O le Soifuaga o Iesu ma Lana Faiva

“E Tatau ona Oti o Ia”

UA SAISAIA Iesu, e pei o se tagata solitulafono faatufanua, ma taʻitaʻiina atu ia Ana, o lē sa avea ma ositaulaga sili sa pule muamua i le taimi lea. O Ana sa avea o le ositaulaga sili ina o avea Iesu o se tama e 12 tausaga sa ia faaofo aʻoaʻo tulafono i le malumalu. O nisi o atalii o Ana sa mulimuli ane auauna e avea o ni ositaulaga sili, ma i le taimi lea o loo umia ai e Kaiafa le tane a lona afafine lena tulaga.

Atonu sa muai taʻitaʻiina atu Iesu i le fale o Ana, ona o le umi o le taimi sa avea ai o ia ma ositaulaga sili sa masani lelei ai o ia ma le olaga o lotu faa-Iutaia. I lenei malōlōga ina ia feiloai atu ia Ana na maua ai se taimi mo le Ositaulaga Sili o Kaiafa e faapotopoto le au Saniterini, sui e 71 o le faamasinoga maualuga a Iutaia, ma ina ia aoaoina ai foi ni molimau pepelo.

Ua fesiligia nei e le ositaulaga sili o Ana Iesu e uiga i ona soʻo ma e uiga i lana aʻoaʻoga. Ae peitai, ua tali atu Iesu: “Ua ou tautala faaali i tagata uma; ua ou aʻoaʻo soo i sunako ma le malumalu, e faapotopoto soo ai Iutaia; a ou te lei tautala faalilolilo i se mea e tasi. Pe se a le mea e te fesili mai ai ia te au? Ia e fesili i e na faalogo ai, se mea na ou tautala atu ai ia te i latou; faauta, ua latou iloa mea na ou fai atu ai.”

Ona o lenei mea, na po atu ai e se tasi o ofisa na tu latalata ane ia Iesu o ia i ona fofoga, ma faapea atu: “E te tali atu ea faapea i le ositaulaga sili?”

“Afai ua leaga laʻu upu,” ua tali atu ai Iesu, “ia molimau i lona leaga; a e afai ua lelei, se a le mea ua e po mai ai ia te au?” Ina ua uma lenei fetaliaiga, ona auina atu lea e Ana Iesu ua fusifusia ia Kaiafa.

Ae i le taimi lea ua amata ona faapotopoto ai ositaulaga sili uma ma toeaina ma tusiupu, ioe, le au Saniterini uma. E mautinoa lava o la latou fonotaga o loo faia i le fale o Kaiafa. Ae peitai, o le faia o sea faamasinoga i le po o le Paseka e manino lava o le faasagatau lea i le tulafono a Iutaia. Ae o lenei mea sa leʻi taitai ona taofia ai taʻitaʻi lotu mai i la latou fuafuaga leaga.

Ae ua maeʻa lea, i ni nai vaiaso ina ua uma ona toe faatuina e Iesu Lasalo, na filifili ai le au Saniterini ia i latou lava faapea e tatau ona oti o ia. Ma i le na o le lua aso ua mavae atu, i le aso Lulu, na taupulepule faatasi ai ia taʻitaʻi lotu ina ia puea Iesu e ala i se auala faatogafiti ina ia fasiotia ai o ia. Seʻi manatu, o le mea moni ua uma lava ona taʻusalaina o ia a o leʻi oo i lona faamasinoga!

Ua faia nei ni taumafaiga ina ia maua ai ni molimau o ē o le a saunia ni faamaoniga sese ina ia mafaia ai ona tuuaʻia Iesu. Ae peitai, e leai ni molimau na mafai ona maua e ioe faatasi a latou molimau. Mulimuli ane, na ō mai i luma tagata e toalua ma faapea mai: “Na ma faalogo atu ia te ia, ua faapea mai, Ou te lepetia lenei malumalu na faia e lima, ma ou toe faia se tasi i aso e tolu, e lei faia e lima.”

“E te le tali mai ea sina upu?” ua fesili atu ai Kaiafa. “Pe se a le mau a nei tagata ia te oe?” Ae e leʻi tali atu Iesu. E oo lava i lenei tuuaʻiga pepelo, na masiasi ai le au Saniterini, ona sa lē mafai e molimau ona tutusa ni a latou tala na fai atu. O lea ua taumafai ai le ositaulaga sili i se isi auala faatogafiti.

Ua iloa e Kaiafa le ilitata o tagata Iutaia e uiga i so o se tasi e faapea mai o ia lava le Alo o le Atua. I nisi aso e lua muamua atu, sa latou tuuaʻia ai ma le sauā Iesu faapea o ia o se tagata ua upu vale ua tatau i ai le oti, o se tasi foi taimi ua manatu sese ai faapea ua ia taʻua o ia e tutusa ma le Atua. Ua fai atu nei ma le togafiti poto Kaiafa: “Ou te fai atu ia te oe ia e tauto mai ia te i matou i le suafa o le Atua soifua, po o oe le Keriso, o le Alo o le Atua.”

 E ui lava po o ā manatu o tagata Iutaia, ae o Iesu moni lava o le Alo o le Atua. Ma o le lē tautala atu e ono mafai ona faamatalaina faapea o le faafitia lea o lona tulaga o le Keriso. O lea sa tali atu ma le lototele Iesu: “O aʻu lava lea; tou te iloa foi le Atalii o le tagata e nofo i le itu taumatau o Le e ona le mana, e sau foi o ia i ao o le lagi.”

I lenei mea, i se tulaga mataʻina, ua saeia ai e Kaiafa lona ofu ma alaga mai: “Ua upu leaga o ia i le Atua; se a se toe aoga o molimau ia te i tatou? faauta, ua outou faalogo nei i ana upu leaga i le Atua. Pe ni a fa outou?”

“E tatau ona oti o ia,” ua alalaga mai ai le au Saniterini. Ona amata lea ona latou ula ia te ia, ma ua latou fai atu upu leaga e tele ia te ia. Ua latou po atu ma tuufeanu i ona fofoga. O isi ua latou ufiufi ona fofoga ma tatuʻi ia te ia ma fai atu ma le faaʻamuʻamu: “Keriso e, ina iite mai ia te i matou, po o ai na na fasia oe?” O nei upu leaga, amioga lē faaletulafono na faia i le po na faamasinoina ai o ia. Mataio 26:57-68; 26:3, 4; Mareko 14:53-65; Luka 22:54, 63-65; Ioane 18:13-24; 11:45-53; 10:31-39; 5:16-18.

◆ O fea ua muai taʻitaʻiina atu i ai Iesu, ma o le ā na tupu ia te ia i inā?

◆ O fea ua sosoo ona aveina atu i ai Iesu, ma mo le ā le fuafuaga?

◆ Ua faapefea ona mafai e Kaiafa ona maua le au Saniterini ina ia alalaga mai faapea ua tatau ona oti Iesu?

◆ O ā upu leaga, ma amioga lē faaletulafono ua faia i le taimi o le faamasinoga?