O le Soifuaga o Iesu ma Lana Faiva

Matuā Tiga i le Faatoaga

INA UA uma ona tatalo Iesu, ona usuina ai lea e ia ma ona aposetolo faamaoni e 11 pese o viiga ia Ieova. Ona latou ō ifo lea nai le potu i luga, ua oo atu i fafo i le mālū o le pogisa o le po, ma latou aga atu i le Vanu o Ketarono agaʻi i Petania. Ae i le auala, na latou malōlō ai i se mea e masani ona latou fiafia i ai, o le faatoaga i Ketesemane. O lenei faatoaga e taatia pe i lalo ifo o le Mauga o Olive. E masani ona feiloai ai i inei Iesu ma ona aposetolo i totonu o le togāolive.

I le tuua ai na o le toavalu o ona aposetolo—atonu e latalata i le faitotoa e ulu atu ai i le faatoaga—ona ia faatonu lea o i latou: “Ia outou nonofo iinei, seia ou alu atu iilā ou te tatalo.” Ona ia ave lea o le isi toatolu—o Peteru, Iakopo, ma Ioane—ma agaʻi atu e mamao atu i totonu o le faatoaga. Ua oo ina tiga ma ātu Iesu. “Ua matuā tiga loʻu loto e oo i le oti,” ua ia fetalai atu ai ia i latou. “Ia outou nonofo pea iinei, ma ia tatou mataala faatasi ma aʻu.”

I le sōsō atu laitiiti o ia i luma, ona faapaʻū lea o Iesu i le eleele ma ona fofoga i le palapala ona amata lea ona tatalo ma le augani: “Loʻu Tamā e, afai e mafai, ia ave ese lenei ipu ia te au; a e aua le faia loʻu loto, a o lou finagalo.” O le ā na ia uiga i ai? Aiseā ua “matuā tiga [ai lona] loto e oo i le oti”? Pe ua solomuli o ia mai lana filifiliga e maliu ma saunia ai le togiola?

E leai lava! E lē o augani atu Iesu ina ia faasaoina o ia mai le oti. E oo lava i le manatu ina ia aloese mai le faia o se maliu faataulagaina, e pei ona sa fautuaina ai e Peteru, sa avea o se mea valea ia te ia. Na i lo o lea, ua tiga o ia ona o le fefe i le auala o le a lē pine ae maliu ai o ia—i le avea o se tagata agasala inosia—o le a avatu ai se faalumaina i le suafa o lona Tamā. Ua logo nei i ona tino faapea i ni nai itula o le a faasatauroina ai o ia i luga o se laau e avea o se ituaiga o tagata aupito silisili ona leaga—o se upu vale lea faasaga i le Atua! O le mea lena o loo matuā ātu ai o ia.

Ina ua uma ona ia tatalo mo sina taimi, ona toe foi atu lea o Iesu ma maua ona aposetolo e toatolu o loo momoe. Ona ia fetalai atu lea ia Peteru i lona faapea atu: “Pe faapena ea ona outou le lavā ona tatou mataala faatasi ma aʻu i le itu po e tasi? Ia outou mataala ma tatalo, ina neʻi oo mai le faaosoosoga ia te outou.” Ae peitai, i lona silafiaina o le tulaga faigata o loo iai i latou ma le leva o le itula o le po, ua ia fetalai atu ai: “Ua manao i ai le loto, a o le tino ua vaivai.”

Ona toe maliu ese atu lea o Iesu mo le taimi lona lua ma aioi atu faapea ia aveesea e le Atua mai ia te ia “lenei ipu,” o lona uiga, le vaega tofia a le Atua, po o le finagalo, mo ia. Ina ua foi mai o ia, ua ia toe maua foi le toatolu o momoe ae sa tatau ona latou tatalo faapea ina neʻi tofotofoina i latou. Ina ua fetalai atu Iesu ia te i latou, ua latou lē iloa po o le ā se tali e tali atu ai.

I le iʻuga, o le taimi lona tolu lea, na maliu faaitiiti atu ai Iesu pe tusa o le togi o le maa le mamao, ona tootuli lea o ia ma ua matuā alaga ma loimata, ua tatalo o ia: “Loʻu Tamā e, a e finagalo i ai, ia e ave ese lenei ipu ia te au.” Ua matuā lagona ma le naunau e Iesu matuiā o tiga ona o le faalumaina o le a tuuina atu e lona maliu e avea o se pagota i le suafa o lona Tamā. Ioe, i le tuuaʻia o sē e upuvale—o sē e faifai i le Atua—ua toetoe lava lē mafai ona tatali!

Ae peitai, ua faaauau ona tatalo Iesu: “Aua le faia loʻu loto, a o lou finagalo.” Ua gauai ma le usiusitai Iesu i le finagalo o le Atua. I lenei taimi, ua faailoa mai ai se agelu mai le lagi ma faamalosia o ia i ni upu faalaeiau. Ua faapena foi ona taʻu atu  e le agelu ia Iesu faapea ua faamaonia o ia e lona Tamā.

Peitai, pagā se avega o loo i tauʻau o Iesu! O lona lava soifua e faavavau ma le ola e faavavau o le fanau atoa a tagata ua fuatiaina. O faalogona ootia tiga ua matuā tele lava. O lea ua faaauau ai ona tatalo ma le matuā pulunaunau Iesu, ma o lona afu ua pei o ni ʻaluʻalu toto a o sisina ifo i le eleele. “E ui lava o lenei mea o se mea e seāseā ona tupu,” ua matauina ai e The Journal of the American Medical Association, “o le afutoto . . . e mafai ona tupu pe a o iai i ni tulaga matuā maualuluga o faalogona ootia.”

Mulimuli ane, ua toe foi atu Iesu mo le taimi lona tolu i ona aposetolo, ma ua toe maua foi i latou o momoe. Ua vaivai i latou mai le matuā tiga. “Ina momoe pea ia, ma malolo.” ua alaga atu ai o ia. “Soia; ua oo mai le itu po; faauta, ua tuuina atu le Atalii o le tagata i lima o tagata agasala. Ina tutū ia, ia tatou o. Faauta, ua latalata mai o ia na te faalataina aʻu.”

A o tautala o ia, ua fotuaʻi mai Iuta le Sekara, o loo ō mai faatasi ma le au e toatele o loo tauaveina sulu ma moli ma auupega. Mataio 26:30, 36-47; 16:21-23; Mareko 14:26, 32-43; Luka 22:39-47; Ioane 18:1-3; Eperu 5:7.

◆ Ina ua tuua le potu i luga, o fea ua taʻitaʻia i ai e Iesu le au aposetolo, ma o le ā o ia faia i inā?

◆ A o tatalo Iesu, o le ā o faia e le au aposetolo?

◆ Aiseā ua matuā tiga ai Iesu, ma o le ā le olega ua ia faia i le Atua?

◆ O le ā ua faaalia i le afu o Iesu e pei o ni ʻaluʻalu toto?