Pe o E Aapa Atu?
Pe o E Aapa Atu?
“Afai e aapa atu se tane mo le tofi o le ovasia, e naunau o ia i le galuega lelei.”—1 TIMOTEO 3:1, “NW.”
1. O le faataunuuina o le ā le sini ua avea o se mea sili ona tāua i Molimau a Ieova?
E IAI sini tatau o loo galulue agaʻi i ai Molimau a Ieova, ua taʻitaʻia ma tauaveina i se auala faaleatua. E lē o se mea lenei e ofo ai, ona e sili atu ona maualuluga sini o lo latou Atua ma e faataunuuina pea ana fuafuaga. (Isaia 55:8-11) E lē tatau i auauna a Ieova ona pei o tagata na o ē e leai ni sini lelei ma agaʻi atu ma le leai o se popole i le olaga i le faia o sina mea laitiiti ina ia aogā mo se tasi e ese mai ia i latou lava. O le mea sili ona tāua i Molimau a le Atua o le faataunuuina o le sini sili ona maualuga o le faalauiloaina o le feau o le Malo ma fetufaai ma isi le poto o le Afioga a le Atua e maua ai le ola.—Salamo 119:105; Mareko 13:10; Ioane 17:3.
2. O le ā le sini mo tane Kerisiano na taʻua e Paulo i le 1 Timoteo 3:1?
2 E iai foi isi sini e sili ona maualuluga i le faalapotopotoga a Ieova. Na taʻua e le aposetolo o Paulo se tasi o nei sini ina o ia tusi: “E faamaoni lena faamatalaga. Afai e aapa atu se tane mo le tofi o le ovasia, e naunau o ia i le galuega lelei.” O se tane faapena e manao o ia e faataunuu se mea mo le lelei o isi. E naunau o ia i “le galuega lelei,” ae lē o se olaga faafifilemu ma le fia mamalu. Ua faapea mai le isi faaliliuga: “E moni lava le faapea atu o se tane ua faanaunau lona loto i le tulaga taʻitaʻi, ua iai se faanaunauga e tatau ai ona viiviia o ia.”—1 Timoteo 3:1, Phillips.
Lamatiaga mo Toeaina
3, 4. Aiseā e ao ai i se tane o loo aapa atu e avea o se ovasia ona leoleo i lona loto?
3 I le ā le auala e “tatau ai ona viiviia” se tane ua faanaunau lona loto i le fia avea o se ovasia Kerisiano? Ia, o le faanaunau o se manaoga malosi ina ia mafai ona maua se sini patino. E moni, e iai faanaunauga e sili ona maualuluga, e iai foi faanaunauga e lē maualuluga. Ae afai e aapa atu ma le loto maulalo se tane mo se tofiga o le ovasia ona o le fia auauna i isi, ua faia la lana auaunaga i uunaiga saʻo ma e mafai ona iʻu i faamanuiaga faaleagaga. Ae manaomia ona ia leoleo lona loto.—Faataoto 4:23.
4 O nisi tagata ua iai faanaunauga tetele latou te saili le mamalu. O isi e fia pule i uso a tagata. O le matapeapea mo le fia lauiloa po o le pule, ua pei o se aa pala lena e mafai ona faapogaia le paʻū i lalo e oo lava i se laau o loo foliga mai e lauusiusi. E mafai ai foi e se Kerisiano ona lolo atu i na faanaunauga e sese ona uunaia. (Faataoto 16:18) Na faapea mai le aposetolo o Ioane: “Na ou tusi atu i le ekalesia, a o Tioterifi, o lē fia sili ia te i latou [“o lē manao ia avea ma ulu i mea uma lava,” Phillips], na te lē fia talia se mea mai ia i matou ma le faaaloalo. O le mea lea, pe a ou alu atu, ou te faamanatu atu ai ana galuega o loo ia faia, o le tautalatala e uiga ia i matou i upu leaga. E faapea foi ona lē lotomalie i nei mea, na te lē talia foi ma le faaaloalo le au uso, ma o i latou o loo mananao e talia i latou, ua taumafai o ia e faatuatuanai ma tuuesea mai le faapotopotoga.” (3 Ioane 9, 10, NW) Sa lē faa-Kerisiano manatu fiasili o Tioterifi. O le faamaualuga ma le faanaunauga fiasili i le fia maua o le pule i luga o isi, e lē talia i totonu o soʻo moni o Iesu.—Faataoto 21:4.
5. Faatasi ai ma le ā le uiga e ao i ovasia ona tausia ai o latou tiute?
5 O se ovasia Kerisiano o lē na te tausia lelei ona tiute faatasi ma le uunaiga saʻo, o le a na lē tuliloa ni faanaunauga manatu faapito. O le a ia manatu i lenei galuega lelei o le vaavaaiga faa-Kerisiano o se faaeaga mai le Atua, ma o le a ia leoleo ai le lafu mamoe a le Atua, “ma le loto, a e le o le faatauanauina; aua foi neʻi faia ma le fia fai oloa, a o le loto fiafia. Aua foi neʻi faapei o e faamalo i le tofi o le Atua, a ia fai . . . ma faaaʻoaʻo i le lafu mamoe.” (1 Peteru 5:2, 3) Ioe, e ao i ovasia ona leoleo faasaga i le faatupuina o le faamaualuga ma saili ia faatinoina lana pule i se auala sese.
6. Aiseā e lē tatau ai i se toeaina ona aliitai i tagata o le Atua?
6 E lē ao i se toeaina ona aliitai i isi Kerisiano, auā o ia o lo latou uso auauna ae lē o se ‘fia pule i lo latou faatuatua.’ (2 Korinito 1:24) Ina ua taumafai nisi aposetolo e sailia le fia lauiloa, na fetalai Iesu: “Ua outou iloa o alii o nuu ese ua aliitai i latou, o e ua sili foi ua pule ia te i latou; a e le faapea outou; a o sē fia sili ia te outou, ia fai o ia ma a outou auauna; o sē fia muamua foi ia te outou, ia fai o ia ma a outou tautua. E pei o le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui aʻi tagata e toatele.” (Mataio 20:20-28) O le toeaina e lē o le Leoleo Mamoe Sili, ae ua na o se leoleo mamoe lagolago. Afai e aliitai o ia i le lafu, ua na faaalia la se agaga o le faamaualuga. Ae maise lava o le a iʻu ina afaina pe afai na te taumafai ina ia maua nisi e fesoasoani ia te ia e faataunuuina ona faanaunauga faamaualuga. Fai mai se faataoto: “E inosia e Ieova atoa uma e ua loto faamaualuga; e tago lea lima i lea lima, a e le faasaoina i latou.”—Faataoto 16:5.
7, 8. (a) Aiseā e tatau ai mo toeaina Kerisiano ona loto maulalo? (e) Aumai se faaaʻoaʻoga o se toeaina loto maulalo.
7 O le mea lea, e ao ai i toeaina Kerisiano ona ‘faamaulalo i latou i lalo o le aao malosi o le Atua.’ E lē aogā faaleagaga le loto faamaualuga, auā e na o i latou lava e loto maulalo o loo i le tulaga saʻo o latou loto ma mafaufau e faia le finagalo tauatua. “E tetee atu le Atua i e faamaualuga, a e foaiina mai le alofa tunoa i e faamaulalo.” (1 Peteru 5:5, 6) Ioe, e faamanuia e Ieova ē loto faamaulalo. Auā o i latou nei e tofia mai ai tane agavaa e auauna e avea o toeaina Kerisiano.
8 Ua faatumuina le talafaasolopito o Molimau a Ieova i aso nei i tala i auaunaga loto maulalo na faia e tagata faaleatua. Mo se faataʻitaʻiga, seʻi manatu ia W. J. Thorn amio agamalu, o lē na avea ma ovasia faimalaga i se tasi o taimi, ma sa galue i Peteli mo se taimi umi. Na faapea mai se tasi Kerisiano e faatatau i lea uso: “O le a lē mafai, lē mafai lava ona galo ia te aʻu le faamatalaga na faia e le Uso o Thorn, sa fesoasoani mai ia te aʻu e oo mai lava i le asō. Na faapea mai o ia ma ua ou sii maia; ‘Pe a oo ina ou manatu tele e uiga ia te aʻu lava, ou te nofo i lalo ma ou faapea ifo ia te aʻu lava: “O oe lena, ua na o sina pefu itiiti. O le ā se mea o ia te oe e mimita ai?”’ ” Maeu se uiga viiviia mo toeaina ma isi ia faaalia! Ia manatua, “o le taui o le faamaulalo ma le mataʻu ia Ieova, o le oloa lea, ma le viiga, ma le ola.”—Faataoto 22:4.
Le Faanaunauga mai le Atua ina ia Auauna
9. Aiseā ua mafai ai ona faapea atu o le faanaunauga ina ia auauna o se ovasia e mai le Atua?
9 Pe o le faanaunau ina ia auauna e avea ma ovasia e mai le Atua? Ioe, auā e aumaia pea e le agaga o Ieova le uunaiga, le lototele, ma le malosi e tuuina atu ai le auaunaga paia ia te ia. Mo se faaaʻoaʻoga, o le ā na tupu ina ua tatalo soʻo sauāina o Iesu mo le lototele e talaʻi ai? “Ona luluina lea o le mea ua faapotopoto ai i latou; ua tutumu foi i latou uma i le Agaga Paia, ma ua tautala atu i le afioga a le Atua ma le faamalosi.” (Galuega 4:27-31) Talu ai le saunia e le agaga paia o na iʻuga, e mafai foi la ona ia uunaia se tagata e aapa atu.
10. (a) O le ā le tasi o mafuaaga atonu ua lē aapa atu ai se tane Kerisiano? (e) Afai ua tuuina mai e le Atua ia i tatou se faaeaga o le auaunaga, o le ā e mafai ona tatou faamautinoa ai?
10 Aiseā atonu o le a lē aapa atu ai se Kerisiano taʻumatuaina? Atonu o ia o se tane faaleagaga ae o loo iai se faalogona faapea e leʻi agavaa o ia. (1 Korinito 2:14, 15) E moni, e ao ona tatou manatu ifo ia i tatou lava ma le loto maulalo, i le iloa lelei o o tatou tapulaa. (Mika 6:8) Na i lo le manatu ma le loto faasausili faapea o i tatou e sili atu ona agavaa mo lea tiute tauave, e lelei pe a manatua faapea “o i ai le poto i e faamaulalo.” (Faataoto 11:2) Ae e ao foi ona tatou iloa faapea afai e tuuina mai e le Atua ia i tatou se faaeaga i le auaunaga, o le a na ia aumaia pea foi le malosi manaomia e tauaveina ai lea faaeaga. E pei ona fai mai Paulo: “Ou te mafaia mea uma lava i le faamalosi mai o lē ua tuuina mai le malosi ia te aʻu.”—Filipi 4:13, NW.
11. O le ā e mafai ona faia e se Kerisiano o lē e lē o aapa atu ona ua ia lagona faapea e lē lava sona atamai e avatu ai le fautuaga?
11 Atonu o le a lē mafai e se Kerisiano ona aapa atu ona o loo ia lagona faapea e lē o lava le atamai na te avatua ai fautuaga. Ia, atonu e mafai ona ia maua le atamai e ala i le avea o se tagata aʻoga e sili atu ona filigā o le Afioga a le Atua, ma e mautinoa e ao ona ia tatalo mo le atamai. Na tusi Iakopo: “Afai ua leai se [atamai] i so outou, ina ole atu ia i le Atua, o lē foai tele mai i tagata uma ma le le toe taʻutaʻua; ona foaiina mai ai lea ia te ia. A ia ole atu ma le faatuatua, aua lava neʻi masalosalo; auā o lē masalosalo e tusa ia ma le peau o le sami ua sousou i le matagi ma felafolafoaiina. Aua lava neʻi manatu lea tagata na te maua se mea e tasi mai [ia Ieova]; o le tagata faalotolotolua e faaletumau ia i ona ala uma.” (Iakopo 1:5-8) I le tali atu i le tatalo, na avatu ai e le Atua ia Solomona “le loto poto ma le matala” lena sa mafai ai ona ia manatunatu i le va o le lelei ma le leaga pe a faia ana faamasinoga. (1 Tupu 3:9-14) O le tulaga o Solomona sa faapitoa, ae faatasi ai ma le filigā e suesue ma le fesoasoani a le Atua, ua mafai ai e tane ua tuuina atu i ai tiute tauave i le faapotopotoga ona fautuaina ma le tonu isi. “O Ieova na te foai mai le [atamai]; mai lona fofoga le poto ma le faautauta.”—Faataoto 2:6.
12. Afai, ona o le popole, ua lē aapa atu ai se tane, o le ā e mafai ona fesoasoani ia te ia?
12 Ona o le popole e mafai ona taofia ai se tane mai le aapa atu. Atonu ua ia manatu faapea o le a lē mafai ona ia tauaveina le tiute tauave mamafa i le avea o se toeaina. E oo lava ia Paulo na ioe faapea: “O le mea e mafatia ai aʻu i aso fai soo, o le popole lea ona o ekalesia uma.” (2 Korinito 11:28) Ae sa iloa e le aposetolo le mea e faia pe a oo i le popole, auā na ia tusi: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:6, 7) Ioe, o le tatalo ma le faalagolago i le Atua e mafai ona fesoasoani e faatoʻafilemuina ai le popole.
13. E mafai faapefea e se tane ona tatalo pe afai e lē o mautonu e uiga i lona aapa atu?
13 Afai e maumauai pea ona iai popolega, o se tane o lē e lē o mautonu i le aapa atu e mafai ona tatalo e pei ona sa faia e Tavita: “Le Atua e, ia e suesue mai ia te au, ma ia e silafia loʻu loto; tofotofo mai ia ia te au, ma ia e silafia oʻu manatunatu; ma ia e silafia po o ia te au se ala e tiga ai; ma e taʻitaʻiina mai aʻu i le ala o le faavavau.” (Salamo 139:23, 24) E tusa lava po o le ā le mafuaaga o o tatou manatunatuga ua “faavevesiina” pe ua “faapopoleina”, e mafai e le Atua ona fesoasoani ia i tatou e feagai ma ia popolega ina ia mafai ai ona tatou faia ni agaʻigaʻi i luma faaleagaga. (Tagai i The New International Version.) Ua lelei ona faaupuina e se isi salamo: “Na ou fai ane, O loo mapeva loʻu vae; ona taofi ae lea o aʻu e lou alofa, Ieova e. O le tele o manatunatu i loʻu loto ua fiafia ai loʻu agaga ona o faamafanafanaga mai ia te oe.”—Salamo 94:18, 19.
Auauna ma le Fiafia e Pei ona Finagalo ai Ieova
14. Aiseā e ao ai i se tane, o lē e lē o aapa atu, ona tatalo mo le agaga paia o le Atua?
14 Afai ona o le popole, i le lagona faapea e lē agavaa, po o le leai o ni uunaiga ua lē taulau ai i se tane Kerisiano ona aapa atu, o se mea tatau ai ona tatalo mo le agaga o le Atua. Na fetalai Iesu: “O lenei, o outou e leaga, afai ua iloa e outou ona avatu o mea lelei mā a outou fanau; e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?” (Luka 11:13) Talu ai o le filemu ma le pulea o oe lava o nisi na o fua o le agaga, ua mafai la e lenei agaga ona fesoasoani ia i tatou e feagai ma popolega po o faalogona o le lē agavaa.—Kalatia 5:22, 23.
15. O le ā le ituaiga o tatalo e mafai ona fesoasoani ia i latou o ē leai se uunaiga e faaavanoa ai i latou mo faaeaga o le auaunaga?
15 Ae faapefea i le leai o se uunaiga? I le avea o ni Kerisiano papatisoina, e manaomia ona tatou tatalo ina ia faia i tatou e le Atua e faia le mea e finagalo malie i ai o ia. Na augani atu Tavita: “Ieova e, ia e faailoa mai ia te au ou ala; . . . Ia e taʻitaʻi mai ia te au i le mea moni mai ia te oe, ma aʻoaʻo mai ia te au.” (Salamo 25:4, 5) O tatalo e pei o lenei o le a fesoasoani ia i tatou e ʻalo ese mai ai i ala sese, ma e mafai ona tatou tatalo i se auala faapena pe afai ua leai se uunaiga ia i tatou ina ia aapa atu. E mafai ona tatou ole atu ia Ieova ina ia faia i tatou ia mananao e talia faaeaga o le auaunaga. O le mea moni, afai tatou te tatalo mo le agaga o le Atua ma lolo atu i lana taʻitaʻiga, o le a lē taumatea le faia o i tatou lava e faaavanoa mo faaeaga o le auaunaga ua ofoina mai ia i tatou. I lo o mea uma lava, e leai se auala o le a mananao ai auauna a le Atua e tetee atu i lona agaga.—Efeso 4:30.
16. O le ā le uiga faaalia ua saunia ai ni uunaiga malolosi ina ia aapa atu mo tiute tauave i le faapotopotoga?
16 O le mauaina o “le finagalo o Keriso,” ua tatou fiafia ai e faia le finagalo tauatua. (1 Korinito 2:16) Sa iai foi ia Iesu lea lava uiga e pei o le faisalamo, o lē na faapea mai: “Loʻu Atua e, ou te fiafia e fai lou finagalo; o loo i totonu lava ia te au lau tulafono.” (Salamo 40:8) Na fetalai Keriso: “Silasila mai ia, ou te alu atu e faia lou finagalo,” ma o lena mea na oo atu lava i le maliu i luga o le laau o le satauro. (Eperu 10:9, 10) O se faanaunauga e faia mea uma lava e mafaia i le auaunaga a Ieova e oo ai i se uunaiga malosi ina ia aapa atu mo tiute tauave i le faapotopotoga.
Vaavaai atu i le Lumanai
17. (a) Aiseā e ao ai i tane o ē e lē o toe auauna atoatoa nei e pei ona sa latou faia muamua ona aua neʻi lotovaivai? (e) O le ā le faaeaga aupito silisili o faaeaga uma?
17 Ona o faafitauli o le soifua malōlōina po o isi lava mafuaaga, o ē sa muai tausia ni tiute tāua i le faapotopotoga ua lē o toe iai nei na faaeaga. E lē tatau ona lotovaivai ai i latou nei. Ua tatou iloa o le toatele o tane faamaoni ua lē o toe auauna nei i le tulaga atoatoa e pei ona sa latou faia i se tasi taimi, o loo tutū mausalī pea o ni ē tausisi i le faamaoni. (Salamo 25:21) E moni, e mafai e toeaina loto maulalo ua loa ona auauna ona faaauau le faaaogāina o lo latou poto masani e ala i le tumau pea ona iai i le tino o le au toeaina. E ui ua lē o toe atoatoa le malosi ona o le matua i tausaga po o nisi faafitauli, ae lē manaomia ai ona latou faamavae. I le taimi lava nei, seʻi tuu atu i Molimau taitoatasi a Ieova e faapelepele i le faaeaga aupito sili i faaeaga uma lava, ‘o le tautala atu lea e uiga i le mamalu o le tulaga tautupu a le Atua’ e avea o ni ē faamaualugaina lona suafa paia.—Salamo 145:10-13.
18. (a) Afai ua aveesea se toeaina po o se auauna o le faiva, o le ā atonu e manaomia? (e) O le ā le uiga lelei na faaalia e se tasi o toeaina na aveesea?
18 Afai sa avea oe o se toeaina po o se auauna o le faiva i se tasi o taimi ae ua lē o toe auauna ai nei i lena tulaga, ia mautinoa faapea o loo tausi mai pea le Atua ia te oe, ma atonu o le a ia tuuina atu ia te oe nisi o faamanuiaga e te lē o faatalitalia i le lumanai. (1 Peteru 5:6, 7) Afai e manaomia ona e faia ni fetuutuunaiga, ia lotomalie e faaalia le mea sese ma galue i ai faatasi ma le fesoasoani a le Atua. O nisi o ē ua aveesea mai le avea o ni toeaina ua latou talia ni uiga lē faa-Kerisiano, ma o nisi ua oo ina lē toe talaʻi po ua paʻūū ese atu mai le upu moni. Ae maeu le atamai pe afai e pei o i latou o ē ua faaalia le agaga lelei! Mo se faataʻitaʻiga, ina ua aveesea se toeaina o lē sa auauna mo le tele o tausaga i Amerika Tutotonu, na faapea mai o ia: “Ua ou matuā tiga lava ina ua leiloa le faaeaga sa tautele ia te aʻu mo se taimi umi. Ae o le a ou toe galue malosi nei i so o se auala lava e mananao ai uso e faaaogā aʻu ma galue ina ia toe maua oʻu faaeaga i le auaunaga.” I le taimi nei, ua toe faaeaina ai lenei uso e auauna e avea o se toeaina.
19. O le ā le fautuaga talafeagai ua tuuina mai i se uso o lē na aveesea i le avea o se toeaina po o se auauna o le faiva?
19 Afai sa aveesea oe i le avea o se toeaina po o se auauna o le faiva, o lea, ia tausia se agaga loto maulalo. Ia alofia uiga ita na o le a lē agavaa ai oe mo ni faaeaga i le lumanai. O se agaga faaleatua e maua ai le faaaloalo. Na i lo le lotovaivai, ia e toe tepa faalemafaufau i le auala o loo faamanuia ai e Ieova lau faiva po o lou auaiga. Atiina aʻe faaleagaga lou aiga, asiasi i ē mamaʻi, ma faalototele i ē o vaivai. I mea uma lava, ia faapelepele ou faaeaga i le vivii atu i le Atua ma folafola le tala lelei i le avea o se tasi o Molimau a Ieova.—Salamo 145:1, 2; Isaia 43:10-12.
20. E mafai faapefea e se tino o le au toeaina ona fesoasoani i sē na avea muamua o se ovasia po o se auauna o le faiva?
20 E ao ona iloa e le tino o toeaina faapea o le aveesea e mafai ona faapogaia ai mafatiaga mo sē na avea muamua o se ovasia po o se auauna o le faiva, e tusa lava pe o ia lava na manao e tuuese le faaeaga. Afai e lē o faateʻaina o ia ae ua iloa e toeaina faapea ua mafatia le uso, e tatau ona latou saunia se fesoasoani alofa faaleagaga. (1 Tesalonia 5:14) E ao ona latou fesoasoani ia te ia e iloa faapea e manaomia o ia i le faapotopotoga. E tusa lava pe e manaomia ai le faia o se fautuaga, e lē tatau ona umi naʻuā se taimi a o leʻi toe maua e lea tane loto maulalo ma loto faafetai faaeaga faaopoopo o le auaunaga i le faapotopotoga.
21. O ai na faatalitali mo faaeaga o le auaunaga, ma o le ā ua fautuaina ia i latou o loo faatali mo ia faaeaga i aso nei?
21 Afai o e aapa atu, atonu e tatau ona e faatali mo sina taimi a o leʻi maua nisi faaeaga atili o le auaunaga. Aua le lē onosai. E 40 tausaga sa faatali ai Mose a o leʻi faaaogāina o ia e le Atua ina ua faasaolotoina Isaraelu mai noataga i Aikupito. (Galuega 7:23-36) A o leʻi tofia e fai ma sui o Mose, sa auauna foi Iosua mo se taimi umi e avea o se tautua. (Esoto 33:11; Numera 27:15-23) Sa faatalitali Tavita mo se taimi a o leʻi faanofoina o ia i le nofoalii o Isaraelu. (2 Samuelu 2:7; 5:3) Atonu sa uia foi e Peteru ma Ioane Mareko se taimi umi o le toleniina. (Mataio 26:69-75; Ioane 21:15-19; Galuega 13:13; 15:36-41; Kolose 4:10) O lea afai e lē o iai nei ia te oe ni tiute o le faapotopotoga, atonu ua faatagaina oe e Ieova ina ia faatulaga lou olaga e ala i le mauaina atili o le poto masani. I so o se itu, ia saili le fesoasoani a le Atua a o e aapa atu, ma atonu o le a ia faamanuia oe i ni faaeaga faaopoopo o le auaunaga. I le taimi nei, ia galue ma le filigā ia taʻuagavaaina mo tiute tauave i le faapotopotoga ma ia faaalia le agaga o Tavita, o lē na faalauiloa mai: “O vii o Ieova e taʻu atu e loʻu gutu; e faafetaia e tagata uma o lona suafa paia, e faavavau faavavau lava.”—Salamo 145:21.
O le a Faapefea ona E Tali?
□ E faasaga i ā lamatiaga e ao i toeaina Kerisiano ona leoleo faasaga i ai?
□ O le ā e mafai ona fesoasoani ia i latou o ē ona o le popole po o faalogona o le lē agavaa ua lē aapa atu ai?
□ O le ā e mafai ona uunaia se tagata e faaavanoa ai o ia lava mo tiute tauave i le faapotopotoga?
□ Faatasi ai ma ā uiga e ao i ē na avea muamua o toeaina ma auauna o le faiva ona vaavaai atu i ai i le lumanai?
[Fesili mo le Suʻesuʻega]
[Ata i le itulau 11]
Na faataatia e W. J. Thorn se faaaʻoaʻoga lelei i le avea o se toeaina loto maulalo
[Ata i le itulau 13]
I le pei o Iesu, pe ua e lotomalie e faia mea uma e mafaia i le auaunaga a Ieova?