Le Pogai Tatou te Manaomia ai le Faatuatua ma le Atamai

Mea Tāua mai le Tusi a Iakopo

E MANAOMIA e auauna a Ieova ona tumau pe a iai i lalo o tofotofoga. E tatau foi ona latou alofia agasala na e ono iʻu ai i le lē faamaonia tauatua. O na manatu o loo faamamafaina i le tusi a Iakopo, ma o le faia o se mea mautinoa e uiga i ai ua manaomia ai se faatuatua galue ma le atamai faalelagi.

E lē o faailoa maia e le tusitala o lenei tusi o ia faapea o se tasi o aposetolo e toalua o Iesu na igoa ia Iakopo ae faapea ‘o se auauna a le Atua ma Keriso.’ E faapena foi i le ʻafa uso o Iesu o Iuta ona faapea mai o ia “o le auauna a Iesu Keriso o le uso foi o Iakopo.” (Iakopo 1:1; Iuta 1; Mataio 10:2, 3) I lea, e foliga mai na tusia e le ʻafa uso o Iesu o Iakopo le tusi o loo taʻua ai lona igoa.—Mareko 6:3.

E lē o taʻua ai i lenei tusi le faaumatiaga o Ierusalema i le 70 T.A., ma ua faaalia e le tusitala o talafaasolopito o Josephus faapea na maliu faamaturo Iakopo i se taimi e leʻi leva lava talu le maliu o le sui Konesula Roma o Feso. I lea, e foliga mai na tusia le tusi a o leʻi oo i le 62 T.A. Sa tusi atu ai i “itu aiga e sefulu ma le lua” o Isaraelu faaleagaga, ona sa tuusaʻo atu lava ia i latou o taofimau i “le faatuatua i lo tatou Alii mamalu o Iesu Keriso.”—Iakopo 1:1; 2:1; Kalatia 6:16.

Ua faaaogā e Iakopo ni tala faatusa ia ua mafai ona fesoasoani ia i tatou e manatua ai lana fautuaga. O se faataʻitaʻiga, ua ia faaalia faapea o le tagata e ole atu i le Atua mo le atamai e lē tatau ona masalosalo, “auā o lē masalosalo e tusa ia ma le peau o le sami ua sousou i le matagi ma felafolafoaiina.” (1:5-8) E tatau ona pulea lo tatou laulaufaiva ona e mafai ona ia taʻitaʻiina lo tatou auala e pei o se foeuli ona taʻitaʻiina o se vaa. (3:1, 4) Ma ina ia tumau ai i tofotofoga, tatou te manaomia ona faaalia le onosai ma le tumau e pei ona faia e se faifaatoaga a o faatalitali atu i le seleselega.—5:7, 8.

Le Faatuatua, Tofotofoga, ma Galuega

Ua muai faaalia e Iakopo faapea e mafai lava ona tatou fiafia i le avea o ni Kerisiano e ui lava i o tatou tofotofoga. (1:1-18) O nisi o nei tofotofoga, e pei o maʻi, e taatele i tagata uma, ae ua puapuagatia foi Kerisiano ona o le avea o ni pologa a le Atua ma Keriso. O le a tuuina mai e Ieova ia i tatou le atamai e manaomia ina ia tumau ai pe afai tatou te ole atu pea mo lea atamai i le faatuatua. Na te lē taitai ona tofotofoina i tatou i mea leaga, ma e mafai ona tatou faalagolago ia te ia e saunia le mea lelei.

Ina ia maua le fesoasoani a le Atua, e tatau ona tatou tuuina atu le tapuaiga ia te ia e ala i galuega e faaalia ai lo tatou faatuatua. (1:19–2:26) O lenei mea e manaomia ai le avea o i tatou ma “e anaana i le upu,” ae lē na o ni tagata faalogologo. E tatau ona tatou pulea le laulaufaiva, tausi i ē ua mātua oti ma fafine ua oti a latou tane, ma ia tumau ona lē pisia mai le lalolagi. Afai tatou te fiafia i tagata mauʻoa ma lē amanaia tagata matitiva, o le a tatou solia ai “le tulafono silisili” o le alofa. E manaomia foi ona tatou manatua faapea e faaalia le faatuatua i galuega, e pei ona faatinoina lelei mai e faaaʻoaʻoga a Aperaamo ma Raava. E moni, ‘e mate le faatuatua pe a leai ni galuega.’

Le Atamai Faalelagi ma Tatalo

E manaomia uma e faiaʻoga le faatuatua ma le atamai e faatinoina ai o latou tiute. (3:1-18) Ua iai ia i latou se tiute tauave mamafa i le avea o ni faiaʻoga. I le pei o i latou, e tatau ona tatou pulea le laulaufaiva—o se mea e mafai e le atamai faalelagi ona fesoasoani mai ia i tatou e faia.

O le atamai foi ua mafai ai ona tatou iloa faapea o le lolo atu i faanaunauga faalelalolagi o le a faaleagaina ai la tatou fāiā ma le Atua. (4:1–5:12) Afai ua tatou tauivi ina ia maua sini manatu faapito po o le faaleagaina ai foi o o tatou uso, e manaomia ona tatou salamō. Ma maeu le tāua o le alofia o faauoga ma lenei lalolagi, auā o le mulilua faaleagaga lena! Aua lava neʻi o tatou faalēamanaia le finagalo o le Atua ona o ni fuafuaga matapeapea i mea faitino, ma seʻi o tatou leoleo faasaga i se agaga o le lē onosai ma le soona faitio faasaga o le tasi i le isi.

So o se tasi ua maʻi faaleagaga e ao ona saili le fesoasoani a toeaina o le faapotopotoga. (5:13-20) Afai ua faia agasala, o a latou tatalo ma fautuaga atamai o le a fesoasoani e toe faafoisia se tagata agasala ua salamō i le soifua malōlōina faaleagaga. O le mea moni, “o lē faafoi mai le tagata agasala nai lona ala sese, e faaolaina e ia le agaga [o le tagata agasala] nai le oti [faaleagaga ma le faavavau].”

[Pusa i le itulau 23]

Ō Ē Anaana i le Upu: E ao ona avea i tatou “ma e anaana i le upu, a e aua le na ona faalogologo i ai.” (Iakopo 1:22-25) O se tagata e na ona faalogologo “e tusa ia ma le tagata ua vaavaai i le faaata i ona lava mata na fanau ma ia.” Pe a uma se iloiloga puupuu, ona ia toe alu ese lea “ua galo loa le uiga o ona mata.” Ae ‘o sē e faia le upu’ e vaavaai atu o ia ma le faaeteete i le tulafono e atoatoa ona lelei pe atoatoa a le Atua, ma taofi i mea uma e manaomia mo se Kerisiano. E “tumau i ai” o ia, i le faaauau pea ona ia suesue loloto i lena tulafono ina ia ona faia ai ni faasaʻosaʻoga e matuā ōgatasi ma lena tulafono. (Salamo 119:16) E faapefea ona eseese “o le anaana i le galuega” mai i se tagata o lē e vaavaai i le faaata ma galo le mea o faaalia ai? Ioe, o lē e faia na te faatinoina le afioga a Ieova ma olioli ai i Lona alofa!—Salamo 19:7-11.