Ua Ono ma Tatau ia Ieova le Viiga e Faavavau

“Ou te faamanu atu ia te oe i aso uma lava; ou te vivii atu foi i lou suafa e faavavau faavavau lava.”—SALAMO 145:2.

1. Aiseā na tele ai ni mafuaaga na ia Tavita mo le vivii atu ia Ieova?

E TELE mafuaaga na vivii atu ai le auauna faamaoni a Ieova o Tavita i le Atua. Sa silafia e lenei tupu lauiloa lelei o Isaraelu anamua e uiga i le silisili ese ma le lelei o Ieova, ma sa iloa tino faapea o Lona tulaga tautupu e faavavau. Ua ono ma tatau ai le viiga i Lē Silisili ona Maualuga mo le faamalieina o manaoga o meafaiola uma ma i le faasalafaina atu o le alofa tunoa i ana auauna faamaoni.

2. (a) Ua faapefea ona faatulaga le Salamo 145? (e) O ā fesili o le a tatou iloiloina?

² Sa ofo atu e Tavita sea viiga i le Atua i le Salamo e 145. O fuaiupu taitasi o lenei salamo faasolo e amata i se mataitusi e sosoo mai ai i le faasologa o le pi faa-Eperu, e ui lava o se mataitusi se tasi (nun) sa lē aofia ai. O le faatulagaga faasolo atonu sa faia e avea o se fesoasoani i le mafaufau ia manatua ai. Ua faamaualugaina i le Salamo 145 Ieova, e pei ona iai i upu: “Ou te faamanu atu ia te oe i aso uma lava; ou te vivii atu foi i lou suafa e  faavavau faavavau lava.” (Salamo 145:2) Ae e mafai faapefea ona aafia i tatou i lenei salamo? O le ā e mafai ona ia faia mo lo tatou faiā ma le Atua? Ina ia iloa, seʻi o tatou muai iloiloina le Salamo 145 fuaiupu 1 e oo i le 10.

E Lē Masuesueina le Silisili Ese o Ieova

3. I le pei o Tavita, o le ā ua tatou nofo aitalafu ai i ‘lo tatou Atua le Tupu,’ ma aiseā?

³ Sa avea Tavita o se tupu, ae sa ia iloa lelei le pule silisili ese a Ieova i luga ia te ia i lona faapea mai: “Loʻu Atua e, le Tupu, ou te faaneenee ia te oe; ou te faamanū atu foi i lou suafa e faavavau faavavau lava.” (Salamo 145:1) Faatasi ai ma le migao faapena, ua faamaualugaina ai e Molimau a Ieova le suafa o le Atua ma viia o ia i le lalolagi aoao. Ua faaʻoaina ai o tatou olaga a o faia so tatou sao i sea galuega. I le pei o Tavita, ua tatou nofo aitalafu ai i le usiusitai ma gauai atu ia Ieova e avea o lo ‘tatou Atua o le Tupu.’ Ma aiseā o le a lē faia ai faapea? O ia o le “Tupu o le vavau.” (Faaaliga 15:3, NW) Ae lē gata i lea, o le Tavita Sili, o Iesu Keriso, o lē ua pule nei mai le Mauga o Siona faalelagi talu mai le 1914, ua na saunia mo i tatou se faaaʻoaʻoga sili o le gauai ia Ieova, le Tupu o le Vavau.

4. E mafai faapefea ona tatou ‘faamanū i le suafa o le Atua’?

⁴ Na faapea mai Tavita o le a ia ‘faamanū atu i le suafa o le Atua.’ Ua faapefea ona mafaia lenei mea e sē ua na o se tagata? Ioe, i le tele o isi mea, o le faamanū atu i se tasi o lona uiga o le tautala i ni tala lelei e uiga ia te ia. O le faamanūina o le suafa o le Atua e faaalia ai ua ia i tatou le alofa malosi mo ia ma lona suafa paia, o Ieova. E lē taitai ona tatou faitio e uiga i le Atua, e lē taitai ona tatou suesue masei e uiga ia te ia, e lē taitai ona tatou siligia lona lelei. I le na o le ia i tatou o lena uiga, i le faia o se tuuina atu ia Ieova, ma tausia le faamaoni i le avea o ana molimau papatisoina ua mafai ai ona tatou fai atu faatasi ma Tavita faapea o i tatou ‘o le a faamanū atu i le suafa o le Atua e faavavau.’ Afai tatou te faatumauina i tatou i le alofa o le Atua, o le a tatou maua le meaalofa o le ola e faavavau ma i lea e mafai ai ona tatou faamanū atu ia Ieova e faavavau.—Iuta 20, 21.

5. O le ā se āuga e ao ona oo ia i tatou i le iai o le faanaunauga ia faamanū ia Ieova “i aso uma lava”?

⁵ Afai tatou te alolofa moni i lo tatou Foai Ola, o le a tatou fai atu faatasi ma Tavita: “Ou te faamanu atu ia te oe i aso uma lava; ou te vivii atu foi i lou suafa e faavavau faavavau lava.” (Salamo 145:2) Maeu le valevalenoa atonu o le a iai se aso pe afai sa tatou lē vivii atu i le Atua! Tau ina ia aua lava neʻi o tatou pisi naʻuā pe soona popole i mea faitino ina neʻi lē taulau ai ona tatou tautala lelei e uiga i lo tatou Tamā faalelagi pe tatalo atu i aso fai soo ia te ia. Sa fautuaina e Iesu faapea e ao ona tatou tatalo i aso uma ina ua ia fetalai i le tatalo faaaʻoaʻo: “Ia e foai mai ia te i matou i lea aso ma lea aso a matou mea e ʻai e tatau ma le aso.” (Luka 11:3) O le toatele o i latou o loo i le auaunaga sauatoa e vivii i le Atua i aso fai soo a o latou auai i le faiva faa-Kerisiano. Ae po o le ā lava lo tatou tulaga, e ao i o tatou loto ona uunaia i tatou e vivii atu i le Atua i nisi o auala i aso taitasi. Ma seʻi tau lava ina mafaufau! I le avea o Molimau tuuina atu a Ieova faatasi ma le faamoemoe o le ola e faavavau, ua tatou maua ai le faamoemoe sili e vivii atu ai i lona suafa e faavavau.—Ioane 17:3.

6. Aiseā e ao ai ona “matuā viia” Ieova?

⁶ E mautinoa lava ua ia i tatou se mafuaaga e vivii ai i le Atua i le aso atoa, auā na faaopoopo mai Tavita: “E silisili lava Ieova, e tusa ona matuā viia o ia; e le mafai ona suesueina lona silisili ese.” (Salamo 145:3) E matuā silisili lava Ieova e lē mafaatusaina o ia, ma e matuā aʻiaʻi lana pule silisili ese. Sa tatau ai i le Tupu o Papelonia o Nepukanesa ona ioe faapea: “E leai se tasi na te taofia lona aao [o le Atua], pe fai atu ia te ia, O le a ea le mea e te fai na?” (Tanielu 4:34, 35) O Ieova “e sili ona matautia o ia i atua uma.” (Salamo 96:4) E lē tioa ona “tusa foi ona matuā viia o ia.” Ioe, e leai ni upu e sili ona maualuluga o viiga pe a vivii atu ia Ieova! Ua ono ma tatau le viiga e faavavau e lē gata mai ia te ia.

7. O le ā ua faamaonia ai faapea ‘e lē masuesueina le silisili ese o le Atua’?

⁷ O Ieova ‘e le masuesueina lona silisili ese.’ E tusa lava po o le ā le tele o lona tino mai i le tino, ae o lona silisili ese e faalagolago atu i le ituaiga o Atua e iai o ia. Ioe, o mea na ia faia e matuā ofoofogia mo i tatou e malamalama i ai, ma o i tatou lava na ‘faia e ala ai ona mataʻutia  ma ofo tele ai.’ (Salamo 139:14; Iopu 9:10; 37:5) E lē gata i lea, maeu le silisili ese ua faia ai e Ieova ia lava! Na te tausia ma le faamaoni ana folafolaga ma faaalia ma le alofa ana fuafuaga. Peitai o le a lē taitai mafai ona tatou iloa mea uma e uiga i le Atua. I le faagasologa o le ola e faavavau, o le a mafai ai ona tatou tutupu aʻe i le iloa lelei o ia, lana foafoaga ma ana fuafuaga.—Roma 11:33-36.

Vivii i Galuega a Ieova

8. (a) Ua faapefea i “le tasi tupulaga ma le tasi tupulaga” ona vivii atu i galuega a Ieova? (e) Afai tatou te aʻoaʻo a tatou fanau e uiga i galuega ma gaoioiga a Ieova, o le ā faapefea ona faapena foi ona latou manatu ai i le tapuaiga ia te ia? (i) I le avea o se “tupulaga” olioli, o le ā ua faia e le vaega totoe faauuina?

⁸ E matuā tele mea e mafai ona fai atu ai e uiga i lo tatou Atua sili e lē masuesueina, o lea na uunaia ai Tavita e faapea atu: “E vivii atu le tasi tupulaga ma le tasi tupulaga i au galuega; latou te faailoa atu au mea mamana.” (Salamo 145:4) Sa viiviia e tupulaga o le fanau a tagata na mulimuli mai galuega a Ieova ma toe taʻua ana galuega mamana. Maeu se faaeaga o le faailoa atu o nei mea ia i latou o ē o tatou faia a latou suesuega faale-Tusi Paia i aiga! Mo se faaaʻoaʻoga, e mafai ona tatou taʻu atu ia i latou o le Atua na foafoaina mea uma lava. (Kenese 1:1–2:25; Faaaliga 4:11) E mafai ona tatou tautala atu e uiga i ana galuega mamana i le taimi na ia laveaiina ai le fanauga a Isaraelu mai noataga i Aikupito, na ia fesoasoani ai ia i latou e faatoilaloina fili Kanana, faasaoina i latou mai le faaumatia atoa e Peresia anamua, ma isi lava mea e tele. (Esoto 13:8-10; Faamasino 4:15; Eseta 9:15-17) Ma pe lē uunaia ai ea i tatou e taʻu atu i a tatou fanau e uiga i galuega ma gaoioiga mamana a Ieova? Afai tatou te avatua i a tatou fanau na faatonuga ma latou vaai mai ia i tatou o auauna ma le olioli i le Atua, o le a faapena foi ona latou manatu i le tapuaiga ia te ia o se mea e matuā fiafia i ai ma o le a tutupu aʻe i le ‘olioli ia Ieova e avea o lo latou olo malosi.’ (Neemia 8:10; Salamo 78:1-4) O le vaega totoe faauuina ua faia aʻe ai le tasi o “tupulaga” olioli o Molimau a Ieova o ē o loo latou faaviivii atu galuega a le Atua i le “motu o tagata e toatele,” le vaega o le tupulaga lea o le a ʻaināina le laueleele Parataiso.—Faaaliga 7:9.

9. A o tatou manatunatu i galuega ma gaoioiga mamana a le Atua, o le ā ua mafai ona tatou mautinoa e uiga i ai?

⁹ A o tatou manatunatu i galuega a le Atua ma gaoioiga mamana, ua oo lava ina sili atu  ona tatou mautinoa faapea “e le lafoai e Ieova i lona nuu ona o lona suafa mamalu.” (1 Samuelu 12:22; Salamo 94:14) Pe a tatou fesagaʻi ma tofotofoga, mea faigata, ma sauaga, e mafai ona tatou maua le toʻafilemu ma le mautinoa faapea “o le filemu mai le Atua” o le a leoleoina o tatou loto ma o tatou mafaufau. (Filipi 4:6, 7, NW) O lea, maeu le talafeagai o lo tatou taʻu atu i isi e uiga i lo tatou Tamā faalelagi alofa o lē na te puipuia i tatou!

10. O le ā ua aofia ai i “mea mamana” a Ieova, ma ua faapefea ona tatou maua aogā mai le mafaufau loloto i na mea?

¹⁰ E ao ona tatou faaalu le taimi e mafaufau loloto ai i le malualii o Ieova ma ana galuega, auā na faaopoopo mai Tavita: “Ou te tautala atu i le matagofie o le viiga o lou mamalu, atoa ma au mea mamana.” (Salamo 145:5) O le mamalu o le Atua e mataʻutia ma ofo ai ma e lē mafaatutusaina. (Iopu 37:22; Salamo 148:13) I lea, na faia ai e Tavita le mamalu silisili ese matagofie o Ieova o se mea e manatu mamafa i ai. Sa manatu foi le faisalamo lava ia i mataupu e uiga i “mea mamana” a le Atua. O nei mea e aofia ai le faatinoina o le faamasinoga tonu tauatua i le faaumatiaina o ē agasala ma faasaoina ē amioatua, e pei ona sa iai i le Lolo. (Kenese 7:20-24; 2 Peteru 2:9) O le manatunatu loloto i na mataupu e faamalosia ai la tatou faiā ma Ieova ma e mafai ai ona tatou taʻu atu i isi e uiga i lona mamalu ma galuega ofoofogia. I le 40 aso i le vao, na faamalosia ai Iesu faasaga i faaosoosoga e ala i le mafaufau loloto i mea na faaalia mai ia te ia ina ua matala mai le lagi. (Mataio 3:13–4:11) O le mea lea na ia fetalai atu ai i isi e uiga i le mamalu ma galuega ofoofogia a Ieova.

11. (a) Aiseā na oo ai le mataʻu tele i ē na nonofo i Ieriko? (e) Faatasi ai ma le ā le agaga ua tautala atu ai Molimau a Ieova e uiga i “mea e matautia ai” a le Atua ma lona “silisili ese”?

¹¹ Pe a tatou tautala e uiga i le mamalu ma galuega a le Atua, ua tatou uunaia ai isi e tautala atu e uiga i ia mea. Na faapea mai Tavita: “E tautalatala i latou i le malosi o au mea e matautia ai oe; ou te taʻutaʻu atu foi i lou silisili ese.” (Salamo 145:6) Sa tautala Raava e uiga i le mataʻu na oo i tagata Ieriko ina ua latou faalogo i le auala na laveaiina ai e Ieova Isaraelu i le Sami Ulaula, ma faia ai i latou ia manumalo i tupu e toalua o sa Amorī. Atonu sa tele ni talanoaga sa faia e uiga i na “mea e matautia ai” i Ieriko. (Iosua 2:9-11) Ma e mautinoa o le “puapuaga tele” ua lata tele mai o le a avea o se mea e mataʻutia ma ofo ai. (Mataio 24:21) Ae o mea e matuā fefefe ai tagata o ē ua faaesea i latou mai le Atua ua faagaee ai i totonu o loto amiotonu “le mataʻu ia Ieova,” o se mataʻu mamā ia te ia. (Faataoto 1:7) Faatasi ai ma sea agaga migao, ua talanoa ai Molimau a Ieova e uiga i le faaalia o le mana o le Atua. Ioe, o le Faigaluega Ofoofogia sili o le mataupu autū lena o le talanoaga i le va o i latou faauuina ma a latou aumea faalelalolagi! Ma e oo lava i sauaga e lē mafai ona taofia ai i latou mai le taʻuina atu i isi e uiga i nei mea ma le “silisili ese” o Ieova.—Galuega 4:18-31; 5:29.

Vivii atu ia Ieova ona o Lona Lelei

12. Ua faapefea i le lelei o Ieova ona faia ai i tatou e “taʻu atu”?

¹² Ua ono ma tatau ona vivii atu i le Atua e lē gata i lona silisili ese ae faapea foi ma lona lelei ma le amiotonu. O lea na fai mai ai Tavita: “Latou te taʻu atu lava le faamanatuga i lou agalelei tele lava; latou te alalaga fiafia foi i lau amiotonu.” (Salamo 145:7) E matuā tele le lelei o Ieova o lea ua tatou “taʻu atu” ai faatasi ma faamatalaga e olioli ai faatatau i ai. I le faa-Eperu, ua manatu i ai faapea e pei o le puna mai o vai mai se vaipuna. O lea seʻi puna atu ia i tatou le viiga o le loto faafetai i le Atua, e pei lava o le tafe atu o se ālia. (Faataoto 18:4) I lo latou matuā afaina ai faaleagaga, na galo ai i tagata Isaraelu le lelei o Ieova. (Salamo 106:13-43) Ae seʻi matuā taumasuasua o tatou loto i sea loto faafetai faapea o isi ua salamō ina ua uma ona latou aʻoaʻoina le maeu o le lelei o Ieova i ana Molimau tuuina atu.—Roma 2:4.

13. O ā āuga e ao ona oo ia i tatou, i le faaalia mai o le faamasinoga tonu tauatua ma le amiotonu?

¹³ I le faaalia o le faamasinoga tonu tauatua ma le amiotonu, seʻi uunaia ai foi i tatou e alalaga atu ma le olioli. Afai o le auala lenei ua tatou lagona ai, o le a tatou muai saili la e lē gata i le Malo o le Atua ae faapea foi ma lana amiotonu. O le a tatou mananao pea lava ina ia  avea a tatou amio ma mea e avatua ai le viiga o Ieova. Ioe, o le a avea i tatou o ni ē folafola e lē aunoa le Malo faatasi ai ma le tele o mea e faia i le auaunaga a le Atua. O la tatou viiga ia Ieova o le a lē taitai ona tanu i lalo pe gūgū ai.—Mataio 6:33; 1 Korinito 15:58; Eperu 10:23.

E Alofa Mutimutivale Ieova

14. O le ā le faamaoniga o iai faapea “e alofa fua mai ma alofa mutimuti vale mai Ieova”?

¹⁴ I le taʻua o uiga faaopoopo e tatau ona viia o le Atua, na faapea mai Tavita: “E alofa fua mai ma alofa mutimuti vale mai Ieova; e tele gese lona toasa, e tele foi lona alofa.” (Salamo 145:8) E alofa fua mai le Atua i lea e atoatoa ona lelei ma agaalofa o ia. (Mataio 19:17; Iakopo 1:5) Na te faia mea lelei e oo lava ia i latou e lē o auauna ia te ia. (Galuega 14:14-17) E alofa mutimutivale foi Ieova, e tigaalofa, “ua manatu ia o le efuefu lava i tatou.” Na te lē tuulafoaia sē ua loto momomo pe feutagai ma i tatou e tusa ma a tatou agasala ae e sili mamao atu ona alofa mutimutivale na i lo o se tamā faaletagata e aupito sili ona alofa. (Salamo 51:17; 103:10-14) Ioe, i le faaalia aupito silisili o le alofa mutimutivale, na ia auina mai ai lona Alo pele ina ia maliu mo i tatou ina ia mafai ai ona tatou lelei ma le Atua ma tofo moni i lona alofa fua!—Roma 5:6-11.

15. Aiseā ua mafai ai ona fai atu faapea o Ieova le Atua e “tele gese lona toasa” ma “e tele foi lona alofa”?

¹⁵ O lo tatou Tamā faalelagi e telegese lona toasa. Na te lē tuuina mai se toasa e lē taofiofia. O Ieova “e tele foi lona alofa.” I inei, o le agalelei ua faaalia i le faa-Eperu faapea e tupuga mai i le alofa ma e faapipii atu o ia lava i se autū. Na te faia faapea seia oo lava ina iloatino lana fuafuaga faatatau i lena autū. O se isi foi faaliliuga o le “alofa faamaoni.” Faatasi ai ma isi mea, o le alofa agalelei o le Atua, po o le alofa faamaoni, ua faaalia i gaoioiga o le laveaiina, faasaoina, puipuiga, mapusaga mai faalavelave, ma le toe fuataiina mai i le agasala e ala i le togiola. (Salamo 6:4; 25:7; 31:16, 21; 40:11; 61:7; 119:88, 159; 143:12; Ioane 3:16) O le mea moni faapea sa leʻi aumaia loa e Ieova Amaketo ina ua uma le ‘taua i le lagi’ ua mafai ai e le vao o tagata ona maua le faaolataga, o se faaaliga sili lea o le alofa agalelei tauatua.—Faaaliga 12:7-12; 2 Peteru 3:15.

16. Ua faapefea ona faamaonia Ieova e “agalelei . . . i mea uma”?

¹⁶ I le manatu e uiga i le alofa mutimutivale o le Atua, atonu o le a faapea mai o loo ia te ia se fatu telē. Na folafola mai e Tavita: “O loo agalelei mai Ieova i mea uma, o lona alofa mutimuti vale foi ua i ana mea uma na fai.” (Salamo 145:9) Ioe, sa lelei le Atua i tagata Isaraelu. Ona o lena tulaga, “na te faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu.” (Mataio 5:43-45) I Etena, sa folafola ai e Ieova se “fanau” o le a avea o se faamanuiaga. Mulimuli ane na ia taʻu atu ia Aperaamo: “O lau fanau foi e manuia ai atu nuu uma lava o le lalolagi.” (Kenese 3:15; 22:18) Ma o le lelei o le Atua e matuā sili lava i nei “ona po o le iuga” o le a mafai ai e so o se tasi ona ‘sau ma ave fua le vai o le ola.’ (Tanielu 12:4; Faaaliga 22:17) E finagalo Ieova e faia le lelei i meafaiola atamamai uma lava, ma o lona lelei e ao ona tataʻi atu ai i tatou ia sili ona latalata atu ia te ia.

17. I le ā le uiga ua ‘alofa mutimutivale ai Ieova i ana galuega uma’?

¹⁷ ‘O le agalelei o Ieova o loo i ana galuega uma’ i lea ua ia faia ai se sauniuniga e lava mo tagata ma manu. O ia o “lē foaiina mea e ʻai i mea ola uma lava.” (Salamo 136:25; 147:9) E lē o faamamaluina e le Atua ē mauoa ma faaamuamu i lē ua solipalaina, pe faamaualugaina ē ua loto faamaualuga ma ʻinoʻino i ē ua loto maualalo, e siitia i luga ē ua valea ma faamaulaloina ē popoto. O loo faia faapena e tagata agasala ae lē o lo tatou Tamā faalelagi alofa mutimutivale. (Salamo 102:17; Sefanaia 3:11, 12; Failauga 10:5-7) Ma maeu le tele o le alofa mutimutivale o le Atua, lona lelei, alofa agalelei i lona faia ia mafai le faaolataga e ala i le taulaga togiola a lona Alo pele!—1 Ioane 4:9, 10.

Faamanū ia Ieova Tagata Faamaoni

18. (a) Ua faapefea i galuega a le Atua ona “vivii” ia te ia? (e) O afea e ao ona uunaia ai i tatou e vivii ia Ieova?

¹⁸ Ua ono ma tatau le viiga i le Atua mai i so  o se itu. E pei ona taʻua ai e Tavita: “Ieova e, e vivii atu ia te oe mea uma na e faia; e faafetai atu foi ia te oe ou tagata [faamaoni].” (Salamo 145:10) O galuega o le foafoaga a le Atua o loo “vivii atu” ia te ia, e pei ona avea se fale ua lelei ona fauina o se viiga i lē na fauina, ma i sē tomai na ia faia se mea tuuteu matagofie. (Faatusatusa Eperu 3:4; Isaia 29:16; 64:8.) E matuā ofoofogia galuega o le foafoaga a Ieova o lea ua uunaia ai agelu ma tagata e vivii atu ia te ia. Sa alalaga fiafia ma olioli atalii faaagelu o le Atua ina ua ia faavaeina le lalolagi. (Iopu 38:4-7) Na faapea mai Tavita ‘ua tala mai e le lagi le mamalu o le Atua ma ua faaalia foi e le vanimonimo galuega a ona aao.’ (Salamo 19:1-6) E mafai foi ona tatou vivii atu ia Ieova pe a tatou vaai atu i se aeto o feleleai i le lagi po o se ʻaila o osooso i luga o mauga. (Iopu 39:26; Pese a Solomona 2:17) E fetaui foi lo tatou vivii atu pe a seleseleina ni fua o a tatou faatoaga pe olioli i se taumafataga faatasi ma uo. (Salamo 72:16; Faataoto 15:17) O le fuafuaina ofoofogia o o tatou lava tino, e mafai foi ona uunaia ai le faia o ni faamatalaga e faailoa atu ai le viiga o le loto faafetai i le Atua.—Salamo 139:14-16.

19. O ai “tagata faamaoni” ma o le ā o latou faia?

¹⁹ I aso nei, ua faamanū atu ai “tagata faamaoni” faauuina e le agaga o Ieova ia te ia o loo i le lalolagi. Ua latou tautala atu i mea lelei e uiga ia te ia ma moomoo ina ia vaai atu ua faia lona finagalo i le lalolagi e pei ona faia i le lagi. (Mataio 6:9, 10) A o taʻu atu e ē faauuina i isi e uiga i galuega ofoofogia a le Atua, ua tali mai le motu o tagata e toatele i se faatelega sa leʻi faapea ona iai. Faatasi ai ma le vaega faauuina faamaoni, ua latou auauna ai ma le maelega o ni ē folafola o le Malo. Pe ua uunaia oe e le loto faafetai ina ia faia sou sao e lē aunoa i lenei galuega i le viiga o le Atua?

20. (a) O le a faapefea ona faapaiaina le suafa o Ieova? (e) E faatatau i le Salamo 145, o ā fesili o loo totoe mo le talanoaina?

²⁰ I le avea o Molimau a Ieova, ua faapena foi ona tatou avatu ai le viiga i le Atua e pei o Tavita. Ia i tatou o le faapaiaina o le suafa paia o Ieova ma le vivii atu i ai o ni mataupu e matuā tāua ona mafaufau i ai. Talu ai o le suafa tauatua o le a faapaiaina e le Malo o le Atua, ua avea ai lenei aʻoaʻoga faale-Tusi Paia o le Malo o se faatomuaga lauiloa o le tala lelei ua tatou folafola atu. Pe o saunia i le Salamo 145 faamalamalamaga faaleagaga e faatatau i lenei mea? O le ā o le a faaalia i lo tatou talanoaina o le vaega o totoe o lenei salamo? I ā isi auala ua faamaonia ai faapea ua ono ma tatau le viiga e faavavau ia Ieova?

O ā Au Tali?

□ E mafai faapefea ona tatou faamanū atu i le suafa o Ieova?

□ O ā nisi o galuega viiviia a le Atua?

□ O le ā lo tatou uiga faaalia pe afai o tatou talisapaia le lelei o Ieova?

□ O ā auala ua faaalia ai le alofa mutimutivale o le Atua?

[Fesili mo le Suʻesuʻega]

[Ata i le itulau 12]

Pe e te taʻu atu i lau fanau e uiga i gaoioiga mamana a Ieova, e pei ona sa faia e mātua faaleatua i Isaraelu anamua?

[Ata i le itulau 15]

E pei ona avea se fale ua lelei ona fauina o se viiga i lē na fauina, e faapena foi i galuega a Ieova o le foafoaga ona avatu ai le viiga ia te Ia