Lo Tatou Gauai Faatatau i Faipule Silisili
Lo Tatou Gauai Faatatau i Faipule Silisili
“O lenei, e tatau ona usiusitai.”—ROMA 13:5.
1. O ā mea faigata na tofo i ai Molimau a Ieova i lima o faipule silisili faa-Nasi, ma pe o lenei mea ona o le ‘faia o le amio leaga’?
IA IANUARI 7, 1940, na faasalaina ai Franz Reiter ma isi talavou Ositeria e toalima i le oti e ala i le vavaeina o o latou ulu. O i latou o ni Bibelforscher, Molimau a Ieova, ma na maliliu i latou ona sa lē mafai i lo latou loto faamaoni ona tagofia auupega mo le Malo o Hitila. O Reiter sa o se tasi o le faitau afe o Molimau o ē na maliliu mo lo latou faatuatua i le taimi o le taua e lua a le lalolagi. E toatele foi isi na onosai i tausaga uumi sa iai i nofoaga e saisaitia ai. Pe na puapuagatia i latou uma nei e ala i le “pelu” a faipule silisili faa-Nasi ona o le faia o le “amio leaga”? (Roma 13:4) E matuā leai lava! O isi upu atili a Paulo ua faaalia ai faapea o nei Kerisiano sa usiusitai i poloaiga a le Atua i le Roma mataupu e 13, e ui lava sa puapuagatia ai i lima o pule.
2. O le ā le mafuaaga malosi mo le gauai atu i faipule silisili?
2 I le Roma 13:5, ua tusi ai le aposetolo: “O lenei, e tatau ona usiusitai, e le gata ona o le toasa, a e peitai ona o le loto fuatia ifo.” Muamua lava, na faapea mai ai Paulo o le tauaveina e faipule silisili o le “pelu” sa o se mafuaaga lelei e gauai atu i ai. Peitai ane, nei la ua ia aumaia se mafuaaga e sili atu ona malosi: o le loto fuatiaifo. Ua tatou tauivi e auauna i le Atua “ma le loto fuatia ifo ua mamā.” (2 Timoteo 1:3) Ua taʻu mai e le Tusi Paia ia i tatou ina ia gauai i faipule silisili, ma tatou te usiusitai ona tatou te mananao e faia le mea ua tonu i fofoga o le Atua. (Eperu 5:14) E moni, o o tatou loto fuatiaifo ua aʻoaʻoina e le Tusi Paia ua uunaia ai i tatou e usiusitai i le pule e tusa lava pe leai se tagata o iai e vaaia i tatou.—Faatusatusa Failauga 10:20.
“O le Mea Foi Lea Tou te Avatu ai Taulaga”
3, 4. O le ā le talaaga ua i Molimau a Ieova, ma aiseā e ao ai i Kerisiano ona totogi lafoga?
3 I ni nai tausaga ua mavae i Nikeria, sa iai ni faanunununu ona o le totogia o lafoga. Sa leiloa ai nisi o ola, ma sa valaau ai e faipule faalemalo le vaegaʻau. Na ulufale atu ni fitafita i se Maota o le Malo o loo faagasolo ai le faia o se sauniga ma tāpā ai ina ia iloa le mafuaaga ua potopoto ai. Ina ua iloa faapea o se sauniga o le suesuega faale-Tusi Paia a Molimau a Ieova, ona fai atu lea o le ofisa sa taʻitaʻi i fitafita ina ia ō ese, ma faapea atu: “O Molimau a Ieova e lē o ni tagata faatupu vevesi i le totogia o lafoga.”
4 Sa iai se talaaga o na Molimau i Nikeria mo le ola e talafeagai ma upu a Paulo: “O le mea foi lea tou te avatu ai taulaga, auā o auauna i latou a le Atua, o loo finafinau i lenei lava mea.” (Roma 13:6) Ina ua tuuina atu e Iesu le tulafono, ‘Avatu mea a Kaisara ia Kaisara,’ sa fetalai o ia e uiga i le totogia o lafoga. (Mataio 22:21) O faipule masani o loo saunia auala, puipuiga a leoleo, fale tusi, faiga tau i femalagaaiga, aʻoga, auaunaga i falemeli, ma isi mea e tele. E masani pea ona tatou faaaogāina nei sauniuniga. Ua o se mea e tonu lava la le ao ona tatou totogi mo i latou e ala i a tatou lafoga.
“Ia Avatu i Tagata Uma Lava a Latou Mea”
5. O le ā le uiga o le faaupuga “ia avatu i tagata uma lava a latou mea”?
5 Ua faaauau mai Paulo: “Ia avatu i tagata uma lava a latou mea; o le taulaga i e ua tatau i ai le taulaga; o le telo i e ua tatau i ai le telo; o le mataʻu i e ua tatau i ai le mataʻu; o le faaaloalo i e ua tatau i ai le faaaloalo.” (Roma 13:7) O upu “uma lava” ua aofia ai pulega faaletagata uma o lona uiga o auauna a le Atua mo le lautele. E leai ni faaeseesega. E tusa lava pe tatou te ola i lalo o se faiga faapolotiki lea tatou te lē mananao ai, e totogi lava a tatou lafoga. Afai e faatagaina lotu e lē totogia a latou lafoga i mea o loo tatou nonofo ai, e mafai la e faapotopotoga ona faaaogā lenei avanoa. Ma i le pei o isi tagatanuu, e mafai e Kerisiano ona faaaogā so o se fuafuaga faaletulafono ua faia e faatapulaa ai lafoga o loo latou totogia. Ae e leai se Kerisiano e tatau ona ʻaloese ma le lē faaletulafono i le totogiina o lafoga.—Faatusatusa Mataio 5:41; 17:24-27.
6, 7. Aiseā e ao ai ona tatou totogi lafoga e tusa lava pe o faaaogāina tupe e faatupe ai se mea tatou te lē fiafia i ai pe e tusa lava foi pe sauāina i tatou e faipule masani?
6 Peitai ane, seʻi faapea la e foliga mai o se lafoga e lē tonu. Pe e faapefea pe afai o le isi vaega o le tupe lea e avatu i le lafoga o loo faaaogā e faatupeina ai se isi mea tatou te lē ioe i ai, e pei o le faia o le faapaʻū tama, fale faaputu toto, po o polokalama na e feteenai ma o tatou tulaga solitu? E totogi pea lava a tatou lafoga uma. O faipule lava e tatau ona iai le avega tauave mo le auala e faaaogā ai tupe o lafoga. E leʻi tofia i tatou e faamasino faipule. O le Atua o le “faamasino o le lalolagi,” ma i lana lava taimi atofa, o le a ia tāpā ai se faamatalaga a pulega faalemalo i le auala na latou faaaogāina ai la latou pule. (Salamo 94:2; Ieremia 25:31) E totogi pea la a tatou lafoga, seia oo ina tupu lena mea.
7 Ae faapefea pe afai e sauāina i tatou e le pulega? E totogi pea lava a tatou lafoga ona o auaunaga ia o loo faia i aso uma lava. E tusa ai o Molimau ia e pagatia i sauaga i se tasi atunuu o Aferika, na faapea mai le San Francisco Examiner: “E mafai ona e manatu ia i latou e avea o ni tagatanuu e fai ma faaaʻoaʻo. Latou te filigā e totogi a latou lafoga, tausi i tagata mamaʻi, tau faasaga i amioga valea.” Ioe, o na Molimau sauāina sa totogi a latou lafoga.
“Mataʻu” ma le “Faaaloalo”
8. O le ā le “mataʻu” tatou te avatu i faipule silisili?
8 O le “mataʻu” i le Roma 13:7 e lē o se mataʻu palaʻai ae, na i lo o lea, o se āva mo pulega faalemalo, o se mataʻu i le solia o ana tulafono. O lenei āva e tuuina atu ona o le tulaga o loo aafia ai, ae lē faapea ona o le tagata o loo umia lea tulaga. Ina o tautala faavaloaga le Tusi Paia i le emeperoa Roma o Tiperio, ua taʻua o ia “o le e inosia.” (Tanielu 11:21) Ae o ia o le emeperoa, ma ona o lea, e ao ai i se Kerisiano ona avatu le mataʻu ma le faaaloalo ia te ia.
9. O ā nisi o auala ua tatou tuuina atu ai le mamalu i faipule faaletagata?
9 E tusa ai o le faaaloalo, tatou te mulimuli ai i le poloaiga a Iesu ina ia aua le avatua ni tofiga e faavae i tulaga faalotu. (Mataio 23:8-10) Ae pe a oo i tulaga o faipule faalemalo, tatou te fiafia e taʻua i latou e ala i le po o le ā lava ni taʻu atonu e manaomia e faaaloalo ai ia i latou. Sa faaaogā e Paulo le faaupuga “Lau Afioga Mamalu” ina ua tautala atu i kovana Roma. (Galuega 26:25, NW) Na taʻua e Tanielu Nepukanesa o “Loʻu alii.” (Tanielu 4:19) I aso nei, e mafai e Kerisiano ona faaaogā faaupuga e pei o “Lau Afioga” po o “Lau Afioga Mamalu.” Atonu foi latou te tutū pe a ulu mai le faamasino i le potu faamasino pe ifo ma le faaaloalo i luma o se pule pe afai o le aganuu lea.
Gauai Faatatau
10. Na faapefea ona faaalia e Iesu faapea e iai tapulaa i mea e manaomia e se faipule faaletagata mai i se Kerisiano?
10 Talu ai e gauai atu Molimau a Ieova i pulega faaletagata, aiseā la na puapuagatia ai Franz Reiter ma le matuā toatele o isi a o latou faia faapea? Ona o lo tatou usiusitai e fai faatatau, ma e lē aloaia pea e pule faapea e iai ni tapulaa faataatia faale-Tusi Paia i le mea na te manaomia. Afai e tāpā e pulega se mea e feteenai ma le loto fuatiaifo ua aʻoaʻoina o se Kerisiano, o lona uiga ua na tāpā se mea e sili atu na i lo o le tapulaa ua tuuina mai e le Atua. Na faaalia e Iesu lenei mea ina ua ia fetalai atu: “O mea a Kaisara, ia . . . avatu ia Kaisara; a o mea a le Atua ia avatu ia i le Atua.” (Mataio 22:21) Pe a tāpā e Kaisara se mea e ā le Atua, e tatau ona tatou faailoaina faapea e muamua mea manaomia e le Atua.
11. O le ā le mataupu silisili, ua faataʻitaʻia ai faapea e iai tapulaa i mea e mafai e se faipule faaletagata ona tāpā, ua talia i le lautele?
11 Pe o lenei tulaga o se taumafaiga e faavaivaia pe faaʻoleʻole? E leai lava. O le mea moni, o se faalautelega o se mataupu silisili ua iloa lelei e le toatele o atunuu malamalama. I lona 15 o senituri, sa tuuina atu ai se tagata e igoa ia Peter von Hagenbach i le faamasinoga ona o le tausolomua i le faia o se pulega o faiga taufaamataʻu i le vaifanua o Europa lea na ia pulea. Na teena lana tetee, faapea sa na ona ia mulimuli atu lava i poloaiga a lona alii, le Duke o Burgundy. O le taofi faapea o se tagata e faia ni faiga sili ona leaga e lē tuuaʻia pe afai e mulimuli atu o ia i poloaiga a se faipule silisili, sa faia faapea mo le tele o taimi talu mai ai—sa sili ona mataʻina i tagata solitulafono o taua faa-Nasi a o leʻi oo mai le vaega e Foia Finauga Faavaomalo i Nuremberg. Sa masani lava ona teena lea taofi. Na faapea mai le Vaega e Foia Finauga Faavaomalo i lana faamasinoga: “E iai i tagata taitoatasi tiute tauave faavaomalo na e tatau ona faamuamua ona tuuina atu i ai le usiusitai, na i lo o tiute tauave faalemalo.”
12. O ā nisi o faaaʻoaʻoga faale-Tusi Paia o ni auauna a le Atua o ē na mumusu e usiusitai i mea lē tatau sa tāpā e faipule silisili?
12 Ua iloa tino pea e auauna a le Atua faapea e iai tapulaa o le gauai atu lea latou te tuuina atu ma le loto faamaoni i faipule silisili. I le taimi na fanau ai Mose i Aikupito, na poloaiina ai e Farao fafine faatosaga Eperu e toalua ia fasiotia pepe tama fou uma lava Eperu faatoʻā fananau. Ae peitai, sa faasaoina e faatosaga ola o pepe. Pe sa sese mo i laʻua le lē usiusitai ia Farao? E leai, sa la mulimuli i o la loto fuatiaifo na tuuina mai e le Atua, ma sa faamanuia i laʻua e le Atua ona o lea mea. (Esoto 1:15-20) Ina o tafea Isaraelu i Papelonia, na poloaiina ai e Nepukanesa ona ofisa, e aofia ai taulelea Eperu o Sataraka, Mesako ma Apeteniko, ina ia ifo atu i luma o se tupua na ia faatuina i le fanua laugatasi o Turu. Sa mumusu Eperu e toatolu. Pe sa sese i latou? E leai, talu ai o le mulimuli atu i le poloaiga a le tupu o le a uiga ai i le lē usiusitai i le tulafono a le Atua.—Esoto 20:4, 5; Tanielu 3:1-18.
“Usiusitai i le Atua o le Pule”
13. O le ā le faaaʻoaʻoga na aumaia e uluai Kerisiano i le mataupu e uiga i le usiusitai faatatau i faipule silisili?
13 Sa faapena foi, ina ua poloaiina e faipule Iutaia Peteru ma Ioane ina ia aua neʻi toe talaʻi e uiga ia Iesu, na la tali atu: “Pe tonu i luma o le Atua, ona ma faalogo ia te outou, a e ma te le faalogo i le Atua, ina filifili ia outou.” (Galuega 4:19; 5:29) Sa lē mafai ona la gūgū. Ua tataʻi mai foi e le mekasini o le The Christian Century manatu i se tasi tulaga loto faamaoni na faia e uluai Kerisiano ina ua faapea mai: “Sa leʻi auauna uluai Kerisiano i ni vaegaʻau. Ua matauina e Roland Bainton faapea, ‘mai le iʻuga o le vaitaimi o le Feagaiga Fou e oo atu i le sefulu tausaga o le 170-180 T.A. e leai lava so o se faamaoniga o le iai o Kerisiano i se vaegaʻau.’ (Christian Attitudes Toward War and Peace [Abingdon, 1960], itu. 67-68). . . . Ua faapea mai Swift, ‘ua iloa e Justin Martyr o se faiga faifai pea a Kerisiano le faamamao mai i gaoioiga sauā.’”
14, 15. O ā nisi o mataupu silisili faale-Tusi Paia na sa pulea ai le usiusitai faatatau o uluai Kerisiano i faipule faaletagata?
14 Aiseā na lē auauna ai uluai Kerisiano e avea o ni fitafita? E lē taumatea, sa suesueina ma le faaeteete e tagata taitoatasi le Afioga a le Atua ma tulafono ma faia ai lana lava faaiʻuga totino e faavae i lona loto fuatiaifo ua aʻoaʻoina i le Tusi Paia. Sa solitu i latou, “e le ni o le lalolagi,” ma o lo latou solitu na faasaina ai i latou e filifilia ni faiga itu i feteenaiga a lenei lalolagi. (Ioane 17:16; 18:36) Ae lē gata i lea, o ni o le Atua i latou. (2 Timoteo 2:19) O le tuuina o latou olaga mo le Setete o lona uiga o le avatua lea ia Kaisara o le mea e ā le Atua. Ae lē gata i lea, sa o i latou o se vaega o le auuso faavaomalo ua fusia faatasi i le alofa. (Ioane 13:34, 35; Kolose 3:14; 1 Peteru 4:8; 5:9) Ona o le loto fuatiaifo lelei sa lē mafai ai ona latou tagofia auupega ma le faanaunauga e fasiotia se uso Kerisiano.
15 E faaopoopo atu i lenei, e lē mafai e Kerisiano ona auaufaatasi ma aso faamanatu lauiloa faalotu, e pei o le tapuaiga i le emeperoa. O le iʻuga, na manatu ai ia i latou o ni “tagata e matuā ese lava ma e mataʻutia, ma na masalomia ai e le isi vaega uma o tagata i latou.” (Still the Bible Speaks, a W. A. Smart) E ui lava na tusi Paulo faapea e ao i Kerisiano ona ‘tuuina atu ia te ia o lē e tatau i ai le mataʻu,’ ae sa leʻi galo ia i latou lo latou mataʻu e sili atu ia, po o le āva mo, Ieova. (Roma 13:7; Salamo 86:11) O Iesu lava ia na fetalai: “Aua foi tou te matatau i e fasioti le tino, a e latou te le mafaia ona fasioti le agaga; a e lelei ona outou matatau i le ua mafai ona fano ia te ia le agaga atoa ma le tino i Kēna.”—Mataio 10:28.
16. (a) O ā vala ua i Kerisiano e fuafua ai ma le faaeteete lo latou gauai atu i faipule silisili? (e) O le ā ua faaalia e le pusa o loo i le itulau e 25?
16 I le avea o ni Kerisiano, ua tatou fesagaʻi ai ma luʻi faapena i aso nei. E lē mafai ona tatou faia se vaega i so o se ituaiga o ifo i tupua i aso nei—pe faia ni gaoioiga faatapuaiga agaʻi i se tupua po o se faatusa po o le tuuina atu o le faaolataga i se tagata po o se faalapotopotoga. (1 Korinito 10:14; 1 Ioane 5:21) Ma i le pei o uluai Kerisiano, e lē mafai ona tatou faagutugutulua i lo tatou solitu faa-Kerisiano.—Faatusatusa 2 Korinito 10:4.
“Le Agamalu ma le Mataʻu”
17. O le ā le fautuaga na avatu e Peteru ia i latou ua puapuagatia ona o le loto fuatiaifo?
17 Na tusi mai le aposetolo o Peteru e uiga i lo tatou tulaga faamaoni ma faapea mai: “O le mea lenei e mālie, pe afai o le loto [fuatiaifo] i la le Atua e onosai ai se tasi i le tiga, o loo faatigaina fua lava o ia.” (1 Peteru 2:19) Ioe, o le mea malie i le Atua pe afai e tumau mausalī se Kerisiano e ui lava i sauaga, ma e iai se aogā faaopoopo faapea o le a faamalosia ai ma faamamāina ai le faatuatua o se Kerisiano. (Iakopo 1:2-4; 1 Peteru 1:6, 7; 5:8-10) Na tusi mai foi Peteru: “Afai e tigaina outou ona o le amiotonu, amuia outou, Aua foi tou te fefefe i lo latou faamatau mai, aua foi le atuatuvale. A ia paia le Alii le Atua i o outou loto. Ia saunia pea lava outou e tali atu ma le agamalu ma le mataʻu ia i latou uma o e fesili mai ia te outou i le uiga o le faamoemoe o loo ia te outou.” (1 Peteru 3:14, 15) O se fautuaga aogā tele!
18, 19. Ua mafai faapefea e se uiga o le faaaloalo loloto ma le magafagafa ona fesoasoani pe afai e faatapulaa e faipule lo tatou saʻolotoga i le tapuaiga?
18 Pe a mapuna aʻe sauaga ona o le lē malamalama o pule i le tulaga faa-Kerisiano pe ona o taʻitaʻi lotu Kerisinetoma ua latou faia tala sese i pule, e uiga i Molimau a Ieova, o le tuuina atu la o mea moni i pule atonu o le a iʻu ai i le faamāmāina o omiga. O le maua o le loto agamalu ma le faaaloalo loloto, o le a lē tau faasaga atu ai i se tulaga faaletino se Kerisiano i ē faasauā. Ae peitai, na te faaaogāina auala uma faaletulafono e mafaia e puipuia ai lona faatuatuaga. Ona ia tuua lea o le mataupu i aao o Ieova.—Filipi 1:7; Kolose 4:5, 6.
19 O le āva loloto e taʻitaʻiina ai foi se Kerisiano e faia le mea na te mafaia, e aunoa ma le faaleagaina o lona loto fuatiaifo, ia usiusitai i pule. Mo se faaaʻoaʻoga, afai ua faasaina sauniga a le faapotopotoga, o le a sailia e Kerisiano nisi o auala e lē iloa tele e faaauau ai le fafagaina i le laoai a Ieova. Ua taʻu mai e le Pule Silisili ese o Ieova le Atua ia i tatou e ala ia Paulo: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi.” (Eperu 10:24, 25) Ae o na faatasiga e mafai ona faia ma le faautauta. E tusa lava pe na o se toaitiiti e auai, e mafai lava ona tatou mautinoa faapea e faamanuia e le Atua na faatulagaga.—Faatusatusa Mataio 18:20.
20. Afai ua faasaina le talaʻiina atu o le tala lelei i le lautele, atonu e ao faapefea ona feagai Kerisiano ma lea tulaga?
20 E faapena foi, o nisi o faipule silisili ua latou faasaina le talaʻiina o le tala lelei i le lautele. E manatua e Kerisiano o loo ola ai i lalo o a latou pulega faapea, e ala ia Iesu lava ia, na fetalai atu ai Lē Pule Silisili ese: “Ia muai talaʻiina foi le tala lelei i nuu uma lava.” (Mareko 13:10) I lea, latou te usiusitai i Lē Pule Silisili ese e tusa lava po o le ā le tau ia i latou. I so o se mea lava sa mafaia ai, sa talaʻi atu ai le au aposetolo i le lautele ma mai i lea fale i lea fale, ae e iai foi isi auala e mafai ona oo atu ai i tagata, e pei o molimau lē fuafuaina. (Ioane 4:7-15; Galuega 5:42; 20:20) E masani lava o le a lē āiā faipule silisili i le galuega talaʻi pe afai e na o le Tusi Paia ua faaaogā—lea ua faatāuaina ai le manaoga mo Molimau uma ina ia aʻoaʻoina lelei i le faia o ni talanoaga mai le Tusi Paia. (Faatusatusa Galuega 17:2, 17.) E ala i le faamalosi, ae i le āva tatau, e masani ai lava ona maua e Kerisiano se auala e usiusitai atu ai ia Ieova e aunoa ma le faaita o faipule silisili.—Tito 3:1, 2.
21. Afai ua lē mapu Kaisara i ana sauaga, o le ā le auala e tatau i Kerisiano ona filifilia?
21 Peitai ane, i nisi taimi, e lē mapu ai faipule silisili i le sauāina o Kerisiano. I lea, i le loto fuatiaifo mamā, o le a na ona mafai ai ona tatou tumau i le faia o le mea ua saʻo. Sa fesagaʻi le talavou o Franz Reiter ma se filifiliga: pe faagutugutulua i lona faatuatua po o le oti. Talu ai sa lē mafai ona ia taofia le tapuai atu i le Atua, sa alu atu ai o ia ma le lototele i lona oti. I le po a o leʻi oti o ia, na tusi atu ai Franz i lona tinā: “O le a fasiotia aʻu i le taeao a taeao. Ua ou maua loʻu malosi mai le Atua, le malosi lava lea e pei ona iai pea i Kerisiano moni uma i tuā i aso ua mavae . . . Afai o le a e tu mausalī seia oo i le oti, o le a ta toe feiloai i le toetu.”
22. O le ā le faamoemoe ua ia i tatou, ma e ao faapefea ona tatou agaʻi atu i luma i le taimi nei?
22 I se aso o le a iai le fanau uma a tagata i lalo o le na o le tasi lava le tulafono, le tulafono a Ieova le Atua. Seia oo i lena taimi, e tatau ai ona tatou matauina ma se loto fuatiaifo lelei le faatulagaga a le Atua ma tausisia lo tatou gauai atu faatatau i faipule silisili ae i le taimi lava e tasi ia usiusitai i lo tatou Alii Pule Silisili ese o Ieova i mea uma lava.—Filipi 4:5-7.
E Te Manatua?
□ O le ā le mafuaaga malosi e gauai atu ai i faipule silisili?
□ Aiseā e lē tatau ai ona tatou faatalatu e totogi atu lafoga ua tuuina mai e Kaisara?
□ O le ā le ituaiga o faaaloalo e ao ona tatou tuuina atu i faipule?
□ Aiseā e faatatau ai lo tatou gauai atu ia Kaisara?
□ Pe afai ua sauāina i tatou ona ua manaomia e Kaisara le mea e ā le Atua, e faapefea ona tatou tali atu i ai?
[Fesili mo le Suʻesuʻega]
[Pusa i le itulau 25]
Faaaloalo, e leʻi ifo
I se tasi taeao i le vasega, na matauina ai e Terra, o se talavou Kanata e Molimau a Ieova, faapea sa ave ai i fafo mai le potu aʻoga e lona faiaʻoga se tamaitiiti aʻoga mo ni nai minute. E leʻi pine lava mulimuli ane, ona faapea lemu atu lea o le faiaʻoga ia Terra ina ia la ō atu faatasi ma ia i le ofisa o le pule aʻoga.
I le taunuu atu i inā, sa vaaia ai e Terra le fuʻa o le malo o Kanata o fofola i luga o le kesi a le pule aʻoga. Ona fai atu lea o le faiaʻoga ia Terra e feanu i le fuʻa! Sa manatu o ia faapea talu ai ona sa leʻi usu Terra i le vii o le fuʻa o le malo pe faʻalo foi i ai, o le a leai la se pogai mo ia e lē faia ai faapea. Sa musu Terra, ma faamatala atu faapea e ui lava e lē ifo Molimau a Ieova i le fuʻa, ae latou te faaaloalo i ai.
I le toe foi atu i le potu o le vasega, na faalauiloa atu ai e le faiaʻoga faapea na seʻi faatoʻā uma lava ona ia faia se suesuega. Sa feauauai ona ia avatu taitoatasi ni tamaiti aʻoga se toalua i le ofisa o le pule aʻoga ma faatonu i laʻua ina ia feanu i le fuʻa. O le tamaitiiti muamua sa faia sana vaega i faamanatuga o mea faapaupau, ae sa feanu o ia i le fuʻa ina ua fai atu e faia faapea. I le faaeseesega, sa leʻi usu Terra i le vii o le fuʻa pe faʻalo i le fuʻa; ae peitai, sa musu o ia e lē faaaloalo i le fuʻa i lenei auala. Sa faasino atu e le faiaʻoga faapea o Terra o se tasi o lē na faaalia le faaaloalo saʻo.—1990 Yearbook of Jehovah’s Witnesses.
[Ē Ana le Ata i le itulau 21]
French Embassy Press & Information Division
USSR Mission to the UN