Maua le Upu Moni Atoatoa!

“OU TE leʻi vaai lava i lena igoa i laʻu Tusi Paia,” na tali mai ai Francisco. Na seʻi faatoʻā taʻua le suafa o Ieova i se talanoaga ma se tasi o Molimau a Ieova. E moni, e leʻi mafai lava ona ia vaaia le suafa tauatua i lana Tusi Paia, o se lomiga o le 1969 o le Tusi Paia faa-Potukale o le Almeida. E lē o iai le suafa o Ieova i lea Tusi Paia. I le avea o se Katoliko i Pasili, e auai e lē aunoa Francisco i Misasā i Aso Sa ma olioli e faitau le Tusi Paia i lona aiga. Ae o le suafa o Ieova sa avea o se mea e naunau i ai o ia.

O Ai le Atua?

I le vaiaso na sosoo ai, na aumai ai e le Molimau ia te ia se isi lomiga o le Tusi Paia o le Almeida. Na la faatusatusaina lomiga e lua i le Salamo 83:18. Ma o le ā na la maua ai? Ioe, i lena lomiga o le 1966 ua faitauina ai faapea le mau lenei: “Ina ia iloa e i latou, o oe, e ou le suafa o IEOVA, na o oe lava o le Silisili ese i le lalolagi uma”! Ae peitai, i le lomiga o le 1969, na i lo o le suafa o “IEOVA” ua faaaogā ai le upu “ALII”. “Ua e vaai la i ai, ua latou suia se mea i inei,” na fai atu ai le Molimau, ma i lea na ia fesili atu: “O le upu ‘Alii’ e mautinoa e lē o se igoa a ea?” “E leai,” na fai atu ai Francisco. I le pei e foliga mai ua tau ita, na ia faaopoopo atu: “E mafai faapefea ona latou faia se mea faapena?”

O lenei mea na tatala ai le auala mo sina sailiiliga itiiti e uiga i le suafa o le Atua. Mo se faataʻitaʻiga, na aʻoaʻoina e Francisco faapea e tusa ai ma le The Catholic Encyclopedia o le (1910), o Ieova o “le suafa saʻo lea o le Atua i le Feagaiga Tuai.” Sa ia aʻoaʻoina foi faapea i le gagana Eperu, lea na tusia ai le tele o le “Feagaiga Tuai,” o lena igoa o loo aliai mai ai toetoe lava 7,000 taimi. E leai se tagata faaliliu e iai se aiā e suia ai le suafa saʻo o Ieova i se taʻu e lē mautinoa e pei o le Alii. Sa manao Francisco i le upu moni e uiga i le suafa o Ieova, ma na ia maua mai i le Tusi Paia lava ia ma e ala i sailiiliga sa tonu ona taʻitaʻia.

O le ā le Tulaga o Iesu?

E pei ona matauina i le mataupu ua mavae atu, ua faafilogia e lotu faalelalolagi le tele o upu moni. Peitai, i la latou faiva i lea fale ma lea fale, ua maua ai e Molimau a Ieova le avanoa e iloa ai po o ā mea o talitonu i ai tagata. O le mea moni, o lenei mea atonu e eseese mai lea nofoaga i lea nofoaga, ae o nisi o talitonuga e masani lava ona tutusa. Mo se  faataʻitaʻiga, ina ua fesiligia, ‘O ai le Atua?’ ua tali mai nisi tagata e ona fale, ‘⁠O Iesu.’ E ala i lenei tali ua latou faauiga ai e faapea o Iesu o le Atua e Ona le Malosi Uma lava. Ae pe o aumaia ai i lenei talitonuga le upu moni?

Seʻi mafaufau i manatu o loo mulimuli mai. Na tatalo Iesu i lona Tamā: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3) Pe sa e matauina faapea na faasino atu e Iesu e lē ia te ia lava ae i lona Tamā faalelagi o le “Atua moni e toatasi”? O le mea lea, sa moni ai uluai soʻo o Iesu ina ua latou faapea atu ia te ia: “O oe lava o le Alo o le Atua.” Na faapea mai Iesu lava ia te ia: “O aʻu nei o le Atalii o le Atua.” O le mea lea, o le upu moni o Iesu e lē o le Atua e Ona le Malosi Uma lava, ae o ia o le Alo o Ieova le Atua.—Mataio 14:33; Ioane 10:36.

O le ā le Lumanai o le Lalolagi?

Ae faapefea e uiga i le lumanai o lenei tupulaga ma le lalolagi? Na faapea mai John F. Kennedy, o lē sa avea muamua ma peresitene o le Iunaite Setete i se faamatalaga na ia fai atu i le Fonotaga Sili a le Malo Aufaatasi: “Ua ia i tatou le malosi e faia ai ia aupito silisili ona lelei lenei tupulaga o le fanau a tagata i le talafaasolopito o le lalolagi—po o le faia e avea o le tupulaga mulimuli.” E foliga mai o le lagona lava lea ua iai i taʻitaʻi o le lalolagi o aso nei. O mea e masani ona faalogo pea i ai Molimau a Ieova i la latou faiva e faapea i le iʻuga o le lalolagi, o le a faaumatia le paneta Laueleele e le afi po o le taua faaniukelea. I le lagolagoina o lenei talitonuga, ua faasino atu ai nisi i le Faaaliga 21:1, lea o loo faapea mai: “Ona aʻu iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi, ua leai foi se toe sami.”

E masani pea ona faaaogā e le Tusi Paia le upu “lalolagi” i se uiga faafaatusa, e faasino atu ai i le fanau a tagata. O se faaaʻoaʻoga, o loo maua i le Kenese 11:1, lea ua faapea mai: “Sa tasi lava le gagana e tasi foi le tautala a le lalolagi uma.” (Tagai foi 1 Tupu 2:1, 2; Salamo 96:1.) I le Faaaliga 21:1, ua faasino atu ai, “le uluai lalolagi,” e lē i lenei paneta, ae i le sosaiete faaletagata amio leaga lea o le a faaumatia. O lenei mea o le a tatalaina ai le auala mo le toe faafoisia o le Parataiso i le lalolagi. (Luka 23:43; 2 Tesalonia 1:6-9; Faaaliga 21:4) Ma ua ioe lenei mea faatasi ma le Tusi Paia atoa, lea ua faaalia ai faapea o le lalolagi faitino o le a lē taitai ona faaumatia. Mo se faataʻitaʻiga, ua taʻua i le Salamo 104:5 faapea o le Atua “na faavaeina le lalolagi i luga o ona lava faavae, ina ia le gaee e faavavau faavavau lava.” (Faatusatusa Failauga 1:4.) O le mea moni, o Ieova ‘na faavaeina le laueleele ina ia ‘aina’ e faavavau.—Isaia 45:18.

Aiseā ia Maua ai le Upu Moni Atoatoa?

O mea na muai taʻua ua na o ni faaaʻoaʻoga na o talitonuga sese ua matuā taatele i aso nei. Ae peitai, pe afai e manao se tagata e talanoa, e pei ona sa faia e Francisco, ua matuā olioli Molimau a Ieova faapea o loo tatala le auala mo se talanoaga e faamalamalamaina ai upu moni o le Tusi Paia.

O le lē maua o le upu moni atoatoa e mafai ona taʻitaʻiina atu ai i iʻuga faanoanoa. O le faataʻitaʻiga: A o iai Iesu i le lalolagi, e toatele tagata sa tauanauina ina ia talitonu faapea o ia ua na o se tasi o le fanau a Maria ma Iosefa, o ia ua na o se kamuta mai Nasareta. I lea, latou te leʻi uaʻi totoʻa atu ai ia te ia. I se isi itu, sa saʻo i latou. O Iesu o le tama a Maria, na afuafuaina e le agaga paia. O ia o le ataliifai o Iosefa, ma sa galue moni lava o ia o se kamuta. (Mareko 6:3) Ae peitai, pe o le upu moni atoatoa lena e uiga ia te ia? E leai! Sa o ia moni lava o le Mesia ma o le “Tupu o tupu” na faatalitalia! (Faaaliga 17:14; Luka 1:32-35; Galuega 2:36) O le lē maua o le upu moni atoatoa e uiga ia Iesu na taʻitaʻia atu ai le toatele o tagata i le lē iloa o se faaeaga e lē mafai ona toe maua—o le olioli i se aufaatasiga totino ma Iesu i le lalolagi.

Saili mo le Upu Moni Atoatoa

E lauiloa tele le aai o Perea (lea ua taʻua nei o Véroia) i Maketonia anamua i tagata  faitau o le Tusi Paia, ona o uiga taʻuleleia o tagata sa nonofo ai i le uluai senituri. O le ā lena uiga? Ua faapea mai le faamaumauga: “Ua latou talia le upu ma le fiafia tele, ua saili i Tusi i lea aso ma lea aso, pe moni ia mea.” O le ā le iʻuga? “Ua talitonu ai i latou e toatele lava, ma saʻo tamaitai Eleni, atoa ma tane e toatele.”—Galuega 17:11, 12.

Sa faapena foi ona taʻuleleia uiga o perofeta a le Atua anamua. Sa latou faia ‘se sailiiliga maelega ma se suesuega faaeteete’ e faatatau i le faaolataga lea sa auala mai i le Mesia. (1 Peteru 1:10) Sa faamanuia e le Atua a latou taumafaiga. O lea, e manino lava, e leai se auala puupuu. O le saili pea ma le maumauai ma suesue ma le faaeteete i aʻoaʻoga—o le auala lenei e maua ai le upu moni atoatoa mai le Tusi Paia!

Atonu o le a e tau manatu, ‘Pe o fea e tatau ona ou amata ai?’ Ina ua uma ona faitau nisi o lomiga faa-Kerisiano, na tusi mai se tasi fafine e nofo i Pasili: “O i maʻua [o ia ma lana tane] sa lē pine ae ma iloa faapea e sili atu ona ma manaomia lena ituaiga o poto, ina ia maua ai tali i le tele o ā ma fesili . . . Faamolemole, e mafai faapefea ona ou maua se Tusi Paia ma isi tusi na o le a fesoasoani ia te aʻu ina ia iloa atili e uiga i lo tatou Tamā faalelagi?” Sa iai o ia i le auala saʻo: o le faitauina o le Tusi Paia faatasi ma lomiga o le upu moni e faavae i le Tusi Paia. Afai e te manao foi oe i le upu moni atoatoa, ia tatala lou loto ia Ieova le Atua ma ole atu mo lana fesoasoani. Ma faamolemole ia matau nei upu faalaeiau: “Afai ua leai se poto i so outou, ina ole atu ia i le Atua, o lē foai tele mai i tagata uma ma le le toe taʻutaʻua; ona foaiina mai ai lea ia te ia. A ia ole atu ma le faatuatua, aua lava neʻi masalosalo.”—Iakopo 1:5, 6.

E faitau miliona tagata o loo latou talanoaina le Tusi Paia faatasi ma Molimau a Ieova, i lea ua faia ai se sailiiliga filiga ma se suesuega faaeteete mo le upu moni. O le aveina i fale ma le faatatauina o lena poto saʻo lelei i le Atua moni ma Iesu Keriso o lona uiga o le ola lea e faavavau. (Ioane 17:3) E mafai ona avea lena mea o lou faamanuiaga sili pe afai e te saili ma le filiga ma maua le upu moni atoatoa.

[Ata i le itulau 7]

O le upu moni atoatoa e uiga ia Iesu e faapea o ia o le Mesia, ae lē na o se kamuta