O le Soifuaga o Iesu ma Lana Faiva

Mai ia Pilato ia Herota ma Toe Foi Atu

INA UA molia e tagata Iutaia Iesu i lona faapea atu o ia o le tupu, ua toe ulu atu ai Pilato i le maota o le kovana ina ia fesiligia o ia. E ui lava ua leʻi taumafai Iesu e faia se taumafaiga faapea e natia ai o ia o le tupu, ae ua ia faamalamalama atu faapea o lona Malo e lē o se faamataʻu ia Roma.

“E lē mai le lalolagi nei loʻu malo,” ua taʻu atu ai e Iesu ia Pilato. “Afai ana mai le lalolagi nei loʻu malo, po ua tau aʻu auauna, ina neʻi tuuina atu aʻu ia Iutaia; a o lenei, e lē mai i inei loʻu malo.” I lea ua faailoa faatolu atu ai e Iesu faapea e iai sona Malo, e ui lava e lē ala mai se puna faalelalolagi.

Peitai, ua uunai atili e Pilato Iesu: “O lena foi, e te se tupu ea oe?” O lona uiga, pe o oe o se tupu, e ui lava e lē mai le lalolagi nei lou Malo.

Ua faailoa atu e Iesu ia Pilato faapea ua ia faia le faaiʻuga saʻo, i lona tali atu: “O lea lava, o aʻu o le Tupu. O le mea lenei na fanau mai ai aʻu, o le mea foi lenei na ou sau ai i le lalolagi, ina ia ou molimau i le upu moni. O i latou uma lava o i le upu moni, e faalogo mai i latou i loʻu leo.”

Ioe, o le iai moni lava o Iesu i le lalolagi ina ia molimau atu i “le upu moni,” e faapitoa lava i le upu moni e uiga i lona Malo. Ua nofo sauni Iesu e faamaoni i lena upu moni e tusa lava pe iʻu ai ina leiloa lona ola. E ui lava ua fesili Pilato: “Po o le ā le upu moni?” e leʻi faatali o ia mo se isi faamatalaga atili. Ua lava mea na ia faalogo i ai e tuuina atu ai se faamasinoga.

Ua toe foi atu Pilato i le motu o tagata o loo faatali i fafo o le maota. E tino mai o le faatasi ai o Iesu i lona itu, ua ia taʻu atu ai i ositaulaga sili ma i latou ua faatasi ma i latou: “Ou te lē iloa se mea e sala ai lenei tagata.”

I le feita ona o le faaiʻuga, ua amata ai ona maumauai mai le motu o tagata: “Ua faaoso e ia i le nuu, ua aʻoaʻo i Iutaia uma, ua afua mai i Kalilaia ua oo mai i inei.”

O le maelega valea e leai se uiga o tagata Iutaia atonu ua maofa ai Pilato. O lea a o faaauau ona alalaga mai ositaulaga sili ma toeaina, ua liliu Pilato ma fesili atu ia Iesu: “Ua e lē faalogo ea i le tele o mea ua latou molimau mai ai ia te oe?” E leai se tali atu a Iesu. O le toʻafilemu i ona fofoga ona o le tuuaʻiga matuiā ua matuā maofa ai Pilato.

I le iloa faapea o Iesu o le Kalilaia, sa maua ai e Pilato se auala e saoloto mai ai o ia i le tauaveina o le tiute tauave mo ia (Iesu). O le pule o Kalilaia, o Herota Anetipa (le atalii o Herota le Sili), o loo iai i Ierusalema mo le Paseka, o lea ua auina atu ai e Pilato Iesu ia te ia. Muamua atu, na vavae ai e Herota Anetipa le ao o Ioane le Papatiso, ma i lea sa oo ai ina fefe Herota ina ua ia faalogo i galuega mamana ua faia e Iesu, i le mataʻu faapea o Iesu o Ioane moni lava lea o lē na toe faatuina mai nai ē ua oti.

O lenei, ua matuā olioli Herota i le faamoemoe e vaai ia Iesu. O lenei mea e lē ona o lona manatu mamafa e uiga i se lelei mo Iesu pe faapea e manao o ia ina ia faia se taumafaiga moni e aʻoaʻoina ai pe moni tuuaʻiga faasaga ia te ia pe leai. Na i lo o lea, ua na ona ia naunau fia iloa ma faamoemoe e vaai ia Iesu o faia ni vavega.

Ae peitai, e musu Iesu e faamalie le naunau fia iloa o Herota. O le mea moni, a o tuufesili Herota ia te ia, e leʻi tali atu o ia i se upu. I le lē fiafia, ua ula ai Herota  ma ana fitafita ia Iesu. Ua latou faaofu o ia i se ofu pupula ma faaamuamu ma tauemu ia te ia. Ona latou toe auina atu lea o ia ia Pilato. O le iʻuga, sa oo ai ina uō mamae Herota ma Pilato o ē sa muai avea o ni fili.

Ina ua toe foi atu Iesu, ona valaaulia lea e Pilato ositaulaga sili, o taʻitaʻi Iutaia, ma tagata ina ia potopoto faatasi ane ma faapea atu: “Ua outou aumai lenei tagata ia te aʻu, e peiseai se faasese i le nuu; faauta mai foi, ua ou suesue ia te ia i o outou luma, ou te leʻi iloa se mea e sala ai lenei tagata i mea ua outou molia mai ai ia te ia. A ua lē iloa foi e Herota; auā na ou aauina atu outou ia te ia; faauta foi e leai se mea ua faia e ia e tusa ai ona oti o ia. O lenei foi, ou te aʻoaʻi atu ia te ia, i le ou tatalaina atu ai.”

O lea, ua faalua ona taʻu atu e Pilato le leai o se sala a Iesu. Ua naunau o ia ina ia faasaoloto ia te ia, auā ua ia iloa ona o le matauʻa ua ala ai ona tuuina mai o ia e ositaulaga sili. Ae a o faaauau ona taumafai Pilato ina ia tatalaina Iesu, ua ia maua se tasi uunaiga malosi atili ina ia faia faapea. A o iai o ia i lona nofoa faamasino, ua auina atu e lana avā se feau, e uunai atu ia te ia: “Neʻi e mao i lea tagata amiotonu; auā na ou matuā tigaina analeila i le miti [e foliga mai o se uunaiga tauatua] ia te ia.”

Peitai, e mafai faapefea e Pilato ona tatala lenei tagata lē sala, e pei ona ia iloa e ao ona ia faia faapea? Ioane 18:36-38; Luka 23:4-16; Mataio 27:12-14, 18, 19; 14:1, 2; Mareko 15:2-5.

◆ Ua faapefea ona tali e Iesu le fesili faatatau i lona tulaga tautupu?

◆ O le ā “le upu moni” e uiga i le mea na faaalu ai e Iesu lona soifuaga faalelalolagi ina ia avatu le molimau?

◆ O le ā le faamasinoga a Pilato, o le ā le tali a tagata, ma o le ā ua faia e Pilato ia Iesu?

◆ O ai Herota Anetipa, aiseā ua matuā olioli ai o ia e vaai ia Iesu, ma o le ā ua ia faia ia te ia?

◆ Aiseā ua naunau ai Pilato e faasaoloto ia Iesu?