Ia Uaʻi atu i le Afioga Faavaloaga a le Atua!

Mea Tāua mai le Lua Peteru 2 Peteru

O LE afioga faavaloaga, po o le feau a Ieova, ua pei o se molī o loo susulu i le mea pogisa, ma e manaomia i Kerisiano moni ona uaʻi totoʻa atu i ai. E lē faigofie lena mea pe a taumafai aʻoaʻo sese e siitia le faaaposetasi. Ae e mafai ona faia faatasi ai ma le fesoasoani tauatua. Ma e tatau ona tatou pipii mau atu i le afioga a le Atua pe afai tatou te mananao ia faasaoina i le aso o Ieova o loo vave ona fotuai mai.

O le tusi lona lua faagaeeina a le aposetolo o Peteru ua mafai ona fesoasoani ia i tatou e uaʻi totoʻa atu ai i le afioga faavaloaga a le Atua. Na tusia e Peteru lenei tusi atonu mai Papelonia i le pe tusa ma le 64 T.A. I lana tusi na ia faasilisiliina ai le upu moni a le Atua, lapataia uso talitonu e uiga i le oo mai pei se gaoi o le aso o Ieova, ma fesoasoani i lana au faitau ina ia lē taʻitaʻieseina e le sese o tagata e matuā tetee i tulafono. Talu ai ona ua toeitiiti oo mai ia i tatou le aso o Ieova, ua mafai ai ona tatou maua aogā sili mai i upu faagaeeina a Peteru.

Faatuatua i le Afioga Faavaloaga

I le avea o Kerisiano, e manomia ai ona faamalosia i tatou lava e faaalia uiga faaleatua ma e tatau ona uaʻi totoʻa atu i le afioga faavaloaga. (1:1-21) Ina ia aloese mai le avea o ni tagata e lē tiotio pe e lē fua mai, e manaomia ai ona tatou ‘faaopoopo i lo tatou faatuatua o le amio lelei, le poto, le lē gaoia, le onosai, le tuutoina i le Atua, faalogona mafana faaleuso, ma le alofa.’ Ina ua vaai Peteru i le faaliliuina o Iesu ma faalogo i le Atua o fetalai e uiga ia Keriso i lena mea, na sili atu ai ona mautinoa le afioga faavaloaga. (Mareko 9:1-8) E manaomia ai ona tatou uaʻi totoʻa atu i lena afioga faavaloaga tauatua.

Leoleo Faasaga i Aposetate

E ala i le matuā uaʻi totoʻa atu i le afioga faavaloaga a le Atua, ua mafai ai ona tatou leoleo faasaga i aposetate ma isi tagata iʻuvale. (2:1-22) Na lapatai mai Peteru faapea o le a iai aʻoaʻo pepelo e ō mai faaleiloga i le faapotopotoga. Ae peitai, o le a tuuina atu e Ieova le faamasinoga leaga faasaga i nei aposetate, e pei lava ona sa ia faamasinoina agelu lē usiusitai, le lalolagi faalemataʻu i aso o Noa, ma aai o Sotoma ma Komoro. E ʻinoʻino aʻoaʻo pepelo i le pule ua tuuina mai e le Atua ma taumafai i se auala faaʻoleʻole e faasese tagata vaivai ina ia aufaatasi ma i latou i le faia o le mea sese. Sa sili ai ona lelei mo na aposetate ona latou lē iloa “le ala o le amiotonu, a e leaga ina ua latou iloa, ma toe liliu ese i le poloaiga paia sa tuuina mai ia te i latou.”

O loo Oo mai le Aso o Ieova!

I le avea o ē uaʻi totoʻa atu i le afioga faavaloaga i nei aso e gata ai, e lē tatau ai ona tatou faatagaina i tatou lava e taaʻina e tagata tauemu o ē faaʻamuʻamu i le feau e uiga i le faatasi mai o Iesu. (3:1-18) Ua galo ia i latou o le Atua o lē na fuafuaina e faaumatia lenei faiga o mea na ia faaumatia le lalolagi tuai i le Lolo. O le onosai o Ieova e lē tatau ona manatu i ai faapea o se faatuai, auā e finagalo o ia i tagata ina ia salamō. O le a faaumatia lenei faiga o mea i “le aso o [Ieova]” ma o le a suia e le ‘lagi fou ma le lalolagi fou o le a mau ai le amiotonu.’ O le mea lea, e ao ai ona tatou faia le mea aupito sili ina ia “le ponā, ma le le mataʻuleagaina.” Na i lo o le taʻitaʻiseseina e aʻoaʻo pepelo, seʻi o tatou tutupu i le poto ia Iesu Keriso.

Seʻi teu i o tatou loto upu a Peteru. Aua lava neʻi lē taulau ona leoleoina i tatou faasaga i aʻoaʻo pepelo. Ia ola ma iloa lelei faapea o loo oo vave mai le aso o Ieova. Ma ia uaʻi totoʻa atu pea i le afioga faavaloaga a le Atua.

[Pusa/Ata i le itulau 25]

Lafo i Tatara: O Ieova, “na leʻi taofia mai le faasalaina o agelu na agasala, ae, e ala i le lafoina o i latou i Tatara, na tuuina atu ai i latou i lua o le pogisa tele e taofia ai mo le faamasinoga.” (2 Peteru 2:4, NW) E lē o le nofoaga lenei e taʻua o Tatara (Tartarus) i tala faafagogo e pei ona aumaia i le tusi a Homer o le Iliad e faapea o se nofoaga i lalo i le eleele sa faafalepuipui ai atua maulalo pepelo, o Cronus ma isi agaga o le aiga atua e 12 o Eleni [Titan]. O le Tatara faale-Tusi Paia o se nofoaga, i se tulaga pei se falepuipui lea na lafo i ai e le Atua agelu lē usiusitai i aso o Noa. (Kenese 6:1-8; 1 Peteru 3:19, 20; Iuta 6) O “maea uamea o le pogisa” ua iʻu i ai mai le momotueseina o i latou e le Atua mai le malamalama faaleagaga ma avea o ē ua tutuli ese mai lona aiga. Ona ua taofia i latou na mo lana faamasinoga e lē fiafia ai, o lea ua na o se vaaiga pogisa lava o loo iai i latou. O Tatara, o se nofoaga ua taofia muamua i ai Satani ma ana temoni a o leʻi lafoina i latou i le to e lē gata, a o leʻi amataina le Pulega a Keriso i le Afe Tausaga. O lo latou faaumatiaga o le a faia pe a uma le Pulega Faa-Meleniuma a Iesu.—Mataio 25:41; Faaaliga 20:1-3, 7-10, 14.

[Ata]

Ua lafo e Seu atua maulalo i le Tatara faafagogo

[Ē Ana le Ata]

National Archaeological Museum, Athens, Greece