Savavali o ni Aumea Galulue Faatasi i le Upu Moni

Mea Tāua mai le Ioane e Lua ma le Tolu

O LE ILOA o le upu moni o le faailoga lea e mataulia ai tagata tapuai o Ieova. (Ioane 8:31, 32; 17:17) O le savavali i le upu moni tauatua e matuā manaomia mo le faaolataga. Ma e tatau i auauna a le Atua ona avea o ni ē galulue faatasi i le upu moni.

O loo tautala le tusi lona lua ma lona tolu a le aposetolo o Ioane faatatau i le “savavali i le upu moni.” (2 Ioane 4; 3 Ioane 3, 4) Ua faalaeiau foi e le Ioane e tolu le felagolagomai i le avea o ni “ē galulue faatasi i le upu moni.” (3 Ioane 5-8, NW) Sa faapena foi ona tusia tusi uma na e lua i Efeso pe e latalata atu i Efeso i le pe tusa o le 98 T.A. Ae o mea o latou fai mai ai e aogā mo tagata o Ieova i aso nei.

Ua Faamamafa e le Ioane e Lua le Upu Moni

Na muai faamamafa e le Ioane e lua le upu moni ma le alofa ma lapatai faasaga i “le anetikeriso.” (Fuaiupu 1-7) Sa faatomua atu lenei tusi i “le tamaitai ua filifilia,” atonu o se tagata e toatasi. Ae afai sa auina atu i se faapotopotoga, o ana “tama” la o Kerisiano fanauagagaina ua “filifilia” e le Atua mo le ola faalelagi. (Roma 8:16, 17; Filipi 3:12-14) Sa olioli Ioane faapea o na tagata sa “savavali i le upu moni” ma i lea sa tetee atu ai i le aposetasi. Ae peitai, sa manaomia ona leoleomalu i latou faasaga i “le anetikeriso,” o lē ua faafitia le afio mai o Iesu i le tino. Ua utagia e Molimau a Ieova i aso nei na lapataiga faasaga i le aposetasi.

Ona sosoo ai lea ma le avatua e Ioane o le fautuaga i le feagai ai ma aposetate ma faaiʻu ai i se moomooga totino ma alofaaga. (Fuaiupu 8-13) E ala i na galuega e pei o le talaʻiga, na fua mai ai e ia ma isi ni fua ua iʻu ai i le faaliliuina o i latou o ē na ia auina atu i ai lana tusi. I le na o le ‘tausia’ lava o i latou faaleagaga o le a latou “maua le taui atoa,” e foliga mai e aofia ai le “pale” faalelagi ua teuina mo ē faamaoni. (2 Timoteo 4:7, 8) Afai e iai se tasi e ‘lē tumau i le aʻoaʻoga a Keriso’ na alu atu ia i latou, e lē tatau lava ona latou ‘talia o ia i o latou fale pe ofo alofa atu ia te ia’ ina ia aloese ai mai le aufaatasi ai i ana “galuega leaga.” Ina ua uma ona faailoa atu le faamoemoe faapea o le a ia alu atu ma talanoa faafesagaʻi ma na uso talitonu, ona faaiʻu atu lea o Ioane i ni moomooga alofa.

Ua Faamamafa e le Ioane e Tolu le Felagolagomai

Sa tuusaʻo atu le Ioane e Tolu ia Kaio ma sa muai matauina ai le mea na ia faia mo uso talitonu. (3 Ioane Fuaiupu 1-8) O Kaio sa ‘savali i le upu moni’ e ala i le pipii atu i le tino atoa o aʻoaʻoga faa-Kerisiano. Sa ia faia foi ‘se galuega faamaoni’ i le fesoasoani atu i uso asiasi. Na tusi Ioane: “E tatau ai ona tatou talia tagata faapea, ina ia tatou fai ma fesoasoani i le upu moni.” Ua faalautele atu e Molimau a Ieova le agaga talimalo foi lea i ovasia faimalaga i aso nei.

Ina ua uma ona faaalia atu le eseesega i le amio leaga a Tioterifi ma le amio a Temetiu, ona faaiʻu lea e Ioane o lana tusi. (Fuaiupu 9-14) Sa leʻi faaalia e Tioterifi o lē na fia saili i le mamalu se faaaloalo mo Ioane ma sa oo lava ina taumafai e tuuesea mai i le faapotopotoga i latou ua taliaina le au uso ma se agaga talimalo. O lea, o se Temetiu faapitoa sa taʻua o se faaaʻoaʻoga lelei. Sa faamoemoe Ioane o le a vave vaai ia Kaio ma faaiʻu ai i alofaaga ma se moomooga faapea ia olioli Kaio i le manuia.

[Pusa/Ata i le itulau 22]

Faatasi ma le Pepa, Peni, ma le Vaitusi: Sa faanaunau Ioane e asiasi atu i “le tamaitai ua filifilia” ma ana “tama” na i lo le tusi atu o le tele o mea ia i latou “i le laupepa ma le vaitusi.” Na i lo le faaauau ona tusi atu ia Kaio “i le vaitusi ma le fulu tusi [peni],” sa faamoemoe foi le aposetolo e vave feiloai ia te ia. (2 Ioane 1, 12; 3 Ioane 1, 13, 14) O le upu Eleni ua faaliliuina i le “fulu tusi [peni]” (kaʹla·mos) e faasino i se fasi ofe po o se fasi laau e mafai ona avea o se “fasi laau e tusitusi ai.” I tagata Eleni ma tagata Roma, o se peni laau sa faamaai le mata ma isi lua e pei o aufulu i aso ua mavae. O le upu Eleni meʹlan, sa faaliliuina i le “vaitusi,” o le ituaiga o kenera e lē faavasegaina o le upu e faamatala ai le tane le meʹlas, o lona uiga o le “uliuli.” I vaitusi aupito leva, o le vaitusi uliuli sa matuā uliuli lava—pei se ituaiga o pauta uliuli e maua mai i se suauu po o se ogalaau ua mu, po o se malala malamalama mai le sua o laau ʻaina lanumeamata po o manu. E masani lava ona teuina vaitusi e pei o ni ogapauta lapotopoto ua faamagoina, na sa faasusū e le tusiupu ma fufui i ai lana pulumu po o le aufulu. O le pepa i aso na sa o se mea manifinifi na faia i ni pepa papae mafolafola mai i saega o paʻu o le laau o le kome. Sa faaaogā e uluai Kerisiano pepa faapena mo le faia o a latou tusi, tusi taai, ma i le tuufaatasia ai o itulau o a latou tusitusiga.