Amiotonu e Lē Ala mai i Uputuu Tuugutu
Amiotonu e Lē Ala mai i Uputuu Tuugutu
“A le sili la outou amiotonu i la le au tusiupu ma le au faresaio, e le sao atu lava outou i le malo o le lagi.”—MATAIO 5:20.
1, 2. O ā mea na tutupu a o leʻi avatua e Iesu lana Lauga i luga o le Mauga?
SA FAAALU e Iesu se po i luga o se mauga. O le lagi vavaloloa o fetu o loo folasia atu i ona luga. O manu iti e feala i le po o loo gasēsē i le togavao. I le itu i sasae o loo fafati lemū atu ai vai o le Sami o Kalilaia i le matafaga. Ae atonu sa itiiti le silafia e Iesu o le toʻafilemu, le mālū matagofie o lona siosiomaga. Sa ia faaalu le po e tatalo ai i lona Tamā faalelagi, o Ieova. Sa ia manaomia le taʻitaʻiga a lona Tamā. O le aso o loo i luma o se aso faigata.
2 I le itu i sasae sa malamalama mai le lagi. Na amata ona gaoioi manulele, ma pesepese mālie mai. Ua amata ona felueaʻi fugālaau o le vao i le mālū o le sau. A o matala aʻe uluai ave o le la i le tafatafāilagi, ona valaau atu lea o Iesu i ona soʻo ina ia ō mai ia te ia, ma mai ia i latou na ia filifilia ai le 12 e avea ma ona aposetolo. Ona latou ō ifo faatasi uma lea ma ia i lalo i le auvae mauga. Ua iloa atu le motu o tagata ua lolofi mai mai Kalilaia, Turo ma Saitonu, Iutaia ma Ierusalema. Na ō mai ina ia faamalōlōina o latou maʻi. Na alu ese atu le mana mai ia Ieova sa ia Iesu a o papaʻi atu le toatele ia te ia ma na faamalōlōina. Na latou ō mai foi ina ia faalogologo i ana fetalaiga na sa avea o se vai mālū i o latou loto mafatia.—Mataio 4:25; Luka 6:12-19.
3. Aiseā na aloalo atu ai le au soʻo ma le motu o tagata ina ua amata e Iesu ona fetalai atu?
3 I a latou faasologa masani o aʻoaʻoga, sa fai ma masani po o tu a rapi ona nonofo i lalo, ma i lenei taeao faapitoa o le tau e totogo ai mea o le 31 T.A., sa faia ai faapea e Iesu, atonu i se laugatasi maualuga i le autafa o le mauga. Ina ua vaai atu ona soʻo ma le motu o tagata i lenei mea, ona latou iloa ai lea faapea o loo iai se mea faapitoa o loo tupu ai, o lea na latou faapotopoto atu ai ma le naunau ia te ia. Ina ua amata ona ia tautala atu sa latou matuā aloalo atu i ana upu; ma ina ua ia faaiʻu i se taimi mulimuli ane, sa tuua i latou ua matuā maofa lava i mea na latou faalogo ai. Seʻi o tatou vaai pe aiseā.—Mataio 7:28.
Ituaiga e Lua o Amiotonu
4. (a) O ā ituaiga e lua o amiotonu sa talanoaina? (e) O le ā le fuafuaga o uputuu tuugutu, ma pe sa faataunuuina lea fuafuaga?
4 I lana Lauga i luga o le Mauga, o loo lipotia uma mai i le Mataio 5:1–7:29 ma i le Luka 6:17-49, na matuā faaeseese ai e Iesu vasega e lua: o tusiupu ma Faresaio ma tagata lautele o loo latou pule sauā i ai. Sa ia fetalai e uiga i ituaiga e lua o amiotonu, le faafiaamiotonu a le au Faresaio ma le amiotonu moni a le Atua. (Mataio 5:6, 20) O le faafiaamiotonu faa-Faresaio sa pogai mai i uputuu tuugutu. O nei mea sa amataina i lona lua o senituri T.L.M. e avea o se “pa puipui o le Tulafono” ina ia puipuia ai mai i auala ʻalo faa-Eleni (o aganuu a tagata Eleni). Sa oo ina manatu i nei mea e avea o se vaega o le Tulafono. O le mea moni, sa oo lava ina faatulaga e tusiupu uputuu tuugutu e maualuga i luga aʻe o le Tulafono tusia. Ua faapea mai le Mishnah: “O le matuā faamalosia e faatatau lea i le tausia o upu a Tusiupu [a latou uputuu tuugutu] na i lo o le usitai i upu o le Tulafono tusia.” I lea, na i lo o le avea o se “pa puipui o le Tulafono” e puipuia ai, o a latou uputuu ua faavaivaia ai le Tulafono ma ua lē amanaia ai, e pei lava ona sa fetalai i ai Iesu: “Ua lelei lo outou faaleaogaina le poloaiga a le Atua, ina ia outou taofi a outou uputuu.”—Mareko 7:5-9; Mataio 15:1-9.
5. (a) O le ā le tulaga o tagata lautele o ē na ō mai e faalogologo ia Iesu, ma na faapefea ona manatu ia i latou le au tusiupu ma Faresaio? (e) O le ā na faia ai uputuu tuugutu o se avega mamafa i ua o tagata galulue?
5 O tagata lautele o ē na lolofi atu e faalogologo ia Iesu sa matitiva faaleagaga, ona “ua lailoa i latou ma tuulafoaiina, e pei o mamoe e leai so latou leoleo.” (Mataio 9:36) Faatasi ai ma le valea ma le faamaualuga na aamu ai tusiupu ma Faresaio ia i latou, na taʻua i latou o ʽam ha·ʼaʹrets (tagata o le eleele), ma inosia i latou e avea o ni tagata valea, tagata agasala faamalaiaina ua lē aogā mo se toetu ona latou te leʻi tausia uputuu masani. I taimi o Iesu o na uputuu sa oo ina matuā faateleina ma sa avea o ni tulafono faigata lavelave e leai se tāua—ua faatumuina i faiga faalotu e maumau ai le taimi—na e lē taitai ona mafai e se tagata galue lautele ona tausia. E lē tioa ona taʻusalaina e Iesu uputuu faapea ‘o avega mamafa ua faaee i ua o tagata.’—Mataio 23:4; Ioane 7:45-49.
6. O le ā na matuā faateʻia ai e uiga i fetalaiga amata a Iesu, ma o le ā le suiga na latou faaalia mai mo ona soʻo ma mo le au tusiupu ma Faresaio?
6 O lea ina ua nofo Iesu i lalo i le autafa o le mauga, ona faalatalata atu ai lea o ona soʻo ma i latou na matelaina faaleagaga e faalogologo ia te ia. Atonu sa faateʻia i latou i ana uluai upu nei. ‘Amuia ē matitiva, amuia ē fia aai, amuia ē faanoanoa, amuia ē itagia.’ Ae o ai i latou e mafai ona fiafia pe a matitiva, fia aai, faanoanoa ma itagia? Ma na folafola atu auē mo i latou o ē mauoa, maoona, featani, ma taʻuleleia e tagata! (Luka 6:20-26) I ni upu itiiti, sa taʻua ai e Iesu le tuufaafeagai o tu masani uma ma tulaga faaletagata e talia. Sa o se tuufaafeagai mataʻina o tulaga, i le ōgatasi ai ma upu mulimuli ane a Iesu: “O sē faamaualuga ia te ia, e faamaulaloina lea; a o lē faamaulalo ia te ia, e faamaualugaina lea.”—Luka 18:9-14.
7. O le ā le iʻuga atonu sa iai i upu amata a Iesu i le motu o tagata matelaina faaleagaga o ē na faalogologo ia Iesu?
7 I le faaeseese atu i tusiupu ma Faresaio mananao e faamalieina i latou lava, o i latou na ō mai ia Iesu i lena lava taeao sa latou iloa e uiga i lo latou tulaga faanoanoa faaleagaga. O ana uluai upu atonu na faatumuina ai i latou i se faamoemoe: “Amuia ē ua iloa o latou manaoga faaleagaga, auā e ō latou le malo o le lagi (NW).” Ma maeu le faagaeeina ai o o latou agaga atonu sa iai ina ua ia faaopoopo atu: “Amuia ē fia aai ma fia inu i le amiotonu; auā e maoona i latou”! (Mataio 5:3, 6; Ioane 6:35; Faaaliga 7:16, 17) Sa faatumuina i le amiotonu, ioe, ae lē o le ituaiga faa-Faresaio.
E Lē Lava le “Amiotonu i Luma o Tagata”
8. Aiseā o le a maofa ai nisi ona e mafai ona tele o la latou amiotonu na i lo le au tusiupu ma le au Faresaio, peitai aiseā e faia ai faapea?
8 “A le sili la outou amiotonu i la le au tusiupu ma le au faresaio,” na fetalai ai Iesu, “e le sao atu lava outou i le malo o le lagi.” (Mataio 5:17-20; tagai Mareko 2:23-28; 3:1-6; 7:1-13.) Atonu sa manatu nisi faapea: ‘Ia sili atu le amiotonu i lo le au Faresaio? Latou te anapogi ma tatalo ma totogi sefuluaʻi ma avatu meaalofa i ē matitiva ma faaalu o latou olaga e suesue ai le Tulafono. E mafai faapefea la e la tatou amiotonu ona ausilia la latou amiotonu?’ Ae e tatau ona matuā tele atu. Atonu sa matuā sili le tulaga o le au Faresaio i manatu o tagata, ae e leʻi faapena i le Atua. I se tasi o mea na fetalai ai Iesu i nei Faresaio: “O outou ua faafiaamiotonu outou i luma o tagata; a ua silafia e le Atua o outou loto; auā o le mea e sili ona lelei i tagata, e inosia lea i luma o le Atua.”—Luka 16:15.
9-11. (a) O le ā le tasi o auala na manatu le au tusiupu ma Faresaio faapea o le a latou maua ai se tulaga amiotonu i luma o le Atua? (e) E ala i le ā le auala lona lua na latou faatalitalia e maua ai le amiotonu? (i) O le ā le auala lona tolu na latou manatu i ai, ma o le ā na fai mai le aposetolo o Paulo faapea o le a pagatia ma lē taulau ai lenei mea?
9 Sa faia e rapi a latou lava tulafono mo le mauaina o le amiotonu. O se tasi sa aogā e ala i le avea o se fanau mai ia Aperaamo: “O soʻo o Aperaamo lo matou tamā o loo olioli i lenei lalolagi ma o le a ulu atu i le lalolagi o loo sau.” (Mishnah) Atonu ina ia mafai ona faafetaiaʻia lenei uputuu o lea na lapataia ai e Ioane le Papatiso le au Faresaio o ē na ō mai ia te ia: “Ia outou fua mai ni fua e tatau ma le salamo; aua foi neʻi outou manatu e faapea ifo i o outou loto, O Aperaamo, o ia o lo matou tamā [e pei ua lava lena].”—Mataio 3:7-9; tagai foi Ioane 8:33, 39.
10 O le auala lona lua e maua ai le amiotonu, na latou fai mai ai, sa auala lea i le avatua o meaalofa i ē matitiva. Sa faaatagia e tusi faa-Apokalifa e lua na tusia e se tagata Iutaia aʻiaʻi i le lona lua senituri T.L.M. lenei vaaiga faauputuu: O se tasi o faamatalaga o loo aliaʻi mai i le Tobit: “O le foaiina o meaalofa mo ē matitiva e faaolaina ai se tasi mai le oti ma faamagaloina ai agasala uma.” (12:9, The New American Bible) O le Tusi a Sirach (Ecclesiasticus) e ioe i lenei mea: “E mafai e vai ona tapeina le mumū o se afi, ma o meaalofa i ē matitiva e togiolaina ai agasala.”—3:29, NAB.
11 O le auala lona tolu na latou sailia ai le amiotonu sa auala i galuega o le Tulafono. Sa aʻoaʻoina e a latou uputuu tuugutu faapea afai sa sili atu ona lelei le galuega a se tagata, o le a faaolaina o ia. O le faamasinoga “e faia e tusa ai o galuega a se tagata pe sili ona lelei pe sili ona leaga.” (Mishnah) Ina ia maua se tulaga faamaonia i le faamasinoga, sa latou manatu faapea “o le maua o uiga sili ona lelei o le a soloia ai agasala.” Afai e sili atu se tasi galuega lelei a se tagata i ana galuega leaga, o le a faaolaina o ia—e pei o le faamasinoga a le Atua e faia i le faitauina pea o a latou galuega e leai se tāua! (Mataio 23:23, 24) I le tuuina mai o se manatu saʻo, na tusi ai Paulo: “E le taʻuamiotonuina se tagata e toatasi i ona luma [o le Atua] i galuega o le tulafono.” (Roma 3:20) E mautinoa lava, o le amiotonu faa-Kerisiano e tatau ona matuā tele na i lo o le amiotonu a le au tusiupu ma le au Faresaio!
“Ua Outou Faalogo, na Fai Mai”
12. (a) O le ā le suiga mai lana auala masani o le faailoa atu o faasinoga mai Tusitusiga Eperu na faia e Iesu i lana Lauga i luga o le Mauga, ma aiseā? (e) O le ā ua tatou aʻoaʻoina mai le faaaogāina lona ono o le faaupuga “Na fai mai”?
12 Ina ua sii atu e Iesu i lana fetalaiga na teʻa Tusitusiga Eperu, na ia fetalai atu: “Ua tusia.” (Mataio 4:4, 7, 10) Ae e faaono taimi i le Lauga i luga o le Mauga, sa ia faailoa atu ai ni mea sa foliga mai o ni faamatalaga mai Tusitusiga Eperu faatasi ai ma upu nei: “Na fai mai.” (Mataio 5:21, 27, 31, 33, 38, 43) Aiseā? Auā sa ia faasino atu i le Tusi Paia e pei ona faamatalaina i le malamalama o uputuu faa-Faresaio na sa feteenai ma poloaiga a le Atua. (Teuteronome 4:2; Mataio 15:3) Ua faamanino mai lenei mea i le faasinoga lona ono a Iesu ma o le faasinoga mulimuli foi lea i lenei faasologa: “Ua outou faalogo, na fai mai, Ia e alofa atu i lē lua te tuaoi, a ia ʻinoʻino i le ua ita mai ia te oe.” Ae e leai se tulafono faa-Mose o fai mai faapea, “Ia ʻinoʻino i le ua ita mai ia te oe.” O upu na a le au Faresaio ma le au tusiupu. O la latou faaliliuga lena o le Tulafono ia alofa i le lua te tuaoi—lou tuaoi faa-Iutaia, ae lē o isi.
13. Ua faapefea ona lapatai Iesu faasaga e oo lava i le amataina o le faia o se amioga e ono taʻitaʻiina atu ai i le fasioti tagata?
13 Seʻi iloilo nei le uluai poloaiga o lenei faasologa o poloaiga e ono. Na folafola atu e Iesu: “Ua outou faalogo, na fai mai i e anamua, Aua e te fasioti tagata; ai se fasioti tagata, e nofo sala o ia i le faamasinoga. A o aʻu, ou te fai atu ia te outou, ai se ita fua i lona uso, e nofo sala o ia i le faamasinoga.” (Mataio 5:21, 22) O le ita i totonu o le loto e mafai ona taʻitaʻiina atu ai i le faia o upu malolosi ma mai i inā ua faia ai ni faamasinoga e taʻusalaina ai, ma i le iʻuga e mafai ona taʻitaʻiina atu i le faia o le fasioti tagata. O le ita faaumiumi e fatufatuaʻi i totonu o le loto e mafai ona iʻu ai i le oti: “O i latou uma o e ita i o latou uso, o fasioti tagata i latou.”—1 Ioane 3:15.
14. Ua faapefea ona fautua mai Iesu ia i tatou ina ia aua neʻi o tatou amata ona uia le auala i le mulilua?
14 Na toe fetalai Iesu: “Ua outou faalogo, na fai mai i e anamua, Aua e te mulilua. A ou te fai atu aʻu ia te outou, ai se vaai atu i le fafine ina ia manao i ai, ua uma ona mulilua ma ia i lona loto.” (Mataio 5:27, 28) O le a e lē faia le mulilua? Ia aua la neʻi amata ona e uia lena auala e ala i le fiafia e mafaufau pea i ai. Ia leoleo lou loto, o i inā e puna mai ai mea na. (Faataoto 4:23; Mataio 15:18, 19) Ua lapatai mai le Iakopo 1:14, 15: “Ua taitasi ma faaosoosoina, pe a tosina ma maileia i lona lava tuʻinanau; pe a to le tuʻinanau ona fanau mai ai lea o le agasala; a matua le agasala ona fanaua mai ai lea o le oti.” E fai mai tagata i nisi taimi: ‘Aua le amata faia se mea e lē mafai ona e faaiʻua.’ Ae i lenei itu e ao ona tatou faapea atu: ‘Aua le amata faia se mea e lē mafai ona e taofia.’ O nisi o ē sa faamaoni e oo lava i le faamataʻuina i le oti i luma o fitafita o loo laina ma fana, na paʻūū mulimuli ane ona o faatosinaga faaʻoleʻole o amioga lē mamā faaleituaiga.
15. Na faapefea ona matuā ese le finagalo o Iesu i le talagā faaipoipoga mai lena o loo taʻua i uputuu tuugutu a tagata Iutaia?
15 Ua tatou oo mai nei i le faamatalaga lona tolu a Iesu. Na fetalai o ia: “Sa fai mai foi, Ai se faatea i lana avā, ia avatu ia te ia le tusi alei. A ou te fai atu aʻu ia te outou, ai se faatea lana avā, a e lei mulilua ia, ua ia faamulilua ia te ia; ai se fai mana avā le ua faateaina [o lona uiga, o se tasi ua tatalaina sana faaipoipoga i luga o faavae e ese mai i amioga lē mamā faaleituaiga], ua mulilua foi o ia.” (Mataio 5:31, 32) O nisi tagata Iutaia sa feutagai ma le faaʻoleʻole ma a latou avā ma faateaina i latou ona o ni faavae e sili ona vaivai. (Malaki 2:13-16; Mataio 19:3-9) O uputuu tuugutu na faatagaina ai se tagata e faatea lana avā “e oo lava i le na o le kukaina o se meaʻai e lē fiafia o ia i ai” pe “afai na te maua se tasi fafine e sili atu ona fiafia i ai na i lo o lana avā.”—Mishnah.
16. O le ā le faiga faa-Iutaia na avea ai le faia o tautoga ma mea e lē aogā, ma o le ā le tulaga na tauaveina e Iesu?
16 I le auala lava faapena, na faaauau ai Iesu: “Ua faalogo foi outou, na fai mai i e anamua, Aua e te tauto pepelo; . . . A ou te fai atu aʻu ia te outou, aua lava neʻi tauto.” I le taimi lea sa faaaogāsese ai e tagata Iutaia tautoga ma sa faia ai ni tautoga se tele e uiga i ni mea e leai se tāua e aunoa ma le faia. Ae na fetalai Iesu: “Aua lava neʻi tauto . . . A ia faapea la outou upu, Ioe, ioe; E leai, e leai.” E faigofie lava lana tulafono: Ia faamaoni i taimi uma lava, ae lē tau faamaonia au upu i le faia o se tautoga. Ia taofia tautoga mo mataupu matuā tāua.—Mataio 5:33-37; faatusatusa 23:16-22.
17. O le ā le auala sili ona lelei na i lo o le ‘sui o le mata i le mata ma le nifo i le nifo’ na aʻoaʻo e Iesu?
17 Na toe fetalai Iesu: “Ua outou faalogo, na fai mai, E suia le mata i le mata, e suia foi le nifo i le nifo. A ou te fai atu aʻu ia te outou, aua neʻi outou tetee atu i le leaga; ai se na te po mai i lou alafau taumatau, ia e liliu atu ia te ia le isi.” (Mataio 5:38-42) I inei e lē o faasino atu ai Iesu i se po o loo faia ma se faanaunau ia manuʻa ai ae i se po atu i le tuālima. Aua neʻi tuua oe i se tulaga maulalo e ala i lou suiseseina o gaoioiga e afaina ai. Ia teena le taui atu o le leaga i le leaga. Na i lo o lea, ia taui atu i le lelei, ma i lea “ia e faatoilaloina le leaga i le lelei.”—Roma 12:17-21.
18. (a) Na faapefea ona soloia e tagata Iutaia le tulafono e uiga i le alofa i lou tuaoi, ae na faapefea ona faafetaiaʻia e Iesu lenei? (e) O le ā le tali a Iesu i se aʻoaʻo tulafono o lē na manao e faatapulaa le faatatauina o le “tuaoi”?
18 I lona ono ma o le faaaʻoaʻoga mulimuli, sa faaalia manino ai e Iesu le auala na faavaivaia ai le Tulafono faa-Mose e uputuu faa-Rapi: “Ua outou faalogo, na fai mai, Ia e alofa atu i lē lua te tuaoi, a ia ʻinoʻino i le ua ita mai ia te oe. A ou te fai atu aʻu ia te outou, ia outou alolofa atu i e ua ita mai ia te outou, . . . ia outou tatalo foi mo e ua tuuaʻi fua mai ma faasaua mai ia te outou.” (Mataio 5:43, 44) Sa leʻi tuua e le Tulafono tusitusia faa-Mose ni tuaoi o le alofa: “E te alofa atu i lē lua te tuaoi ia pei o oe lava ia te oe.” (Levitiko 19:18) O le au Faresaio o i latou na sa mumusu e faia lenei poloaiga, ma ina ia sosola ese ai sa latou faatapulaaina le faaupuga “tuaoi” ia i latou o ē na tausia uputuu. O lea ona o lena mea na faamanatu mulimuli atu ai e Iesu i se tasi o loia (aʻoaʻo tulafono) e uiga i le poloaiga ia ‘alofa i le lua te tuaoi ia pei o oe lava,’ na finau ai le tamaloa: “O ai foi le tagata ma te tuaoi?” Na tali atu Iesu i se tala faatusa e uiga i le Samaria agalelei—ia fai oe lava ma tuaoi o lē na te manaomia oe.—Luka 10:25-37.
19. O le ā le gaoioiga a Ieova agaʻi i tagata amio leaga na fautuaina e Iesu ina ia tatou mulimuli ai?
19 I le faaauauina o lana lauga, na folafola atu ai e Iesu faapea ‘na faaalia e le Atua le alofa i ē amio leaga. Sa ia faaoso le la ia susulu atu ma le timu ia paʻū i o latou luga. E leai se mea e sili atu na i le alofa ia i latou o ē alolofa ia te oe. E faia foi e tagata leaga lena mea. E leai se pogai mo se taui i lena mea. Ia faamaonia outou o atalii o le Atua. Ia faaaʻoaʻo ia te ia. Ia faia oe o se tuaoi i tagata uma ma ia alofa i ou tuaoi. Ma i lea “ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.”’ (Mataio 5:45-48) Maeu se tulaga e luʻia ai e ao ona ola ai! Ma pagā se matuā lē taulau ua faaalia i le amiotonu o loo iai a le au tusiupu ma le au Faresaio!
20. Na i lo o le faataatia ese o le Tulafono faa-Mose, na faapefea ona faalautele ma faaloloto e Iesu lona uiga ma faatu i se nofoaga e sili atu ona maualuga?
20 O lea ina ua faasino atu Iesu i vaega o le Tulafono ma faaopoopo atu, “A ou te fai atu aʻu ia te outou,” na te leʻi faataatia ese ai i inā le Tulafono faa-Mose ae sui i se isi mea. E leai, ae sa ia faalolotoina ma faalauteleina lona malosi e ala i le faaalia o le agaga o loo i ona tua. O le tulafono e sili ona maualuga o tulaga faaleauuso ua faamasinoina ai faanaunauga leaga faaauau pea e pei o le fasioti tagata. O le tulafono e sili ona maualuga o le auliuligia mai mea leaga ua faaumatia ai mafaufauga leaga faaauau pea e pei o le mulilua. O le tulafono e sili ona maualuga o faaipoipoga ua teena ai le tatalaina vave o se faaipoipoga e avea o se auala e taʻitaʻi atu ai i le faia o ni toe faaipoipoga mulilua. O le tulafono e sili ona maualuga o le upu moni ua faaalia ai le lē tatau o le faia soo o tautoga. O le tulafono e sili ona maualuga o le loto maulalo ua faataatia ese ai le taui ma sui. O le tulafono e sili ona maualuga o le alofa e manaomia ai le alofa faaleatua lena e leai se tuaoi.
21. O le ā na faaalialia atu e apoapoaiga a Iesu e tusa ai ma le faafiaamiotonu faarapi, ma o ā isi mea o le a aʻoaʻoina e le motu o tagata?
21 Maeu se iʻuga e maofa ai atonu sa iai i na upu apoapoai sa leʻi faalogo i ai a o paʻū atu i taliga o i latou na sa faatoʻā faalogo i ai mo le uluai taimi! Maeu le matuā leai o se aogā na latou tuuina atu i le faafiaamiotonu pepelo na maua mai i le faapologaina i uputuu faarapi! Ae a o faaauau e Iesu lana Lauga i luga o le Mauga, o le motu o tagata sa fia aai ma fia inu mo le amiotonu a le Atua na latou aʻoaʻoina faapitoa le auala e maua ai, e pei ona faaalia i le mataupu o loo mulimuli mai.
Fesili o le Autaluga
□ Aiseā na faia ai e tagata Iutaia a latou uputuu tuugutu?
□ O le ā le tuufaafeagai mataʻina na faia e Iesu e fesootai atu ma tusiupu ma Faresaio ma tagata a lautele?
□ Na faapefea ona faatalitalia e Faresaio ma tusiupu le mauaina o le tulaga amiotonu ma le Atua?
□ O le ā na faaalia e Iesu e avea o le auala e ʻaloese ai mai le faitaaga ma le mulilua?
□ E ala i le faaalia o le agaga i tua o le Tulafono faa-Mose, o ā tulaga sili ona maualuluga na faavae e Iesu?
[Fesili mo le Suʻesuʻega]