Tumau ia Mausalī i le Faatuatua!

Mea Tāua mai le Muamua Peteru

E FESAGAʻI Molimau a Ieova ma tofotofoga eseese, po o tofo o lo latou faatuatua. I nisi atunuu, o loo faia ai la latou galuega talaʻi o le Malo ma se fesagaʻiga o sauaga sili. I tua o nei mea ma isi taumafaiga ina ia faaumatia lo latou fāiā ma le Atua o loo iai Satani le Tiapolo. Ae o le a lē manuia o ia, auā ua faamausalīina e Ieova ana auauna—ioe, mausalī i le faatuatua.

Sa faaeaina le aposetolo o Peteru e ‘faamalosi i ona uso’ o ē sa ‘faanoanoa i tofotofoga eseese.’ (Luka 22:32; 1 Peteru 1:6, 7) Sa ia faia faapea i lana uluai tusi, na tusia pe tusa ma le 62–64 T.A. mai Papelonia. I lea tusi na fautua atu ai Peteru, faamafanafana atu ma faalaeiau atu i Kerisiano Iutaia ma Nuu Ese, i le fesoasoani atu ia i latou ina ia tumau i osofaiga a Satani ma tumau “mausali . . . i le faatuatua.” (1 Peteru 1:1, 2; 5:8, 9) Talu ai ua puupuu nei le taimi o le Tiapolo ma ua matuā feʻai i ana osofaiga, e mautinoa ai lava le mafai e tagata o Ieova ona maua aogā mai i upu faagaeeina a Peteru.

O Amioga e Faavae i Mataupu Silisili Faaleatua

E tusa lava po o lo tatou faamoemoe e faalelagi pe faalelalolagi, e ao i lea faamoemoe ona fesoasoani ia i tatou e tumau ai i lalo o tofotofoga ma gaoioi ai i se auala faaleatua. (1:1–2:12) O le faamoemoe e ulu atu i le lagi ua faapogaia ai ē faauuina e olioli i le feagai ai ma tofotofoga, na ua matuā faamamāina ai lo latou faatuatua. I le avea o se fale faaleagaga e fausia i le faavae o Keriso, ua latou ofo atu ai taulaga faaleagaga e talia e le Atua ma amioaʻi i latou i se uiga lelei e aumaia ai lona viiga.

O a tatou feutagaiga ma uso a tagata uma e ao ona pulea e mataupu silisili faaleatua. (2:13–3:12) Na faaalia e Peteru faapea e ao ia i tatou ona gauai atu i pule faaletagata. O auauna i aiga e tatau ona gauai atu i o latou matai, ma o avā i a latou tane. O amioga faaleatua a se avā Kerisiano e ono mafai ona manumalo ai i le aumaia o lana tane lē talitonu i le faatuatuaga moni. Ma o se tane talitonu e ao ona ‘avatu le mamalu i lana avā o se ipu e sili ona vaivai.’ E ao i Kerisiano uma lava ona manatu mamafa le tasi i le isi, ia iai le faalogona mafana faaleuso, faia le mea e lelei, ma ia tausisi i le filemu.

O le Tumau e Aumaia ai Faamanuiaga

Afai e tumau ma le faamaoni Kerisiano moni i mafatiaga o le a iʻu i faamanuiaga. (3:13–4:19) Afai tatou te puapuagatia ona o le amiotonu, e ao ona tatou fiafia. Ae lē gata i lea, talu ai sa tiga Keriso i le tino ina ia taʻitaʻi atu ai i tatou i le Atua, e lē tatau la ona tatou toe ola e tusa ma o tatou lava tuʻinanauga faaletino. Afai tatou te onosai ma le faamaoni i tofotofoga, o le a tatou auai i le olioli sili i le faaalia mai o Iesu. O le tauaveina o faifaiga ona o le suafa o Keriso, po o le avea o ona soʻo, e ao ona faafiafiaina ai i tatou ona ua faamaonia ai faapea ua ia i tatou le agaga o Ieova. O lea a o tatou tigaina ona o le finagalo o le Atua, seʻi tuu atu i tatou i lana tausiga ma faaauau ona faia mea lelei.

I le avea o Kerisiano, e manaomia ona tatou faia ma le faamaoni o tatou tiute ma faamaulalo i tatou i lalo o le aao malosi o le Atua. (5:1-14) E tatau i toeaina ona leoleo ma le loto naunau le lafu mamoe a le Atua, ma e ao ia i tatou uma lava ona lafo atu o tatou popolega ia Ieova, i le iloa lelei faapea e manatu moni mai o ia ia i tatou. Tatou te manaomia foi ona tutū e faasagatau atu i le Tiapolo ma aua lava neʻi o tatou lotovaivai, auā o loo uia foi e o tatou uso na lava tiga o loo tatou oo i ai. Ia manatua pea faapea o le a faamausalīina i tatou e Ieova le Atua ma o le a mafai ai e i tatou ona tumau mausalī i le faatuatua.

[Pusa/Ata i le itulau 24]

Teuga Faafafine: I le fautuaga i fafine Kerisiano, na faapea mai ai Peteru: “Aua neʻi faia i le tino a latou teuga, o le fili lea o le lauulu, ma le teuteu i auro, ma le oofu i ofu; a o le tagata lilo o le loto, ia teua lea i le mea e le pala, o le loto agamalu ma le filemu, o le mea tau tele lava lea i luma o le Atua.” (1 Peteru 3:3, 4) I le vaitaimi o le uluai senituri T.A., sa masani fafine faapaupau ona teu o latou lauulu i tifiga e matuā ese lava, tafili o latou lauulu uumi i ni faiga mataʻina ma teuteu i auro a latou fili. Ai lava, sa faia faapena e le toatele o ni teuga faaalialia—o se mea e lē onomea mo Kerisiano. (1 Timoteo 2:9, 10) Peitai, e lē sese teuga uma lava, auā ua faaaofia e Peteru “le oofu i ofu”—e manino lava o se mea manaomia. Sa faaaogā foi maa tāua e auauna a le Atua i taimi anamua. (Kenese 24:53; Esoto 3:22; 2 Samuelu 1:24; Ieremia 2:32; Luka 15:22) Ae peitai, o se fafine Kerisiano na te alofia ma le atamai teuga feilafi pe faaalialia ma ofu faatosina e faagaee ai faalogona faaleituaiga ma e ao foi ona faaeteete i le faaaogāina o vali mata ina ia ʻaua neʻi soona papanu naʻuā. O le autū o le fautuaga faaaposetolo e faapea e tatau ona tuu atu e le fafine le faamamafa, e lē o le teuteuina o foliga mai i fafo, ae o totonu. Ina ia lalelei moni, e tatau ona ofu o ia i ofu onomea ma ia iai le faalogona o sē e mataʻu i le Atua.—Faataoto 31:30; Mika 6:8.

[Ē Ana le Ata]

Israel Department of Antiquities and Museums: Israel Museum/David Harris