E Tauia le Alofa Moni
E Tauia le Alofa Moni
“E le amioletonu le Atua, na te le faagalogaloina la outou galuega ma le faamalosi i le alofa ua outou faaali mai ai i lona suafa.”—EPERU 6:10.
1, 2. Aiseā ua tauia ai totino le alofa moni ia i tatou taitoatasi?
O LE ALOFA lē manatu faapito, o le uiga silisili ona lelei, silisili ona mamalu, silisili ona tāua e mafai ona tatou faaalia. O lenei alofa (faa-Eleni, a·gaʹpe) ua maumauaʻi pea ona ia manaomia le tele o mea mai ia i tatou. Peitai, talu ai na faia i tatou e le Atua o le faamasinotonu ma le alofa, ua tatou iloa ai faapea e moni, e tauia lena alofa lē manatu faapito. Aiseā ua faapea ai?
2 O le tasi o mafuaaga e faapea ai e tauia le alofa moni e aofia ai le uiga faavae o le mafaufau ma faalogona, o iʻuga o mafaufauga ma faalogona i o tatou tino. Ua faapea mai se tasi tagata o lē e suesue i le tigā o le mafaufau: “‘O le alofa i lou tuaoi,’ o se tasi o vaega aupito atamai o fautuaga faafomaʻi sa faapea ona tuuina mai.” Ioe, “o le tagata alofa ua agalelei o ia ia te ia lava.” (Faataoto 11:17) E faapena foi ona tāua upu ia: “E faatamaoaigaina le tagata matamau; o ia foi lē faasūsū i nisi, e faasūsūina lava o ia.”—Faataoto 11:25; faatusatusa Luka 6:38.
3. E faapefea ona gaoioi le Atua ina ia tauia ai le alofa moni?
3 E tauia foi le alofa ona e tauia e Ieova le lē manatu faapito. Ua tatou faitau ai: “O le ua alofa i le tagata mativa, na te avatua ana mea ia Ieova; e tauia mai foi [e le Atua] ana mea na avatu ia te ia.” (Faataoto 19:17) E gaoioi Molimau a Ieova e tusa ma nei upu pe a latou folafola atu le tala lelei o le Malo o le Atua. Latou te iloa ‘e lē amioletonu le Atua ma na te lē faagalogaloina la latou galuega ma le alofa ua latou faaalia mo lona suafa.’—Eperu 6:10.
La Tatou Faaaʻoaʻoga Sili ona Lelei
4. O ai ua saunia le faaaʻoaʻoga sili ona lelei faapea o le alofa moni e tauia, ma ua faapefea ona ia faia?
4 O ai ua saunia le faaaʻoaʻoga sili ona lelei faapea e tauia le alofa moni? Ioe, e leai lava se isi na ia saunia lenei mea ua na o le Atua! Sa “alofa mai le Atua i le lalolagi [o le fanau a tagata], ua ia au mai ai lona Atalii e toatasi.” (Ioane 3:16) O le aumaia o lona Alo ina ia mafai ai e i latou e talia lena taulaga togiola ona maua le ola e faavavau, e mautinoa lava sa matuā tele se tau mo Ieova, ma ua faaalia manino ai faapea e ia te ia le alofa ma le tiga alofa. Ua faaalia atili lenei e ala i le mea moni faapea ‘i taimi uma lava sa tigaina ai Isaraelu i Aikupito, sa avea o se mea tiga foi lea ia te ia.’ (Isaia 63:9) Pagā la le tele o le tiga atonu sa ia Ieova i le silasila atu o puapuagatia lona Alo i luga o le satauro ma faafofoga atu i lana alaga mai: “Loʻu Atua e, loʻu Atua e, se a le mea ua e tuulafoai mai ai aʻu?”—Mataio 27:46.
5. O le ā ua tupu ona o le alofa tele o le Atua i le fanau a tagata na ia aumaia ai lona Alo e fai ma taulaga?
5 Pe sa silafia e Ieova le tauia o lona lava faailoaina o le alofa moni? E mautinoa lava sa sili ona faapena. Ma le mataʻina, maeu se tali sa mafai ona togi atu e le Atua i mata o le Tiapolo ona sa faamaonia le faamaoni o Iesu e ui lava i mea uma sa mafai ona faia e Satani ia te ia! (Faataoto 27:11) O le mea moni, o le a faataunuuina mea uma lava e le Malo o le Atua i le faamamāina o le suafa o Ieova mai le taʻuvalea, le toe faafoisia o le Parataiso i lenei lalolagi, ma o le a taunuu lava le avatua i le faitau miliona o le ola e faavavau auā e alofa tele le Atua i le fanau a tagata, o lea na ia aumai ai le ʻoa aupito sili ona pele i lona finagalo e fai ma taulaga.
Le Faaaʻoaʻoga Lelei a Iesu
6. O le alofa na uunaia ai Iesu e faia le ā?
6 O se isi faaaʻoaʻoga lelei e faamaonia ai faapea e tauia le alofa moni, o le Alo lea o le Atua, o Iesu Keriso. E alofa o ia i lona Tamā faalelagi, ma o lena alofa na uunaia ai Iesu e faia le finagalo o Ieova e tusa lava po o le ā le tau. (Ioane 14:31; Filipi 2:5-8) Sa faaalia pea e Iesu lona alofa mo le Atua e ui lava i nisi taimi sa uiga ai faapea sa tatau ona ia ole atu i lona Tamā “ma le tagi tele ma loimata.”—Eperu 5:7.
7. I ā auala na iloa ai e Iesu le tauia o le alofa moni?
7 Pe sa tauia Iesu mo lea alofa faataulagaina? O le mea moni sa faia faapea! Seʻi manatu i le olioli na ia maua mai i mea lelei uma na ia faia i le taimi o le tolu ma le ʻafa tausaga o lana faiva. Maeu le tele na ia fesoasoani ai i tagata i le faaleagaga ma le faaletino! I lo o mea uma lava, e ala i le faatinoina faapea o se tagata lelei atoatoa e mafai ona tausisia le faamaoni i le Atua e ui lava i mea uma sa aumaia e Satani e faasagatau ai ia te ia, na maua ai e Iesu le lotomalie i le faamaonia o le pepelo a le Tiapolo. E lē gata i lea, i le avea o se auauna faamaoni a le Atua, na maua ai e Iesu le taui sili o le ola e lē mafai ona oti i lona toe faatuina aʻe i le ola faalelagi. (Roma 6:9; Filipi 2:9-11; 1 Timoteo 6:15, 16; Eperu 1:3, 4) Ma maeu ni faaeaga ofoofogia o loo taatia mai mo ia ia Amaketo ma le taimi o lana Pulega faa-Meleniuma, pe a toe faafoisia le Parataiso i le lalolagi ma le faatutūina o le faitau afe o miliona mai le oti! (Luka 23:43) E lē mafesiligia na silafia e Iesu le tauia o le alofa moni.
Le Faaaʻoaʻoga a Paulo
8. O ā mea na oo ia Paulo ona o lona alofa moni mo le Atua ma ona uso a tagata?
8 I le tasi taimi na fesili ai le aposetolo o Peteru ia Iesu: “Faauta, ua matou tuua mea uma, a e matou mulimuli atu ia te oe; se a foi se mea matou te maua?” I se vaega, na tali atu Iesu: “Ai se tasi ua ia tuua o fale, po o uso, po o tuafāfine, po o le tamā, po o le tinā, po o le avā, po o le fanau, po o fanua ona o loʻu igoa, e maua e ia e taisautuaselau, e fai foi mona tofi le ola faavavau.” (Mataio 19:27-29) Ua tatou maua se faaaʻoaʻoga e ootia ai o lenei mea i le aposetolo o Paulo, o lē na olioli i le tele o faamanuiaga, e pei ona faamauina faapitoa e Luka i le tusi o Galuega. O le alofa moni mo le Atua ma uso a tagata sa faapogaia ai Paulo e tuua lana galuega i le avea o se Faresaio faamamaluina. Seʻi manatu foi, i mea sa onosaia e Paulo i le sasaina, tulaga a tali oti ai, lamatiaga, ma le tuua na o ia—o nei mea uma ona o le alofa moni mo le Atua ma Lana auaunaga paia.—2 Korinito 11:23-27.
9. Na faapefea ona tauia Paulo mo le faaalia o le alofa moni?
9 Pe sa tauia e Ieova Paulo mo sea faaaʻoaʻoga lelei i le faaalia o le alofa moni? Ia, seʻi mafaufau i le maeu o le fua tele sa iai i le faiva a Paulo. Sa mafai ona ia faavaeina lea faapotopotoga ma lea faapotopotoga Kerisiano. Ma maeu ni vavega na tuuina atu e le Atua ia te ia le malosi e faia ai! (Galuega 19:11, 12) Sa faaeaina foi Paulo e maua ni faaaliga uiga ese ma tusia tusi e 14 ia ua avea nei o se vaega o Tusitusiga Kerisiano Eleni. Ae o le pale o nei mea uma lava, ua tuuina atu ai ia te ia le taui o le ola e lē mafai ona oti i le lagi. (1 Korinito 15:53, 54; 2 Korinito 12:1-7; 2 Timoteo 4:7, 8) E mautinoa lava sa iloa e Paulo e tauia e le Atua le alofa moni.
E Tauia le Alofa Moni i o Tatou Aso
10. O le ā atonu e ono aafia ai i le avea o se soʻo o Iesu ma i le faailoa atu o lo tatou alofa mo Ieova?
10 Ua faapena foi ona iloa e Molimau a Ieova i aso nei faapea e tauia le alofa moni. I le faaalia o lo tatou alofa mo Ieova e ala i lo tatou tutū i lana itu ma avea o soʻo o Iesu, e mafai foi ona aafia ai o tatou lava ola i le avea o ni ē tausisi i le faamaoni. (Faatusatusa Faaaliga 2:10.) O le pogai lena na fetalai ai Iesu faapea e ao ona tatou faitau le tau. Ae tatou te lē faia lena mea e manatu maumaututū ai faapea o le avea o se soʻo e tauia pe lē tauia foi. Na i lo o lea, tatou te manatu faapea ina ia sauniuni ai i tatou lava e totogi atu e tusa lava po o le ā le tau atonu o le a iai e tusa ma lo tatou tulaga faasoʻo.—Luka 14:28.
11. Aiseā ua lē taulau ai i nisi ona tuuina atu i latou i le Atua?
11 I aso nei, e toatele—e lē taumatea e faitau miliona—ua talitonu i le feau ua avatua e Molimau a Ieova ia i latou mai le Afioga a le Atua. Ae ua latou solomuli i tua mai le tuuina atu ma le papatisoina o i latou lava i le Atua. Pe o lenei mea e ono mafai ona faapea ona o le leai o so latou alofa moni lea e pei ona iai i isi mo le Atua? E toatele ua lē taulau ona faia ni laasaga o le tuuina atu ma papatisoina ona latou te mananao ina ia alofagia pea i latou e a latou paaga lē talitonu. O isi ua lē mafai ona lalata atu i le Atua ona o loo ia i latou le uiga o se tagata faipisinisi o lē na ia taʻu i se Molimau: “Ou te fiafia i le agasala.” E manino lava, o tagata faapena latou te lē talisapaia mea uma na faia e le Atua ma Keriso mo i latou.
12. O le ā ua fai mai ai lenei mekasini e faatāuaina ai taui o le iloaina po o le poto lena e taaʻina ai i tatou ia latalata atu i le Atua i le alofa moni?
12 Afai e ia i tatou le talisapaia moni aʻiaʻi mo mea uma lava ua faia e Ieova le Atua ma Iesu Keriso mo i tatou, o le a tatou faaalia lenei mea e ala i le lotomalie e usiusitai atu e tusa lava po o le ā le tau ina ia auauna ai i lo tatou Tamā faalelagi ma i le avea o se soʻo o Iesu. Ona o le alofa moni mo le Atua, ua mafai ai e tane ma fafine i matātā uma o le olaga—tagata faipisinisi o loo manuia, tagata lauiloa i taaloga, ma isi mea faapena—ona suia galuega e lelei ai i latou lava ona o le faiva faa-Kerisiano, e pei ona sa faia e le aposetolo o Paulo. Ma e leai lava se mea latou te maua e suia ai taui e maua mai ona o le iloa ma le auauna i le Atua. E tusa ai o lenei mea, na faapea mai i se tasi taimi Le Olo Matamata: “Ua matou fesili i nisi taimi, Pe toafia ni uso o le a loto malilie e talia se afe talā mo le mea ua latou iloa e uiga i le Upu Moni? E leai lava se lima na vaaia! O ai e talia le sefulu afe talā? E leai se tasi! O ai e talia le miliona talā? O ai o le a talia le lalolagi atoa e fesuiai ma le mea ua ia iloa e uiga i le peresona Tauatua ma le Fuafuaga Tauatua? E leai lava se tasi! Ona matou faapea atu lea, Uo pele, e lē o outou o se motu o tagata e matuā lē lotomalie. Afai ua outou lagona ua outou mauʻoa ma o le a leai se mea tou te talia e fesuiai ma lo outou iloa o le Atua, ona outou lagona lea ua tou matuā mauʻoa lava e pei foi ona matou iai.” (Tesema 15, 1914, itulau 377) Ioe, o le poto saʻo lelei e uiga i le Atua ma ana fuafuaga ua tosina atu ai i tatou e latalata ia te ia i le alofa moni e matuā tauia.
13. E ao faapefea ona tatou manatu i le suesuega totino?
13 Afai tatou te alolofa i le Atua, o le a tatou taumafai la ina ia iloa ma faia lona finagalo. (1 Ioane 5:3) O le a tatou vaai ai ma le uigā i suesuega totino, tatalo, ma le auai i sauniga faa-Kerisiano. O nei mea uma e manaomia ai le faataulagaina totino, auā o nei gaoioiga o loo aafia ai le faaaluina o le taimi, malosi, ma isi lava alāmanuia. Atonu e tatau ona tatou filifili i le va o le matamata i se polokalama o televise ma le faia o se suesuega totino faale-Tusi Paia. Ae maeu le tele o le malosi faaleagaga ua ia i tatou, maeu le tele o le sili ona lelei o la tatou molimau atu i isi, ma maeu le tele o mea tatou te maua mai i sauniga faa-Kerisiano pe a tatou faia ma le uigā na suesuega ma faataatia se taimi e lava mo lea mea!—Salamo 1:1-3.
14. O le ā le tāua o le tatalo ma se faiā lelei ma Ieova le Atua?
14 Pe tatou te olioli e lē aunoa e talanoa atu i lo tatou Tamā faalelagi e ala i le ‘finafinau i le tatalo’? (Roma 12:12) Pe masani ona tatou pisi naʻuā ua tatou lē faaalia atu ai le tāua moni o lenei faaeaga tautele? ‘O le tatalo e lē aunoa’ o se auala matuā tāua e faamalosia ai la tatou faiā ma Ieova le Atua. (1 Tesalonia 5:17) Ma e leai se mea e pei o se faiā lelei ma Ieova e fesoasoani ia i tatou pe a tatou fesagaʻi ma tofotofoga. O le ā na mafaia ai e Iosefa ona tetee atu ina ua tofotofoina e le avā a Potifara? Ma aiseā sa lē taofia ai e Tanielu le tatalo ina ua faasaina e le tulafono a Metai ma Peresia o ia ona toe ole atu ia Ieova? (Kenese 39:7-16; Tanielu 6:4-11) Ioe, o se faiā lelei ma le Atua sa fesoasoani i na tane ina ia oo ina manumalo, lea foi o le a faapena ona fesoasoani ia i tatou e faia faapea i aso nei!
15. E ao faapefea ona tatou manatu i sauniga faa-Kerisiano, ma aiseā?
15 Ia, o le ā le uigā o tatou faia ai lo tatou auai i a tatou sauniga e lima faalevaiaso? Pe o tatou faataga le lē lavā, sina faaletonu itiiti faaletino, po o sina faalē lelei itiiti o le tau e aiā i la tatou tiute tauave o le aua le tuulafoaiina le faapotopotoina ma uso talitonu? (Eperu 10:24, 25) Na iloa e se tasi tagata fai masini e lelei le totogi i Amerika faapea sa masani lava ona faalavelavea lona auai i sauniga faa-Kerisiano ona o lana galuega. O lea na suia ai lana galuega, ua faaitiitia le tupe maua ina ia mafai ai ona auai e lē aunoa i sauniga uma a le faapotopotoga. O a tatou sauniga e mafai ai ona tatou olioli i feofoofoaiga o faalaeiauga ma faamalosia ai e le tasi le faatuatua o le isi. (Roma 1:11, 12) I nei mea uma lava, pe ua tatou lē maua ai ea faapea “o le tele ana e lulu e tele foi ana e selesele”? (2 Korinito 9:6) Ioe, o le faaalia o le alofa moni i auala faapea e matuā tauia.
Le Alofa Moni ma la Tatou Faiva
16. O le ā e ono iʻu i ai pe a uunaia i tatou e le alofa e molimau atu lē fuafuaina?
16 O le alofa e uunaia ai i tatou e talaʻi atu le tala lelei i le avea ma tagata o Ieova. Mo se faataʻitaʻiga, na te uunaia i tatou ia auai i molimau lē fuafuaina. Atonu e mafai ona tatou faatalatū e molimau atu lē fuafuaina, ae o le alofa o le a uunaia i tatou e tautala atu. Ioe, o le alofa o le a faapogaia i tatou e mafaufau i ni auala atamai e amata ai se talanoaga ona tataʻi atu ai lea i le Malo. O se faataʻitaʻiga: I luga o se vaalele, na iloa ai e se toeaina Kerisiano o loo nofo o ia i tafatafa o se patele Katoliko Roma. Muamua lava, sa saputu atu e le toeaina i le patele ni fesili faagauloto. Peitai, i le taimi ina o le a alu ese le patele ma le vaalele, o lona naunau na uunaia ai o ia e ave ni tusi se lua o a tatou tusi. Maeu se iʻuga lelei mo le molimau lē fuafuaina!
17, 18. Ua uunaia i tatou e le alofa e faia le ā e tusa ai ma le faiva faa-Kerisiano?
17 O le alofa moni foi ua na uunaia i tatou e auai e lē aunoa i le galuega talaʻi mai lea fale i lea fale ma isi vala o le faiva faa-Kerisiano. I le tulaga faapea ua mafai ai ona tatou faia ni talanoaga faale-Tusi Paia, o le a tatou avatu ai le faamamaluina ia Ieova le Atua ma o le a fesoasoani ia i latou pei ni mamoe ia iai i le auala i le ola e faavavau. (Faatusatusa Mataio 7:13, 14.) E tusa lava pe lē mafai ona tatou faia ni talanoaga faale-Tusi Paia, ae o a tatou taumafaiga o le a lē avea o ni ʻai a le matagi. O lo tatou iai i fale o aiga ua avea o se molimau, ma o le a maua ai e i tatou lava aogā mai le faiva, auā e lē mafai ona tatou folafola atu upu moni o le Tusi Paia e aunoa ma le faamalosia ai o lo tatou faatuatua. E moni, e manaomia le loto maulalo e alu atu ai mai lea fale i lea fale, ‘faia mea uma lava ona o le tala lelei, ina ia mafai ai foi ona tatou tufa atu i isi.’ (1 Korinito 9:19-23) Ae ona o le alofa mo le Atua ma uso a tagata, ua tatou faia ai ma le loto maulalo ni taumafaiga ma ua tauia i le ʻoa o faamanuiaga.—Faataoto 10:22.
18 E manaomia foi le alofa moni mo auauna a Ieova ina ia iloa e uiga i le faia o toe asiga i tagata naunau i le upu moni o le Tusi Paia. O le faia o suesuega faale-Tusi Paia mai lea vaiaso i lea vaiaso ma lea masina i lea masina o le faailoaina lea o le alofa i le Atua ma tuaoi, auā o lenei galuega e manaomia ai ona faaaluina le taimi, taumafaiga, ma alāmanuia faitino. (Mareko 12:28-31) Peitai, pe afai tatou te vaavaai atu i se tasi o nei tagata aʻoga o le Tusi Paia ua papatisoina ma atonu ua oo lava ina ulu atu i le faiva sauatoa, pe lē faamautinoa ai ea ia i tatou faapea e tauia le alofa moni?—Faatusatusa 2 Korinito 3:1-3.
19. O le ā le faiā o loo iai i le va o le alofa ma le auaunaga sauatoa?
19 O le alofa lē manatu faapito ua na uunaia i tatou e faataulagaina ni manuia faitino ona o le auaunaga sauatoa pe afai e mafaia ona tatou faia se sao i lea auaunaga. E faitau afe ma afe Molimau ua mafai ona molimauina faapea o le faailoa atu o lo latou alofa i lena tulaga ua sili atu ona tauia. Afai e faatagaina oe e ou tulaga ina ia fai sou sao i le faiva sauatoa ae e te lē faaaogāina na avanoa, ua na ona e lē iloa ai la po o ā faamanuiaga ua e misia.—Faatusatusa Mareko 10:29, 30.
Tauia i Isi Auala
20. E faapefea ona fesoasoani le alofa ia i tatou e faamagalo atu?
20 O se tasi auala e tauia ai le alofa moni o le fesoasoani lea ia i tatou ina ia faamagalo atu. Ioe, o le alofa “e le tuuina atu i nisi le leaga.” O le mea moni, “o le alofa e ufiufi ai agasala e tele.” (1 Korinito 13:5; 1 Peteru 4:8) O le “tele,” o lona uiga e tele agasala, a ea? Ma maeu le tauia pe afai e faamagaloina! Afai e te faamagalo atu, o le a lelei ai ou faalogona atoa foi ma lē na agasala atu ia te oe. Ae o le mea aupito tāua o le mea moni faapea seiloga ua uma ona faamagaloina e i tatou i latou o agasala mai ia i tatou, auā a leai, e lē mafai la ona tatou faatalitalia Ieova e faamagalo mai i tatou.—Mataio 6:12; 18:23-35.
21. E faapefea ona fesoasoani le alofa moni ia i tatou e gauai?
21 E lē gata i lea, e tauia le alofa moni i le uiga faapea ua fesoasoani ia i tatou ina ia gauai atu. Afai tatou te alolofa ia Ieova, o le a faamaulalo la i tatou i lalo o lona aao malosi. (1 Peteru 5:6) O le alofa mo ia o le a uunaia ai foi i tatou e gauai atu i lana mea faigaluega filifilia, le “auauna faamaoni ma le mafaufau.” E aofia ai i lenei le gauai atu ia i latou o taʻimua i le faapotopotoga. E tauia lenei auā a lē taulau ona faia faapea o le a “le aoga” ai i tatou. (Mataio 24:45-47; Eperu 13:17) O le mea moni, o lenei mataupu silisili o le gauai atu e faatatauina foi i totonu o le liʻo faaleaiga. O sea auala e tauia ona e siitia ai le olioli o le aiga, filemu, ma le autasi a o aumaia ai ia i tatou le lotomalie lena e ō faatasi ma le iloa ua tatou faafiafiaina le Atua.—Efeso 5:22; 6:1-3.
22. E mafai faapefea ona tatou fiafia moni?
22 Ua manino la, o le uiga aupito sili e mafai ona tatou atiina aʻe o le a·gaʹpe, le ituaiga o alofa e lē manatu faapito, e faalemataupu silisili. Ma e matuā leai lava se masalosalo faapea o le alofa moni e tauia. I lea, o le a faafiafiaina moni ai i tatou pe afai tatou te atiina aʻe ma faailoa atu lenei uiga i se tulaga e matuā sili atu ona tele mo le mamalu o lo tatou Atua alofa, o Ieova.
O le a Faapefea ona E Tali?
□ I ā auala ua faaalia ai e Ieova le Atua le alofa moni?
□ Ua faapefea ona faaalia le alofa e Iesu Keriso?
□ O le ā le faaaʻoaʻoga na faataatia e le aposetolo o Paulo i le faaalia o le alofa moni?
□ Ua faapefea ona faaalia e Molimau a Ieova le alofa?
□ Aiseā e te fai atu ai o le alofa moni e tauia?
[Fesili mo le Suʻesuʻega]
[Ata i le itulau 16]
O le alofa o Ieova mo le fanau a tagata na uunaia ai o ia ina ia auina mai lona Alo ina ia mafai ai ona tatou maua le ola e faavavau. Pe e te talisapaia lea alofa moni?
[Ata i le itulau 18]
O le alofa moni mo Ieova o le a uunaia ai i tatou e “finafinau i le tatalo”