Ia Faaeteete i Aposetate!

Mea Tāua mai le Tusi a Iuta

E TATAU i auauna a Ieova ona “ʻinoʻino i le leaga” ma “ia pipii i le lelei.” (Roma 12:9) Sa fesoasoani le tusitala o le Tusi Paia o Iuta e faia lenei mea i lana tusi lea na auina mai i Palesitina pe tusa i le 65 T.A.

Na taʻua e Iuta ia lava “o le auauna a Iesu Keriso, o le uso foi o Iakopo.” O Iakopo lenei sa foliga mai o le ʻafa uso lauiloa o Iesu Keriso. (Mareko 6:3; Galuega 15:13-21; Kalatia 1:19) I lea, o Iuta lava ia sa o le ʻafa uso o Iesu. Ae peitai, atonu sa ia manatu e lē o se mea tatau le taʻua o lenei sootaga faaletino, talu ai ona o le taimi lena ua avea ai Keriso o se peresona agaga faamamaluina i le lagi. O le tusi a Iuta sa matuā tuusaʻo lava i le aumaia o fautuaga na e mafai ona fesoasoani ia i tatou e “pipii i le lelei” ma faaeteete ai i aposetate.

“Faamalolosi ona Finau mo le Faatuatua”

E ui lava sa faanaunau Iuta e tusi atu e uiga i le faaolataga ua maua e Kerisiano lautele, ae sa ia iloa le tatau ona uunai lana au faitau ina ia “faamalolosi ona finau mo le faatuatua.” (Fuaiupu 1-4) Aiseā? Auā na ō ane faaleiloga tagata lē faaleatua i le faapotopotoga ma na latou ‘faaliliuina ai le alofa tunoa o le Atua e fai ma faamolemolega i le faia o amioga leaga.’ Sa latou manatu sese faapea e mafai lava ona latou solia tulafono a le Atua ae nonofo faatasi pea ma ona tagata. Tau ina ia aua lava neʻi o tatou lolo atu i na manatu leaga, ae ia tausisia pea le amiotonu, ma ia loto faafetai faapea e ala i le toto o Iesu ua faamamā ai ma le alofa tunoa lava e le Atua i tatou mai i a tatou agasala.—1 Korinito 6:9-11; 1 Ioane 1:7.

Lapataiga ua Faataatitia mai i o Tatou Luma

O se mea tatau ona leoleomalu faasaga i ni uiga patino, amioga, ma tagata. (Fuaiupu 5-16) Talu ai ona o nisi tagata Isaraelu sa faasaoina mai i Aikupito sa leai se faatuatua, na faaumatia ai i latou. O agelu foi na tuua lo latou tulaga saʻo “ua taofia e ia i noanoataga e faavavau i lalo o le pogisa [faaleagaga], seia oo i le faamasinoga o le aso tele.” O amioga matuā leaga tele ua aumaia ai le “faasalaina [o] i latou i le afi e faavavau” i luga o Sotoma ma Komoro. O le mea lea, seʻi o tatou faafiafia le Atua ma aua lava neʻi tuua “le ala o le ola.”—Salamo 16:11.

I le lē pei o Mekaeli le agelu sili, o lē na te lē aumaia e oo lava i se faamasinoga faasaga i le Tiapolo i ni faaupuga sese, ae o na tagata lē faaleatua sa tautatala taufaaleaga i “e ua mamalu,” e foliga mai o i latou ia ua iai ni mamalu faapitoa na tuuina atu i ai e le Atua ma Keriso i le avea o ni toeaina faauuina. Seʻi aua lava neʻi o tatou faaalia se lē faaaloalo mo le pule na tuuina mai e le Atua!

O le faaaʻoaʻoga leaga a Kaino, Palaamo, ma Koru sa mulimuli ai tagata lē faaleatua. Sa latou lafo atu se faamataʻu faaleagaga sa faatusatusa i papa na natia i lalo o le vai ma sa pei o ni ao mamago ua lē o iai se vai ma ni laau mamate ua liaʻiina e lē fua mai i ni fua aogā. O na aposetate sa avea foi o ni tagata muimui, faitio, ma o ‘ē faaviivii i alii ma o latou uiga ina ia maua ai ni aogā mo i latou lava.’

Ia Tumau Pea ona Tetee Atu

Ona sosoo ai lea ma le avatua e Iuta o se lapataiga faatatau i le tetee atu i taaʻiga leaga. (Fuaiupu 17-25) O le a iai tagata faaamuamu i “aso e gata ai,” ma e tatau i Kerisiano moni ona onosai ai ia i latou na ma a latou upu faifai i aso nei. Ina ia tetee atu i na taaʻiga leaga, e ao ona tatou atiina aʻe i tatou lava i luga o lo tatou “faatuatua e silisili ona paia,” ia tatalo faatasi ma le agaga paia, ma tumau ai i le alofa o le Atua, a o faatalitali mo le faaalia mai o le alofa tunoa o Iesu.

E foliga mai i le vaega a aʻoaʻo pepelo, ua faapogaia ai e tagata lē faaleatua nisi ina ia iai ni masalosaloga. (Faatusatusa 2 Peteru 2:1-3.) Ma o le ā sa manaomia e tagata masalosalo? Ioe, o le fesoasoani faaleagaga ina ia seʻi mai le “afi,” le faaumatiaga e faavavau! (Mataio 18:8, 9) Ae lē manaomia ona mataʻu le tagata faaleatua i lena taunuuga, auā o le a puipuia i latou e Ieova mai le “faatausuai” (NW) i le agasala ma le faaumatiaga o loo faatali mai mo aposetate.

[Pusa i le itulau 23]

Papa o loo Natia: Sa lapataia e Iuta uso Kerisiano e uiga i ‘papa o loo natia i lalo o vai i a latou faigaʻai alofa.’ (Iuta 12) O le alofa pepelo mo uso talitonu, sa pei ai na aposetate o ni maa ua feomaʻi i lalo o le sami e mafai ona tutaʻia ai ni vaa pe saeia ma faaumatia ai tagata feauisi. O faigaʻai alofa atonu o ni tausamiga na e valaaulia ai e Kerisiano e tele a latou oa uso talitonu matitiva. Na faapea mai se Tamā o le Lotu o Chrysostom (347?–407 T.A.): “Latou te feiloai uma lava i se faigaʻai masani: sa aumaia e tagata mauoa sauniuniga, ae o tagata matitiva ma i latou o ē sa valaaulia ae leai ni a latou mea, sa latou aai faatasi uma lava.” Po o le ā lava le tulaga sa iai a latou faigaʻai alofa i aso anamua, ae o le lapataiga a Iuta sa fesoasoani i tagata faamaoni e faaeteete ai e uiga i aposetate, ‘papa o loo natia’ na e mafai ona aumaia ai le oti faaleagaga. E ui lava sa leʻi poloaiina Kerisiano ia faia ni faigaʻai alofa, ma latou te lē o faia i aso nei, ae o tagata o Ieova latou te fesoasoani le tasi i le isi i mea faitino i taimi e manaomia ai ma faapena ona fiafia ai i aufaatasiga fiafia.