Fesili Mai le Au Faitau

▪ Aiseā ua faasino atu ai e le New World Translation i le upu Eperu ʽa·rumʹ i le Kenese 3:1 e avea o le “faaeteete [cautious]” ae o loo faapea mai isi faaliliuga o le Tusi Paia o “agapiʻopiʻo [cunning]” po o le “poto [clever]”?

Ua faitauina faapenei le mau: “Ua faamaonia nei le sili ona faaeteete o le gata i manu feai uma o le vao na faia e Ieova le Atua. O lea na ia faapea atu ai i le fafine: ‘E moni ea na fetalai mai le Atua e lē tatau ona lua aai i laau uma lava o le faatoaga?’” (NW).

I le Faataoto 12:23 ma isi nofoaga, ua tuuina atu ai e le New World Translation le upu Eperu o le ʽa·rumʹ e faapea o le “tofa mamao [shrewd],” o le tasi lena uiga faavae o le upu pe a faatatauina i tagata. Ae e tusa ai o le tulaga lea ma le tele o isi upu, o le ʽa·rumʹ e iai tafa eseese o lona uiga. Mo se faataʻitaʻiga, ua faamatalaina e Benjamin Davidson le ʽa·rumʹ e faapea: “I. faaʻoleʻole [crafty], agapiʻopiʻo [cunning], faigata ona iloa [subtle].—II. mafaufau faaeteete [prudent], faaeteete [cautious].”—The Analytical Hebrew and Chaldee Lexicon.

Aiseā la ua filifilia ai e le New World Translation le uiga lona lua o le “faaeteete” i le Kenese 3:1? O lena filifiliga ua ōgatasi ma isi faaliliuga. Mo se faataʻitaʻiga, ina ua faaliliuina le Kenese 3:1 i le gagana Eleni i le faaliliuga a le Septuagint o lona tolu o senituri T.L.M., sa faaaogā ai le upu phroʹni·mos—le upu lava lea na mulimuli ane faaaogā i le Mataio 10:16: “E tatau ona outou faaeteete e pei o gata ma fifilemu e pei o lupe.”—Today’s English Version.

Na fai se manatu o le tagata aʻoga Eperu o Ludwig Koehler i tuā i le 1945 e faapea: “E matamuli le gata. Ua mafai e le upu Eleni phronimos ona faamatalaina lelei lenei mea, auā e ala i lenei matamuli po o le faaeteete, ua faaalia ai e le gata lona tulaga ma le faatinoina o le phrenes.” O le phrenes i inei o lona uiga o le ituaiga o atamai faalenatura lena e faaalia foi e isi manu.—Faatusatusa Faataoto 30:24.

Ae peitai, e iai se mafuaaga e sili atu ona tāua mo le faaaogāina o le upu “faaeteete” na i lo o le “tofa mamao” po o le “poto” i le Kenese 3:1. I le taʻua o le gata i inei faapea e poto, i le taimi lava a o leʻi faamatalaina faapea na ia faaseseina Eva i le faia o le agasala, e ono mafai ona taʻitaʻiina atu ai le toatele o le au faitau e faia se faaiʻuga faapea ua faasino i le Tusi Paia faapea sa galueaiina lenei taumafaiga e na o se gata e ala i le malosi o lona lava poto e lē o se mea e masani ai. O se faamatalaga faapena o le a faaitiitia ai le uiga o le tala i se tulaga o se talafatu—ma o se talafatu valea lena.

I le tuufeagai ai, ua aʻoaʻo e le Tusi Paia faapea sa iai se mea e sili atu na i lo o se gata poto sa galue i inā i le faatoaga i Etena. Ua faailoa manino e le Faaaliga 12:9 Satani le Tiapolo faapea “o le gata tuai.” O ia o le malosi lē vaaia, e malosi atu na i lo tagata, na faagaoioia le gata lē poto i le auala e pei ona faagaoioia ai e se tagata tomai e faafoliga leo o mea taalo ina ia tautala mai. O le faaeteete faalenatura o le gata na faia ai o ia o se mea lelei e filifili ai mo lea togafiti. Ona e leʻi matamuli o ia ma solomuli ese ma le faaeteete e pei o lona natura ae na i lo o lea sa faamalosi ona tatala lona gutu ma amata ona tautala atu ia Eva, o lea na uaʻi atu loa i ai manatu uma lava o Eva i se uiga e sili atu ona uigā.

O le Afioga faagaeeina a le Atua e saʻoloto mai i talafatu, ma e ala i le faaupuina ma le saʻo lelei, ua fesoasoani ai le New World Translation ia i tatou e talisapaia lenei mea moni.—2 Timoteo 3:16.

▪ Talu ai ua iloa e Molimau a Ieova faapea o ē ua oti latou te lē iloa se mea, ae aiseā e tumau ai pea ona tāua ia i latou le auai i falelauasiga o uso talitonu?

O le poto saʻo mai le Tusi Paia e uiga i le tulaga o tagata oti ua puipuia ai Molimau a Ieova mai i le faia o ni gaoioiga sese ma iʻu ai i le faia o ni amioga e lē atamai i falelauasiga. Ua avatua ai foi ia i latou le mafuaaga e auai ai i falelauasiga faa-Kerisiano.

Ua faaalia manino i le Afioga a le Atua faapea a maliu se tagata, e lē ola pea o ia e avea o sē e lē mafai ona oti. (Failauga 9:5) Pe a mavae le oti, e foi atu le tino i le efuefu, e ala i le tanuga masani pe e ala i le faaliuefuefuina. E lē o toe ola lē ua oti; o le a toe ola mai o ia i le na o le toe faatuina o ia e le Atua i le lumanai.—Ioane 5:28, 29; Galuega 24:15.

I lea, e lē mulimuli atu ai Molimau a Ieova i ni faiga o falelauasiga na e faavae i talitonuga faapea o le tagata ua oti e iai sona solu e lē mafai ona oti, lea e ola pea i se isi mea. Latou te lē auai i ni leo i le po, faatasi ma ni pesega leo tetele o le faanoanoa ina ia faafefe ai “agaga,” e lē auai foi i ni leoleoga i le po atoa pe matuā fetagisi ona o le faanaunau ina ia faatoʻafilemu ai lē ua oti.

Ae peitai, e lē o le uiga o lenei mea faapea o le a lē faanoanoa tagata o le Atua. O le maliu o se tasi o le aiga po o se uo mamae o se mea e faanoanoa ai, e oo lava i tagata tapuai moni o ē o loo iai le poto saʻo e uiga i le oti. Mo se faaaʻoaʻoga, ina ua manatu Iakopo faapea atonu ua fasiotia Iosefa e se manu feai, ‘⁠sa faanoanoa le tamā matua i aso e tele ona o lona atalii.” Ua tatou faitau ai faapea “ua tutū i luga ona atalii uma ma ona afafine uma e faamafanafana ia te ia.” (Kenese 37:33-35) Ina ua maliu Iakopo faamaoni, “ona poloai lea o Iosefa i ana auauna fomai ia latou atualala i lona tamā,” ma na “tagi foi Aikupito ia te ia e fitugafulu ona aso.” A o leʻi taofi mau le aiga o Iakopo i manatu sese o Aikupito e uiga i le oti, ae manino lava sa uunaia i latou ona o le oti o Iakopo. O “le aiga uma o Iosefa, ma ona uso,” sa mananao ina ia tanu lelei Iakopo, ma e oo lava i tagata i fafo sa mafai ona latou matauina  faapea sa faanoanoa i latou.—Kenese 50:1-11.

E anoanoai le tele o isi faaaʻoaʻoga a le Tusi Paia e mafai ona siitia mai, na o loo taʻua ai le matuā uunaia moni o auauna a Ieova ona o le oti o se uso tapuai po o se tauaiga ma na faapea ai ona latou faanoanoa i se tulaga tatau. * Ina o iai Iesu faatasi ma aiga faanoanoa o Lasalo, sa leʻi faapea e leʻi uunaia ai faalogona malolosi Iesu pe olioli i se tulaga lē tatau. E ui lava sa iai le mautinoa i le mana o le toetu, ae sa tagi Iesu. (Ioane 11:33-35) Ina ua mavae le maliu o Iesu lava ia, sa faanoanoa ona soʻo, e ui lava na ia taʻu atu ia i latou faapea o le a fasiotia o ia ma toe faatuina i le ola.—Mataio 16:21, 28; Ioane 16:17-20; 20:11.

E mafai ona lagona e auauna a le Atua i aso nei le faanoanoa lea ua aumaia e le oti. Peitai, o lo latou malamalamaga faale-Tusi Paia ua fesoasoani e taofiofia pe faapaleni ai lo latou faanoanoa, i le ōgatasi ai ma le 1 Tesalonia 4:13, 14: “Ou te loto ina ia outou iloa, le au uso e, i le mataupu i e o momoe, ina neʻi outou faanoanoa, pei o isi e leai so latou faamoemoe. Auā afai tatou te talitonu, ua maliu Iesu ma toe tu mai, e faapea foi ona aumaia e le Atua faatasi ma ia e o momoe ona o Iesu.”

Ae faapefea la e uiga i le auai i se falelauasiga o se Kerisiano (po o se lauga faamanatu faatatau i se tagata talitonu)? E iai mafuaaga faale-Tusi Paia e ala ai ona lagona e Molimau le aogā o le auai i sea sauniga.

Manatua faapea ina ua foliga mai ua leiloa le atalii o Iakopo, “ua tutū i luga ona atalii uma ma ona afafine uma e faamafanafana ia te ia.” (Kenese 37:35) I le tele o atunuu o se tu mo tauaiga le faapotopoto mo se falelauasiga. E avea lena o se avanoa mo isi o ē e lē vavalalata tele i le aiga ma e lē o matuā aafia tele tau i faalogona, ina ia avatu ai ni upu o faamafanafanaga ma faamalosiauga. Ina ua maliu Lasalo, ‘o le toatele o tagata Iutaia na ō mai ia Mareta ma Maria ina ia faamafanafana ia i laʻua ona o lo la tuagane.’ (Ioane 11:19) E aafia ai foi i lenei mea Kerisiano o ē mananao ina ia “faamafanafana atu ia te i latou ua maua i se tasi lava puapuaga.”—2 Korinito 1:4.

E ui lava atonu o loo matuā pisi ovasia Kerisiano, ae ao lava ia i latou ona taʻimua i le saunia o le faamafanafanaga i le lafu. Latou te manatua faapea o lo latou faaaʻoaʻo o Iesu, le Leoleo Mamoe Lelei, na tofia ‘ina ia fusifusi i ē ua loto momomo ma faamafanafana i ē uma ua faanoanoa.’ (Isaia 61:1, 2; Ioane 10:14) Sa leʻi ofoina atu e Iesu sea faamafanafanaga ina ua maua se taimi. Sa naunau o ia e maliu atu ina ia faatasi ma le aiga faavauvau o Lasalo—ina ia auai i o latou faanoanoaga.—Ioane 11:11, 17, 33.

E oo lava i Kerisiano o ē atonu e lē mafai ona fai atu ni upu se tele i ē o faavauvau i le taimi o le falelauasiga e mafai ona lelei le tau lava o lo latou auai atu i ai. E mafai ona maua mai e tagata o le aiga faanoanoa se matuā faamafanafanaga tele mai i le auai ma le tiga alofa o le toatele—talavou ma ē matutua—mai i le faapotopotoga Kerisiano. Manatua uiga faaalia o nisi o tagata Iutaia ina ua maliu atu Iesu i tuafafine faanoanoa o Lasalo: “Faauta i le tele o lona alofa ia te ia!” (Ioane 11:36) O aiga lē talitonu, tuaoi, po o aumea i galuega sa auai i le falelauasiga o se Kerisiano sa matuā faafiafiaina lava i latou ona o le toatele o Molimau na auai ma i lea sa sili atu ai ona latou talia upu moni o le Tusi Paia na folasia atu.

O amioga a Molimau e auai e ao ona fetaui ma le tulaga. E ui lava ina iloa e lē o toe lagona e lē ua maliu se tiga, ma e mautinoa faapea o loo faatalitali mai le toetu mo ē uma e faamaoni, ae latou te teulotoina lava le fautuaga, ‘O ona po e tagi ai ma ona po e ʻataʻata ai, o ona po e taufaitagituʻi ai ma ona po e sasaa ai.’ (Failauga 3:4) O se falelauasiga po o se lauga faamanatu e lē o se taimi lea mo ni talanoaga tausua leo tetele. O se sauniga mo le faanoanoa, e tausisi atu ai i le fautuaga: “Ia outou olioli faatasi ma e ua olioli, ia outou tagi foi faatasi ma e ua fetagisi.”—Roma 12:15.

E iai foi se isi mafuaaga e ala ai ona auai Molimau a Ieova i falelauasiga. Ua faapea mai le Afioga a le Atua: “E sili ona lelei o le alu i le fale o i ai le faanoanoa, i le alu i le fale ua fai ai le tausamiga; auā o le iuga lea o tagata uma; e manatua foi e le tagata ola i lona loto. . . . O le loto o le tagata poto ua i le fale o i ai le faanoanoa; a o le loto o e valelea, ua i ai lea i le fale o i ai le olioli.”—Failauga 7:2-4.

A o iai i Molimau a Ieova le pogai mo le faamoemoe, o na upu sa faagaeeina ma tuu i le Tusi Paia mo lo tatou lelei. E ono mafai ona faatusaina se falelauasiga i se “fale o i ai le faanoanoa.” A o tatou auai, e mafai ona liliu atu o tatou manatu mai i o tatou popolega masani po o galuega, ma taulai atu i le olaga faanoanoa. Pe auala i maʻi po o nisi “mea e tupu ai” e lē mailoa, o le oti e mafai ona taia ai so o se tasi o i tatou ma vave ona aveesea ai i tatou, auā “e le iloa e le tagata lona tausaga.” (Failauga 9:11, 12) O mātua o ē e iai a latou fanau faatasi ma i latou i se falelauasiga faa-Kerisiano atonu latou te iloa faapea o lenei mea e mafai ona faia ai ni talanoaga i le tulaga moni o le oti, lo tatou manaomia o le togiola, ma le atamai o le auauna “i le Atua na te toe faatuina e ua oti.”—2 Korinito 1:9; Failauga 12:1, 13.

E lē o manatu Molimau a Ieova i ni falelauasiga o ni sakalameta (mea paia), ae ua latou iloa faapea o nei mea faanoanoa e tutupu ua ofoina atu ai se avanoa mo le avatuina o faamafanafanaga. E ala i le auai, ua mafai ai e Kerisiano ona avatu se faamaoniga o le alofa ma le faaaloalo ua ia i latou mo o latou uso Kerisiano. Ma e mafai foi ona uunaia ai i latou e mafaufau atili ma le uigā i le uiga o le ola, e uiga i le auala e ao ona latou faaaogā ai o latou lava ola i luma o le Atua.

[Faaopoopoga i lalo]