O le Soifuaga o Iesu ma Lana Faiva

Faafitiga i le Lotoā

INA ua la tuulafoaia Iesu i le faatoaga o Ketesemane ma sosola faatasi ma ē o totoe o le au aposetolo ona o le matataʻu, ona tutū lea o Peteru ma Ioane i la la solaaga. Atonu ua la maua atu Iesu a o avatu i le fale o Ana. Ina ua auina atu o ia e Ana i le Ositaulaga Sili o Kaiafa, ae o loo mulimuli mamao atu Peteru ma Ioane, atonu ua fesaeaʻina i le matataʻu mo o laua lava ola ma i lo la matuā popole pe o le ā le mea o le a tupu i lo la Matai.

I le oo atu i le fale telē o Kaiafa, ua mafai ai e Ioane ona ulu atu i le lotoā o le fale, talu ai e iloa o ia e le ositaulaga sili. Ae peitai, o loo tu pea Peteru i fafo o le faitotoa. E leʻi pine ae toe foi atu Ioane ma tautala atu i le leoleo faitotoa, o se auauna teine, ma faatagaina ai Peteru e ulu i totonu.

I le taimi lea ua malulu, ma ua tafu ai se afi malala e tautua o le fale ma alii ofisa a le ositaulaga sili. Ua faatasi atu Peteru ia i latou ina ia faamafanafana a o faatalitali i le iʻuga o le faamasinoga o Iesu. I inā, i le malamalama o le mumū o le afi, na mafai ai e le leoleo faitotoa o lē na faatagaina mai Peteru i totonu ona vaai lelei ia te ia. “O oe foi, sa oulua faatasi ma Iesu le Kalilaia,” ua alaga atu ai o ia.

I le ita ona ua iloa o ia, ua faafitia ai e Peteru lona iloa o Iesu i luma o i latou uma. “Ou te lei iloa o ia, ou te le lagona foi le mea ua e fai mai na,” ua fai atu ai o ia.

I lena, na alu atu ai Peteru i fafo e ui atu i tafatafa o le ala tatala. I inā, na maitau mai ai foi o ia e se tasi teine ma faapea atu ia i latou o loo tutū i ona tafatafa ane: “O lenei tagata foi sa la faatasi ma Iesu le Nasareta.” Ona toe faafiti foi lea o Peteru, ua tauto atu: “Ou te lei iloa lea tagata.”

Ua nofo faatali ai pea Peteru i le lotoā, i le taumafai ina ia lē iloa gofie atu o ia. Atonu i le taimi tonu lea ua faateʻia ai o ia ina ua vivini se moa i le taeao po a o leʻi malamalama. I le taimi lea, o loo faagasolo le faamasinoga o Iesu, e manino lava o loo faia i se vaega o le fale i luga aʻe o le lotoā. Atonu ua iloa atu e Peteru ma isi o loo faatali ai i lalo ifo le ō mai ma le ō atu o molimau eseese ua aumaia ina ia avatu ni molimau.

Pe tusa o le itula ua mavae talu le matauliaina mulimuli o Peteru o se aumea a Iesu. Ae ua ō atu nei ia te ia le toatele o i latou o loo tutū latalata ane ma faapea atu: “E moni, o oe lava lo latou; auā ua iloa oe i lau gagana.” O se tasi o le vaega lea o se aiga o Maliko, o lē na tipi e Peteru le taliga. “Ou te lei vaai atu ea ia te oe faatasi ma ia i le [faatoaga]?” ua ia fai atu ai.

“Ou te lei iloa lava lea tagata,” Sa matuā faamautinoa atu ai e Peteru. O le mea moni, e ala i le tautuʻi ma tauto i le mataupu, o lona uiga ua ia tuuina e ia lava le leaga i ona luga pe afai na te lē tautala i le upu moni, o lea ua ia taumafai ai ina ia faamautinoa ia i latou faapea e sese i latou uma.

I le taimi lava a o fai atu e Peteru lana faafitiga lona tolu lenei, ae vivini loa se moa. Ma i lena lava taimi, ua sau ai Iesu i fafo atonu i le faapaologa i luga aʻe o le lotoā, ua faliu ma silasila atu ia te ia. Ua vave lava ona manatua e Peteru le mea na fetalai ai Iesu i le na o nai itula muamua atu i le potu i luga: “A o lei oo i le vivini faalua o moa, e te faafiti faatolu mai ia te au.” Ona ua matuā nutimomoia i le mamafa o lana agasala, ua alu ai loa Peteru i fafo ma tagi lotulotu.

Pe ua mafai faapefea ona tupu o lenei mea? Ina ua uma ona matuā mautinoa e uiga i lona malosi faaleagaga, ua mafai faapefea e Peteru ona faafitia faatolu lona Matai i se taimi puupuu lava? O nei tulaga atonu ua puʻea faamanu-i-ofaga ai Peteru.  Ua mimilo sese le upu moni, ma ua faamatalaina Iesu faapea o se tagata solitulafono inosia. O le mea e tonu ua taumafai e faafoliga mai e sese, o lē e leai se agasala i le peiseai o se tagata agasala. O lea ona o omiga i lenei tulaga, ua matuā lē mautonu ai Peteru. Ua faafuaseʻi ona faavevesiina le tulaga saʻo o lona faamaoni. Ua oo ina faanoanoa o ia ona ua lē mafesoasoania i le fefe i tagata. Ia aua lava neʻi tupu lena mea ia i tatou! Mataio 26:57, 58, 69-75; Mareko 14:30, 53, 54, 66-72; Luka 22:54-62; Ioane 18:15-18, 25-27.

▪ Ua faapefea ona ulu atu Peteru ma Ioane i le lotoā o le fale o le ositaulaga sili?

▪ A o iai Peteru ma Ioane i le lotoā, o le ā o loo faagasolo i totonu o le fale?

▪ E faafia ona vivini le moa, ma o le ā le tele ua faafitia ai e Peteru lona iloa o Keriso?

▪ O le ā lona uiga faapea ua tautuʻi ma tauto Peteru ia te ia?

▪ O le ā ua faapogaia ai Peteru ina ia faafitia lona iloa o Iesu?