Le Vaaiga a le Kerisiano i Faipule Silisili

“Ia usiusitai tagata uma i faipule silisili; auā e leai se pule pe a le mai le Atua; o pule uma lava o loo fai nei, ua faatuina e le Atua.”—ROMA 13:1.

1, 2. (a) Aiseā na avea ai Paulo o se pagota i Roma? (e) O ā fesili na lāgā e le talosaga a Paulo ia Kaisara?

NA TUSI e le aposetolo o Paulo upu o loo i luga i tagata Roma pe tusa ma le 56 T.A. I ni nai tausaga mulimuli ane, na avea ai o ia lava o se pagota i Roma. Aiseā? Sa osofaia o ia e ni tagata faatupu faalavelave i Ierusalema ma sa faasaoina o ia e fitafita Roma. I le aveina atu i Kaisareia, na fesagaʻi ai o ia ma tuuaʻiga sese, ae sa mafai lava ona ia puipuia o ia i luma o Filiki, le kovana Roma. I le faamoemoe o Filiki e faia se faiga faatogafalea, na ia taofia ai Paulo mo tausaga e lua i le falepuipui. I le iʻuga, na tapā ai e Paulo le kovana na sosoo ai o Feso, ina ia tuuina atu lona faamasinoga i luma o Kaisara.—Galuega 21:27-32; 24:1–25:12.

² O lona aiā lenei i le avea o ia o se tagatanuu Roma. Ae pe sa talafeagai mo Paulo le talosaga atu i lena faipule silisili faalemalo ae semanū na faasino atu e Iesu ia Satani faapea o ia moni o le “alii [pule] o lenei lalolagi” ma sa taʻua e Paulo lava ia Satani “o le atua o  lenei faiga o mea”? (Ioane 14:30; 2 Korinito 4:4, NW) Po o, pe sa umia e faipule silisili a Roma se ‘tulaga faatatau’ lea sa alagātatau ai mo Paulo ona vaavaai atu i lena faipule mo le puipuia o ana aiā? E moni lava, i uluai upu a aposetolo, “E tusa ona sili o lo matou anaana i le Atua i lo matou anaana i tagata,” pe ua faatagaina ai le usiusitai o Kerisiano i pule faaletagata pe afai lava e lē o aafia ai le lē usiusitai i le Atua?—Galuega 5:29.

3. O le ā se vaaiga taʻumatuaina na faaalia e Paulo, ma ua faapefea ona aafia ai le loto fuatiaifo?

³ Ua fesoasoani Paulo ia i tatou e taliina nei fesili i lana tusi i tagata Roma, o i inā o loo ia faaalia ai se vaaiga taʻumatuaina i pulega faaletagata. I le Roma 13:1-7, ua faamanino mai ai e Paulo le vaega e tatau ona faia e le loto fuatiaifo o se Kerisiano i le faapaleniina o le usiusitai atoatoa i lē Pule Silisili ese, o Ieova le Atua, faatasi ai ma le usiusitai faatatau i “faipule silisili.”

Iloaina o Faipule Silisili

4. O le ā le fetuunaiga o manatu na faia i le 1962, na lāgā ai ā fesili?

⁴ Mo ni nai tausaga, seia oo mai i le 1962, na taofi ai Molimau a Ieova faapea o faipule silisili, o Ieova le Atua ma Keriso Iesu. Ae peitai, i le ōgatasi ai ma le Faataoto 4:18, na faateleina le malamalama, ma sa toe faasaʻo ai lenei manatu, lea atonu e lagā ai ni fesili i manatu o nisi. Pe ua saʻo lo tatou fai atu nei faapea o nei faipule silisili o tupu, peresitene, palemia, pulenuu, faamasino, ma isi lava o ē umia pule faapolotiki faapena i le lalolagi ma faapea e ao ona tatou gauai atu i ai i se auala faatatau?

5. I le ā le auala ua fesoasoani le faamatalaga o loo siosiomia ai le Roma 13:1 ia i tatou e iloaina faipule silisili, ma ua faapefea i faaliliuga eseese o le Tusi Paia ona lagolagoina ai lenei faailoaga?

⁵ Na taʻua e Irenaeus, o se tusitala o le senituri lona lua T.A. e faapea, e tusa ai ma manatu o nisi tagata i ona aso, sa tautala Paulo i le Roma 13:1 “e tusa ai ma pule faaagelu [po o] pule lē vaaia.” Peitai, sa manatu Irenaeus lava ia i faipule silisili, “o ni pule moni faaletagata.” O le faamatalaga o loo siosiomia ai upu a Paulo ua faaalia ai le saʻo o Irenaeus. I fuaiupu faaiʻu o le Roma mataupu e 12, ua faaalia ai e Paulo le auala e ao i Kerisiano ona latou amioaʻi i luma o “tagata uma lava,” i le tausia e oo lava i ‘fili’ i se tulaga alofa ma le magafagafa. (Roma 12:17-21) E manino, o le faaupuga “tagata uma lava” e iai lona faatatauga i tagata o loo i fafo atu o le faapotopotoga Kerisiano. O lea, o “faipule silisili,” o ē na faamatalaina atili e Paulo, e ao foi ona faasino ia i latou i fafo atu o le faapotopotoga Kerisiano. Ina ia ōgatasi ai ma lenei mea, matau pe o faapefea ona taʻua e isi faaliliuga eseese le vaega muamua o le Roma 13:1: “E tatau i tagata uma ona usiusitai i pule faale-setete” (Today’s English Version); “e tatau i tagata uma ona gauai atu i pule o loo faia pulega” (New International Version); “e ao i tagata uma ona usiusitai i pule faalenuu.”—New Testament in Modern English a Phillips.

6. Ua faapefea i upu a Paulo e uiga i le totogia o lafoga ma taulaga ona faaalia ai faapea o faipule silisili e tatau ona o faipule masani?

⁶ Ua faapea atili mai Paulo o nei faipule o loo latou manaomia lafoga ma taulaga. (Roma 13:6, 7) E lē manaomia e le faapotopotoga Kerisiano lafoga po o taulaga; e lē manaomia foi e Ieova po o Iesu po o so o se isi lava “pule lē vaaia.” (2 Korinito 9:7) O lafoga e totogi atu i na o faipule masani. I le ioeina o lenei mea, o upu Eleni mo “lafoga” [“taulaga”] ma “telo” sa faaaogā e Paulo i le Roma 13:7 e faasino faapitoa atu i tupe e totogi i le Setete. *

7, 8. (a) E faapefea ona ōgatasi mau eseese ma le manatu faapea e ao i Kerisiano ona gauai atu i faipule faapolotiki o lenei lalolagi? (e) E na o afea e lē ao ai i Kerisiano ona gauai atu i poloaiga a “pule”?

⁷ Ae lē gata i lea, o upu apoapoai a Paulo ina ia gauai i faipule silisili e ōgatasi ma le poloaiga a Iesu ia avatu “mea a Kaisara, ia . . . avatu ia Kaisara,” lea ua fai ai “Kaisara” ma sui o faipule faalelalolagi. (Mataio 22:21) Ua ioe foi lenei mea faatasi ma upu mulimuli ane  a Paulo ia Tito: “Ia e faamanatu atu ia i latou ia latou usiusitai i alii sili ma faipule, ia gauai i alii, ia nofo sauniuni foi i latou i galuega lelei uma lava.” (Tito 3:1) I lea, pe a poloaiina Kerisiano e pulega a malo ina ia auai i galuega faaleatunuu, e tatau lava ona latou matuā gauai atu pe afai o na galuega o le a lē iʻu ai i le faagutugutulua i le faia o ni auaunaga e lē faale-Tusi Paia ina neʻi solia ai mataupu silisili faale-Tusi Paia, pei o na o loo maua i le Isaia 2:4.

⁸ Sa faamautinoa foi e Peteru faapea e ao ona tatou gauai atu i faipule faaletagata o lenei lalolagi ina ua ia faapea mai: “Ia outou usiusitai atu i tofiga uma a tagata auā o le Alii; po o le tupu ina ua sili; po o alii, o i latou ua aauina mai e ia ina ia faasalaina ai ē amio leaga, a ia viia ē amio lelei.” (1 Peteru 2:13, 14) I le ōgatasi ai ma lenei mea, o le a ono mafai ai foi ona utagia e Kerisiano apoapoaiga a Paulo ia Timoteo: “O lenei, e muamua i mea uma ou te apoapoai atu ia faia olega, ma tatalo, ma faatoga, ma faafetai mo tagata uma lava; mo tupu ma i latou uma ua i ai le pule, ina ia tatou nonofo ma le le atuatuvale ma le filemu.” *—1 Timoteo 2:1, 2.

9. Aiseā ua lē aveesea ai le mamalu mai ia Ieova i le faasino atu i faipule faaletagata faapea e “silisili”?

⁹ I le taʻua o pule faaletagata e “silisili,” pe i lea ea ua tatou aloese ai mai i le tuuina atu o le mamalu e ono ma tatau mo Ieova? E leai, auā o Ieova e sili mamao atu na i lo na o sē e silisili. O ia o le “Alii Pule Silisili,” o “Lē Silisili ese.” (Salamo 73:28, NW; Tanielu 7:18, 22, 25, 27; Faaaliga 4:11; 6:10) O le tuuina atu o le gauai saʻo i pule faaletagata, o le a leai se mea e aloese ai fua mai la tatou tapuaiga i Lē Pule Silisili, le Alii Pule Silisili ese o Ieova. O lea, o le ā le tele ua silisili ai nei faipule? I le na o le tuufeagai ai lava ma isi tagata ma i o latou lava tulaga o galuega. O i latou ua tuuina atu i ai le pule e pulea ma puipuia faiga faaletagata, ma ona o lenei ua latou faavaeina ai ni tulafono e tusa ma amioga i mataupu lautele.

‘Ua Faatuina e le Atua i o Latou Tulaga Tatau’

10. (a) O le faamatalaga a Paulo i le ‘faatuina’ o faipule silisili i o latou tulaga ua faamaonia ai le ā e uiga i le pule silisili a Ieova lava ia? (e) O le ā ua faatagaina e Ieova e tusa ai o le ‘faatuina’ o nisi pule, ma ua faapefea ona tofotofoina ai ana auauna i lea mea?

¹⁰ O le silisili ese o Ieova le Atua e oo lava i luga aʻe o faipule faaletagata ua vaaia i le faapea o nei faipule ‘ua faatuina e le Atua i o latou tulaga tatau.’ Ae peitai, o lenei faamatalaga ua lāgā ai se fesili. I ni tausaga ina ua uma ona tusi e Paulo nei upu, ona tuuina mai ai lea ma le lē mataofiofia e le emeperoa Roma o Neru se tauiviga o sauaga ogoogo faasaga i Kerisiano. Pe sa faatuina e le Atua lava ia Neru i lona tulaga? E matuā leai lava! E lē faapea o pule taitoatasi uma ua filifilia e le Atua ma faatuina i se tulaga ‘e ala i le alofa faifua o le Atua.’ Na i lo o lea, i nisi taimi e faaliliuina ai e Satani tagata e leai se alofa i ni tulaga e avea o ni pule, ma ua faatagaina e Ieova lenei mea, faatasi ai ma tofotofoga e aumaia e na pule i luga o ana auauna o loo tausi i le faamaoni.—Faatusatusa Iopu 2:2-10.

11, 12. O ā tulaga ua iai i faamaumauga ia na faaliliuina totino ai e Ieova faipule masani i o latou tulaga pe aveesea foi?

¹¹ Ae peitai, ua faasalavei totino ane Ieova i tulaga o nisi pule po o ni pulega a malo ina ia faataunuuina ai lana fuafuaga sili ona maualuga. Mo se faaaʻoaʻoga, i taimi o Aperaamo na faatagaina ai tagata Kanana e nonofo pea i le laueleele o Kanana. Peitai, mulimuli ane, na liaʻiina e Ieova i latou ma avatu le laueleele i le fanau a Aperaamo. I le malaga a le nuu o Isaraelu mo sina taimi i le vao, sa leʻi faatagaina i latou e Ieova e faatoilalo Amoni, Moapi, ma le Mauga o Seira. Ae na ia poloaiina i latou ina ia faaumatia malo o Sekono ma Oko. —Kenese 15:18-21; 24:37; Esoto 34:11; Teuteronome 2:4, 5, 9, 19, 24; 3:1, 2.

¹² Ina ua maeʻa faamautu Isaraelu i Kanana, sa faaauau e Ieova ona naunau faapitoa tuusaʻo lava i pule na sa aafia ai ona tagata. I nisi taimi, ina ua agasala Isaraelu, sa faatagaina e Ieova i latou ina ia oo i lalo o pulega a nuu faapaupau. Ina ua latou salamō, na ia toe aveesea na pulega mai le nuu. (Faamasino 2:11-23) Mulimuli ane, na ia faatagaina Iuta, faatasi ai ma le tele o isi atunuu, ina ia ō atu i lalo o le pulega a Papelonia. (Isaia 14:28–19:17; 23:1-12; 39:5-7) Ina ua ō atu faatagataotaua Isaraelu i Papelonia, na valoia ai e Ieova le tulai mai ma le paʻū o malo malolosi o le lalolagi na o le a aafia ai ona tagata mai le taimi o Papelonia seia oo mai i o tatou lava aso.—Tanielu, mataupu 2, 7, 8, ma le Tanielu 11.

13. (a) E tusa ai o le pese a Mose, aiseā na poloaia ai e Ieova tuaoi o tagata? (e) Aiseā na toe faafoisia ai mulimuli ane e le Atua Isaraelu i lona laueleele?

¹³ Na pese Mose e uiga ia Ieova: “O ona po na tofitofia ai e le Silisili ese o nuu, ma na faataapeapeina e ia le fanau a Atamu, na ia faia tuaoi o le nuu, e tusa ma le faitau o le fanauga a Isaraelu. Auā o le tofi o Ieova o lona nuu lea; o Iakopo o lona tofi lea ua fuafuaina.” (Teuteronome 32:8, 9; faatusatusa Galuega 17:26.) Ioe, ina ia tauaveina ana fuafuaga, na poloaiina ai e le Atua po o ā pule o le a tumau ma o ā pule o le a faaumatia. I lenei auala, na ia tofia ai i le fanau a Aperaamo se laueleele e fai mo latou tofi ma mulimuli ane toe faafoisia i latou i lena laueleele, ina ia mafai ai mulimuli ane e le Fanau folafolaina ona aliaʻi mai ai i inā, e pei lava ona sa valoia.—Tanielu 9:25, 26; Mika 5:2.

14. Mo le vaega tele, i le ā le uiga ua tuu ai e Ieova faipule faaletagata i o latou tulaga faatatau?

¹⁴ Ae peitai i le tele o tulaga, na tuu ai e Ieova pule i o latou tulaga faatatau, i se uiga faapea ua ia faatagaina tagata ina ia umia tulaga o pulega faatatau o le tasi i le isi peitai e sili pea lava o ia. I lea, ina ua tu Iesu i luma o Ponotio Pilato, na ia taʻu atu i lena pule: “E leai sau pule ia te au, ana le tuuina mai ia te oe mai lugā.” (Ioane 19:11) E lē o le uiga o lenei mea faapea sa tuu totino i ai e le Atua Pilato i lona tulaga lea, ae sa uiga faapea o lana pule i le pe faasaoina pe fasiotia Iesu sa faia i le na o le faatagaga a le Atua.

“Le Atua o le Lalolagi Nei”

15. I le ā le auala ua tuuina atu ai e Satani le pule i lenei lalolagi?

¹⁵ Ae faapefea la e uiga i le faamatalaga a le Tusi Paia faapea o Satani o le atua, po o le pule, o lenei lalolagi? (Ioane 12:31; 2 Korinito 4:4) O le ā moni lava e uiga i le gugutu a Satani, ina ua ia faaali atu ia Iesu malo uma o le lalolagi ma faapea atu: O “lenei pule uma, . . . ua tuuina mai ia te au, ou te avatu ai foi i lē ou te manao i ai”? (Luka 4:6) E leʻi tetee Iesu i le gugutu a Satani. Ma sa ōgatasi upu a Satani ma le mea na mulimuli ane tusi atu ai Paulo i tagata Efeso: “Tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi.” (Efeso 6:12) E lē gata i lea, ua taʻua i le tusi o Faaaliga Satani faapea o se tarako tele ua na avatu i se faatusa pei se manu feai o faiga faapolotiki o le lalolagi  “lona malosi, ma lona nofoālii, ma le pule tele.”—Faaaliga 13:2.

16. (a) E mafai faapefea ona iloa faapea o le pulega a Satani e faatapulaa? (e) Aiseā ua faataga ai e Ieova Satani e faia lana pulega i le fanau a tagata?

¹⁶ Peitai ane, matau o le faamatalaga a Satani ia Iesu, O “lenei pule uma, . . . ua tuuina mai ia te au,” e faaalia ai faapea o ia foi e faia lana pulega i le na o se faatagaga. Aiseā ua tuuina mai ai e le Atua lenei faatagaga? O le galuega a Satani i le avea o se pule o le lalolagi sa amata i tuā i Etena ina ua ia tuuaʻiina i le lautele le Atua faapea e pepelo ma e lē o tonu ona faatinoina Lana pule silisili ese. (Kenese 3:1-6) Na mulimuli atu Atamu ma Eva ia Satani ma lē usiusitai ai ia Ieova le Atua. I lena lava taimi, sa ono mafai ai e Ieova, faatasi ai ma le faamasinoga tonu atoatoa, ona faasalaina Satani ma ona soʻo fou e toalua. (Kenese 2:16, 17) Ae o upu a Satani sa o se luʻi totino moni lava ia Ieova. O lea sa faatagaina ai e le Atua i lona atamai Satani e ola pea mo sina taimi, ma sa faatagaina Atamu ma Eva ina ia faatoateleina a la fanau a o leʻi feoti. I lenei auala, ua saunia ai e le Atua se taimi ma se avanoa e faatinoina ai le pepelo o le luʻi a Satani.—Kenese 3:15-19.

17, 18. (a) Aiseā ua mafai ai ona tatou faapea atu o Satani o le atua o lenei lalolagi? (e) I le ā le auala o le a “leai [ai] se pule” i lenei lalolagi “pe a le mai le Atua”?

¹⁷ O mea tutupu talu mai le taimi i Etena ua faaalia ai faapea o tuuaʻiga a Satani o ni matuā pepelo lava. Sa leʻi maua e fanau a Atamu se fiafiaga i lalo o le pulega a Satani po o pulega ua faia e tagata. (Failauga 8:9) I le isi itu, o feutagaiga a le Atua ma ona lava tagata ua faataʻitaʻia ai le silisili ese o le pulega tauatua. (Isaia 33:22) Ae talu ai o le toatele o le fanau a Satani latou te lē talia le pule silisili ese a Ieova, ua latou auauna ai ma le iloa pe lē iloa foi, ia Satani e avea o lo latou atua.—Salamo 14:1; 1 Ioane 5:19.

¹⁸ O le a lē pine, ae foia finauga na lāgā i Etena. O le a pule atoatoa le Malo o le Atua i pulega o mataupu a le fanau a tagata, ma o le a tuuina ai Satani i le to e lē gata. (Isaia 11:1-5; Faaaliga 20:1-6) Peitai ane, i le taimi nei, o nisi ituaiga o faatulagaga, po o fausaga, ua manaomia e le fanau a tagata ina ia mafai ai ona iai se olaga maopoopo. O Ieova “e le o le Atua ia o le [lē maopoopo], a o le filemu.” (1 Korinito 14:33) I lea, ua ia faatagaina ai fausaga o pulega ina ia faia i nuu na sa atiina aʻe i fafo atu o Etena, ma ua ia faatagaina tagata e faia a latou pulega i lenei faatulagaga. I lenei auala, “e leai se pule pe a le mai le Atua.”

Faipule Tonu o Latou Mafaufau

19. Pe o pule faaletagata uma o i lalo o le pulega tuusaʻo a Satani?

¹⁹ Talu mai lava Etena, ua maua ai e Satani se saʻolotoga tele i le fanau a tagata, ma ua ia faaaogā lenei saʻolotoga e faaliliuina ai mea tutupu i le lalolagi, ina ia ōgatasi ma lana gugutu lea na fai ia Iesu. (Iopu 1:7; Mataio 4:1-10) Ae peitai, e lē o le uiga o lenei mea faapea o pule uma lava i lenei lalolagi o loo gauai saʻo atu i le pulega a Satani. O nisi—e pei o Neru i le uluai senituri ma Adolf Hitler i o tatou aso—sa faaalia se agaga moni faasatani. Ae o isi e leai. O Sekio Paulo, le sui konesula o Kuperu, sa o se “tagata faautauta” o lē na “manao i le fia faalogo i le afioga a le Atua.” (Galuega 13:7) O Kaliona, le sui konesula o Akaia, sa musu e uunaia o ia e tagata Iutaia o ē na tuuaʻia Paulo. (Galuega 18:12-17) O le toatele o isi pule sa faatinoina la latou pule i se auala mamalu ma le matuā faaeteete.—Faatusatusa Roma 2:15.

20, 21. O ā mea tutupu i le 20 senituri ua faataʻitaʻia ai faapea e lē o taimi uma e faia ai e pule faaletagata le manao o Satani?

²⁰ Na valoia i le tusi o Faaaliga faapea i le  “aso o le Alii,” e amata mai i le 1914, o le a oo ai lava ina faaliliuina e Ieova pulega faaletagata e faaumatia fuafuaga a Satani. Ua faamatalaina e le Faaaliga se lolo o sauaga, ua tatalaina atu e Satani faasaga i Kerisiano faauuina, na o le a foloina e “le fanua.” (Faaaliga 1:10; 12:16) O elemeni o loo iai i “le fanua [eleele],” le sosaiete faaletagata o loo iai nei i luga o le lalolagi, o le a puipuia tagata o Ieova mai sauaga a Satani.

²¹ Pe ua tupu moni ea lenei mea? Ioe. Mo se faaaʻoaʻoga, i le taʻi sefulu tausaga o le 1930 ma le 1940, na matuā oo ai Molimau a Ieova i le Iunaite Setete i lalo o ni omiga sili, pagatia ai i osofaiga a tagata faatupu faalavelave ma le faaauau pea ona saisaia ma le lē tonu. Sa latou maua se mapusaga ina ua tuuina atu e le Faamasinoga Sili Ona Maualuga i le Iunaite Setete ni iʻuga filifiliga e iloa tino ai le faaletulafono o la latou galuega. I isi foi nofoaga, ua fesoasoani atu ai faipule silisili i tagata o le Atua. I ni tausaga e 40 ua mavae i Aialani, na osofaia ai e tagata faatupu faalavelave Katoliko Roma ni Molimau se toalua i le aai o Cork. Na oo atu se leoleo o le malo o lea aai ma fesoasoani i Molimau, ma na aʻoaʻia ai i se faamasinoga o tulafono i latou na faia le osofaiga. I le tausaga foi talu ai i Fiti, na faafofogaina ai e le fono a alii sili se lafo faatu ina ia faasaina le galuega a Molimau a Ieova. O se tasi o alii sili na matuā tautala atu ma le lototele mo Molimau, ma sa faigofie ai lava ona tafea le lafo.

22. O ā fesili o le a sosoo ai ona talanoaina?

²² E leai, e lē o auauna faipule masani i taimi uma i le itu a Satani. E mafai e Kerisiano ona gauai atu i faipule silisili e aunoa ma le gauai atu ia Satani lava ia. E moni, o le a gauai atu pea i latou i nei faipule i le umi lava o loo faatagaina ai e le Atua pulega a faipule e iai. Peitai ane, o le ā la le uiga o le gauai atu? Ma o le ā e mafai e Kerisiano ona faatalitalia mai i faipule silisili? O nei fesili o le a talanoaina i mataupu mo suesuega e amata i le itulau e 16 ma le 21 o lenei mekasini.

[Faaopoopoga i lalo]

O le a Faapefea ona E Tali?

□ O ai faipule silisili?

□ E mafai faapefea ona tatou fai atu e “leai se pule pe a le mai le Atua”?

□ Aiseā ua faataga ai e Ieova le lalolagi ia iai i lalo o le pulega a Satani?

□ I le ā le auala ua faatuina ai e le Atua faipule faaletagata ‘i o latou tulaga faatatau’?

[Fesili mo le Suʻesuʻega]

[Ata i le itulau 13]

Ina ua uma le susunuina o Roma, na faaalia ai e Neru se agaga moni faasatani

[Ata i le itulau 15]

O Sekio Paulo, le sui konesula o Kuperu, sa manao e fia faalogo i le afioga a le Atua