O le ā ua Tupu i le Natura Faaletagata?

“Aiseā ua tatou maua ai le agaleagaina o tamaiti i lenei tupulaga? Aiseā ua tatou maua ai uiga faasaunoa i manu? Aiseā ua tatou maua ai faiga sauā? . . . Aiseā ua fiafia ai tagata e fai faiga taufaamataʻu? Aiseā ua fiafia ai tagata i vailaau oona? . . . Aiseā ua liliu atu ai nisi tagata i na uiga faavae ua ōia ai le taualumaga atoa o le aʻoaʻoina o le poto lautele e ui lava ua latou maua mea uma?”

ONA fesili sa fesiligia leotele e le palemia o Peretania. Atonu sa e fesili ai foi i na fesili i le tele o taimi. Pe ua e maua ni tali faamalie loto?

I le faatinoina o se ata atoa o ana fesili, na faapea mai ai le palemia: “Mo le tele o tausaga a o oʻu talavou ma a o iai i faiga faapolotiki faatasi ai ma oʻu faamoemoega uma ma miti ma faanaunauga fiasili, sa foliga mai ia te aʻu ma ē na matou tupulaga faapea afai matou te maua se tupulaga o le a matou maua ai fale lelei, aʻoaʻoga lelei, se tulaga lelei o le olaga, o le a masuigamalie mea uma ma o le a ao ai ia i matou ona iai se lumanai talafeagai ma le matuā faigofie lava. Ua matou iloa nei faapea ua lē o lea le tulaga. Ua matou fesagaʻi nei ma faafitauli moni lava o le natura faaletagata.”—O upu faasisipa o ā matou.

O le natura faaletagata e mafai ona faamatalaina faapea “o se tuufaatasiga o vaega e tele o manatu faavae ma uiga o tagata.” E tino mai, o manatu feteenai ma uiga o tagata e mafai ona faapogaia ai faafitauli totino, i tulaga faaleatunuu pe oo lava i va o malo. Ae o le ā le tele ua tuuaʻia moni ai le natura faaletagata mo gaoioiga mataʻutia o faiga sauā, faiga taufaamataʻu, le faatau solo atu o vailaau faasaina, ma isi mea faapena i aso nei?

Pe ua na o le natura faaletagata e tuuaʻia mo tulaga ua faamataʻuina ina ia “faavaivaia ai le taualumaga atoa o le aʻoaʻoina o le poto lautele”? Pe po o iai nisi vala e ao ona tatou manatunatu i ai e faamatalaina ai le pogai ua faigofie ai ona taaʻina tagata i faiga paʻū maulalo, ma le manatu faapito ae semanū e mafai ona latou taumafai ina ia ausia se tulaga maualuga, ma taumafaiga e sili atu ona mamalu? Seʻi o tatou vaai.