O le Soifuaga o Iesu ma Lana Faiva

Faalataina ma le Puʻea

O LE taimi lea ua mavae le tulua o po ma ao a o taʻitaʻiina atu e Iuta se vaega toatele o fitafita, ositaulaga sili, Faresaio ma isi i le faatoaga i Ketesemane. Ua loto malilie ositaulaga e totogi atu ia Iuta le 30 tupe siliva ina ia faalataina ai Iesu.

Muamua lava, ina ua alu ese Iuta mai le tausamiga o le Paseka, e foliga mai sa alu atu saʻo loa o ia i ositaulaga sili. O nei tagata sa vave loa ona latou faapotopoto i o latou ofisa, faapea foi ma se vaega o fitafita. Atonu sa muai taʻitaʻiina i latou e Iuta i le mea sa faamanatu ai e Iesu ma ona aposetolo le Paseka. I le iloa faapea ua latou ō ese, ona mulimuli atu lea o se motu o tagata e toatele o loo tauaveina auupega ma sulu ma moli ma mulimuli atu ia Iuta i tuapa o Ierusalema ma oo atu i le Vanu o Ketarono.

A o taʻitaʻiina e Iuta le solo i le Mauga o Olive, sa ia lagona ma le mautinoa na te iloa le mea e maua i ai Iesu. I le vaiaso ua mavae, a o femalagaai Iesu ma ona aposetolo i le va o Petania ma Ierusalema, sa masani lava ona latou malōlō i le faatoaga o Ketesemane ma talanoa ai. Ae i le taimi nei, atonu o loo lilo Iesu i le pogisa o le po i lalo ifo o le togāolive, o le a faapefea la ona iloa o ia e fitafita? Atonu latou te leʻi vaai muamua lava ia te ia. Ua saunia e Iuta se faailoga, i lona faapea atu: “O lē ou te sogi atu i ai, o ia lea; tou te pue ia te ia, ma taʻitaʻiina atu, ma taofimauina.”

Ua taʻitaʻi e Iuta le motu o tagata i le faatoaga, ua iloa atu Iesu ma ona aposetolo, ona alu atu saʻo lea ia te ia. “Rapi e, si oʻu alofa;” ua ia fai atu ai ma sogi lemu atu ia te ia.

“Sole, se a le mea ua e sau ai?” ua tetee atu ai Iesu. O lea, i le taliina o lana lava fesili, ua ia fetalai ai: “Iuta e, e te faalataina ea le Atalii o le tagata ma le sogi?” Ae ua lava lea mo lē na faalataina o ia! Ua savali atu Iesu i luma i le malamalama o sulu ma moli ma fesili atu: “O ai ea tou te saili na?”

“O Iesu le Nasareta,” ua sau ai le tali.

“O aʻu lenei,” ua tali atu ai Iesu, a o ia tu ma le lototele i o latou luma. I le matuā maofa i lona lototele ma ua lē iloa se mea o le a fai, ona solomuli ai lea o tagata ma ua paʻūū i le eleele.

“Ua uma ona ou fai atu ia te outou, o aʻu lenei,” ua faaauau atu ai ma le toʻafilemu Iesu. “O lenei, afai tou te saili mai ia te au, tuu pea ia i latou nei, ia latou o.” I sina taimi lava faatoʻā mavae atu i le potu i luga, na taʻu atu ai e Iesu i lona Tamā i le tatalo faapea sa ia tausia ona aposetolo faamaoni ma e leai foi se tasi o i latou ua fano vaganā “le tagata o le malaia.” O lea, ina ia faataunuuina ana upu, ua talosaga atu ai o ia ina ia tuu atu ona soʻo e ō.

A o toe maumanatu fitafita, ua tutū i luga, ma amata ona fusifusi ia Iesu, ua iloa atu e le au aposetolo le mea o le a tupu. “Le Alii e, pe matou te taia ea i le pelu?” ua latou fesili atu ai. A o leʻi tali atu Iesu, ua seʻi e Peteru se tasi o pelu e lua a le au aposetolo na aumai, ua osofai ai Maliko, o le auauna a le ositaulaga sili. Na misi le ta a Peteru mai le ulu o le auauna ae na motu ese ai lona taliga taumatau.

“Tuu mai ia, seia faia lenei mea,” ua faasalavei atu ai Iesu. I le paʻi atu i le taliga, ua ia faamalōlō ai le manuʻa. Ona ia aʻoaʻo atu lea o se lesona tāua, i le faatonu atu ia Peteru: “Ina toe sulu ia o lau pelu i lona faamoega; auā o i latou uma o e tago i le pelu, e oti i latou i le pelu. Fa te oe ea ou te le mafaia ona aioi atu nei i loʻu Tamā, ona aauina mai ai lea e ia ia te au o agelu e sili ona toatele i lekeona e sefulu ma le lua?”

 Ua loto malie Iesu ina ia puea o ia. Auā ua ia faamatala atu: “Ona faapefea lea ona taunuu o Tusi, e tatau ona oo ia mea?” Ma ua ia faaopoopo atu: “Ou te le inu ea i le ipu ua au mai ia te au e loʻu Tamā?” Ua matuā malie atoatoa o ia i le finagalo o le Atua mo ia!

Ona fetalai atu lea o Iesu i le motu o tagata. “Ua outou o mai ea ma pelu ma uatogi e pue mai ai ia te au, peiseai o se fao mea?” ua ia fesili atu ai. “Sa tatou nonofo ma outou i le malumalu, ma ou aʻoaʻo atu ai i aso fai soo, a e tou te lei pueina ai aʻu. A ua oo ia mea ina ia taunuu ai Tusi a le au perofeta.”

Ona pue ai loa lea e le au fitafita ma le taʻitaʻiʻau ma alii sili o Iutaia Iesu ma fusifusi ia te ia. I le vaai atu i lenei mea, ona lafoai ai lea e le au aposetolo Iesu ma sosola. Ae peitai, o se taulealea—e foliga mai o le soʻo o Mareko—sa nofo ai pea faatasi ma le motu o tagata. Atonu sa iai o ia i le fale lena sa faamanatu ai e Iesu le Paseka ma mulimuli ane sa mulimuli atu i le motu o tagata mai i inā. Ae peitai, ua iloa mai nei o ia, ma ua faia ai se taumafaiga ina ia puea o ia. Peitai ua ia tuua le ie lino sa pulupulu ai ma ua sola ese mai ia te i latou ua lē lavalava. Mataio 26:47-56; Mareko 14:43-52; Luka 22:47-53; Ioane 17:12; 18:3-12.

◆ Aiseā sa oo ai ia Iuta se lagona mautinoa faapea o le a ia maua Iesu i le faatoaga i Ketesemane?

◆ Ua faapefea ona faaalia e Iesu le manatu mamafa mo ona aposetolo?

◆ O le ā le gaoioiga ua faia e Peteru e puipuia ai Iesu, ae o le ā ua fetalai atu ai Iesu ia te ia?

◆ Ua faapefea ona faaalia e Iesu faapea ua matuā malie atoatoa o ia i le finagalo o le Atua mo ia?

◆ Ina ua lafoaia e le au aposetolo Iesu, o ai na nofo ai pea, ma o le ā ua tupu ia te ia?