“O le Sili o na Mea o le Alofa”
“O le Sili o na Mea o le Alofa”
“A o lenei, o tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa lea.”—1 KORINITO 13:13.
1. O le ā na fai mai ai se tagata suesue tau i tu ma aganuu e uiga i le alofa?
NA FAAPEA mai i se tasi taimi se tagata suesue lauiloa o le lalolagi i mea tau i tu ma aganuu a tagata e faapea: “O le uluai taimi lenei i le talafaasolopito o lo tatou ituaiga ua matou malamalama ai faapea, o le mea aupito tāua o manaoga autū tau i amioga ma mafaufauga o tagata uma, o le manaoga lea mo le alofa. O loo tu i le ogātotonugālemu o manaoga o tagata uma e pei lava ona tu lo tatou la i le ogātotonugālemu o felavasaʻiga vevela o lo tatou lalolagi faatasi ai ma paneta o loo malaga faataamilo i le la. . . . O le tamaitiiti ua lē alofagiaina e matuā ese lava i uiga faatatau i le tali mai o le tino i vailaau e faaaogāina mo le tino, i le faagaoioia o vaega eseese o le tino, ma i tulaga tau i amioga ma mafaufauga, na i lo lē sa alofagiaina. E ese foi le tupu a le tamaitiiti muamua na i lo o le tamaitiiti mulimuli. O le mea ua matou iloa nei e faapea, ua fanau mai le tagata ina ia ola e peiseaī o le ola ma le alofa ua avea o se mea e tasi. O le mea moni, e lē fou lenei mea. O le aogā lea o le Lauga i luga o le Mauga.”
2. (a) Na faapefea ona faaalia e le aposetolo o Paulo le tāua o le alofa? (e) O ā fesili ua aogā nei ona talanoaina?
2 Ioe, e pei ona taʻua ai e lenei tagata poto faalelalolagi, o lenei mea moni e uiga i le tāua o le alofa mo le lelei o tagata e lē o se mea fou. Atonu e foliga mai o lea faatoʻā talisapaia nei e tagata popoto o le lalolagi, ae ua sili atu i le sefuluiva senituri ua mavae talu ona aliali mai i le Afioga a le Atua. O le pogai lena sa mafai ai ona tusi le aposetolo o Paulo: “A o lenei, o tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa lea.” (1 Korinito 13:13) E te iloa pe aiseā ua sili ai le alofa i lo le faatuatua ma le faamoemoe? Aiseā ua mafai ai ona fai atu o le alofa e aupito sili i uiga o le Atua ma fua o lona agaga?
E Fa Ituaiga o Alofa
3. O ā faaaʻoaʻoga faale-Tusi Paia o iai o le alofa faaleituaiga?
3 O le tomai o le tagata e faaalia ai le alofa o le faailoaga lea o le atamai ma le finagalo alofa o le Atua mo le fanau a tagata. O se mea lelei le iloa faapea i Eleni anamua e fa ona upu mo le “alofa.” O le tasi o le eʹros, e faaalia ai le alofa faaleituaiga lea e fesootai atu ma le fetosinaaʻi i le va o tane ma fafine. Sa leai se pogai tāua e faaaogā ai e tusitala o Tusitusiga Kerisiano Eleni le eʹros, e ui lava o loo faaaogā e le Septuagint ona ituaiga i le Faataoto 7:18 ma le 30:16, ma o loo iai foi isi faasinoga i le alofa faaleituaiga i le va o tane ma fafine i Tusitusiga Eperu. Mo se faataʻitaʻiga, ua tatou faitau ai faapea “ua fiafia [alofa]” Isaako ia Repeka. (Kenese 24:67) O se faaaʻoaʻoga mataʻina moni o lenei ituaiga o alofa o loo maua i le tulaga o Iakopo, o lē sa foliga mai faapea i le taimi muamua lava na ia vaaia ai Rasela aulelei sa ia alofa loa i ai. O le mea moni, “ona auauna ai lea o Iakopo i tausaga e fitu ona o Rasela, ua peiseai o nai aso itiiti ia i lona manatu, auā o lona manao [alofa] tele ia te ia.” (Kenese 29:9-11, 17, 20) O loo feagai foi le Pese a Solomona ma le alofa faaleituaiga i le va o se leoleo mamoe ma se tamaitai. Ae lē mafai ona soona faamamafaina nauā ona o lenei ituaiga o alofa, lea e mafai ona avea o le puna o le lotomalie sili ma le olioli, e ao ona faaalia i le na o le ōgatasi lava ma tapulaa amiotonu a le Atua. Ua taʻu mai e le Tusi Paia ia i tatou faapea e na o le alofa lava o le avā a le tamaloa ua uma ona ia faaipoipo atu i ai faaletulafono e mafai ona ia “aua le aunoa ona . . . matua fiafia” i ai.—Faataoto 5:15-20.
4. Ua faapefea ona faataʻitaʻia i le Tusi Paia le alofa faaleaiga?
4 Ona iai lea o le alofa malosi faaleaiga, po o le lotoaiga, e faavae i faiā tau i le toto, lea ua tuuina i ai e tagata Eleni le upu stor·geʹ. O lea ua tatau ai le muāgagana, “E mafiafia (totoo) le toto i lo le vai.” Ua tatou maua se faaaʻoaʻoga lelei o lenei mea i le alofa lena sa i le auso o Maria ma Mareta i lo la tuagane o Lasalo. O lo la alofa tele ia te ia sa vaaia lea e ala i lo la matuā fetagisi ma le faanoanoa ona o lona maliu faafuaseʻi. Ma maeu lo la olioli ina ua toe faafoisia e Iesu lo la tuagane pele o Lasalo i le ola! (Ioane 11:1-44) O le alofa o se tinā i lana tama o se isi lea faaaʻoaʻoga o lenei ituaiga o alofa. (Faatusatusa 1 Tesalonia 2:7.) I lea, ina ia faamamafaina le maeu o lenei alofa tele sa iai mo Siona, na fetalai Ieova faapea sa sili atu lea na i lo le alofa o se tinā i sana tama.—Isaia 49:15.
5. Ua faapefea ona faaalia le leai o se lotoaiga i aso nei?
5 O se tasi o faamaoniga faapea o loo tatou ola i “aso e gata ai” faatasi ai ma o latou “aso faigata” o le leai lea o se “lotoaiga.” (2 Timoteo 3:1, 3) Ona o le leai o se alofa faaleaiga, ua sosola ese ai nisi talavou mai i o latou aiga, ma o nisi tamaiti ua matutua ua tuulafoaia o latou mātua ua matutua. (Faatusatusa Faataoto 23:22.) O le leai o se lotoaiga ua vaaia foi i le salalau atu o le agaleagaina o tamaiti—o nisi mātua ua sasa faamoʻamoʻa a latou fanau o lea ua manaomia ai ona avatu i le falemaʻi. Ua iloatino foi le leai o se alofa faamātua, i le lē taulau o le toatele o mātua ina ia aʻoaʻi a latou fanau. O le tuufaasaʻoloto o tamaiti e ō i o latou lava ala e lē o se faaaliga lea o le alofa ae o le iʻuga o le mulimuli atu i se ala o le tetee. O se tamā e alofa moni i lana fanau na te aʻoaʻi i latou pe a tatau ai.—Faataoto 13:24; Eperu 12:5-11.
6. Aumai ni faaaʻoaʻoga faale-Tusi Paia o le alofa i le va o uo.
6 Ona iai lea o le upu Eleni phi·liʹa, e faaalia ai le alofa (e leai ma ni faanaunauga faaleituaiga) i le va o uo, e pei o le va o ni tane po o ni fafine matutua se toalua. Ua ia i tatou se faaaʻoaʻoga lelei o lenei mea i le alofa sa iai ia Tavita ma Ionatana o le tasi i le isi. Ina ua fasiotia Ionatana i le taua, sa tagi auē Tavita ona o ia, ua faapea mai: “Ua tigaina aʻu ona o oe loʻu uso Ionatana e; sa aʻu matuā fiafia ia te oe, sa maeu lava lou alofa ia te au, e sili i le alofa o fafine.” (2 Samuelu 1:26) Ua tatou iloa foi sa iai se alofa faapitoa ia Keriso mo le aposetolo o Ioane, lea sa lauiloa o le soʻo “sa alofaina e Iesu.”—Ioane 20:2.
7. O le ā le uiga o le a·gaʹpe, ma ua faapefea ona faaalia lenei alofa?
7 O le ā le upu Eleni sa faaaogā e Paulo i le 1 Korinito 13:13, lea sa ia taʻua ai le faatuatua, le faamoemoe, ma le alofa ma faapea mai “o le sili o na mea o le alofa”? I inei, o le upu o le a·gaʹpe, le upu foi lea sa faaaogā e le aposetolo o Ioane ina ua ia faapea mai: “O le Atua, o le alofa lava ia.” (1 Ioane 4:8, 16) O le alofa lenei e taʻitaʻia pe pulea e mataupu silisili. Atonu pe o aofia pe lē o aofia ai i lea le alofa naunau po o le matuā fiafia atu, ae o se faalogona e lē manatu faapito po o se lagona popole faatasi ai ma le faia o le lelei i isi e tusa lava po o ā aogā e maua e lē na te talia po o so o se aogā foi e maua e lē na te foai. O le ituaiga o alofa lenei na faapogaia ai le Atua e foai atu le oloa aupito sili ona pele i lona finagalo, lona Alo pele e toatasi, o Iesu Keriso, “ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) E pei ona lelei ai ona faamanatu mai e Paulo ia i tatou: “E toe ina le mafai ona oti o se tasi e sui aʻi le ua amiotonu; a o le ua agalelei, atonu pe faamalosi se tasi ona oti e sui aʻi o ia; a ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea.” (Roma 5:7, 8) Ioe, o le a·gaʹpe na te faia le lelei mo isi e tusa lava po o ā o latou tulaga i le olaga po o le tau i lē ua ia faaalia atu le alofa.
Aiseā ua Sili ai i lo le Faatuatua ma le Faamoemoe?
8. Aiseā e sili ai le a·gaʹpe na i lo o le faatuatua?
8 Ae aiseā na fai mai ai Paulo faapea o lenei ituaiga o alofa (a·gaʹpe) ua sili na i lo le faatuatua? Na ia tusi i le 1 Korinito 13:2: “Afai foi o ia te au ona perofeta ane, ma le iloa o mea lilo uma, ma le poto uma lava; afai foi o ia te au le faatuatua uma e ave ese ai mauga, a e leai soʻu alofa, ou te le aoga lava.” (Faatusatusa Mataio 17:20.) Ioe, afai o a tatou taumafaiga ia maua le poto ma tutupu i le faatuatua ua faia mo se fuafuaga manatu faapito, o le a leai ni aogā tatou te maua mai i le Atua i lenei mea. E faapena foi, na faaalia e Iesu faapea o nisi o le a ‘perofeta ane i lona igoa, tutuli temoni i lona igoa, ma faia galuega mamana e tele i lona igoa’ ae o le a lē maua lana faamaoniga.—Mataio 7:22, 23.
9. Aiseā ua sili ai le alofa na i lo o le faamoemoe?
9 Aiseā ua sili ai foi le a·gaʹpe le ituaiga o alofa lea na i lo le faamoemoe? Auā o le faamoemoe e mafai foi ona faaautū i manaoga totino, atonu ua matuā popole nauā se tagata i ni aogā mo ia lava, ae semanū o le alofa “e le sailia e ia ana lava mea.” (1 Korinito 13:4, 5) Ae lē gata i lea, o le faamoemoe—e pei o le faasaoolaina atu i le “puapuaga tele” i le lalolagi fou—e mou atu pe afai e iloatino mai le mea sa faamoemoe i ai. (Mataio 24:21) E pei ona fai mai Paulo: “E faaolaina i tatou i le faamoemoe; a o le faamoemoe ua vaaia, e le o le faamoemoe lea; auā pe faapefea ona toe faamoemoe se tasi i le mea ua vaaia? A e peitai a tatou faamoemoe i le mea ua le vaaia, tatou te faatalitali atu i ai ma le onosai.” (Roma 8:24, 25) O le alofa lava ia e tumau i mea uma, ma e lē mafai ona lē taulau. (1 Korinito 13:7, 8) I lea, o le alofa lē manatu faapito (a·gaʹpe) e sili na i lo le faatuatua po o le faamoemoe.
Pe Sili na i lo le Atamai, Faamasinotonu, ma le Malosi?
10. Aiseā ua mafai ai ona faapea atu o le alofa e aupito sili i uiga sili ona tāua e fa o le Atua?
10 Seʻi o tatou talanoaina nei uiga e fa e sili ona tāua o Ieova le Atua: le atamai, le faamasinotonu, le malosi, ma le alofa. Pe mafai foi ona faapea atu e sili le alofa i lo nei mea? O le mea moni e mafai. Aiseā? Ona o le alofa o le malosi lea e faagaoioia ai o loo i tua o mea e faia e le Atua. O le mea lena na tusi ai le aposetolo o Ioane: “O le Atua, o le alofa lava ia.” Ioe, o Ieova o le faaalitinoina po o le faaperesonaina o le alofa. (1 Ioane 4:8, 16) E leai se mea o i le Tusi Paia ua tatou faitau ai faapea o le Atua o le atamai, o le faamasinotonu, po o le malosi. Na i lo lea, ua taʻu mai ia i tatou faapea o loo iai ia Ieova uiga nei. (Iopu 12:13; Salamo 147:5; Tanielu 4:37) Ua ia te ia nei uiga e fa e matuā paleni lelei. I le uunaia e le alofa, ua faataunuu ai e Ieova ana fuafuaga e ala i le faaaogāina o isi uiga e tolu po o le faagaoioia o i latou.
11. O le ā na uunaia Ieova e foafoaina le vateatea ma meafaiola agaga ma tagata?
11 O lea la, o le ā na uunaia Ieova e foafoaina le vateatea ma meafaiola agaga popoto ma tagata? Pe o le atamai po o le malosi? E leai, auā sa na ona faaaogā e le Atua lona atamai ma le malosi i le foafoaga. Mo se faaaʻoaʻoga, ua tatou faitau ai: “O le poto [po o le atamai] na faavaeina ai e Ieova le lalolagi.” (Faataoto 3:19) Ae lē gata i lea, o lona uiga o le faamasinotonu sa leʻi manaomia ona ia foafoaina ai ni sui po o isi ua saoloto tau le amio. O le alofa o le Atua na uunaia ai o ia e tofutofusia i le olioli o le nonofo faatasi ma le poto ma isi. O le alofa na ala ai ona maua le auala e aveesea ai le faaumatiaga na tuu atu e le faamasinoga tonu i luga o le fanau a tagata ona o le solitulafono a Atamu. (Ioane 3:16) Ioe, ma o le alofa foi na faagaoioia ai Ieova e fuafua faapea e tatau ona ola le fanau a tagata usiusitai i le Parataiso faalelalolagi o loo sau.—Luka 23:43.
12. E ao faapefea ona tatou tali atu i le mana o le Atua, lana faamasinotonu, ma le alofa?
12 Ona o le malosi uma lava o le Atua, aua lava neʻi o tatou tofo tofo faatupuina lona fuā. Na fesili Paulo: “‘Pe ua tatou faatupu ea le fuā o Ieova’? Pe ua sili ea lo tatou malosi i lona?” (1 Korinito 10:22, NW) E moni, o Ieova “o le Atua fuā,” e lē i se uiga leaga ae i “le maumauai i le tuutoina atoatoa i ai.” (Esoto 20:5; King James Version) Ona o ni Kerisiano, ua tatou matuā maofa ai ma le lē magagana i le tele o faaaliga o le atamai lē maausia o le Atua. (Roma 11:33-35) O lo tatou faaaloalo sili mo lana faamasinoga tonu e tatau ona faapogaia ai i tatou ina ia matuā faamamao ese mai le agasala ma le loto i ai. (Eperu 10:26-31) Ae o le alofa, e lē mafesiligia e aupito sili i uiga autū e fa o le Atua. Ma o le alofa lē manatu faapito o Ieova ua tosina ai i tatou ia te ia ma tatou mananao ai ina ia faafiafia o ia, ia tapuai ia te ia, ma ia auai i le faapaiaina o lona suafa paia.—Faataoto 27:11.
E Aupito Sili i Fua o le Agaga
13. O fea o tu ai le alofa i totonu o fua o le agaga o le Atua?
13 O le ā le tulaga o le alofa i fua e iva o le agaga o le Atua, na o loo taʻua i le Kalatia 5:22, 23? O uiga nei, “o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā.” O se mafuaaga lelei na tuu faamuamua ai e Paulo le alofa. Pe sili le alofa i le olioli, le isi uiga lea na ia taʻua e sosoo mai? Ioe, o lea lava, auā e lē mafai ona iai se olioli tumau e aunoa ma le alofa. O le mea moni, ua matuā leai se olioli o le lalolagi ona o le manatu faapito, le leai o se alofa. Ae o Molimau a Ieova o loo iai le alofa i totonu o i latou lava, ma latou te alolofa foi i lo latou Tamā faalelagi. O lea e ao ai ona tatou faatalitalia i latou e olioli, ma sa valoia faapea latou te “alalaga . . . ona o le loto fiafia.”—Isaia 65:14.
14. Aiseā ua mafai ai ona faapea atu o le alofa e sili na i lo le fua o le agaga o le filemu?
14 E sili foi le alofa na i lo le fua o le agaga o le filemu. Ona o le leai o se alofa, ua faatumuina ai le lalolagi i fetauaʻiga ma misa. Ae o loo nonofo fifilemu tagata o Ieova i le lalolagi atoa. Ua moni upu a le faisalamo e tusa ai ma lo latou tulaga: “E faamanuia e Ieova lona nuu i le filemu.” (Salamo 29:11) Ua latou maua lenei filemu ona o loo ia i latou le faailoga e mataulia ai Kerisiano moni, o le alofa. (Ioane 13:35) E na o le alofa lava e mafai ai ona foia vala fevaevaeaʻi uma e pei o lanu, atunuu, po o aganuu. O “le fusi lea e atoatoa ona lelei ai.”—Kolose 3:14.
15. Ua faapefea ona vaaia le vaega aupito silisili a le alofa i le faatusatusa atu i le fua o le agaga o le onosai?
15 Ua vaaia foi le vaega silisili ona maualuga o le alofa pe a faatusatusa ma le onosai, o le tumau ma le onosai i mea sese po o uunaiga e fai mea sese. O le onosai o lona uiga ia faapalepale ma ia faagesegese ona ita. O le ā e faapogaia ai ona lē onosai tagata ma vave ona ita? Pe lē o le leai ea o se alofa? Ae peitai, o lo tatou Tamā faalelagi e onosai ma e “telegese lona toasa.” (Esoto 34:6; Luka 18:7) Aiseā? Auā e alofa o ia ia i tatou ma e “le finagalo ia fano se tasi.”—2 Peteru 3:9.
16. Ua faapefea ona faatusatusa le alofa ma le mataalofa, agalelei, agamalu, ma le lē gaoiā?
16 Na seʻi faatoʻā uma lava ona tatou iloa le pogai e sili ai le alofa i lo le faatuatua, ma o mafuaaga na tuuina mai e faatatauina i fua o le agaga ia o loo totoe, o le mataalofa, le agalelei, le agamalu ma le lē gaoiā. O nei mea uma o ni uiga tatau, ae o le a lē aogā mo i tatou pe a aunoa ma le alofa, e pei ona matauina ai e Paulo i le 1 Korinito 13:3, na ia tusi ai: “Afai foi ou te tufatufaina aʻu mea uma e fagaina aʻi e matitiva; afai foi ou te tuuina atu loʻu tino ina ia susunuina, a e leai soʻu alofa, e leai lava sona aoga ia te au.” I le isi itu, o le alofa ua aumaia ai i lumāmea uiga na e pei o le mataalofa, agalelei, faamaoni, agamalu ma le lē gaoiā. I lea, na faaauau ai ona faapea mai Paulo o le alofa e agalelei ma i lea, “e ufiufi i mea uma, e talitonu i mea uma, e faamoemoe i mea uma, e onosai i mea uma.” Ioe, ma “e le uma le alofa.” (1 Korinito 13:4, 7, 8) Ua lelei ai la ona matauina faapea o isi fua o le agaga o ni faaaliga, po o vala eseese o le alofa, lea na uluai taʻua. E moni, ua malamalama faapea mai fua uma lava e iva o le agaga, e moni o le alofa e sili lava lea.
17. O ā faamatalaga faale-Tusi Paia ua lagolagoina le faaiʻuga faapea o le alofa o le fua aupito sili o le agaga?
17 O upu ia a Paulo e lagolagoina ai le faaiʻuga faapea o le alofa e aupito sili i fua o le agaga o le Atua: “Aua neʻi ia te outou se mea e tasi a se tasi tagata; a e tau lava o le fealofani; auā ai sē alofa atu i se tasi tagata, ua atoatoa ona faia e ia o le tulafono. Auā o upu ia, . . . o loo ua aofia lava i lenei upu, Ia e alofa atu i lē lua te tuaoi, ia pei o oe lava ia te oe. E le agaleaga atu le alofa i lē la te tuaoi; o lenei, o le alofa o le atoatoa lea o le tulafono.” (Roma 13:8-10) Ua matuā fetaui lelei lava, le faasino atu o le soʻo o Iakopo i lenei tulafono o le alofa atu i lē lua te tuaoi e pei o oe lava ia te oe, faapea o “le tulafono silisili.”—Iakopo 2:8.
18. O ā isi faamaoniga atili o iai faapea o le alofa o le uiga silisili?
18 Pe iai nisi faamaoniga atili faapea o le alofa o le uiga aupito sili? Ioe, o le mea moni lena. Seʻi manatu i se mea na tupu ina ua fesili atu se tusiupu ia Iesu: “Po o le fea poloaiga e sili i poloaiga uma?” Atonu sa ia faatalitalia faapea o le a sii mai e Iesu se tasi o Tulafono e Sefulu. Ae na sii mai e Iesu le Teuteronome 6:4, 5 ma fetalai mai: “E sili lenei i poloaiga uma, Faalogo mai ia Isaraelu e; o le Alii [o Ieova] lo tatou Atua, o le Alii [o Ieova] e toatasi ia. Ia e alofa foi i le Alii [o Ieova] lou Atua ma lou loto atoa, ma lou agaga atoa, ma lou manatu atoa, ma lou malosi atoa.” Ona toe faaopoopo lea o Iesu: “E faapena foi lona lua, o lenei, Ia e alofa atu i lē lua te tuaoi, ia pei o oe lava ia te oe. E leai lava se tasi poloaiga e sili i na poloaiga.”—Mareko 12:28-31.
19. O ā nisi o fua mataʻina o le a·gaʹpe?
19 E moni, sa leʻi faaopoopo i ai e Paulo nisi tala ina ua ia taʻua le faatuatua, le faamoemoe, ma le alofa ma faapea mai: “O le sili o na mea o le alofa lea.” O le faaalia o le alofa ua iʻu ai i faiā lelei ma lo tatou Tamā faalelagi ma isi, e aofia ai i latou i le faapotopotoga ma tagata o o tatou aiga. O le alofa e iai sona taunuuga e atiina aʻe ai i tatou. Ma i le mataupu o sosoo mai o le a faaalia ai le mafai ona tauia o le alofa moni.
O le a Faapefea ona E Tali?
□ Ua faapefea ona sili le alofa na i lo le faatuatua ma le faamoemoe?
□ O le ā le a·gaʹpe, ma ua faapefea ona faaalia sea alofa?
□ Aiseā ua aupito sili ai le alofa i uiga autū e fa o le Atua?
□ I ā auala ua sili ai le alofa na i lo isi fua o le agaga?
[Fesili mo le Suʻesuʻega]
[Ata i le itulau 13]
O le alofa na uunaia ai le Atua e foafoaina le fanau a tagata mo le ola i se lalolagi parataiso. Pe o e faamoemoe e te iai i inā?