O le Soifuaga o Iesu ma Lana Faiva

I Luma o le Au Saniterini, ona Sosoo lea ma Pilato

UA LATALATA ona ao. O lona faatolu ai lea ona faafitia e Peteru Iesu, ma ua uma foi ona faia e sui o le au Saniterini la latou faamasinoga faatagāfai ma ua taape. Ae peitai, ua latou toe feiloai i le taeao o le aso Faraile i le tafa o ata, o le taimi lea i le Maota o le au Saniterini. O la latou fuafuaga sa faia ina ia faafoliga ai e faaletulafono le faamasinoga lea na faia i le po. Ina ua avatu Iesu i o latou luma, ua latou fai atu, e pei ona sa latou faia i le po: “Afai o oe o le Keriso, fai mai ia ia te i matou.”

“Pe afai ou te fai atu ia te outou, tou te le talitonu mai lava,” ua tali atu ai Iesu. “Afai foi ou te fesili ia te outou, tou te le tali mai lava.” Ae peitai, ua faasino atu ma le lototele e Iesu i lona faailoaga, i le faapea atu: “E amata i nei ona po ona nofo o le Atalii o le tagata i le itu taumatau o le Atua mamana.”

“O oe foi ea le Alo o le Atua?” ua latou fia iloa uma ai.

“O aʻu lea ua outou fai mai ai na,” ua tali atu ai Iesu.

Ona o loo faanaunau nei tagata i le fia fasioti tagata, o lea ua lava ai lea tali. Latou te manatu o se upu vale. “ Se a le aoga o sa tatou toe molimau?” ua latou fesili ai. “Auā o i tatou lava, ua tatou faalogo i lana lava upu.” O lea ua latou fusifusi ai ia Iesu, taʻitaʻi ese atu ia te ia, ma tuuina atu o ia i le kovana Roma o Ponotio Pilato.

Ua matauina uma nei mea e Iuta, o lē na faalata ia Iesu. Ina ua ia iloa atu ua faasalaina Iesu, sa faanoanoa o ia. O lea na ia alu atu ai i ositaulaga sili ma toeaina ia toe faafoi atu le 30 tupe siliva, i le faamatala atu: “Ua ou agasala, ina ua ou faalata le ua le sala.”

“Sa matou mea ea lena? faitalia lava oe,” ua latou tali atu ai ma le lē alofa. O lea ua lafo ai e Iuta tupe siliva i le malumalu ma alu ese ma ia taumafai ai e sisi o ia lava. Ae peitai, o le lala na nonoa ai e Iuta le maea atonu na gau, ma paʻu ifo ai lona tino i maa i lalo, ma pa ai o ia.

Ua lē mautinoa e ositaulaga sili po o le ā le mea o le a fai i tupe siliva. “E sa ona tuu ia mea i le mea e teu ai oloa,” ua latou filifili ai, “auā o le tau o le toto.” O lea, ina ua uma se felafolafoaiga, ona latou faatau ai lea i le tupe se fanua a le faiipu omea e tatanu ai tagata ese. O lea ua taʻua ai lea fanua “O le fanua o le toto.”

O loo taeao po pea ae avatu loa Iesu i le maota o le kovana. Ae o tagata Iutaia o ē na ō faatasi ma ia sa mumusu e ulu atu ona sa latou talitonu faapea o le aufaatasi vavalalata ma Nuu Ese o le a faaleagaina ai i latou. O lea ina ia faafiafiaina i latou ua sau Pilato i fafo. “ Se a se mea ua outou momoli ai i lena tagata?” ua ia fesili atu ai.

“Afai ana le pagota o ia, po ua matou le tuuina atu o ia ia te oe,” ua latou tali atu ai.

I lona faanaunauga e ʻaloese mai le aafia ai, ua tali atu Pilato: “Ina ave ia e outou ia te ia, ina faamasino ia te ia i la outou tulafono.”

I le faaalia o o latou faanaunauga fia fasioti tagata, ua tali atu ai tagata Iutaia: “E sa ona matou fasioti o se tasi.” E moni, afai latou te fasiotia Iesu i le taimi o le Faigaai o le Paseka, atonu o le a faapena foi ona faapogaia ai le faanunununu o tagata, talu ai o le toatele o tagata sa faaaloalo ia Iesu. Ae  afai e mafai ona latou tuuina atu i tagata Roma e faasalaina o ia i se tuuaʻiga faapolotiki, o le a mafai ai ona saʻoloto i latou mai lenei avega mamafa i luma o tagata.

Ua fatu aʻe nei e taʻitaʻi lotu nisi moliaga eseese, ia sa leʻi taʻua i la latou uluai faamasinoga, lea na latou taʻusalaina ai Iesu faapea ua upu vale. E tolu vaega o le moliaga ua latou faia: “Na matou iloa lenei tagata ua ia [1] faasese i le nuu, ua [2] vavao foi ona avatu o taulaga ia Kaisara, ua [3] faapea mai, o ia lava o le Tupu, o Keriso.”

O le moliaga faapea ua fai atu Iesu o ia o le tupu o le mea lea ua popole ai Pilato. O lea, ua toe ulu atu ai o ia i lona maota, ua valaau atu ia Iesu ina ia sau ia te ia, ma fesili atu: “O oe ea le tupu o tagata Iutaia?” I se isi faaupuga, pe ua e solia ea le tulafono e ala i le faalauiloa atu o oe lava e avea o se tupu e tetee ai ia Kaisara?

O loo manao Iesu e fia iloa po o le ā le tele na faalogo ai Pilato e uiga ia te ia, o lea ua ia fesili atu: “Pe se upu mai ia te oe lea upu, pe na taʻua aʻu e nisi ia te oe?”

Ua taʻutino e Pilato na te lē iloa e uiga ia Iesu ma ua manao e fia iloa le mea moni. “Ou te se Iutaia ea?” ua ia tali atu ai. “Ua tuuina mai oe ia te au e lou nuu ma le au ositaulaga sili; pe se a le mea ua e faia?”

E leai lava se auala na taumafai ai Iesu e ʻaloese mai le mataupu, e uiga i le tulaga tautupu. O le tali ua avatu nei e Iesu e lē taumatea ua ofo ai Pilato. Luka 22:66–23:3; Mataio 27:1-11; Mareko 15:1; Ioane 18:28-35; Galuega 1:16-20.

◆ Mo le ā le fuafuaga ua toe feiloai ai le au Saniterini i le taeao?

◆ Na faapefea ona oti Iuta, ma o le ā ua faia i tupe siliva e 30?

◆ Aiseā e mananao ai tagata Iutaia ia fasiotia e tagata Roma Iesu, na i lo o le fasiotia o ia e i latou lava e pei ona sa latou taumafai ai muamua ina ia faia faapea?

◆ O ā moliaga ua faia e tagata Iutaia e faasaga ia Iesu?