Faaliliuina o le Natura Faaletagata

“E LĒ o ola tagata i le na o le tau ina ia tetee atu i mea leaga,” na fai mai ai se tagata fai filosofia o Sir Isaiah Berlin. “Latou te ola e ala i ni sini mautinoa, i le avea o tagata taitoatasi ma i se vaega tuufaatasi.” Ae e toafia ua mafai ona maua na “sini mautinoa”? I le tele o taimi e masani lava ona taaʻina le natura faaletagata i le mea e lē mautinoa ma e malaia ai.

Mo se faataʻitaʻiga, i Peretania, na oso aʻe talu ai nei lava le solitulafono o faiga sauā i le 11 pasene. Ua faapea mai le palemia o Peretania: “O la matou galuega, o le taumafai lea ina ia maua ni taofiofiga ina ia mafai ai e le taualumaga sili i le aʻoaʻoina o le poto lautele ona faaauau pea.” Ae pe ua mafai e tulafono ma uunaiga faapolotiki, e ui lava i ni taumafaiga ina ia faaleleia, ona suia moni le faanaunauga o tagata ina ia faia le mea sese? O le mea moni ua faaali tino mai lava o loo iai pea le solitulafono ma ua faateleina e ui lava i le faia o tulafono, ma e oo lava foi i taumafaiga maumauaʻi e faamalosia le tulafono. Ua manaomia se mea e sili atu na i lo o ni taofiofiga faaletulafono. E tatau ona suia le natura moni o le tagata.

I le Tusi Paia, i le aumaia o se vaaiga faamaoni, e pei lava ona iai e uiga i le olaga, o loo faamatalaina ai uiga leaga o le tagata. Mo se faaaʻoaʻoga, na tusi le aposetolo o Paulo i ona uso Kerisiano i Kalatia e uiga “i gaoioiga lē mamā, eleelea, ma le leaga . . . Ua fai ma fili o isi tagata isi tagata ma ua latou fetauai; ua oo ina latou felotoleagaai, feitagai, ma . . . ua matauʻa, onanā, faia poula, ma faia isi mea e pei o nei.” E tusa ai ma le Today’s English Version, o loo sii mai i inei, o nei mea uma o ni faiga paʻū maulalo “o mea ua faia e le natura faaletagata.”—Kalatia 5:19-21.

 Le Aa o le Faafitauli

Ae peitai, e lē o saʻo atoatoa le faaliliuga a le Today’s English Version, ma o le faaupuga “o mea ua faia e le natura faaletagata” ua na o se manatu e tali tutusa ma lea na taʻua moni e Paulo ae lē o le uiga moni lea. O le upu Eleni na faaaogā e Paulo, o le sarx, o lona uiga o le “tino,” ae lē o le “natura faaletagata.” Ona o lenei mafuaaga, ua tautala ai i inei le faaliliuga saʻo e uiga “i galuega a le tino” e faaalia ai le saʻo o le faaupuga a Paulo i la tatou gagana faaonaponei. *

O le faamatalaga a le Tusi Paia i le ulu atu o le agasala i le tulaga faaletagata e manino ma faigofie—o le mea moni, e matuā faigofie lava o lea ua filifili ai e le toatele ina ia lē talitonu i ai. Ua faapenei ona faamatalaina e Paulo: “Faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava.” (Roma 5:12) I inei ua faasino atu ai e Paulo i le Kenese, le uluai tusi o le Tusi Paia, ma i le foafoaina o le uluai tagata, o Atamu, ma lana avā, o Eva. O lo la lē usiusitai ma le loto i ai ua lauiloa. Ona o lenei mea, na faasalaina ai i laua i le oti. Ua tuufaasolo atu ai i a la fanau o la lē lelei atoatoa ma ua faapena foi ona oti ai. O lea la, “ua agasala tagata uma lava, ma ua le oo i le [mamalu o, NW] le Atua.” Ona o lenei mafuaaga autū, ua silisili ai ona avea le natura faaletagata i aso nei o se ata lafoia nenefu o le mea sa iai muamua ina o uluai foafoaina e le Atua le tagata lelei atoatoa.—Roma 3:23; Kenese, mataupu 2 ma le 3.

Ua Faaliliuina le Natura Faaletagata!

Ae peitai, e mafai ona foia le tele o uiga silisili ona leaga o le natura faaletagata. E moni, ua faapea mai le Tusi Paia e mafai ona tatou suia o tatou natura i se uiga o le suia o o tatou uiga faaletagata. Faapefea? Faatasi ai ma le fesoasoani a le agaga paia o le Atua.—Roma 8:9.

Na faapenei ona tusia e Paulo i lana tusi i uso Kerisiano i Kolose: “Ina ua toeseina e outou le tagata tuai atoa ma ana amio, a ua outou oofu i le tagata fou, o le ua faafouina i le poto, e faatatau ia foliga i le na faia o ia.” I faiga o uiga tuai faaletagata, ua ia lisiina ai nisi o uiga na e uunaia ai tagata ina ia taaʻina atu i le mea e mafai ona malaia ai: o le tuʻinanau leaga, o le lotoa, o le ita, ma le loto leaga.—Kolose 3:5-10.

I se tusi foi i Kerisiano i Efeso, ua toe taʻua ai e Paulo le manaoga mo se “tagata fou,” lea ua ia taʻu atu ia i latou na “faia e foliga i le Atua, i le amiotonu ma le amio lelei e faamaoni.” Ua ia faaauau lana talanoaga i lona faapea atu: “Ia teʻa ma outou upu faafiufiu uma lava, ma le lotoa, ma le ita, ma le leo tele, ma le upu leaga, atoa ma le loto leaga uma lava. A ia outou feagaleleiai, ia femutimutivaleai lo outou alofa.”—Efeso 4:24, 31, 32.

Pe sa faamatalaina e upu a Paulo le tulaga moni? Pe mafai ona suia moni uiga faaletagata? Ioe, e foliga mai o na uluai Kerisiano sa faia ni suiga matuā tetele i o latou olaga. I le avea o se vaega o tagata, sa latou tutū ese ai mai i le lalolagi o loo siomia ai i latou. Na tusia e Justin Martyr, o se tusitala o talafaasolopito i taimi o uluai Kerisiano: “O i matou o ē sa ʻinoʻino ma fefaaumatiaai, ma ona o le eseese o uiga, sa matou mumusu ai e nonofo faatasi ma tagata o se ituaiga ese, o lenei, talu ai le faaalia mai o Keriso, ua ola ai i tulaga o le fegalegaleai masani faatasi ma i latou, ma tatalo mo o matou fili, ma taumafai e faaoleole i latou o ē ʻinoʻino fua mai ia i matou ina ia ola e talafeagai ma poloaiga lelei atoatoa a Keriso.”

Ae faapefea i aso nei? Pe o mafai pea ona faia na suiga matuā tetele i le natura o se tagata? Ioe! E faitau sefulu afe ni faaaʻoaʻoga ua faaalia ai o loo faia pea na suiga mataʻina. O se tasi o na suiga o loo mulimuli mai.

O Setefano na ola aʻe i ni nofoaga tutotonu o fale gaosimea i Egelani. O lona tamā sa lē talitonu i le iai o le Atua. I le 12 o ona tausaga, na faafalepuipuiina ai Setefano mo le tolu tausaga i se aʻoga e aʻoaʻia ai tamaiti amio leaga. Sa ia ioe i ni solitulafono e 64 o le talepe fale! Sa leʻi pine ae lē toe faaaloalo i so o se faipule silisili, ma a o ia tuputupu aʻe, sa oo ina  faateteleina ona matuiā ana solitulafono. Sa aofia ai faiga taufaasese, le onā, le amio lē pulea, ma le fasi o leoleo, ma o lana teteega mulimuli na tuuina ai Setefano i le falepuipui. Sa oo ina matuā sauā lona natura. Na faapea mai o ia: “E leai se solitulafono o le a lē faia e le tagata e lē faaleatua pe afai e matuā tele lava ona manaoga.”

O le ā na mafaia ona suia sea tagata solitulafono loto maaa? Sa mulimuli ane talia e Setefano le fesoasoani mai i lona uso o lē na avea o se tasi o Molimau a Ieova. Ina ua uma ona suesueina le Tusi Paia mo sina taimi puupuu, na amata loa e Setefano ona ofu i le “tagata fou.” O suiga na ia faia sa matuā mataʻina lava. I le taimi nei, i le lima tausaga mulimuli ane, ua faaipoipo fiafia o ia ma ua avea o se sui maufaatuatuaina o le faapotopotoga o Molimau a Ieova lea o loo ia auauna ai o se auauna o le faiva.

O lea e mafai ona suia le natura faaletagata e tusa ai ma tulaga o tagata taitoatasi. Ae pe o vaivaiga faaletagata ua na o lea le mafuaaga mo le ‘faavaivaia o le taualumaga o le aʻoaʻoina o le poto lautele’ i aso nei?

“Le Tiapolo o le Tusi Paia”

Na tusia e le aposetolo o Paulo se valoaga mataʻina faatatau i nei “aso e gata ai.” O ana upu o loo toe aumaia i le pusa o loo i luga. Matau faapea o le faateleina ma le matuā faateleina o le sauā ma le leaga ua aumaia ai “aso faigata.” Pe ua na o le natura faaletagata ua tuuaʻia mo nei mea uma lava?—2 Timoteo 3:1.

E leai, e iai se isi mea, o se faanaunauga sili ona leaga e faamataʻu ai mo le leaga lea o loo ia faaaogāseseina vaivaiga faaletagata. E pei lava ona iloa e tagata le faigata ona talitonu faapea o le agasala ua tuufaasolo mai i le tagata, ua faapena ai foi ona faafaigata ia i latou ona talia faapea e iai se malosi e sili atu na i lo o le tagata lena o loo saili e faaaogāseseina o ia. Ae ua faapea mai le Tusi Paia o lena malosi o loo iai: o Satani le Tiapolo.

O le upu “Tiapolo” (o lona uiga, “taufaaleaga”) o loo iai e 33 taimi i le Tusi Paia, ma “Satani” (o lona uiga, “o le tetee”) e 52 taimi. O le tele o nei faasinoga ua iai ona fesootaiga ma le peresona agaga leaga lava lea e tasi. E ui i lea, o nisi ua faafitia le iai o Satani o se peresona, i le filifili e faapea mai: “O le natura faaletagata faatasi ai ma ona faanaunauga i le agasala o le tiapolo lea o le Tusi Paia.” * Peitai ane, o le mea malie, i le faamatalaga i le auauna faamaoni a Ieova o Iopu, ua faaaogā ai e le mau faa-Eperu le faaupuga has·Sa·tanʹ, o le Satani, ma i le Luka 4:2, tatou te faitau ai faapea o le Tiapolo (faa-Eleni, ho di·aʹbo·los) o lē na faaosoosoina Iesu. (Iopu 1:6) I nei faasinoga e lua, ua faasino ai e le kalama i se peresona patino. E lē aafia ai le natura faaletagata.

Ua faaopoopo e le aposetolo o Paulo i lo tatou malamalamaga le tulaga malosi o Satani ina a o ia tusi i tagata Efeso, ua ia tautala ai e uiga i “alii o le pouliuli o lenei lalolagi, . . . ma agaga leaga i mea o i le lagi.” (Efeso 6:12) Faatasi ai ma Satani le Tiapolo, o na “alii” o temoni, o meafaiola agaga leaga lē vaaia. O loo  latou “faasese i le lalolagi uma,” ua latou faaaogāina le tulaga paʻū o le tagata i le tele e mafai ai ina ia maua ai ni o latou lava aogā. (Faaaliga 12:9) O lenei le mafuaaga ua uunaia malosi ai e Paulo Kerisiano taitoatasi ina ia “mafaia ona tetee atu i togafiti a le tiapolo.” O ia o le pogai sili o le matuā faaleagaina o faiga faaletagata ia o loo tatou vaaia i o tatou autafa.—Efeso 6:11.

Le Toe Faafoisia

Ua faamautinoa mai i tatou e le tupulaga a Paulo, o Peteru e faapea, o Satani ma ana temoni o le a lē iai pea e faavavau e maileia le fanau a tagata. Ua faapea mai o ia: “E faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.” (2 Peteru 3:13) E moni, ua lē o toe pine nei, ona lē toe iai lea o lē amio leaga ma ana faiga uma lava e avea o se vaega o le mataaga faaletagata. O Satani ma ana temoni o le a faaumatia. (Roma 16:20; Faaaliga 20:1-3) Ona faaalia moni mai ai lava lea e le natura faaletagata “le [mamalu o, NW] le Atua,” faatasi ai ma le ola e faavavau o se faamoemoe mautinoa mo le aiga faaletagata.—Roma 3:23.

“Ua ou fai atu soo ma o le a ou fai atu soo ai pea,” ua faamautinoa ai e le peresitene Amerika o Thomas Jefferson, “faapea o le tilofaia i le suesueina o le Tusi Paia o le a avea ai o ni tagatanuu e sili atu ona lelei . . . Ua faia e le Tusi Paia tagata aupito sili ona lelei i le lalolagi.” E pei ona tatou iloa ai, o lo tatou natura e mafai ona faaliliuina pe afai tatou te tuuina atu se avanoa i le feau mamana a le Tusi Paia e faaaafia o tatou olaga. (Roma 12:2) E mafai ona tatou filifili ina ia aapa atu e talia le mea mamalu ma e faaleatua. Ma ina ia faamalosia i tatou i a tatou taumafaiga ina ia faaleleia atili, e mafai ona tatou filifili e auaufaatasi ma i latou o ē mananao faamaoni e faia le mea lava lea e tasi. (Eperu 10:24, 25) O loo naunau Molimau a Ieova e fesoasoani ia te oe i auala uma e mafai ai. Aiseā e lē faafesootai ai nei loa i latou!

[Faaopoopoga i lalo]

[Pusa i le itulau 6]

“ASO E GATA AI”—Le Faamatalaga a le Tusi Paia

“A e ia e iloa e oe lenei mea, o ona aso e gata ai e oo mai ai aso faigata; auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua amio Atua, a o le mana ua i lea mea ua latou teena; ia e ʻalo ese lava i tagata faapena.”—2 Timoteo 3:1-5.

[Ata i le itulau 7]

E lē o toe pine, ae faaatagia atoatoa e le natura faaletagata le mamalu o le Atua