Pe Gafatia e Tagata Matitiva ona Faamaoni?

Sa na o le 29 aso le matua o Amelia ina ua avatu o ia e le tinā o lona tinā i le fomaʻi. Sa lē mafai e le tinā o Amelia ona alu i le malaga, ona sa maʻi o ia i le fale faatasi ai ma isi tamaiti e toafa. O le tamā o loo alu atu i se isi mea e saili se galuega. Sa suesue e le fomaʻi le pepe. Sa iai ni faailoga o le lē paleni o meaʻai, o se mea e masani ai i Aferika i Sisifo. Ae o le faafitauli autū ona sa mamaʻi sela o le totogasā o le tinā. Sa aloua le fatafata laitiiti o Amelia i se maʻi e sili ona telē na aafia ai. Ina ua tuuina atu e le fomaʻi le pepa e tala ai vai i le tinā matua, na fesili atu le tinā matua: “Faamata e fia le tau o le vai?”

“E fa i le lima tala,” na tali atu ai le fomaʻi.

Sa tomumumumu le tinā matua. E leai se tupe na iai ia te ia e oo lava i se lua tala e totogi ai le vaaiga o le pepe. “O fea se mea o le a matou maua mai ai lenei ituaiga o tupe!” na fai atu ai ma le ofo tele o ia.

 “E tatau ona e sue mai le tupe i se mea,” sa tali maumauai atu ai le fomaʻi. “Alu e aisi i au uo ma aiga. Afai tou te lē togafitia lenei maʻi pipisi, o le a salalau atu i alātoto, ma o le a oti le pepe.”

Ae peitai na maua e le aiga o Amelia le tupe, ma ola ai le pepe e oo atu i lona lua o masina. Ae peitai, e faitau miliona tagata i atunuu atiaʻe i le lalolagi aoao e lē mafai ona nonō ni tupe mai a latou uo ma aiga. Ma o faamoemoega mo le faaleleia o le tulaga tau tamaoaiga ua lē mautinoa lava.

Ua faalauiloa mai e The State of the World’s Children Report 1989 a le UNICEF (United Nations Children’s Fund) e faapea: “Ina ua mavae le faitau sefulu o tausaga o le sologa lelei o le agaʻi i luma o le tamaoaiga, ae ua see atu ai i tua nofoaga tetele o le lalolagi i le mativa.” I Aferika ma Amerika Latina, na paʻū ai le faatatauga o tupe maua mai le 10 i le 25 pasene i tausaga e sefulu o le 1980. Ma i ni nai tausaga ua mavae, i atunuu e 37 e aupito sili ona matitiva o le lalolagi, na paʻū ifo ai le tupe faaalu mo le soifua malōlōina i le 50 pasene.

O le ā le uiga o lenei mea mo le faitau miliona o tagata o loo ola matitiva? Mo le toatele, o lona uiga ua lē mafai ona latou faatauina meaʻai po o vailaau manaomia. O le mea lea, atonu o le a fesagaʻi ai a latou fanau, paaga faaipoipo, po o mātua ma se oti sa lē manaomia, seʻi vagana ua latou faia se taumafaiga mulimuli e maua ai tupe i le na o le pau lava o le auala e foliga mai o loo matala ia i latou—e ala lea i le gaoi! Ioe, o le mativa e mafai ona uiga i ni tauiviga faatasi ai ma tulaga tiga o le mafaufau: o le gaoi po o le oti? o le pepelo po o le matelaina? o le faatogafalea po o le faaogea?

E iai se muāgagana i Aferika i Sisifo: “O le mea lava e te nonoa ai le povi, o i inā foi e ʻai vao ai.” I se isi faaupuga, so o se avanoa lava e faatagaina atu i tagata e maua ai a latou oa, latou te matuā faaaogāina atoatoa. E masani lava, o i latou e pule i atunuu i le lalolagi atoa e faaaogā o latou tulaga e faia ai faiga faatogafalea, faaaogāina ai tupe ua tuuina atu i a latou tausiga, po o le gaoi. ‘Fai loa oe semanū o e maua le avanoa,’ o la latou faauigaina lea. ‘Atonu e te lē toe maua lena avanoa e faia ai mulimuli ane.’ A o agaʻi ina sili atu ona leaga tulaga faigata tau tamaoaiga i atunuu atiaʻe, o le a ono faateleina e tagata ua matuā leai lava ni mea ona latou ioeina le manatu faapea e lē mafai ona avea le faamaoni ma auala aupito sili ona lelei mo tagata matitiva.

Ua faapea mai le Tusi Paia: “Aua e te gaoi.” (Esoto 20:15) Ae afai ua lē gafatia moni e tagata matitiva ona faamaoni, pe ua fesiligia ai la le aogā o mataupu silisili tau amio a le Tusi Paia? Pe ua lē tonu tulafono a le Atua, ua lē fetaui ma le manaoga moni o tagata? O mea na tutupu i le faitau afe o Kerisiano moni i atunuu atiaʻe ua aumaia ai se tali mataʻina i nei fesili.

[Faamatalaga faaopoopo i le itulau 4]

“O le mea lava e te nonoa ai le povi, o i inā foi e ʻai vao ai”

[Ata i le itulau 4]

O tagata matitiva o loo iai faatasi ma i latou o ē o loo galulue ma le tiga i atunuu atiaʻe