Le Auala e Faafetaiaʻia ai le Luʻi Tau Amio o le Mativa

“UA MATITIVA tagata ona o lo latou paiē,” na fai mai ai se tasi fomaʻi Aferika. “Ua tumu le aai i tagata tafafao vale. Afai latou te mananao moni i se galuega, semanū e mafai lava ona latou maua. E leai se manaoga mo so o se tasi e mativa ai i aso nei.”

E itiiti se faaletonu faapea o nisi tagata e paiē ma faapea o le paiē e mafai ona oo ai ina mativa. Ua faapea mai le Tusi Paia: “Seʻi toe itiiti sina moe, toe itiiti se matamoe, toe itiiti se piilima e taoto ai. A e oo mai lou mativa e pei o [se tagata gaoi i le ala, NW]; ma lou le tagolima pei o le tagata ua sauni lana auupega.” (Faataoto 24:33, 34) Ae peitai, e toatele lava tagata matitiva e matuā lē paiē lava. Mo se faaaʻoaʻoga, seʻi manatu i le tagata o lē na tusi: “Ua oo mai i lenei lava itu aso, ua matou fia aai, ma fia inu, ma ua le lavalavā, ma taufaituʻiina, ma maumau solo.” (1 Korinito 4:11) Pe o se tagata tafao vale ua lē mafesoasoania? E matuā leai lava. O na upu sa tusia e le aposetolo o Paulo. Sa filifili o ia e ola i se olaga faatapulaa tau tamaoaiga ina ia mafai ai ona sili atu ona lelei ona tausisia le faiva faa-Kerisiano. O nisi foi o ona faaogea sa faia ona sa i tala atu o na mea sa mafai ona ia pulea, e pei o sauaga faalotu.

I aso nei, o le toatele o tagata matitiva i le lalolagi o tagata ua afaina i tulaga o mea ua lē mafai ona latou pulea—atonu o le leai o se aʻoaʻoga, o le lē taulau i le itu tau tamaoaiga o le atunuu, po o fesuiaʻiga sauā faapolotiki. E toatele e matuā galulue ma le tiga mai lava i le taeao po e oo i le leva o le po ma e na o le pau lava le mea ua latou maua e na o se mea e ola ai. O avanoa ina ia maua ni tupe e ala i faiga lē faamaoni e ono foliga mai e lelei, pe talafeagai foi. E oo lava foi i nisi, atonu o le a manatu faapea ua taʻutonuina e le Tusi Paia sina lē taulau tau amio i nisi o taimi! E ao ona manatua, ua ia faapea mai: “E le inosia le gaoi pe a gaoi o ia e tali ai lona manava, ina ua fia ʻai.” Ma sa tatalo le tagata poto: ‘Tau ina ia aua neʻi oʻu mativa ma oo ai ina ou gaoi.’—Faataoto 6:30; 30:8, 9.

Le Faamaoni—Le Tulaga a le Tusi Paia

Pe o nei mau faale-Tusi Paia ua aumaia moni ai se faamaoniga lē leoa i le lē faamaoni? Ia, seʻi o tatou iloiloina ia mau i o latou mau faaopoopo. Ina ua uma ona faailoa atu faapea e lē inosia e tagata le gaoi o sē e gaoi ina ia tali ai lona manava, ae ua faaauau mai le Faataoto 6:31: “A e a maua o ia, ona taui atu lea e ia e taifitu; na te avatu ai oloa uma o i lona fale.” I se isi faaupuga, pe a maua le gaoi, ona fesagaʻi lea o ia ma le faasalaga atoatoa o le tulafono. E totogi e ia mo lana solitulafono! O le mea lea, na i lo le faamalosia o faiga faagaoi, o nei upu ua lapataia ai tagata matitiva faapea o le gaoi e iʻu ai i le leiloa atili o isi tulaga tau tamaoaiga, taʻuvalea ai i latou ma o latou aiga, ma leiloa ai le faaaloalo totino.

Ae faapefea le tatalo a le tagata poto? Na ole atu o ia ina ia aua neʻi mativa o ia ma ‘oo ina gaoi, ma ia taʻufuaina ai le suafa o lona Atua.’ (Faataoto 30:9) Ioe, o le lē faamaoni i  le vaega a se tagata o loo faapea mai e auauna ia Ieova, e mafai ona aumaia ai le faalumaina i le suafa o le Atua ma i le faapotopotoga a Ona tagata. Na tusi le aposetolo o Paulo: “O oe lē lauga atu, Aua le gaoi, e te gaoi ea oe?” Afai e gaoi nisi o ē faapea mai o Kerisiano, e ono faapogaia ai e lenei mea le ‘upu leagaina o le suafa o le Atua i nuu ese.’—Roma 2:21, 24.

O lea, mo se mafuaaga lelei, ua faapea mai ai le Tusi Paia: “E sili ona lelei o le tagata mativa ua savali i lana amiotonu, i le ua faapiopio ona ala, a o le mauoa ia.” (Faataoto 28:6) E ui lava sa tau leai ni ana mea i isi taimi, sa leʻi faapalepale pe lolo atu le aposetolo o Paulo i le faia o le lē faamaoni. Na i lo lea, na ia tusi: “O lē gaoi aua neʻi toe gaoi, a e lelei ina faamalosi o ia i galuega a ona lima i mea aoga, ia maua e ia se mea e avatu i le ua mativa.”—Efeso 4:28.

Le Vaifofo: Ia Faalagolago i le Atua

Ae faapefea i latou o ē galulue mamafa ae lē mafai ona maua ni mea e lava e tausia ai o latou lava aiga? Pe ua taʻutonuina le lē faamaoni po o le gaoi i lo latou tulaga, ae maise lava pe afai ua taia se tasi o le aiga i se maʻi po o nisi lava mea faafuaseʻi e tutupu mai? Ua manatu faapena nisi tagata. Fai mai se tasi tagatanuu o se atunuu o Aferika: “I lo matou atunuu, afai e te faamaoni, e te lē ola. Afai e te manao ia e ola, e tatau ona iai ni nai piʻo i ala o lou olaga.”

Peitai, i Aferika atoa e masani ai lava ona vaaia e se tagata upu “Faalagolago i le Atua” o valiina i luga o loli, faaalia i pa puipui, ma lomia i mea faapipii ma tua o taavale. Ua faapea mai le Tusi Paia lava ia: “Ia e faalagolago ia Ieova ma lou loto atoa.” (Faataoto 3:5, NW) O le lē faamaoni e lē taitai ona ōgatasi ma lena apoapoaiga faale-Tusi Paia. Ae pe o le faalagolago i le Atua o le tali moni lea i le luʻi i tulaga tau amio o le mativa?

I le avea o se faifeau a le Atua, na tofo ai le aposetolo o Paulo i na tulaga faigata e pei o le ‘fia ʻai ma le fia inu, o le leai o ni meaʻai, maalili, ma le lē lavalavā.’ (2 Korinito 11:27) E mautinoa lava, atonu sa tau mānatu le aposetolo o Paulo pe o le a faapefea ona ia ola! Ae ina ua mavae le 25 tausaga o le poto masani faa-Kerisiano, sa mafai ai ona ia tusi: “Ua ou iloa le mativa, ua ou iloa foi le mauoa, o i mea uma lava ou te i ai, ma mea uma e oo ia te au ua aʻoaʻoina ai aʻu ia ou maʻona, ma ou fia ʻai, ia faulai mai mea, ma ia oge mea. Ou te mafaia mea uma lava i le faamalosi mai o [Ieova, NW] ia te au.” (Filipi 4:12, 13) Ioe, sa faalagolago Paulo i le Atua.

Sa iloa lelei e Paulo faapea o mataupu silisili faale-Tusi Paia e lē o ni upu gaogao pe leai se aogā. O ni faatonuga ia mai le Atua soifua o loo naunau e fesoasoani ma lagolago ia i latou o loo saili e faatatauina ia mataupu silisili. Na faapea mai se perofeta anamua: “Auā o fofoga o Ieova e fetaufetuliai i le lalolagi uma, na te fesoasoani ia te i latou o e ua sao o latou loto ia te ia.”—2 Nofoaiga a Tupu 16:9.

Faamanuiaina ona o le Faalagolago i le Atua

Aiseā ua matuā faigata ai mo le toatele o tagata ona faalagolago i le Atua? E lē taumatea ona ua lē taulau ona avatu e a latou lotu ia te i latou ni mafuaaga e lava e faia ai faapea. Ua faia e lotu le Atua e foliga mai e leai se suafa, e lē o iai moni, e lē o se peresona, e lē matāea e mafaufauga faaletagata. Ae e ala i le suesueina o le Tusi Paia, ua oo ai ina iloa e Molimau a Ieova, o le Atua, e lē faapea ua na o se malosi o se uiga i le mafaufau, ae o se Peresona e iai se suafa. (Salamo 83:18; Eperu 9:24) Ua latou aʻoaʻoina faapea e iai ona uiga ua ono ma tatau ai ona tatou faalagolago i ai. Mo se faaaʻoaʻoga, e tusa ai ma le Esoto 34:6, o Ieova “o le Atua alofa mutimutivale ma le alofa fua, e telegese lona toasa, a e tele le alofa ma le faamaoni.” E faalagolago Molimau i le Atua ma iloa lelei faapea o ia e ‘tele le faamaoni.’ I lea, ua latou  mautinoa atoatoa ai i lana folafolaga ina ia faaofi mai se lalolagi fou e saʻoloto mai le mativa e faaumatia ai lea ua afaina ai nei le toatele o le fanau a tagata.—2 Peteru 3:13.

O le mea lea, e faitau miliona Molimau a Ieova ua faamaonia faapea e aogā le faalagolago i le Atua. Mo se faaaʻoaʻoga, o Rosalina, o se Molimau i Sierra Leone, e galue mamafa mai le lima i le vaveao seia oo atu i le po ina ia saunia meaʻai ma lavalava mo ia ma lana fanau e toaono. Ua ia taʻua faapea: “E toatele tagata sa fai mai faapea e lē mafai ona ola i se olaga faamaoni, ae ua ou iloa, e lē saʻo lena mea. I nisi taimi e iai oʻu faafitauli ma ua ou leiloa pe o le a faapefea ona foia. Ae ua ou iloa faapea afai ou te ola i se olaga faamaoni, o le a lelei mea uma mo aʻu. O lea ou te taumafai malosi ai ina ia aua neʻi faia se mea e lē fiafia ai Ieova.”

Na faapea mai se tasi tusitala: “O se tagata mativa o loo fia ʻai e manaomia se faamoemoe . . . e sili atu na i lo se fasi falaoa.” Ioe, o le leai o se faamoemoe, lē mautonu, ma le matuā lē fiafia, o ni aafiaga ia e mafai ona sili atu ona tiga na i lo le fia ʻai. Ae o lē na te iloa le Atua ma faalagolago i ai e lē tatau ona lolo atu i le faavaivai. “Ou te galue mamafa nei,” ua faaopoopo mai ai Rosalina, “ae ua ia te aʻu le olioli ona ua ou iloa faapea o le a oo mai le taimi ou te lē toe galue tiga ai i lenei auala. I le taimi nei ou te galue ina ia maua meaʻai mo aʻu ma loʻu aiga, ae i le lalolagi fou a Ieova, o le a tele meaʻai. O lea ua ia te aʻu nei le faamoemoe ma le olioli sa leʻi taitai ona iai muamua ae ou te leʻi iloa Ieova.”—Faatusatusa Isaia 25:6; Faaaliga 21:3, 4.

E moni, o i latou e faalagolago i le Atua o loo mafai pea ona tofo i omiga tau i tamaoaiga, e pei o le aposetolo o Paulo. Ae aua lava neʻi o latou faia se faaiʻuga faapea o le a solia tulafono a le Atua ina ia maua ai le tamaoaiga e ola ai. Na faapea mai le faisalamo o Tavita: “Ua ou toeaina aʻu nei, sa aʻu taulealea; a ou te lei iloa se tagata amiotonu na lafoaiina, po o ana fanau ua ʻaiisi i latou.” (Salamo 37:25) Ioe, e tausia e le Atua ma faamanuia i latou o ē faamuamua mea e naunau i ai o ia i o latou olaga.—Mataio 6:25-33.

O lea afai e te mativa, “aua neʻi [e] faavaivai i le amio lelei.” (2 Tesalonia 3:13) Aua lava neʻi e lolo atu i le faagutugutulua tau amio. Ia fausia se faiā ma le Atua ma faalagolago ia te ia e fesoasoani ia te oe i le feagai ai ma faafitauli ma faigata o le olaga. O i latou o loo auauna ia Ieova ma faalagolago ia te ia ua matuā uunaia i latou: “Ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai. Ia tuuina atu ia te ia mea uma tou te popole ai, auā o loo manatu mai o ia ia te outou.”—1 Peteru 5:6, 7.

[Faamatalaga faaopoopo i le itulau 6]

“O se tagata mativa o loo fia ʻai e manaomia se faamoemoe, . . . e sili atu na i lo se fasi falaoa”

[Ata i le itulau 7]

E fesoasoani Molimau a Ieova i tagata ia tuu atu lo latou faalagolago i le Atua