Se Lalolagi Fou ua Oo Mai!

UA ANOANOAʻI manatu faatutū mo le togafitia o maʻi o le lalolagi. I le tulaga lautele, ua latou talosaga mai mo le manatu mamafa ma le felagolagomaʻi, faapea foi ma se taumafaiga aufaatasi talafeagai a atunuu uma lava o le lalolagi aoao. Ua iai se lagona faapea a o faateleina ona leaga tulaga o mea, o le manaoga mo le faasaoina o tagata o le a faamalosia ai atunuu e toe fetuunaʻi a latou mea o faamuamua ma galulue faatasi ina ia faia aʻe ai se lalolagi fou e mafai ona faasaoina. Ua vaaia faalemafaufau faapea o tupe sa faasao mo faiga faavaegaʻau o le a matuā faaitiitia lava ona o le fiafia e faaaogā alagāmanuia e faailoa atu ai faamataʻuga o le siosiomaga ma faapea, e pei ona matauina i le State of the World 1990, “na i lo o le tausisia o a latou lava fausaga tetele mo le puipuiga, atonu o le a faalagolago atu ai malo i se vaegaʻau tausi filemu ua matuā faateleina ma faamalosia a Malo Aufaatasi, le vaegaʻau lena o le a iai le malosi ma le pule e puipuia ai so o sona sui atunuu mai se osofaiga lē tatau a se isi atunuu.”

Peitai o na fuafuaga e matuā lē taulau lava ona aumaia ai tulaga na o loo moomoo i ai ua lisiina mai i a tatou itulau amata. E leai lava se auala e mafai ai e na o ni taumafaiga tetele faaletagata ona foia tulaga agasala ma le matapeapea faaletagata; latou te lē mafai ona soloia le faamasinoga lē tonu ma fetauaiga i le va o tagata o atunuu; e lē mafai ona latou saunia se alofa e lē manatu faapito i totonu o le fanau a tagata uma; latou te lē mafaia foi ona faamaonia se iʻuga i faamaʻi ma le oti. E lē o uigā a latou faamatalaga e faatatau i le solitulafono, latou te lē o taʻua ai foi le foia o eseesega ma le feinoinoaʻi faalotu. Ma o le aveesea o mala faalenatura e lē o mafai foi ona latou manatunatu i ai. O le lotonuu, faatasi ai ma ona āuga ua faapogaia ai faafitauli, o loo faatagaina pea ina ia iai. O lea, ma le faanoanoa lava, e tatau ai ona tatou faaiʻua faapea ua lē taulau le fanau a tagata i le aumaia o se vaifofo e manuia.

Peitai, e iai se vaifofo! E moni, o nei mea uma o loo moomoo i ai le fanau a tagata, ua uma ona folafolaina mai, ma o le folafolaga e sau mai i le Atua “e le mafai ona tala pepelo.” (Tito 1:2) Ua ia silafia tonu po o le ā e tatau ona faia, ma o loo ia te ia le atamai, le mana, ma le tomai e faataunuuina ai mea na ia fuafuaina.—Faaaliga 7:12; 19:1.

Ua folafola mai e le Atua: “E toe itiiti, ona leai lea o le tagata amio leaga; e te mafaufau foi i le mea sa i ai o ia, a e leai lava. A o e agamalu, e fai mo latou le nuu; e faafiafia foi i latou ia te i latou ona o le manuia e tele.”—Salamo 37:10, 11.

O le ā faapefea ona faataunuuina o lenei mea? Ua tali mai le Isaia 11:9: “Latou te le faia se mea leaga, latou te le faaumatia foi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.” Ioe, o le a aʻoaʻoina le fanau uma a tagata i “le malamalama o Ieova,” ma so o se tasi e musu e gauai atu i ai o le a lē faatagaina e tumau ma faaleagaina le filemu o isi. O le a lē toe faaleagaina lava lo tatou laueleele matagofie.

“Ina vaavaai i galuega a Ieova, . . . Ua faaiua e ia o taua e oo lava i tuluʻiga o le lalolagi,” ua folafola mai ai e le Salamo 46:8, 9. (Tagai foi Mika 4:3, 4.) O se vala tāua i le faia o le kelope ia filemu o le faaiʻua lea o eseesega faavaoatunuu. O le felagolagomai ua faamaonia, auā e na o le tasi le malo o le a iai i le lalolagi aoao—le Malo lea o le Atua. Ma o lana pulega o se Malo “e le faaumatia e faavavau.” (Tanielu 2:44) Ae lē gata i lea, o lona Tupu o le Iesu Keriso toe faatuina i le ola e lē mafai ona oti, o lē o lana pule o le a auala mai i le faamasinoga tonu ma le amiotonu.—Isaia 9:6, 7; 32:1.

 Ae pe o le a faaleagaina lenei mea e ala i le lē lelei atoatoa tuufaasolo o le tagata ma pe o le a faaleagaina e le faaauau pea o le tiga, maʻi, faanoanoa, ma le oti? E leai, auā o le a avea foi nei mea ma mea o taimi ua tuanai. Ua faamautinoa mai i tatou e le Faaaliga 21:4: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” O le agasala tuufaasolo o le a faamagaloina e faavae i le taulaga togiola a Iesu, ma o le a aumaia ai le fanau a tagata i le tulaga lelei atoatoa. (Roma 6:23; Efeso 1:7) Ma o ai e sili atu ona lelei i le pulea o malosi faalenatura ma taofiofia i latou mai le faaleagaina o le fanau a tagata na i lo o Lē na Foafoaina i latou?—Salamo 148:5-8; Isaia 30:30.

O mea e na ona faamoemoe ma moe miti i ai le tagata, o le a auina mai e le Atua. Ae o afea? Ua faaalia i le valoaga a le Tusi Paia faapea o suiga o le a oo mai i le taimi pe a “ita” nuu ma o le a “fano ai le lalolagi” i tagata. (Faaaliga 11:18) O aso mulimuli o le lalolagi tuai o le a faailogaina i “aso e gata ai e oo mai ai aso faigata”—ma iʻu ai i le sili atu ona faaleagaina o tulaga o mea lea ua tatou vaaia i le taimi nei lava. (2 Timoteo 3:1-5, 13) Ma na valoia e Iesu faapea o le tupulaga o loo vaai i nei mea o le tupulaga lea o le a vaai i le faataunuuina o folafolaga a le Atua.—Mataio 24:3-14, 32-34.

Ia faaavanoa se taimi e siaki ai nei folafolaga o loo faamauina i le Tusi Paia. Auā i lenei manatu, ua ioe uma i ai tagata popoto ma le Atua: O le taimi lenei mo se lalolagi fou!