E Mafai Faapefea ona Tatou Tali atu ma le Lē Manatu Faapito i le Alofa o le Atua?

“Afai ua faapea ona alofa mai o le Atua ia te i tatou, e tatau ai ona tatou fealofani.”—1 IOANE 4:11.

1, 2. O le ā ua manaomia mo i tatou e tali atu ai ma le lē manatu faapito i faaaliga o le alofa o le Atua?

O IEOVA o le peresona totino o le alofa. E moni, sa tatou iloa i le mataupu na seʻi faatoʻā mavae atu le maeu o le anoanoai o faaaliga sa faaalia moni ai lona alofa. Sa tatou matauina ai foi pe na faapefea ona tali atu ma le lē manatu faapito Mose, Tavita, ma Iesu Keriso i na faatinoga o le alofa. Pe lē ao ai ea i Molimau a Ieova taitoatasi ona mananao e faia le mea lava lea e tasi? E mautinoa lava e faapea!

² O ā mea e manaomia pe afai o le a tatou tali atu ma le lē manatu faapito i faailoaga o le alofa o le Atua? Mo le tasi o mea, e tatau ona tatou tuu faamuamua o ia i o tatou olaga, alofa atu ia te ia ma o tatou loto atoa, solu, manatu, ma le malosi. (Mareko 12:29, 30) O lona uiga, o le tuutoina matuā atoatoa i le Atua, o le iai lea o se faiā totino mafana ma Ieova. Pe o tatou faanaunau e talanoa atu i lo tatou Tamā faalelagi i le tatalo? Pe o faia e lē aunoa ma le  faatauanau a tatou tatalo? Pe o le mea o faatopelau ona fai a tatou tatalo, ma i nisi taimi, ua pisi naua ua lē faia ai se tatalo? (Roma 12:12; 1 Tesalonia 5:17) Pe o tataʻi atu o tatou manatu ia Ieova, i le avatua ia te ia ma lana faalapotopotoga o le viiga mo ni mea atonu ua tatou faataunuuina? (1 Korinito 3:7; 4:7) Pe o tatou lagona moni e pei ona sa lagona ai le faisalamo? Sa ia faapea mai e faatatau i le Atua: “E taʻi foi faafitu i le aso ona ou vivii atu ia te oe.”—Salamo 119:164.

3. Pe a tatou faatasitasi mo ni fiafiaga, e ao faapefea ona tatou faaalia faapea ua tatou tali atu ma le lē manatu faapito i le alofa o le Atua?

³ E tusa lava pe o tatou tali atu ma le lē manatu faapito i le alofa o le Atua pe leai, tau ina ia matuā faaalia lelei pe a tatou faatasitasi mo ni faafiafiaga. Pe o a tatou talanoaga o faaautū i mea e masani ai o le olaga, po o mea faaleagaga? E lē faapea e manaomia ona tatou faia se suesuega faale-Tusi Paia uigā i taimi uma lava tatou te faatasitasi ai ma uso Kerisiano. Ae mautinoa lava e mafai ona tatou maua ni mea faatupu fiafia i le natura faaleagaga, e faaaofia i a tatou talanoaga. Ae faapefea le faamatalaina o ni mea na tutupu i le fanua, talanoaina o a tatou mau o le Tusi Paia e sili ona fiafia i ai, faamatala atu pe na faapefea ona tatou maua le upu moni, pe taʻua ni faamaoniga o le tausiga alofa ma faamanuiaga a le Atua mo i tatou?

4. E ao faapefea ona tatou manatu i mataupu pe afai tatou te lē fiafia e uiga i se faaeaga i le auaunaga?

⁴ O le isi tulaga faapea e mafai ona faaalia ai le maualuga o lo tatou talisapaia mo le alofa o le Atua, pe a lē tuuina mai ia i tatou se faaeaga o le auaunaga i le faalapotopotoga a Ieova. O ā o tatou uiga faaalia? Afai tatou te manatu mamafa tele i le faamamaluina o Ieova, o le a tatou ioe la faapea o le a sili atu ona viia lelei faapena le Atua e so o se tasi o iai sea faaeaga patino o le auaunaga. (Faatusatusa Luka 9:48.) Ae afai tatou te soona popole naua mo lo tatou lava lelei po o le igoa, o le a oo ai ia i tatou se lagona tiga e pei ona atonu o le a oo ifo ai se manatu faapea ua lē amanaia i tatou. E ao ona tatou manatua faapea e alofa Ieova ia i tatou ma atonu foi o ia silafia faapea e lē o mafai i le taimi nei ona tatou tauaveina le mamafa o sea tiute tauave faatiokarate. Atonu o ia faaʻoaina i tatou i faamanuiaga i nisi auala, ma o na faaaliga o lona alofa e ao ona fesoasoani ia i tatou ia tausia ai lo tatou paleni faaleagaga.—Faataoto 10:22.

Alofa i le Amiotonu, Inoino i le Amio Leaga

5. O ā ni taunuuga e ao ona iai i a tatou amio ona o faaaliga o le alofa o le Atua?

⁵ O faaaliga o le alofa o le Atua ia i tatou e ao ona uunaia ai i tatou ina ia faataʻitaʻi ia Keriso i le alofa i le amiotonu ma inoino i le amio leaga. (Eperu 1:9) E moni, e lē mafai ona tatou faia lenei mea i se tulaga lelei atoatoa, e pei ona sa faia e Iesu. Peitai, e mafai ona tatou faia e avea ma o tatou sini ina ia paia, faamaoni, ma ia tausia tulafono i le mea tatou te mafaia e tusa ai ma lo tatou tulaga lē lelei atoatoa. I le faia o lenei mea, e lē gata ina tatau ona tatou atiina aʻe le alofa mo le amiotonu ma mea lelei, ae ia atiina aʻe foi se inoino, le matuā lē manaomia, se matuā lē fiafia, mo le mea ua leaga. E pei ona faaleo mai e le aposetolo o Paulo lea mea: “Ia ʻinoʻino i le leaga, ia pipii i le lelei.” (Roma 12:9) O le “ʻinoʻino” o se upu e matuā malosi, o lona uiga “ia manatu i ai o se mea e matuā lē fiafia lava i ai.”—Webster’s New Collegiate Dictionary.

6. O le ā o le a fesoasoani ia i tatou e leoleo faasaga i tofotofoga ua togi mai e le lalolagi, o tatou tino agasala, ma le Tiapolo i o tatou ala?

⁶ O le ā o le a fesoasoani ia i tatou e leoleo faasaga i faaosoosoga ua lafo mai i lo tatou auala e le lalolagi, e o tatou lava tino agasala, ma le Tiapolo? O le faamaoni [loyalty] ia Ieova le Atua. Ua ia aioi mai ia i tatou: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” (Faataoto 27:11) Ioe, o le faamaoni ia Ieova o le a uunaia ai i tatou e uia le auala atamai o le inoino i mea e inoino i ai o ia. E lē gata i lea, e tusa lava po o le ā le matagofie po o le fiafia atonu o le a foliga mai ai i le solia o se tasi o tulafono a le Atua, ae tatau lava ona tatou faapea ifo ia i tatou o le faia faapea e leai lava sona aogā. (Kalatia 6:7, 8) O le loto o le tagata e faaʻoleʻole, e faapiopio, e tau faasese, e pei lava ona faamanatu mai ia i tatou i le Ieremia 17:9. O le loto faa-Kerisiano e manao i mea lelei, matagofie, ma mamā. Ae i nisi taimi ona o faanaunauga agasala ua lolo atu ai e manao foi i le mea ua leaga. E pei o loto o tagata Isaraelu o ē sa  tapuai ia Ieova ae i le taimi lava e tasi sa tausisi atu pea i a latou “mea maualuluga” o ifoga i tupua, o lea, o o tatou lava loto e mafai ona manatu faapito ma faitogafiti. (1 Tupu 22:43; Teuteronome 12:2) Atonu o le a taumafai o tatou loto lē lelei atoatoa e faia ni faamolemolega ina ia tuu ai i tatou i le auala o faaosoosoga. Atonu o le a ia taumafai e manatu māmā ai i le matuiā o le faia o se mea sese lea ua faaosoosoina ai i tatou. Pe ono taumafai foi o tatou loto e faamautinoa ia i tatou faapea so o se faasalaga lava o le a mo na o sina taimi.

7. Aiseā e tatau ai ona tatou leoleo faasaga i le tuʻinanau i mea ua leaga?

⁷ Ona o lo tatou talisapaia mo le alofa o le Atua, e tatau ai ona tatou leoleo faasaga i le naunau i le mea ua leaga, e pei o le mafuli atu i amioga lē mamā faaleituaiga, e tusa lava pe o tatou nonofo fua po o ua faaipoipo. I le tele o taimi, o le mea sa amata foliga mai o se faamanaia po o se faateine e leai se mea e afaina ai, ua iʻu ina matuā aafia ai faalogona ootia o ni Kerisiano se toalua ma na faapea ona la faia ai pea le agasala ma ua faateʻaina. E oo lava i toeaina, o ē e ao ona avea o ni faaaʻoaʻo lē mataʻuleagaina i le lafu, ua oo ina agasala i nei mea!—Faatusatusa 1 Tupu 15:4, 5.

8. O le ā le lapataiga faaaʻoaʻo ua aumaia ia i tatou e le aposetolo o Paulo, ma e ao faapefea ona faataʻitaʻia lea faafitauli?

⁸ Seʻi manatu i le aposetolo o Paulo, o lē na faamanuiaina i faaaliga o le mana malosi ma le mana faatasi ai ma le meaalofa o le faagaeeina tauatua. Ina ia manuia i lana tauiviga faasaga i faanaunauga agasala, sa tatau ai ona ia tuʻi—ioe ia matuā sasa lava—lona tino. Pe ao la ona faamalieina ai i tatou i le na o le faia o sina gaoioiga e itiiti ifo i lea? (Roma 7:15-25; 1 Korinito 9:27) E peiseaī sa tatou iai i totonu o se tamai vaa i luga o se vaitafe o loo tatafe malosi ma o loo taaʻina atu i le mea o loo tosoina atu agaʻi i ai i ona āfu. Ina ia puipuia mai le mala, e tatau ona tatou matuā tauivi e alo atu faasaga i le mea o loo tafe mai ai le au malosi. Atonu e ono foliga mai tatou te lē o faia ni agaʻigaʻi i luma tetele, ae afai lava  tatou te faamalosia pea ma le tiotio i tatou, o le a tatou lē paʻūū ai i lalo i le āfu mo lo tatou faaumatiaga. E mautinoa lava, o faaaliga o le alofa o Ieova le Atua ia i tatou e ao ona faapogaia ai i tatou ina ia tatou faamalolosi ma le tiotio ina ia faamaoni ia te ia e ala i le inoino i le mea ua leaga ma alofa i le amiotonu.

Faaalia le Alofa Faaleuso

9. O le ā le fautuaga ua aumaia e le aposetolo o Ioane e tusa ai ma le alofa i o tatou uso?

⁹ O faaaliga o le alofa o le Atua e ao foi ona uunaia ai i tatou e alofa i o tatou uso e pei ona alofa o Iesu Keriso i ona soʻo. (Ioane 13:1) Ma le matuā talafeagai lava, ua taʻua ai e le aposetolo o Ioane: “O le alofa lava lenei, e le ona ua tatou alofa i le Atua, a ua alofa mai o ia ia te i tatou, ua na auina mai foi lona Alo o le togiola mo a tatou agasala. Le au pele e, afai ua faapea ona alofa mai o le Atua ia te i tatou, e tatau ai ona tatou fealofani.” (1 Ioane 4:10, 11) O le mea moni, na fetalai Iesu faapea o le auala e mafai ai ona iloa ona soʻo moni o lo latou fealofani.—Ioane 13:34, 35.

10, 11. O ā nisi o auala e mafai ona tatou faaalia ai le alofa faaleuso?

¹⁰ Ua tatou iloa faapea e ao i Kerisiano ona faaalia le alofa faaleuso. Ae o se mea lelei le faamanatu ifo ia i tatou lava auala eseese ia e mafai ai ona tatou faaalia lenei alofa faa-Keriso mo le tasi i le isi. O sea alofa o le a fesoasoani ia i tatou e lē amanaia ai feeseeseaiga e tusa ai o le va o lanu, atunuu, aʻoaʻoga, aganuu, ma le tulaga tau le tamaoaiga. Ae lē gata i lea, o le alofa faaleuso o le a uunaia ai i tatou e ō atu ina ia faatasitasi i sauniga. Afai tatou te alolofa moni i o tatou uso, o le a tatou lē faatagaina la le leaga o le tau po o sina faaletonu faaletino e taofia ai i tatou mai le olioli i le aufaatasi ma i latou ma fetufaai i ni feofoofoaiga o faalaeiauga. (Roma 1:11, 12) E sili atu i lena, o le alofa faaleuso o le a faia ai i tatou ina ia sauniuni lelei mo a tatou sauniga ma faia se vaega tiotio i ia sauniga ina ia mafai ai ona tau faatupu le alofa o le tasi i le tasi ma galuega lelei.—Eperu 10:23-25.

¹¹ Ae faapefea le fesoasoani atu i o tatou uso i le faiva i le fanua? Ua matauina faapea e masani lava ona auai toeaina ma auauna o le faiva o le tasi i le isi pe ō taitoatasi, i le faiva i lea fale ma lea fale, ae atonu e mafai faatasi ma sina fuafuaga, ona valaaulia nisi o le au talaʻi o le Malo o loo manaomia se fesoasoani i le faiva ina ia ō faatasi ma i latou. O le faaalia o le alofa i lenei auala o le a faia ai le faiva i le fanua a toeaina ma auauna o le faiva o se taui sautua lua. Ae faapefea i le aveina o se tagata talaʻi fou i se suesuega faale-Tusi Paia i aiga?—Roma 15:1, 2.

12. E faapefea ona tatou malamalama i le 1 Ioane 3:16-18?

¹² O le alofa o le a faapogaia ai foi i tatou e o atu e fesoasoani i o tatou uso o ē atonu o loo iai moni le manaoga mo mea faitino. Na tusi le aposetolo o Ioane: “O le mea lava lenei ua tatou iloa ai le alofa, ina ua tuuina atu e ia o lona lava soifua e sui aʻi i tatou; e tatau foi ona tatou tuuina atu lo tatou ola e sui aʻi le au uso. O sē ua i ai le oa a le lalolagi nei, pe a iloa atu e ia lona uso ua mativa, a e punitia lona loto alofa ia te ia, pe faapefea ona tumau o le alofa i le Atua i lea tagata? Laʻu fanau e, aua neʻi  tatou alolofa tau o le upu ma le gutu, a o le amio ma le faamaoni.” (1 Ioane 3:16-18) Atonu e lē o manaomia nei i tatou ina ia tuuina atu i tatou e fai ma sui o i latou, ae i nisi taimi ua tatou maua ai avanoa e faailoa ai le alofa mo i latou i nisi auala, ia lē tau o le upu ma le gutu ae ia faapea foi i galuega. E leai se mea e sese ai le alofa i o tatou uso i upu, ae tatou te lē mananao e faatapulaa lo tatou alofa i lenei mea a o loo latou manaomia ni mea faitino. O le faaupuga a Iesu faapea “e sili le manuia o le na te foai atu, i le manuia o le na te talia mai” e faatatau foi i le sauniunia o fesoasoani faaletino.—Galuega 20:35.

13. (a) O ā nisi o upu moni faavae ua tatou aʻoaʻoina mai le fesoasoani a le faalapotopotoga vaaia a Ieova? (e) O le ā le manatu tāua na faia e Charles Taze Russell?

¹³ Ua ia i tatou le avanoa e faaalia ai le alofa mo o tatou uso o ē o loo taʻimua i le faapotopotoga po o le fesootai atu ma le faalapotopotoga vaaia a Ieova i le lalolagi aoao. E aofia ai i lenei mea le faamaoni atu i “le auauna faamaoni ma le mafaufau.” (Mataio 24:45-47) Seʻi o tatou talia le mea moni faapea e tusa lava po o le ā le tele ua tatou faitau ai i le Tusi Paia, ae lē mafai lava ona tatou aʻoaʻoina na o i tatou le upu moni. E lē mafai ona tatou iloa le upu moni faatatau ia Ieova, ana fuafuaga ma uiga, le uiga ma le tāua o lona suafa, le Malo, le togiola a Iesu, le eseesega i le va o le faalapotopotoga a le Atua ma le faalapotopotoga a Satani. Tatou te lē mafai foi ona aʻoaʻoina le pogai ua faatagaina ai pea e le Atua le amio leaga. E pei lava ona sa tusia e le uluai peresitene o le Sosaiete o le Olo Matamata, o Charles Taze Russell, i le 1914: “Pe lē o i tatou ea o tagata fiafia ua faamanuiaina? Pe lē o lo tatou Atua ea e faamaoni? Afai e iloa e se tasi se isi mea e sili atu ona lelei, inā faia ia. So o se tasi o outou ua na maua se mea e sili atu ona lelei, matou te faamoemoe o le a e taʻu mai ia i matou. Ua matou iloa e leai se mea e sili atu ona lelei po o se vaega foi e sili atu lona lelei na i lo mea ua matou maua i le Afioga a le Atua. . . . E leai se gagana po o se tusi e mafai ona taʻu maia le filemu, le olioli ma le faamanuiaga ua aumaia e le malamalamaga manino e uiga i le Atua moni i o tatou loto ma olaga. O le tala i le Atamai, le Faamasino Tonu, le Mana ma le Alofa o le Atua, ua atoatoa ona faamalieina ai faanaunauga o o tatou mafaufau ma o tatou loto. Tatou te lē o toe saili atu i se isi mea. E leai lava se isi mea e sili atu o toe faanaunau i ai na i lo le maua o lenei Tala ofoofogia e sili atu ona manino i o tatou mafaufau.” (Le Olo Matamata faa-Peretania o Tesema 15, 1914, itulau 377-378) Maeu le moni o nei upu ua lelei ona tusia!

Auauna ia i Latou o i Fafo

14. E ao faapefea ona uunaia i tatou e faailoaga o le alofa o le Atua ia gaoioi ai faatatau ia i latou i fafo?

¹⁴ O faailoaga o le alofa o le Atua ua tatou olioli ai e ao ona uunaia ai i tatou e faaalia atu le alofa i tuaoi, ia i latou i fafo atu o le faapotopotoga. E mafai faapefea ona tatou faia lenei mea? O tulaga ua faailoa ai faapea atonu e mafai ona tatou fesoasoani i o tatou tuaoi i se auala faitino. Ae, o le mea e aupito sili atu ona tāua, o le mafai lea ona tatou faaalia i tuaoi le alofa e ala i le avatua i isi o le tala lelei o le Malo o le Atua ma fesoasoani i ē  alolofa i le amiotonu ina ia avea ma soʻo o Iesu Keriso. Pe tatou te auai e lē aunoa i lenei faiva i le lautele, pe o tatou faaleamanaia lea mea? Pe ua avea na o se mea e fai ma masani po o sina ituaiga o auaunaga e faalētāua? Pe o uunaia moni i tatou e le alofa i tuaoi? Pe o tatou faaalia le manatunatu i tulaga o isi? Pe o tatou onosai, faatalitali mo le tali mai a tagata? Pe o tatou faamalosiʻau i tagata e ona fale ia faamatalaina mai i latou lava? Ioe, na i lo le faia uma e i tatou o tala, seʻi tatou faatagaina le alofa i tuaoi e uunaia i tatou e faalogologo ma ia maua ni talanoaga faale-Tusi Paia faatasi ma tagata tatou te feiloai atu i ai i la tatou faiva.

15. (a) Aiseā e sili ai ona lelei le faaupuga “molimau atu lē fuafuaina” na i lo le “molimau faafuaseʻi”? (e) Aiseā e faaaogā ai avanoa e molimau atu ai lē fuafuaina?

¹⁵ Pe o tatou mataala e pei ona tatau ai ona tatou faia ina ia faaaogā avanoa e molimau atu ai lē fuafuaina? E ao ona matauina faapea o lenei mea ua lē na o se molimau atu faafuaseʻi, i le faia o ni gaoioiga e leʻi fuafuaina pe faalētāua tele. O le molimau atu lē fuafuaina e matuā tāua, ma o le alofa i o tatou uso a tagata o le a uunaia ai i tatou e faia ni avanoa ina ia auai. Maeu le fua tele e masani ona maua i lea molimau atu! Mo se faataʻitaʻiga, a o auai se uso i se tauaofiaga a Molimau a Ieova i Italia i matu, na ia alu atu ai i se faleinisinia o taavale ina ia faapipii molī o lana taavale. A o faatalitali, sa ia molimau atu ia i latou sa i ona tafatafa ma avatu ia i latou ni tusi valaaau e valaaulia ai i latou i le lauga lautele faale-Tusi Paia i le Aso Sa. I se tauaofiaga faavaomalo i Roma i le tausaga mulimuli ane, na faafeiloai ai ma le mafana o ia e se uso na te leʻi iloaina. O ai lenei uso? Ioe, o ia lenei o se tasi o tagata o ē sa ia avatu i ai tusi valaau i le faleinisinia i le tausaga ua mavae! Sa alu atu le tagata e faalogologo i le lauga lautele ma na ia faatalosagaina ai le faia o sana suesuega faale-Tusi Paia. Nei la ua avea uma i laua ma lana avā ma Molimau a Ieova tuuina atu. E lē tau fesiligia le mafai ona matuā tauia o le molimau atu lē fuafuaina!

Ia Tali atu Pea i le Alofa o le Atua

16. O ā fesili atonu e lelei ona tatou fesili ifo ai ia i tatou lava?

¹⁶ E moni e anoanoai faaaliga o le alofa o Ieova mo ana meafaiola. E pei ona ua tatou matauina, ua aumaia e le Tusi Paia ia i tatou faaaʻoaʻoga lelei o i latou o ē ua tali atu ma le lē manatu faapito i faaaliga o le alofa o le Atua. Ma le matuā fetaui lava, na alaga ai le faisalamo faagaeeina: “Ia vivii atu i latou ia Ieova ona o lona alofa, ma ona vavega na fai i le fanau a tagata.” (Salamo 107:8, 15, 21, 31) Pe tatou te talia ea le alofa tunoa o le Atua ma misia ai lana fuafuaga? Aua lava neʻi tupu lena mea! (2 Korinito 6:1) O lea seʻi o tatou fesili ifo ia i tatou lava taitoatasi: ‘⁠Pe o oʻu talisapaia moni faailoaga o le alofa o le Atua ua uma ona ou olioli ai ma faamoemoe ai ma le mautinoa e olioli atili i le lumanai? Pe o latou uunaia aʻu ina ia alofa ia Ieova ma loʻu loto atoa, solu, mafaufau, ma le malosi? Pe o aʻu moni o se tagata e matuā tuutoina i le Atua? Pe ou te alofa i le amiotonu ma inoino i le amio leaga? Pe o oʻu faaalia le alofa faaleuso? Ma o le ā le vavalalata o oʻu taumafai e savali ai i tulagāaao o Iesu e tusa ai ma laʻu faiva?’

17. O le ā o le a iʻu i ai pe afai tatou te tali atu ma le lē manatu faapito i faaaliga o le alofa o Ieova le Atua?

¹⁷ E moni, e tele auala e faaalia ai lo tatou loto faafetai moni mo faaaliga uma o le alofa o le Atua lea ua tatou tofo i ai. E ala i le faaaogā atoatoa o avanoa e faaalia ai lea talisapaia, o le a tatou faafiafia ai le finagalo o lo tatou Tamā faalelagi, avea ai i tatou o se faamanuiaga i isi, ma maua le olioli, filemu, ma le lotomalie e i tatou lava. O le mea lea tau ina ia tatou faaauau ona tali atu ma le lē manatu faapito i faaaliga o le alofa o le Atua.

O le a Faapefea ona E Tali?

□ O le ā e manaomia e tali atu ai ma le lē manatu faapito i le alofa o le Atua?

□ E mafai faapefea ona tatou leoleomalu faasaga i faaosoosoga?

□ O ā nisi o auala e faaalia ai le alofa faaleuso?

□ E ao faapefea i faaaliga o le alofa o Ieova ona uunaia ai i tatou e gaoioi agaʻi i o tatou tuaoi?

[Fesili mo le Suʻesuʻega]

[Ata i le itulau 17]

E tatau ona tatou tauivi faasaga i faanaunauga agasala ina ia alofia ai mala

[Ata i le itulau 18]

E faaalia e toeaina le alofa faaleuso e ala i le ō faatasi ma isi i le faiva o le Malo

[Ata i le itulau 19]

Na tataʻi mai e Charles Taze Russell, le uluai peresitene o le Sosaiete o le Olo Matamata, manatu i le filemu, olioli, ma faamanuiaga e na o le Atua e mafai ona ia saunia