Pe ua E Agavaa e Auauna?

“O le lava o lo matou taʻuagavaaina e mai le Atua.”—2 KORINITO 3:5, “NW.”

1. O le ā le ituaiga o tagata e lē manaomia i le faapotopotoga Kerisiano?

O IEOVA LE ATUA ma Iesu Keriso o ni ē galulue. Na fetalai Iesu: “O loo galue loʻu Tamā e oo mai lava i le aso nei; o loo galue foi aʻu.” (Ioane 5:17) E lē fiafia le Atua i ē mumusu e galulue; e lē fiafia foi o ia ia i latou o ē saili i tiute tauave ina ia maua ai le pule i luga o isi. E leai se avanoa mo ni tagata paiē e lē fia galulue po o ni faanaunauga manatu faapito i totonu o le faapotopotoga Kerisiano.—Mataio 20:25-27; 2 Tesalonia 3:10.

2. Aiseā ua iai nei se manaoga tele mo tane ina ia tauaveina tiute tauave i le faapotopotoga Kerisiano?

² ‘E tele mea e fai i le galuega a le Alii’ a Molimau a Ieova, ae maise lava ona ua gasolo mai nei le matuā toatele o tagata i “le mauga” o le tapuaiga moni. (1 Korinito 15:58; Isaia 2:2-4) O loo manaomia tele tane agavaa faaleagaga e tauaveina tiute tauave i le faapotopotoga. I le lē uunaia e faanaunauga manatu faapito, ua faasilisiliina ai e na tagata Ieova, ae lē o i latou lava. (Faataoto 8:13) Ua latou iloa e fesoasoani le Atua ia i latou ina ia taʻuagavaaina mo tiute i le faapotopotoga, e pei ‘ona lava lona taʻuagavaaina o faifeau o le feagaiga fou.’—2 Korinito 3:4-6.

3. I le tulaga faavae, o ā tiute tauave o toeaina ma auauna o le faiva?

³ I aso nei, e pei ona sa iai i uluai Kerisiano, e tofia e le agaga paia tane ma e ala i faatulagaga faalefaalapotopotoga a Ieova ina ia auauna o ni toeaina ma auauna o le faiva. (Galuega 20:28; Filipi 1:1; Tito 1:5) O toeaina latou te leoleoina faaleagaga le lafu a le Atua i le  saunia o le vaavaaiga e puipuia ai. E fesoasoani ia i latou auauna o le faiva, o ē o o latou tiute e lē aafia tuusaʻo ai le pulega faaleagaga. (1 Peteru 5:2; faatusatusa Galuega 6:1-6.) I le pei o le Alo o le Atua, o lē na afio mai ina ia auauna atu, o na tane tofia e faanaunau ina ia auauna i uso talitonu. (Mareko 10:45) Afai o oe o se tane Kerisiano, pe o ia te oe lena agaga?

Agavaa e Tutusa mo Toeaina ma Auauna o le Faiva

4. O fea patino lava tatou te maua ai lisi o agavaa mo i latou ua tuuina atu i ai tiute tauave i le faapotopotoga?

⁴ E faapitoa lava mea manaomia mo i latou ua tuuina atu i ai tiute tauave i le faapotopotoga na ua faataatia e le aposetolo o Paulo i le 1 Timoteo 3:1-10, 12, 13 ma le Tito 1:5-9. A o tatou talanoaina na agavaa, o nisi e faatatau uma i toeaina ma auauna o le faiva, e lē ao ona tatou manatu i ai e tusa ai ma faatulagaga faalelalolagi. Na i lo lea, e ao ona tatou vaai i ai e tusa ai o lo latou faatulagaga i le uluai senituri ma e mafai ona faaaogā i tagata o Ieova. O le ausiaina o nei mea manaomia e lē matuā manaomia ai le lelei atoatoa, auā ana fai o lea, o le a leai se tasi e mafai ona taʻuagavaaina. (1 Ioane 1:8) Ae afai o oe o se tane Kerisiano, tusa lava pe o iai nei ni ou tiute faalefaapotopotoga pe leai, aiseā e lē matuā iloilo ai ou agavaa totino?

5. O le ā lona uiga ia lē mataʻuleagaina?

⁵ Ia lē mataʻuleagaina; ia iai se taʻuleleia mai tagata o i tua; ia lē aafia i ni tuuaʻiga leaga. (1 Timoteo 3:2, 7, 8, 10; Tito 1:6, 7) I le taimi na tofia ai ma a o auauna ai, e tatau i auauna o le faiva ma toeaina ona lē mataʻuleagaina, o lona uiga, ia auliuligia mai i ni tuuaʻiga ma mai so o se mea lava e manaomia ai ona aʻoaʻia mo se tuuaʻiga tonu i le faia o se amioga po o se aʻoaʻoga sese. O tuuaʻiga lē moni ua faia e “uso pepelo” po o nisi, e lē faia ai se tane faapea ua taʻuleagaina. Ina ia lē taʻuagavaaina se tane mai le auauna pea i le faapotopotoga, e lē tatau ona avea o se tuuaʻiga valea e lē faamaonia, ma e tatau i le tuuaʻiga ona faamaonia e tusa ai ma tapulaa faale-Tusi Paia. (2 Korinito 11:26; 1 Timoteo 5:19) O lē ua tofia i le faapotopotoga “e tatau ona ia logoleleia o ia e i latou o i tuā, neʻi upuleagaina o ia ma paū i le mailei a le tiapolo.” Afai sa faia e se tane se agasala matuiā i aso ua mavae, e na o le pau lava le auala e mafai ai ona toe tofia o ia pe afai ua faamaonia lona matuā faagaloina o so o se uiga leaga e aumaia ai le faalumaina, ae ua faia se igoa lelei mo ia lava.

6. I le avea ma tane a le avā e toatasi o le ā lona uiga?

⁶ O le tane a le avā e toatasi. (1 Timoteo 3:2, 12; Tito 1:6) E lē o le uiga o lenei mea faapea e na o tane ua faaipoipo e mafai ona avea ma auauna o le faiva ma toeaina. Peitai ane, afai ua faaipoipo e tatau i se tane ona iai le na o le toatasi o le avā o loo ola ma ia faamaoni ia te ia. (Eperu 13:4) I le lē pei o le toatele o tane e lē ni Kerisiano i le uluai senituri, e lē mafai ona faia sana autau nonofo. *

7. (a) Pe o tausaga o le olaga e agavaa ai se tane e avea o se toeaina? (e) O le ā ua aofia ai i le pulea lelei o se auaiga?

 ⁷ E pule lelei i lona auaiga, ma ni fanau e gauai atu ia te ia. (1 Timoteo 3:4, 5, 12; Tito 1:6) Ua lagona e nisi faapea e tatau i toeaina ona a lē itiiti mai o le taʻi 30 tausaga le matutua, ae e lē o faataatia maia e le Tusi Paia se matua faatulagaina. Peitai, e tatau i lea tane ona faamatuātagata i le uiga faaleagaga. E ao i toeaina ma auauna o le faiva ona iai i le matutua e mafai ai ona faia ni fanau. Afai ua faaipoipo, e lē taʻuagavaaina se tane pe afai e amio faaleatua i isi nofoaga ae pule sauā i lona lava aiga. E tatau ona ia maua mai le faaaloalo ona o le puleaina o lona aiga e ōgatasi ma mataupu silisili a le Tusi Paia, ma e ao ona avea ma ona sini le taumafai ina ia manuia faaleagaga i ana feutagaiga ma tagata uma o le aiga. I le tulaga masani, o se toeaina ma o se tamā e ao ona iai se fanau laiti o loo i lalo pea o lana puleaga o ē amio lelei, o ni ē “talitonu.” O ni ē o loo agaʻigaʻi i luma i le tuuina atu i le Atua pe ua uma foi ona papatisoina o ni Molimau a Ieova. O se tane e lē mafai ona ia atiina aʻe i totonu o lana fanau le faatuatua, e faapena foi ona lē mafai ona ia faia i isi.

8. A o leʻi avea se tane o se aiga ma toeaina, o le ā e tatau ona ia aʻoaʻoina e faia?

⁸ A o leʻi avea se tane tausi aiga ma toeaina e tomai i le saunia o le vaavaaiga faaleagaga i se faapotopotoga, e tatau ona ia aʻoaʻo pe faapefea ona taʻitaʻia lona lava auaiga. ‘Afai e lē iloa e se tasi pe faapefea ona pulea o lona lava auaiga, o le a faapefea la ona ia tausia le faapotopotoga a le Atua?’ (1 Timoteo 3:5) E moni, atonu o le a tetee se tane e lana avā lē talitonu. (Mataio 10:36; Luka 12:52) Pe atonu ua oo ina taʻusalaina se tasi o lana fanau i le faia o se agasala matuiā, e ui lava o loo lelei pea tulaga faaleagaga o isi. E ui i lea, afai ua faia e le tane mea uma lava ua manaomia, ae maise lava pe afai o iai se tulaga lelei faaleagaga i isi o lona auaiga, e lē faapea ai la ua lē taʻuagavaaina o ia i le avea o se auauna o le faiva po o se toeaina pe afai e teena e se tagata e toatasi o lona aiga lana taʻitaʻiga lelei.

9. O le ā le faaeteetega e tatau i se toeaina po o se auauna o le faiva ona faaalia e faatatau i le faaaogāina o le ava malosi?

⁹ E lē o sē faamisa pe fia inu tele i le uaina. (1 Timoteo 3:3, 8; Tito 1:7) E lē tatau i se toeaina po o se auauna o le faiva ona soona inu tele i ava malolosi. O le fai ma masani ona soona faaaogā o ia mea, e ono iʻu ai i le lē pulea o le mafaufau ma faalogona ootia, e oo ai ina tauaʻimisa pe tauaʻifusu ona o le onanā. E lē tatau ona ‘inu tele i le uaina’ po o le iai o sona talaaga o sē ua fai ma masani le onā po o le inu tele. (Faataoto 23:20, 21, 29-35) Pagā le faanoanoa pe afai e faaleagaina se asiasiga faaleoleomamoe ona o le inu tele ma le lē pulea o le ava malosi! Afai e inu se uso, e lē tatau ona ia faia faapea pe a auai i sauniga, le faiva, po o isi auaunaga paia.—Levitiko 10:8-11; Esekielu 44:21.

10. Aiseā ua lē taʻuagavaaina ai e avea o ni toeaina ma auauna o le faiva i latou o ē mananao tele i tupe ma i latou e matapeapea i mea e maua ma le lē faamaoni?

 ¹⁰ E lē o sē manao tele i tupe pe matapeapea i mea e maua ma le lē faamaoni. (1 Timoteo 3:3, 8; Tito 1:7) O ē mananao tele i tupe ua iai i tulaga faigata faaleagaga, ma o “e matapeapea” e lē fai ma o latou tofi le Malo o le Atua. I lea, o tane faapena, e lē taʻuagavaaina e avea ma toeaina po o auauna o le faiva. (1 Korinito 6:9, 10; 1 Timoteo 6:9, 10) O le upu autū i le faa-Eleni ua tuuina atu i le “manumanu [lē faamaoni]” o lona uiga faavae o le “taʻuvalea” ma o le upu na faaliliuina i le “oloa [ni mea ua maua]” e faasino atu i so o se ituaiga o mea faasili e maua po o ni aogā. (Filipi 1:21; 3:4-8) E moni, so o se tane lava e faaalia e ona manatu o le a ia tausia ma le lē faamaoni “mamoe” a le Atua, ua lē taʻuagavaaina o ia mo tiute tauave i le faapotopotoga. (Esekielu 34:7-10; Galuega 20:33-35; Iuta 16) E manaomia le faaeteete i le fautuaina o se tane e avea o se toeaina pe a tatou mafaufau faapea, pe afai e tofia se tane faapea, atonu o le a tuuina atu i ai le tausiga o tupe ma tofotofoina ai loa o ia ina ia gaoi nisi o tupe.—Ioane 12:4-6.

11. Aiseā e ao ai ona lē fautuaina mo se tiute tauave i le faapotopotoga ‘se tane fou faatoʻā liliu’?

¹¹ E lē se faatoʻā liliu; ua muamua ona tofotofoina pe ua agavaa. (1 Timoteo 3:6, 10) O se tagata fou faatoʻā papatiso sa leʻi lava se taimi e faamaonia ai faapea o le a ia faamaoni i le tausia o tiute ua tofia atu i ai. Atonu e leai sona tiga alofa mo ē ua tigaina pe leai sona atamai manaomia e fesoasoani ai i uso tapuai ma atonu e oo lava foi ina ia vaai maulalo i isi. O le mea lea, a o leʻi fautuaina e avea o se auauna o le faiva ae maise lava i le avea o se toeaina, e ao i se tane ona “tofotofoina” ma e ao ona avatu se faamaoniga o le faia o se faamasinoga lelei ma le maufaatuatuaina. E lē o faataatia maia se taimi faatulagaina mo lenei tofotofoga, ma e eseese lava tulaga o tagata taitoatasi e tusa ai o le tutupu aʻe faaleagaga. Ae lē tatau i toeaina ona vave fautuaina se tane fou ona o le fefe ina “neʻi faafefeteina lona loto, ona paū lea o ia i le faasala a le tiapolo.” Ia tuu atu i lena tane na te muai faaalia mai le loto maulalo e pei o Keriso.—Filipi 2:5-8.

Agavaa Faapitoa mo Auauna o le Faiva

12. Pe o mea manaomia o loo lisiina mai mo auauna o le faiva ua na o i latou lava e ao ona ausia?

¹² O nisi o mea manaomia ua lisiina mo auauna o le faiva. Peitai, afai e lē ausia foi e toeaina na mea manaomia, o le a lē taʻuagavaaina foi i latou e auauna. I le avea o se tane Kerisiano, pe ua taʻuagavaaina oe i nei tulaga?

13. O le ā lona uiga ia uigā?

¹³ E manatu mamafa i mea. (1 Timoteo 3:8) O se tane ua agavaa ina ia auauna e avea o se auauna o le faiva e lē tatau ona manatu māmā i le tiute tauave. E ao ona ia gaoioi e faia mea i se uiga mamalu e mafai ai ona ia maua le faaaloalo. E ui lava e lē o se mea sese le faia o ni tausuaga i nisi taimi, ae o le a lē taʻuagavaaina o ia pe afai ua ia gaoioi maumauai i se auala valea.

14. (a) O le lē faagutugutulua o le ā lona uiga? (e) O le iai o se loto fuatiaifo mamā e manaomia ai le ā?

¹⁴ E lē faagutugutulua; ia iai se loto fuatiaifo mamā. (1 Timoteo 3:8, 9) O auauna o le faiva (ma toeaina) e tatau ona faamaoni, ia lē faitatala pe faaʻoleʻole. Talu ai e lē tatau ona latou faagutugutulua, e lē tatau ai ona talapepelo i le fai atu i se tasi o le isi mea ae fai atu i le isi le upu e matuā tuufaafeagai lava. (Faataoto 3:32; Iakopo 3:17) E tatau foi i nei tane ona avea o ni lagolago faamaoni o le upu moni ua faaalia, “o loo latou taofi i le upu o le faatuatua sa lilo, i le loto fuatia ifo ua mamā.” I le silafaga a le Atua, o le loto fuatiaifo o lena tane e ao ona molimau atu faapea o ia e tonu ma na te lē o faia so o se mea faaʻoleʻole pe faaleagaina ai. (Roma 9:1; 2 Korinito 1:12; 4:2; 7:1) E leai se tasi e taʻuagavaaina e auauna i le lafu a le Atua seʻi vaganā ua ia pipii atu i le upu moni ma i mataupu silisili faaleatua.

Taulaʻi atu i Agavaa o Toeaina

15. O agavaa o ai ua iloiloina nei, ma o le ā ua aafia faapitoa ai lava i nei mea?

¹⁵ E iai agavaa patino e faatatauina faapitoa lava i toeaina ma e feagai lelei lava ma la latou  galuega faaleoleomamoe ma le aʻoaʻo atu. I le avea o se tane Kerisiano, pe e te ausia nei manaoga?

16. (a) O le ā e manaomia ina ia onomea i uiga masani? (e) E mafai faapefea e se toeaina ona tausisia le pulea o ia lava?

¹⁶ E onomea i ana masani; e pulea o ia lava. (1 Timoteo 3:2; Tito 1:8) E ao i se toeaina ona fai faatatau, ia lē faapologaina i masani leaga. A o fesagaʻi o ia ma tofotofoga, o le a fesoasoani le Atua ia te ia e tausia le paleni pe a ia tatalo e pei ona faia e le faisalamo: “Ua faateleina puapuaga o loʻu loto; ia e aveeseina aʻu i mea ou te tiga ai.” (Salamo 25:17) E ao foi i se ovasia ona tatalo mo le agaga o le Atua ma faaalia ona fua, e aofia ai le pulea o ia lava. (Luka 11:13; Kalatia 5:22, 23) I le pulea pea o mafaufauga, faamatalaga, ma gaoioiga, e mafai ai e se toeaina ona alofia le lē paleni a o ia saunia taʻiala faaleagaga mo le faapotopotoga.

17. O le ā ua aafia ai i le faautauta?

¹⁷ Ia mamā le mafaufau. (1 Timoteo 3:2) E tatau i se toeaina ona magafagafa, ia faautauta, ma ia faaeteete. E ao foi ona ia fuafua lelei ma ia faaalia i ana upu ma gaoioiga e mafaufau. O ona mafaufauga loto maulalo ma le paleni lelei e faavae i le atamai faaleatua, ma i aʻoaʻoga mamā o le Afioga a Ieova, lea e manaomia ai ona avea o ia o se tagata aʻoga filigā.—Roma 12:3; Tito 2:1.

18. O le avea ma sē maopoopo lelei ua manaomia ai le ā mo se toeaina?

¹⁸ E maopoopo. (1 Timoteo 3:2) O le upu Eleni o loo faaaogā i inei ua faaliliuina i le “onomea [lelei ona faatulagaina]” i le 1 Timoteo 2:9. O lea, e ao i se toeaina ona ola i se olaga talafeagai fuafua lelei. Mo se faataʻitaʻiga, e ao ona ia tausi i le taimi. E foliga mai sa lē faia o se manatu autū e uluai Kerisiano ona tausia ni faamaumauga totino, ma e lē manaomia foi i se ovasia i aso nei ona avea o se numera tasi i le tausitusi po o se faaofisa. E mafai e auauna o le faiva ona tausia ni mea o manaomia e tusa ai o nei itu. Ae o le upu Eleni mo le “amio lelei [maopoopo]” e mafai ona faaalia ai le amio lelei, ma e mautinoa lava le lē taʻuagavaaina o se tane e avea ma toeaina pe afai e lē pulea ma lē maopoopo o ia.—1 Tesalonia 5:14; 2 Tesalonia 3:6-12; Tito 1:10.

19. Ona o ia o se tagata e agaga talimalo, o le ā e faia e se toeaina?

¹⁹ E agaga talimalo. (1 Timoteo 3:2; Tito 1:8) O se toeaina e ‘tausisi i le alofa i tagata ese.’ (Roma 12:13; Eperu 13:2) O le upu Eleni mo le “alofa i tagata ese [agaga talimalo]” o lona uiga moni, o le “naunau i tagata ese e lē masani ai.” I lea, o se toeaina agaga talimalo na te talia fiafia ē fou i sauniga faa-Kerisiano, ma faaalia lona naunau i tagata matitiva e pei ona ia faia i ē o manuia i mea faitino. E talimalo o ia ia i latou o ē femalagaai ona o faanaunauga o le Faa-Kerisiano ma aauina atu i latou e ō i se auala “e tusa i le Atua.” (3 Ioane 5-8) Ioe, e faaalia e se toeaina le agaga talimalo ae maise lava i uso talitonu e tusa ai ma o latou manaoga ma ona tulaga.—Iakopo 2:14-17.

20. I ā auala e tatau ai i se toeaina ona taʻuagavaaina e aʻoaʻo atu?

²⁰ Ua agavaa e aʻoaʻo atu. (1 Timoteo 3:2) O le tomai o se toeaina e avea ai o se faiaʻoga [aʻoaʻo] faaleagaga e lē o se iʻuga o le maai o lona mafaufau, po o se atamai faalelalolagi. (1 Korinito 2:1-5, 13) Na te maua ona o lona “taofi mau i le upu moni, faapei ona aʻoaʻoina o ia, ina ia mafaia e ia ona apoapoai atu i le mataupu e ola ai, ma aoai atu i e finau mai.” (Tito 1:9; faatusatusa Galuega 20:18-21, 26, 27.) E tatau ona ia mafai ona ‘faatonu atu ma le agamalu i ē o finau mai.’ (2 Timoteo 2:23-26) E tusa lava pe o le toeaina e lē o se failauga e sili ona lelei i le faapotopotoga, ae ao lava ona avea o ia o se tagata aʻoga lelei o le Afioga a le Atua, ia lava lona tomai e faatonu ma fautua ai tagata talitonu, o ē o loo suesue foi i le Tusi Paia. (2 Korinito 11:6) E tatau ona agavaa o ia i le avatuina o “mataupu e ola ai” na e fesoasoani i aiga ma tagata taitoatasi ia tausisi i ni olaga faaleatua.—Tito 2:1-10.

21. (a) Aiseā ua mafai ai ona faapea atu o se toeaina e lē o se fasitagata? (e) O le ā lona uiga ina ia magafagafa? (i) E lē o se fai finauga ua uiga i le ā?

²¹ E lē se fasitagata, ae taofiofi, e lē se fai finauga. (1 Timoteo 3:3; Tito 1:7) I le tausia o le filemu, o le toeaina e lē se fasitagata i le itu faaletino, pe fasi upu i latou i le faia o ni tala sese pe faatiga ia i latou. (Faatusatusa  2 Korinito 11:20.) (O le faamatalaga lea na fai atu muamua faapea “e le se inu tele i uaina” o ia ua faaalia ai faapea ua ia ʻaloese mai le faaaogāsese o le ava malosi lea e masani lava ona iʻu ai i le tauaʻimisa.) O le “magafagafa” (po o le, “lolo atu”), e lē taumafai e fia pule ma faamalie gatā, na te lē faia ni finauga i ni nai mea iti. (1 Korinito 9:12; Filipi 4:5; 1 Peteru 2:18, NW) Talu ai o se toeaina e lē o se fai finauga, pe finauvale, na te ʻalofia le faia o ni taugaupu ma “e le itagofie.”—Tito 1:7; 3:2; Iakopo 1:19, 20.

22. O le ā ua faaalia e le mea moni faapea e lē tatau i se toeaina ona ua maaa pe finau vale?

²² E lē ua maaa. (Tito 1:7) O le uiga moni o lenei faaupuga, o le “lē faamalieina na o ia lava.” (Faatusatusa 2 Peteru 2:10.) E lē tatau i se toeaina ona manatu faasausili ae ao ona maua se vaaiga loto maulalo e uiga i ona tomai. Aua le manatu e sili atu ona lelei lona taulimaina o mea na i lo so o se isi lava, ae ia saosaolaumea ma le loto maulalo ma isi tiute tauave ma ia faatāuaina le toatele o tagata faufautua.—Numera 11:26-29; Faataoto 11:14; Roma 12:3, 16.

23. (a) O le a faapefea ona e faamatala ‘lē alofa i le lelei’? (e) I le avea o lē amiotonu o le ā lona uiga?

²³ O lē alofa i le lelei; e amiotonu. (Tito 1:8) Ina ia taʻuagavaaina e avea o se toeaina, e tatau i se tane ona alofa i le lelei ma ia amiotonu. O sē alofa i le lelei e alofa i le mea ua lelei i le silafaga a Ieova, e faia galuega agalelei ma fesoasoani ai, ma faaalia le talisapaia o le lelei o isi. (Luka 6:35; faatusatusa Galuega 9:36, 39; 1 Timoteo 5:9, 10.) O le avea o sē amiotonu, o lona uiga ia ōgatasi ma tulafono ma tapulaa a le Atua. Faatasi ai ma isi mea, o se tane faapena e lē faailoga tagata, ma e teu pea i le mafaufau mea e tonu, mamā, ma matagofie. (Luka 1:6; Filipi 4:8, 9; Iakopo 2:1-9) Talu ai o le lelei e ese mai i le amiotonu ma e sili atu na i lo le mea e manaomia e le faamasinoga tonu, o se tasi la e alofa i le lelei e sili atu mea na te faia mo isi na i lo mea e manaomia mai ia te ia.—Mataio 20:4, 13-15; Roma 5:7.

24. I le avea o sē faamaoni e manaomia ai le ā?

²⁴ E faamaoni (loyal). (Tito 1:8) O se tane ua agavaa e avea ma toeaina e tausisia se tuutoina lē mamotusia i le Atua ma pipii atu i le tulafono tauatua, e tusa lava po o le ā le tele ua tofotofoina ai lona faamaoni. Na te faia le mea ua faatalitalia e Ieova mai ia te ia, ma e aofia ai i lenei le auauna e avea o sē folafola faamaoni o le Malo.—Mataio 24:14; Luka 1:74, 75; Galuega 5:29; 1 Tesalonia 2:10.

Ausia o Agavaa

25. O agavaa na seʻi faatoʻā talanoaina e manaomia mo ai, ma e mafai faapefea ona maua na agavaa?

²⁵ O le tele o agavaa na sa faatoʻā talanoaina e aofia ai mea e manaomia mai i Molimau uma a Ieova ma ua mafai ona maua e ala i le faamanuiaga a le Atua i suesuega a tagata taitoatasi, taumafaiga, aumea lelei, ma le tatalo. O isi tagata atonu e malolosi atu i nisi o agavaa na i lo isi. Ae i se tulaga talafeagai, e tatau ai i auauna o le faiva ma toeaina ona ausia mea uma e manaomia mo lo latou faaeaga patino.

26. Aiseā ua faaavanoa atu ai e tane Kerisiano i latou mo tiute tauave i le faapotopotoga?

²⁶ E ao i Molimau a Ieova uma ona mananao e faia mea uma latou te mafaia i le auaunaga a le Atua. O lenei agaga, ua uunaia ai tane Kerisiano ia faaavanoa i latou lava mo tiute tauave i le faapotopotoga. Pe o oe o se tane ua tuuina atu ma papatisoina? Afai o lea, ia e aapa atu ma ia faia taumafaiga uma ina ia agavaa ai e auauna!

[Faaopoopoga i lalo]

O le a Faapefea ona E Tali?

□ Aiseā ua ala ai nei ona iai se manaoga tele mo tane papatisoina ina ia talia tiute tauave i le faapotopotoga?

□ O ā nisi o agavaa e tatau ona ausia e auauna o le faiva?

□ O ā nisi o mea manaomia e tatau ona ausia e toeaina?

□ Aiseā e ao ai i se toeaina ona iloa e pulea lelei lona lava auaiga?

□ O le ā ua uunaia ai tane Kerisiano ina ia faaavanoa i latou lava mo tiute i le faapotopotoga?

[Fesili mo le Suʻesuʻega]

[Ata i le itulau 16, 17]

E tatau i toeaina ma auauna o le faiva ona pulea o latou auaiga e tusa ai ma mataupu silisili a le Tusi Paia