Ia Saili pea le Malo ma le Amiotonu a le Atua
Ia Saili pea le Malo ma le Amiotonu a le Atua
“A ia outou muai saili le malo o le Atua ma lana amiotonu;
ona faaopoopoina atu lea o ia mea uma ia te outou.”—MATAIO 6:33.
1, 2. O le ā na faaliliuina i ai e tusiupu ma Faresaio galuega sa lelei ia i latou lava, ma o le ā le lapataiga na avatu e Iesu i ona soʻo?
SA SAILI e le au tusiupu ma Faresaio le amiotonu i la latou lava auala, lena e lē o le auala a le Atua. E lē gata i lena, ae ina ua latou faia galuega sa lelei ia i latou lava, na liliuina ai i latou i faiga faafiaamiotonu ina ia iloa ai e tagata. Sa latou auauna, e lē i le Atua, ae i a latou lava faiga iʻuvale. Na lapataia e Iesu ona soʻo faasaga i na uiga faaalia: “Ia outou, neʻi avatu ni a outou mea alofa i luma o tagata, ina ia iloa ai e i latou; a faapea, ona leai ai lea o so outou taui mai lo outou Tamā o i le lagi.”—Mataio 6:1.
2 E talisapaia e Ieova i latou o ē foai atu i tagata matitiva—ae lē o i latou e avatu e pei ona sa faia e le au Faresaio. Na lapataia e Iesu ona soʻo faasaga i le faaaʻoaʻo ia i latou: “O lea a e avatu ai ni mea alofa, aua neʻi e ilia le pu i ou luma, pei ona faia e tagata pepelo i sunako ma ala, ina ia viia o i latou e tagata. E moni, ou te fai atu ia te outou, ua maua e i latou lo latou taui.”—Mataio 6:2.
3. (a) I le ā le auala na tauia ai le au tusiupu ma Faresaio e tusa ai o a latou foai? (e) Ua faapefea ona ese le auala a Iesu i le foaiina atu o meaalofa?
3 O le upu Eleni mo le ‘maua lo latou taui’ (a·peʹkho) sa o se faaupuga e masani ona aliaʻi mai i lisiti faapisinisi. O lona faaaogāina i le Lauga i luga o le Mauga e faaalia ai faapea “ua maua e i latou lo latou taui,” o lona uiga, “ua latou sainia lisiti o lo latou taui: o la latou aiā e talia ai o latou taui ua faaalia, ae maise lava e pei ua uma ona tuuina atu e i latou se lisiti mo lea mea.” (An Expository Dictionary of New Testament Words, a W. E. Vine) O meaalofa mo ē matitiva sa taʻutino atu ai i le lautele i luga o auala tetele. I sunako sa faailoa atu ai igoa o ē sa faia foai. O i latou sa foai atu meaalofa e tele sa faamamaluina faapitoa i latou i le tuuina i ai o nofoa e pito atu i rapi po o aʻoaʻo i le taimi o le tapuaiga. Sa tuuina atu i latou i inā ina ia iloa ai i latou e tagata; sa iloa ma viia i latou e tagata; o lea, sa mafai ai ona latou tuuina le faailoga i le lisiti mo le taui lena na maua mai i a latou foai “Totogi Atoa.” Maeu le eseese ma le tulaga sa iai Iesu! Ia tuuina atu “ia lilo au mea alofa; o lou Tamā foi, o lē silafia i le mea lilo, o ia lava na te avatu faaaliali se taui ia te oe.”—Mataio 6:3, 4; Faataoto 19:17.
Tatalo e Faafiafia ai le Atua
4. Aiseā ua avea ai tatalo a Faresaio ma pogai na taʻua ai na tagata e Iesu o tagata pepelo?
4 E talisapaia e Ieova tatalo e tuusaʻo atu ia te ia—ae lē pei ona tatalo ai le au Faresaio. Na fetalai atu Iesu i ona soʻo: “Pe a e tatalo, aua neʻi e pei o tagata pepelo, auā ua latou fia tutū ma tatalo i sunako ma fetaulaigāala, ina ia iloa i latou e tagata. E moni, ou te fai atu ia te outou, ua maua e i latou lo latou taui.” (Mataio 6:5) E tele tatalo a le au Faresaio e tatau ona faia pea i aso taitasi, i taimi patino, e tusa lava po o fea le mea sa latou iai. O se manatu i ai, sa tatau ona latou tatalo patino atu tau o le tagata lava ia. Peitai, i le fai ma faailoga, sa mafai ona latou oo atu i “fetaulaigāala,” e iloa atu ai e tagata e savavali ane i itu uma e fa, pe a oo mai le itula mo tatalo.
5. (a) O ā isi faiga atili na faapogaia ai le lē faafofogaina e le Atua o tatalo a Faresaio? (e) O ā mea na tuu faamuamua e Iesu i lana tatalo faaaʻoaʻo, ma pe ioe tagata i aso nei i lena mea?
5 I le faaalia o le paia pepelo, sa latou “faalevaleva foi a latou tatalo e fai ma ufiufi.” (Luka 20:47) Na faapea mai se tasi o uputuu tuugutu: “O tane iloga anamua sa masani ona faatali mo se itula ae latou te leʻi faia le Tefillah [tatalo].” (Mishnah) E oo atu i lea taimi ua faamautinoa e tagata uma ua vaaia la latou faitatalo ma ofo ai ona o lea! O na tatalo e lē sili aʻe na i o latou lava ulu. Na fetalai Iesu ia tatalo i se nofoaga faapitoa na o oe, e aunoa ma le tautu i upu e lē aogā, ma na ia avatu ia i latou se faaaʻoaʻoga faigofie. (Mataio 6:6-8; Ioane 14:6, 14; 1 Peteru 3:12) O le tatalo faaaʻoaʻo a Iesu na tuu faamuamua ai mea e muamua: “Lo matou Tamā e, o i le lagi, ia paia lou suafa. Ia oo mai lou malo. Ia faia lou finagalo.” (Mataio 6:9-13) E toaitiiti tagata i aso nei ua latou iloa le suafa o le Atua, ae matuā itiiti e mananao e faapaiaina. I lea, ua latou faia ai o ia o se atua e leai se igoa. Ia oo mai le Malo o le Atua? E toatele tagata ua manatu faapea o lea ua iai le malo o loo i totonu o i latou. Atonu latou te tatalo mo lona finagalo ina ia faia, ae o le toatele o loo faia o latou lava loto.—Faataoto 14:12.
6. Aiseā na taʻusalaina ai e Iesu anapogi a tagata Iutaia e leai se uiga?
6 E talia e Ieova le anapogi—ae lē pei ona faia ai e le au Faresaio. E tusa ai ma le foaiina atu o meaalofa i ē matitiva ma tatalo a le au tusiupu ma le au Faresaio, sa taʻuvalea ai foi e Iesu a latou anapogi faapea e leai se uiga: “Pe a outou anapopogi, aua neʻi outou mata faanoanoa pei o tagata pepelo; auā ua latou faalaleaga o latou mata, ina ia iloa e tagata ua latou anapopogi. E moni, ou te fai atu ia te outou, ua maua e i latou lo latou taui.” (Mataio 6:16) I a latou uputuu tuugutu na faaalia ai faapea i taimi o anapogi e lē mulumuluina ai e Faresaio pe uuina i latou ae asu lefulefu i o latou ulu. Ae a lē anapopogi, e masani lava ona faamamā e tagata Iutaia i latou ma uu o latou tino i le suāuu.
7. (a) Sa ao faapefea ona amioaʻi soʻo o Iesu pe a anapogi? (e) E tusa ai ma anapogi, o le ā sa manaomia e Ieova i aso o Isaia?
7 E faatatau i anapogi, na taʻu atu ai e Iesu i ona soʻo: “Ia uu lou ulu, ma mulumulu ou mata; ina ia le iloa e tagata ua e anapogi, na o lou Tamā.” (Mataio 6:17, 18) I aso o Isaia, o tagata Iutaia na see i tua sa latou olioli i a latou anapogi, ua faatigaina o latou tino, ua punonou i lalo o latou ulu, ua nonofo i le ie talatala ma le lefulefu. Ae sa finagalo Ieova ia i latou ina ia faasaʻoloto i ē ua tigaina, fafaga i ē o fia ʻaai, fai fale mo ē leai ni aiga, ma faalavalava i ē ua lē lavalavā.—Isaia 58:3-7.
Ia Toloaʻi Oa Faalelagi
8. O le ā sa faapogaia le au tusiupu ma Faresaio e leiloa le auala e maua ai le faamaoniga a le Atua, ma o le ā le mataupu silisili, lea na mulimuli ane faamatala e Paulo faapea sa latou lē amanaia?
8 I lo latou tuliloaina o le amiotonu, sa leiloa ai e le au tusiupu ma Faresaio le auala e maua ai le faamaoniga a le Atua ma taulai atu ai i viiga mai tagata. Na matuā taʻui i latou i uputuu a tagata o lea na latou faataatia ese ai le Afioga a le Atua. Sa taulai atu o latou loto i tulaga faalelalolagi na i lo o le oa faalelagi. Sa latou lē amanaia le upu moni faigofie lena na tusia e se Faresaio na faaliliuina i le Faa-Kerisiano i tausaga mulimuli ane: “O mea uma lava tou te faia, ia faia ma le loto, peiseai ua faia [ia Ieova] a e le o tagata; auā ua outou iloa, e maua e outou mai le Alii o le taui, o le tofi lea.”—Kolose 3:23, 24.
9. O ā lamatiaga e mafai ona faamataʻuina ai le ʻoa faalelalolagi, ae o le ā o le a tausia ai le saogalemu o le ʻoa moni?
9 E naunau Ieova i lou tuutoina ia te ia, ae lē o lau tusitupe. Na te silafia faapea o le mea o iai lau oa e iai lou loto. Pe mafai e le ele ma mogamoga ona faaumatia lau oa? Pe mafai e tagata gaoi ona eli atu i pa palapala ma gaoi ai? Pe i nei taimi o le lē mautu o le tamaoaiga, pe mafai e le paʻū maulalo o le aogā o le tupe ona faamemeʻi ai lona malosi e faatau ai pe e mafai e le paʻū o le tau o mea i maketi i fafo ona soloiesea? Pe o le a faapogaia e le oso maualuga aʻe o le tau o le solitulafono ona gaoia lau oa? E leai pe afai o loo teuina i le lagi. E leai pe afai o ou mata—o le lamepa e faamalamalamaina ai lou tino atoa—o lelei, e taulai atu i le Malo o le Atua ma lana amiotonu. E iai le auala e mafai ona galoma ese ai oloa. “Aua e te galue faapuapuaga ia mauoloa ai; tuu ia o lou lava [malamalama]. E te tulimatai atu ea i le mea ua leai? auā e faia lava e ia ona apaau; e pei o le aeto ona lele atu o ia i le lagi.” (Faataoto 23:4, 5) O lea aiseā e lē mafai ai ona moe ona o le tamaoaiga? “Ona o le tele o oa a le tagata mauoa ua le mafai ai ona moe o ia.” (Failauga 5:12, NW) Ia manatua le lapataiga a Iesu: “Tou te le mafaia ona auauna i le Atua atoa ma [le ʻOa].”—Mataio 6:19-24.
Le Faatuatua na te Aveesea le Popole
10. Aiseā e matuā tāua ai ona tuu atu lou faatuatua i le Atua na i lo i mea faitino, ma o le ā le fautuaga na tuuina mai e Iesu?
10 E manao Ieova ina ia tuu atu lou faatuatua ia te ia, ae lē i mea faitino. “A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.” (Eperu 11:6) Na fetalai Iesu: “Auā e le ola se tasi i le tele o ana mea ua ia te ia.” (Luka 12:15) O le faitau miliona o tupe i le fale tupe o le a lē mafai ai ona tausia pea ia ola māmā ua mamaʻi pe mafai ona faagaoioia ai pea le fatu ua vaivai. O lea ona “o le mea lea ou te fai atu ai ia te outou,” na faaauau atu ai Iesu i lana Lauga i luga o le Mauga: “aua neʻi outou popole i o outou ola, i mea tou te aai ai, ma mea tou te inu ai, po o outou tino, i mea tou te oofu ai. E le sili ea le ola i le mea e ʻai, ma le tino i le ofu?”—Mataio 6:25.
11. O fea na maua mai ai e Iesu le tele o ana tala faatusa, ma ua faapefea ona faatinoina lenei mea i le Lauga i luga o le Mauga?
11 O Iesu o le matai o tala faatusa sa faaupu atu. So o se mea sa silasila atu i ai o ia sa manatunatu lava ia i latou. Sa ia silasila atu i se fafine o tutu se moli gaʻo ma tuu i luga o le tuugalamepa ma ia faaliliu loa i se tala faatusa. Na ia silasila atu i le leoleo mamoe o tuu eseese mamoe mai ʻoti; sa avea lea o se tala faatusa. Sa ia silasila atu i tamaiti o taaalo i le maketi; sa avea foi lea o se tala faatusa. Ma o le mea lena sa ia faia i le Lauga i luga o le Mauga. A o ia fetalai atu e uiga i le popole i mea faitino, sa ia silafila ai le fetaui o ni tala faatusa e uiga i manu o loo felelei solo ma lili o loo folasia ai autafa o mauga. Pe lūlū ma selesele manu? E leai. Pe taavili ma milo lili? E leai. Na faia i latou e le Atua; o loo ia tausia i latou. Ae peitai outou, e sili ona aogā outou na i lo o manu ma lili. (Mataio 6:26, 28-30) Sa ia tuuina atu lona Alo mo outou, ae lē mo i latou.—Ioane 3:16.
12. (a) Pe o le uiga o le tala faatusa e uiga i manu felelei ma fugalaau faapea e lē tatau ona galulue soʻo o Iesu? (e) O le ā le manatu sa faia e Iesu e faatatau i galuega ma le faatuatua?
12 Sa leʻi taʻu atu i inei e Iesu i ona soʻo faapea e lē tatau ona latou galulue ina ia fafaga ma faalavalava i latou. (Tagai Failauga 2:24; Efeso 4:28; 2 Tesalonia 3:10-12.) I lena taeao i le tau e totogo ai mea, sa matuā pisi lava manu i le sailia o meaʻai, tafafao, fausia o latou faamoega, tatao o latou fua, fafaga i a latou tamai manu. Sa latou galulue ae e aunoa ma se popole. Sa pisi foi fugalaau i le uunai atu o o latou aa i lalo i le eleele ina ia saili le vai ma minerale ma aauina atu i o latou lau ina ia maua mai le malamalama o le la. Sa tatau ona latou tutupu ia matutua ma fua mai ma lafoai o latou fatu a o leʻi mamate. Sa latou galulue e aunoa ma le popole. E saunia e le Atua mea mo lili ma manu. ‘E lē sili ea ona saunia e ia mo outou o mea e tele, o outou o e faatuatua itiiti?’—Mataio 6:30.
13. (a) Aiseā sa alagātatau ai mo Iesu ona faaaogā le fua o le kupita ina ua ia fetalai e uiga i le faateleina o le umi o le olaga o se tagata? (e) E mafai faapefea ona e faateleina le umi o lou ola i le faitau miliona o maila e lē uma, e pei ona sa iai?
13 O lea ia faatuatua. Aua le popole. O le popole o le a lē suia ai lava se mea. “O ai ea so outou na te mafaia,” na fesili atu ai Iesu, “i lona popole ona faateleina le umi o lona olaga i le kupita e tasi?” (Mataio 6:27) Ae aiseā ua faafesootai atu ai e Iesu se fua faaletino e matuā mamao lava, se kupita, i se fua o taimi o le olaga? Atonu ona e masani pea ona faatusa e le Tusi Paia le olaga o tagata i se malaga, i le faaaogāina o na faaupuga e pei o “le ala o e agasala,” “le ala o e amiotonu,” le ‘auala va tele i le faaumatiaga,’ ma le ‘auala va apiapi i le ola.’ (Salamo 1:1; Faataoto 4:18; Mataio 7:13, 14) O le popole e uiga i manaoga i aso fai soo e lē mafai ona faaumiina ai le ola o se tasi e oo lava i le na o se vaegāmea, “kupita e tasi,” e pei ona taʻua ai. Ae e iai se auala e faafualoa ai lou ola mo le faitau miliona o maila e lē muta, e pei ona sa iai. E lē ala i le popole ma faapea atu: “Ni a mea tatou te aai ai?” po o “Ni a foi mea tatou te inu ai?” po o “Ni a foi mea tatou te oofu ai?” ae i le iai o le faatuatua ma le faia o le mea na fetalai mai Iesu ia i tatou e faia: “A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.”—Mataio 6:31-33.
Mauaina o le Malo o le Atua ma Lana Amiotonu
14. (a) O le ā le matua o le Lauga i luga o le Mauga? (e) I le ā le auala sese na sailia ai e tusiupu ma Faresaio le Malo ma le amiotonu?
14 I le fuaiupu amata o lana Lauga i luga o le Mauga, na fetalai ai Iesu e uiga i le malo o le lagi e o i latou o ē e iloa o latou manaoga faaleagaga. I le fuaiupu lona fa, na ia fetalai ai faapea o i latou o ē fia ʻaai ma fia inu mo le amiotonu o le a maoona. I inei ua tuu faamuamua ai e Iesu le Malo ma le amiotonu a Ieova. O mea na o le matua o le Lauga i luga o le Mauga. O na mea o le tali atu lea i manaoga o le fanau uma a tagata. Ae i le ā le auala o le a mafai ai ona maua le Malo o le Atua ma le amiotonu a le Atua? E faapefea ona faaauau pea ona tatou sailia ia mea? E lē i le auala na faia ai e le au tusiupu ma Faresaio. Sa latou saili le Malo ma le amiotonu e ala i le Tulafono faa-Mose, lea na latou faapea mai e aofia ai uputuu tuugutu, talu ai ona latou te talitonu o le Tulafono tusitusia ma uputuu tuugutu na tuuina atu e le Atua ia Mose i le Mauga o Sinai.
15. (a) E tusa ai ma tagata Iutaia, o anafea na amata ai a latou uputuu tuugutu, ma na faapefea ona latou faamaualugaina ia uputuu i luga aʻe o le Tulafono tusitusia faa-Mose? (e) O anafea na amata moni ai nei uputuu, ma faatasi ai ma le ā le iʻuga i le Tulafono faa-Mose?
15 O la latou uputuu e faatatau i lenei mea na faapea mai: “Na maua e Mose le Tulafono [le faamatalaga i lalo, “Le ‘Tulafono Tuugutu’”] mai Sinai ma tuuina atu ia Iosua, ma o Iosua i toeaina, ma o toeaina i le au Perofeta; ma na tuuina atu e le au Perofeta i tagata o le Sunako Sili.” I le faagasologa o taimi, sa faamaualugaina ai e sili aʻe i le Tulafono tusitusia la latou tulafono tuugutu: “[Afai] e agasala o ia i upu i le Tulafono [tusitusia], e lē taʻusalaina,” ae afai “e faaopoopo atu o ia i upu a le au Tusiupu [uputuu tuugutu], ua taʻusalaina o ia.” (Mishnah) O a latou uputuu tuugutu sa leʻi amataina i Sinai. O le mea moni, na amata ona latou aoaoina vave mai i ni senituri se lua a o leʻi afio mai Keriso. Na latou faaopoopo atu i ai, toese mai, ma i lea sa faaleaogāina ai le Tulafono tusitusia faa-Mose.—Faatusatusa Teuteronome 4:2; 12:32.
16. E faapefea ona oo mai le amiotonu a le Atua mo le fanau a tagata?
16 O le amiotonu a le Atua e oo mai e lē ala i le Tulafono ae e matuā mamao ese lava mai i lea: “E le taʻuamiotonuina se tagata e toatasi i ona luma i galuega o le tulafono; auā o le tulafono e iloa lelei ai le agasala. A o lenei, ua faaalia mai le amiotonu a le Atua, e le o i ai le tulafono, ua molimau i ai e le tulafono atoa ma le au perofeta; o le amiotonu lea a le Atua i le faatuatua ia Iesu Keriso.” (Roma 3:20-22) O lea o le amiotonu a le Atua e sau mai i le faatuatua ia Keriso Iesu—o lenei mea na matuā atoa ona “ua molimau i ai e le tulafono atoa ma le au perofeta.” O valoaga faa-Mesia na faataunuuina ia Iesu. Sa faataunuuina foi ia te ia le Tulafono; na aveesea ai nai i le auala e ala i le tuʻituʻia i fao i luga o lona satauro.—Luka 24:25-27, 44-46; Kolose 2:13, 14; Eperu 10:1.
17. E tusa ai ma le aposetolo o Paulo, na faapefea ona misia e tagata Iutaia le amiotonu a le Atua?
17 I lea, na tusi ai le aposetolo o Paulo e uiga i le lē taulau i tagata Iutaia ona saili le amiotonu: “Auā ou te molimau ia te i latou, ua latou maelega i la le Atua, a e le tusa ma le poto. Auā ua le iloa e i latou le amiotonu mai le Atua, ma ua saili e faatu la latou lava amiotonu, ua latou le usiusitai ai i le amiotonu mai le Atua. Auā o le iuga o le tulafono o Keriso lea, e oo mai ai le amiotonu i e faatuatua uma lava.” (Roma 10:2-4) Na tusi foi Paulo e uiga ia Keriso Iesu: “O ia na le iloa le agasala, na faia lea e ia ma agasala, o le sui o i tatou; ina ia avea i tatou ma amiotonu a le Atua ia te ia.”—2 Korinito 5:21.
18. Na faapefea i le “Keriso na faasatauroina” ona manatu i ai tagata Iutaia tausi i uputuu, tagata faafilosofia Eleni, ma “e ua valaauina”?
18 Sa manatu tagata Iutaia i se Mesia e maliu e pei o se mea vaivai ma lē aogā. Sa aamu tagata faafilosofia Eleni i sea Mesia faapea e valea. Ae peitai, e pei ona folafola e Paulo: “O loo fai mai Iutaia i se faailoga, ma Eleni o loo saili i latou i le poto; a o i matou, ua matou talaʻi atu ia Keriso na faasatauroina, o le mea e tausuai ai Iutaia, ma le valea ia Eleni; a e peitai o e ua valaauina, o Iutaia atoa ma Eleni, ua fai Keriso ma mana o le Atua, ma poto o le Atua ia te i latou. Auā o le valea o le Atua e sili lona poto i tagata; o le vaivai foi o le Atua e sili lona malosi i tagata.” (1 Korinito 1:22-25) O Keriso Iesu ua faaalia ai le mana ma le atamai o le Atua ma o le auala lea a le Atua o le amiotonu ma le ola e faavavau mo le fanau a tagata usiusitai. “E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.”—Galuega 4:12.
19. O le ā o le a faaalia i le mataupu o sosoo mai?
19 O le a faaalia i le mataupu o sosoo mai faapea afai tatou te mananao ia sosola ese mai i le faaumatiaga ma maua le ola e faavavau, e tatau ona tatou saili pea le Malo o le Atua ma lana amiotonu. E tatau ona faia o lena mea e lē gata e ala i le faalogologo i fetalaiga a Iesu ae i le faatinoina foi o ia fetalaiga.
Fesili o le Autaluga
□ O le ā na faaliliuina i ai e tagata lotu Iutaia a latou meaalofa o le alofa tunoa, tatalo, ma anapogi?
□ O fea le nofoaga malupuipuia mo le teuina o au ʻoa?
□ Aiseā e ao ai ona tatou aloese mai i le popole i manaoga faitino?
□ O le ā le faamatalaga pepelo na faia e tagata Iutaia e uiga i le amataga o a latou uputuu?
□ O le ā le auala e sau ai le Malo o le Atua ma lana amiotonu?
[Fesili mo le Suʻesuʻega]
[Ata i le itulau 16]
Sa mananao Faresaio e tutū ma tatalo i fetaulaigāala, i mea e mafai ai ona iloa atu i latou e tagata