Pe o le a Faaauau ona E Savali i le Upu Moni?

“E LEAI soʻu fiafia e sili i lenei, pe a . . . savavali laʻu fanau i le upu moni.” (3 Ioane 4) Sa faapena ona fai mai ai le aposetolo o Ioane ina ua agaʻi atu i le faaiʻuga o lona soifuaga umi. O le faaauau ona tumau o ‘lana fanau,’ i latou o ē na ia faailoa atu i ai “le upu moni,” na aumaia ai ia te ia le olioli sili. E olioli foi Ieova pe a tumau ona tagata tapuai i le upu moni. Maeu le fiafia tele atonu o loo iai ia te ia i aso nei i le silasila mai i se faalapotopotoga tele, ua faitau miliona, o loo mulimuli i lena auala atamai!—Faataoto 27:11.

Ae peitai, a o pipii atu ma le lē maluelue i le upu moni tagata o le Atua i le avea o se vaega atoa, ae o nisi lava Kerisiano taitoatasi ua faagesegese pe ua oo lava ina lafoaia le tapuaiga mamā. E lē o se mea lenei e leʻi faatalitalia, auā o le mea lava foi lea na tupu i le uluai senituri. (2 Timoteo 4:10; Eperu 2:1) Ae ui i lea, o le mea moni faapea ua faagesegese nisi, ua faamamafaina ai le manaoga mo tagata uma ina ia vaavaai totoʻa i o latou lava tulaga faaleagaga. Sa faalaeiauina e Paulo Kerisiano uma: “Ia outou taumafai pea e faamaonia po o le ā le ituaiga tagata e iai outou.” (2 Korinito 13:5, NW) E ao i Kerisiano taitoatasi ona fesiligia ia lava i le fesili: ‘Ou te mautinoa faapefea o le a faaauau ona ou savali pea i le upu moni?’

Ua faagesegese nisi po ua oo lava ina taofia le savavali i le upu moni ona sa faalotovaivaia i latou—atonu e ala i faafitauli o le soifua malōlōina po o ni feteenaiga o ona lava uiga totino. Ua faagesegese isi ona sa faatosina ese i latou. Ua latou mananao e olioli i nisi o fua o lenei faiga o mea a o iai. E mafai faapefea ona tatou alofia le faagesegese? Ina ia taliina, seʻi o tatou iloiloina le faaaʻoaʻoga na tuu e Iesu ia i tatou.

Mulimuli i le Faaaʻoaʻoga a Iesu

Sa fesagaʻi Iesu ma le tele o ni tulaga faigata. Sa ao ona ia taulimaina ni feteenaiga o uiga totino i le va o ona soʻo, faapea foi ma le onosai i le inosia ma le amusia e ona fili. Sa ao foi ona ia tetee atu i faaosoosoga a lenei lalolagi. E moni, sa ofoina atu ia te ia le tamaoaiga tele ma se tulaga lauiloa lea e toaitiiti lava sa latou iloa. (Mataio 4:8-11; Ioane 6:14, 15) Peitai, sa maumauai Iesu i le savali pea i le upu moni. O le ā na fesoasoani ia te ia e faia lenei mea?

Ua taʻu mai e le aposetolo o Paulo ia i tatou ina o ia tusi: “Ina tatou taufetuli ia ma le onosai i le tausinioga o i o tatou luma, a o tatou vaavaai atu ma le naunautai i le Sui Sili ma Lē na te Faaatoatoaina lo tatou faatuatua, o Iesu. O lē na onosai i le satauro, na faatauvaa ia te ia le mā, ona o le olioli sa tuu i ona luma, ma ua nofo ai o ia i le itu taumatau o le nofoālii o le Atua.” (Eperu 12:1, 2, NW) I le tulaga o Iesu, o le manatua pea o “le olioli sa tuu i ona luma,” o taui maualuluga sa faatalitali mai mo ia, sa fesoasoani ia te ia e faaauau ai ona savali i le upu moni. O lenei “olioli sa tuu i ona luma” sa sili mamao atu ona tāua na i lo o ni faalotovaivai e lē tumau po o faatosinaga sa ia fesagaʻia.

O le teu i le mafaufau o le taui e mafai ona fesoasoani ia i tatou ia onosai, e pei lava ona ia Iesu. (Faaaliga 22:12) O se faataʻitaʻiga, seʻi manatu i se tagata faimalaga o loo savali i se auala maugā faigata. Ua oo ina lē lavā o ia ma ua lotovaivai. O laasaga taitasi e matuā faia ai se taumafaiga, ma e foliga mai e leai se iʻuga o le auala. Ona ia oo atu loa lea i le tumutumu o le aʻega ma ia iloa mamao atu ai le aai o loo ia aga atu i ai. Ua faafuaseʻi lava ona foliga mai ua fai sina faigofie o le malaga. O se vaaiga manino i lona taunuuga ua fesoasoani ia te ia e faagalo ai lona lē lavā. O le a faapena foi ona iloa e se Kerisiano le faigofie ona faaauau ona ia savali i le upu moni pe afai e teu manino i lona mafaufau lona taunuuga.

Faaaʻoaʻo i le Aposetolo o Paulo

O se tasi o lē na onosaia le tele o mea na sa ono mafai ona faalotovaivaia ai o ia, o le aposetolo o Paulo. Sa ao ona ia taulimaina ni fevaevaeaiga ma ni feteenaiga o uiga totino i totonu o le au uso, faapea foi ma le onosaia o le faafitauli matuiā o le soifua malōlōina, sauaga, faigata faaletino, ma  faafitauli ma e oo lava i teteega i totonu o faapotopotoga. (1 Korinito 1:10; 2 Korinito 10:7-12; 11:21-29; 12:7-10) Aiseā na lē lotovaivai ai Paulo seʻi oo atu i le tulaga e faamaamulu ai? Ua ia faamatala mai: “Ou te mafaia mea uma lava i le faamalosi mai o lē ua tuuina mai le malosi ia te au.” (Filipi 4:13, NW) Sa leʻi taumafai o ia e ave toatasi ana avega. Na i lo o lea, sa vaavaai atu Paulo ia Ieova ina ia faamalosia pea o ia.—Salamo 55:22.

O le puna tauatua o le malosi sa sailia e Paulo ina ia fesoasoani ia te ia e onosai ai o loo maua foi i aso nei. Ua faapea mai le Tusi Paia: “[Ua] avatua [e Ieova] le malosi i e ua vaivai; a o e ua leai se malosi, na te faatuputele i ai le malosi. E vaivai ma tigaina tama matutua; o taulelea foi, e pauu lava i latou; a o e faatalitali ia Ieova, e toe faafouina lo latou malosi; latou te sii ae apaau e pei o aeto; latou te femoei, a e le vaivai; latou te savavali, a e le tigaina.” (Isaia 40:29-31) Afai tatou te vaavaai atu ia Ieova e aumaia ia i tatou le malosi e ala i suesuega totino, auai i sauniga, le galuega maelega faa-Kerisiano, ma—ae maise lava—le tatalo, o le a mafai ai ona tatou onosai i tofotofoga ma faalotovaivaiga na atonu e mapuna aʻe i lea taimi ma lea taimi.—Salamo 1:1-3; Roma 10:10; 1 Tesalonia 5:16, 17; Eperu 10:23-25.

Ua Sauniuni le Faitau Miliona e Ola i le Parataiso

O Satani o le atua o lenei faiga o mea, lea ua avea moni ai Kerisiano o ni tagata ese, o ni tagata aumau. (2 Korinito 4:4) I lea, e lē ao ai ona tatou maofa pe afai tatou te fesagaʻi ma ni faalotovaivaia po o faatosinagaese i nisi taimi. Na tusi Paulo i le tusi o Eperu: “Ua leai so tatou aai tumau iinei, a ua tatou saili i lē atali.” (Eperu 13:14) O le manatuaina o lo tatou faamoemoe e lē i lenei lalolagi tuai ae i lea o loo sau o le a fesoasoani foi ia i tatou ia lē faagesegese ai.

I nisi auala, ua pei ai Kerisiano o tagata o ē ua tuua lo latou nuu moni ae faimalaga atu ina ia saili se olaga e sili ona lelei i se isi mea. E tusa ai o tulaga masani, o se laasaga lenei e faigata ona faia. E aofia ai le teuina o mea i totonu o ato po o le tiai uma o ana mea ma faatofā atu i se aiga ua masani ai, faapea foi i uo ma aiga. E aofia ai foi le alu atu i se nuu ese, nonofo faatasi ma tagata o ē atonu e lē faafeiloai lelei maia o ia, ma aʻoaʻo se gagana fou ma se auala o le olaga e lē masani ai. E ui i lea, e toatele ua faia sea gaoioiga i le na o le pau o faamoemoega ia faaleleia o latou tulaga faaletino i lenei lalolagi.

O i latou o ē ua tuua nuu moni, e pei ona sa iai, mai i lenei faiga tuai o mea ma avea o se vaega o tagata o le Atua ua fesagaʻi ma luʻi faapena. Ua latou faia ni fetuunaiga i tu ina ia ola ai e tusa ma tapulaa mamā o le Afioga a le Atua, ma ua latou aʻoaʻoina le “gagana mamā” o le upu moni. (Sefanaia 3:9, NW; 1 Korinito 6:9-11) Latou te galulue mamafa foi, ina ia auauna i le Tupu sili o le Malo o le Atua, o Iesu Keriso. Ae lē gata i lea, i le tele o tulaga ua tuulafoaia ai i latou e o latou aiga ma uo muamua, o lea la, o le iʻuga, ua tatau ai ona latou faatofā atu ia i latou.

Ae e sili atu ona tele mea e maua e Kerisiano na i lo o i latou o ē ua tuua nuu moni mo ni mafuaaga tau tamaoaiga. O se mea e tasi, ua latou ō mai i se faiganuu e alolofa ma tausi ia i latou. (Luka 18:29, 30) O le mea e sili atu ona tāua, ua latou oo ai i se faiā vavalalata ma Ieova, le Atua o le vateatea. Ua latou maua le filemu o le mafaufau ma le mautinoa e uiga i le lumanai a o latou tulimataʻi atu le faataunuuga o folafolaga ofoofogia a le Atua. (Filipi 4:8, 9) O i latou e iai le talisapaia talafeagai o nei mea moni o le a lē faatagaina faalotovaivaiga po o faatosinagaese e faagesegese ai i latou seia oo ina lē toe gaoioi. O le a lē faaliliuina i latou mai le ala vaapiapi lea e tau atu i le ola.—Mataio 7:13, 14; 1 Ioane 2:15-17.

Ia Tausi mo Lou Soifua Malōlōina Faaleagaga

Afai tatou te tausia o tatou soifua malōlōina faaletino i se faavae faifai pea, ua ia i tatou la le avanoa e sili atu e tetee atu ai i faamaʻi. Ma afai tatou te mamaʻi, e vave lava ona tatou toe malolosi. I se auala tutusa, afai tatou te tausia lelei lo tatou soifua malōlōina faaleagaga, teuina se vaaiga manino o faamanuiaga ua tatou olioli ai nei ma na o loo faatali mai mo i tatou, ma afai tatou te aʻoaʻo e faalagolago i le malosi mai ia Ieova na i lo o lo tatou lava malosi, o le a tatou maua la se tulaga e sili atu ona lelei e taulimaina ai faafitauli e mapuna aʻe. E lē mafai ona tatou ʻalo ese atoatoa mai i faatosinagaese po o tulaga e faavaivaia ai. Ae afai e muamua ona tatou tausia lelei o tatou soifua malōlōina faaleagaga, o le a lē mafai e na mea ona lofituina ai i tatou.

Manatua, e olioli Ieova pe a tumau ona tagata tapuai. O lea seʻi o tatou faafiafia lona finagalo e ala i le faaauau ona savavali i le upu moni.