MATAUPU 5

Taaloalo i Totoga Sa ma le Tauātane po o le Tauāfafine

1-4. (a) O le ā le taaloalo i totoga sa? (e) Aiseā e lē tatau ai ona manatu i le mea moni faapea a taatele se faiga ona saʻo ai lea? (i) Aiseā e tatau ai ona tatou naunau e fia iloa le silafaga a le Atua e faatatau i lea mataupu?

PE LĒ o se mea iloga le auala e tutupu aʻe ai tino o tama ma teine i le vaitaimi o le talavou ina ia latou mafaia ai a lē o le faatamāina o ni fanau, o le fanauina mai o i latou? E masani ona iai se suiga i ou uiga agaʻi i le isi ituaiga faatasi ma lenei suiga i le tino. Ua tuputupu aʻe se faatosinaga, ma e masani ona tutupu aʻe i tama se naunau fiafia i teine, e faapena foi teine i tama. Peitai, i lea lava taimi, atonu e ia te oe nisi o taumanatunatuga ma le fia iloa e faatatau i lou lava tino o loo suia faavavevave. E faapefea ona e faamalieina lenei fia iloa? Pe tatau ea ona e faataʻitaʻia i ou lava totoga faaleituaiga? O iai ea se mea e sese ai pe a milimili i se faiga seia oo ai i le tumutumuga o faalogona fiafia?

² O lenei faiga faifai pea ua taʻua o le taaloalo i totoga sa. O se faiga ua matuā taatele. Fai mai se tasi tagata poto faapitoa i lenei mataupu: “Ua faaalia manino mai i suesuega maelega tau fuainumera ua matou faia e faapea . . . e lē itiiti mai o le ivasefululima pasene o tama ma taulelea talavou i le va o le sefulutolu ma le luasefululima tausaga le matutua, e oo i ia vaitaimi o le fai ma masani le taaalo i totoga sa mo ni taimi uumi e eseese.” Ae ua faapea mai lenei faamatalaga e tusa ai ma teine, “e fasefulu i le limasefulu pasene ua iloa e taaalo moni lava i totoga sa.” Fai mai nisi tagata o nei fuainumera ua faamaonia ai “o le mea e masani ai” ma faapea mai o le “lē taaloalo i totoga sa i taimi o le malaulau o se talavou o se mea lea e popole ai.”

³ O le ā nei sou manatu? Pe e te ioe faapea talu ai ona ua matuā taatele i aso nei i le lalolagi le taaloalo i totoga sa, ua avea ai ea lea o se gaoioiga o le tino e faalenatura ma e masani ai? E taatele foi le tala pepelo ma le gaoi i aso nei. Peitai, e te lē faapea mai ua avea ai na mea ma mea e masani ai ma e tatau, a ea? O le fulū “taatele” ua matuā aoao lava, ae o le mea mautinoa e lē faapea ai e te manao i ai, a ea? E faapefea la le manatu faapea e lē afāina le taaloalo i totoga sa?

⁴ Mai se vaaiga faaletino, ua fai mai le toatele o fomaʻi, e lē afāina le taaloalo i totoga sa mai lea taimi i lea taimi. E pei ona fai mai le toatele o fomaʻi o le mafaufau e faapea, na o le pau lava le taimi e leaga ai pe afai ua iai i le tagata o loo ona faia lea masani, ni faalogona faapea ua agasala, lea e faapogaia ai le atuatuvale faalemafaufau ma faalogona ootia, o nei mea e maua ai i le mafatia faaletino. Peitai, o ni tagata e lē lelei atoatoa fomaʻi ma tagata atamamai o le mafaufau, e nonofo toilalo i le faia o mea sese, ma e fesuisuiaʻi o latou manatu. Peitai, o loo iai se puna o fautuaga e mautu ma saoloto mai mea sese po o faaiʻugasese e mafai e tagata talavou ona liliu atu i ai. O le Afioga lena a le Atua. Ma afai tatou te mananao ia lē tau ina faafualoaina le soifua, a o le ola e faavavau i le finagalo malie o le Atua, e tatau lava la ona tatou sailia lona atamai ma fautuaga. Na te mafaia mo i tatou ma lo tatou fiafiaga mea e lē taitai ona mafaia e tagata.

SILAFAGA A SE PUNA E SILLI ONA MAUALUGA

5, 6. (a) E fesootai faapefea le fautuaga i le Kolose 3:5 i le taaloalo i totoga sa? (e) Aiseā e faafesootai atu ai e le Tusi Paia lea faiga i le “matapeapea” ma le “tuʻinanau”?

⁵ O le fesili moni la, e lē o le tele o le  faaleagaina faaletino e mafai ona iʻu i ai ona o le taaloalo i totoga sa, ae pe iʻu ina faaleagaina ai faaleagaga. E moni, e lē o iai i le Tusi Paia faaupuga “taaloalo i totoga sa” ma “lou faaleagaina o oe lava.” Peitai, o le ā lou malamalamaga e uiga i le fautuaga faagaeeina a le aposetolo o Paulo i le Kolose 3:5? Ua ia faapea mai ia i latou o ē lē mananao ina ia aveesea mai le faamaoniga a le Atua: “O lenei, ia outou fasiotia [aua neʻi faaosofiaina] o outou itu tino o i le lalolagi, o le faitaaga, o le amio leaga, o le faamatāitu [galala tau feusuaiga], o le tuʻinanau leaga, ma le matapeapea (o le ifo i tupua lava lea).” E lē pei o le faitaaga, o le taaloalo i totoga sa o se mea e mafai e se tagata ona faia na o ia lava (le tama po o le teine). Peitai, pe taofia ai ea e lena mea mai le avea o se mea e lē mamā? Po o le lolo atu foi i ai, ma ua pulea e le “galala tau feusuaiga”?

⁶ Ona toe tusi foi lea o le aposetolo ia i latou o ē “ua tuuina atu i latou ia i latou i le matāitu e fai mea leaga uma lava ma le tuʻinanau i ai.” (Efeso 4:19) Sa taʻua e Paulo le “matapeapea” i lana tusi i tagata Kolose, na siiina mai le palakalafa muamua atu, ae i le mau lenei, o le “tuʻinanau.” O le mea moni, e faaalia e le taaloalo i totoga sa nei uiga lē manaomia uma e lua. Faapefea? Ia, o se faailoaga o le faanaunau i se mea e lē se mea e fitoitonu i se tasi. Ua saunia e le Atua le faaipoipoga o se fuafuaga e faamalieina ai faanaunauga tau feusuaiga. Peitai, o le tagata ua fai ma ana masani le taaloalo i totoga sa, o le mea moni, o loo taumafai na te mauaina lea faamaliega e aunoa ma le totogiina o le tau. O le tau, o le tauaveina lea ma le amoina o tiute tauave e ō faatasi ma le faaipoipoga. I lenei sootaga seʻi matau e faapea, ina ua fautuaina e le aposetolo tagata o ē na ‘mu i faalogona tau feusuaiga,’ na te leʻi faapea atu ia i latou ina ia saili se mapusaga e ala i le taaloalo i totoga sa, peitai e auala i le sauniuniga a le Atua o le faaipoipoga.—1 Korinito 7:2, 9.

7, 8. (a) Afai e avea le taaloalo i totoga sa ma masani, e mafai faapefea ona aafia ai faamoemoega o se tasi i se faaipoipoga fiafia? (e) Aiseā o le a avea ai o se mea sese le manatu i le taaloalo i totoga sa o se auala ina ia alofia ai le solia ma le matuiā o le tulafono a le Atua?

⁷ O le mea moni, e mafai e le taaloalo i totoga sa ona lamatia ai lou fiafiaga i le lumanai i le faaipoipoga. Pe afai ua masani se tagata i le faamalieina o ona faalogona tau feusuaiga e ala i le taaloalo i totoga sa, e faatupuina aʻe ai e lenei mea le uiga ua fai ma masani, o le manatu i le na o le fiafiaga ma le faamalieina o ia lava. Peitai i le faaipoipoga, o loo iai le manaoga ae maise lava le tane, ina ia faaalia le manatu mamafa i le fiafiaga ma le faamaliega foi o le isi tagata. Neʻi meanē, ua faasolo ina leaga faiā faalefaaipoipoga ma maua ai i le popole ma le lē fiafia. O lenei lava tulaga—o le mafaufau o tane i lo latou lava faamaliega ma faatuatuanaʻi manaoga a a latou avā—o se tasi o faafitauli silisili i le faaipoipoga. O le tele o ia faafitauli e mapuna mai ona o se uiga ua fai ma masani, o le taaloalo i totoga sa a o leʻi faaipoipoina.

⁸ Atonu o le a fesili mai nisi, “peitai, ae faapefea pe afai o loo laitiiti tele se tasi ua lē alagātatau ai le fautuaina ia faaipoipo? A o tolopōina le faaipoipoga, pe o le a lē avea le taaloalo i totoga sa e puipuia ai se tasi faasaga i ni soliga e sili ona leaga o tulafono a le Atua, e pei o le faitaaga ma le tauātane po o le tauāfafine?” Atonu e foliga mai faapena. Peitai, pe o se fefulisaʻiga lelei lena? E leai. E faavaivaia e le taaloalo i totoga sa le loto fuatiaifo lelei ma le alofa i le mea ua saʻo, o mea tonu ia e mafai ona puipuia ai se tasi faasaga i faiga faifai pea faapena. E pei o le pulea e vailaau faasaina, o le taaloalo i totoga sa e mafai ona avea ma mea e liliu i ai i taimi uma lava e faalogoina ai e se tama po o se teine so o se ituaiga o faalogona malolosi ma leai se loto e faafetaiaʻia ai ma manumalo i faafitauli o loo faapogaia ai faalogona malolosi faapena. E mafai la ona maua ai i se amioga ua faifai  soo, e iʻu lava ina avea ai le tagata ma ana pologa. Peitai, ua fetalai mai le Atua e tatau ona tatou pulea o tatou tino, ae lē o le puleaina e o tatou tino i tatou.

FAIGA FAATAUĀTANE MA FAATAUĀFAFINE

9-13. (a) E avea faapefea le taaloalo i totoga sa ma mea e ono oo atu ai se tasi i faiga faifai pea faatauātane po o le tauāfafine? Pe na fanau mai se tasi ua tauātane pe tauāfafine? (e) E silasila faapefea le Atua i faiga faifai pea faapena? (i) E mafai ea ona tuusaoloto mai ai i ia faiga? (Roma 1:24-27; Levitiko 18:22, 23; 1 Korinito 6:9-11)

⁹ O le malolo atu ma le vaivai i faanaunauga faaleituaiga e ala i le taaloalo i totoga sa, o le a mautinoa e lē avatua ai ia te oe se malosi pe a fesagaʻi ma se tulaga e tofotofoina ai oe ina ia faia le faitaaga—pe oo foi lava i le tauātane ma le tauāfafine. Ua na o le tuufaafeagai, e faatupuina ai mafaufauga sese ma faanaunauga sese. O le mea moni, o le taaloalo i totoga sa e mafai ona taʻitaʻiina atu ai i le tauātane ma le tauāfafine. I tulaga faapea, ona o le lē faamalieina o le tagata i ana lava gaoioiga faaleituaiga na o ia, ua ia sailia ai sana paaga e faia faatasi faiga tau feusuaiga faaleituaiga.

¹⁰ Ua sili atu ona tupu soo lenei mea na i lo le mea e mafai ona e iloaina. E ese ai mai le mea e manatu i ai le toatele o tagata, e leʻi fananau mai tauātane ma tauāfafine o faapena, ae o a latou amioga faatauātane ma faatauāfafine o se mea na latou aʻoaʻoina mai. Ma e masani lava ona amata i se tagata a o laitiiti lava e ala i le taalo i totoga sa o le isi tagata, ona auai loa lea i faiga faatauātane ma le faatauāfafine. Ua faamatalaina mai e se tasi taulealea talavou e faapea:

¹¹ “A o ou laitiiti, sa matuā itiiti sina taʻitaʻiga faamātua na ia te aʻu. Sa faatagaina aʻu ou te alu i le mea ou te loto i ai ma faia ‘aʻu lava mea.’ Sa na o le valu oʻu tausaga ae faafeiloai atu aʻu e oʻu tei matutua matou te tausoga, i gaoioiga faatauātane. Sa ou iloaina nei e manaia tele nei gaoioiga, ma faaauau ai lava la lea faiga faifai pea ma i latou atoa ma isi mulimuli ane ai. E leʻi pine ae toetoe avea o se gaoioiga i aso taitasi. Muamua, sa ou lē iloaina faapea o loo faia se mea sese. E leʻi tuuina mai lava e oʻu mātua se faatonuga e tusa ai ma amioga mamā, ma sa lē taitai ona ou taʻuina atu ni mea faalilolilo ia i laua.

¹² “O le taimi lena sa matou mau ai i se atunuu i Amerika Tutotonu. Mulimuli ane ona matou sifi lea i le aai o Niu Ioka, lea na faauma ai laʻu aʻoga maualuga. Sa faaauau foi lava aʻu faiga faifai pea faatauātane. Sa faatumulia le aʻoga ma le aai i tauātane ma tauāfafine, o lea sa tele naunau avanoa e faia ai. A o ou tuputupu aʻe sa ou iloaina ai e lē faalenatura le mea na ou faia, ma sa lē saʻo. Peitai, sa ou faaauauina pea auā sa ou manao lava i ai. Sa matuā manaia ia te aʻu nei gaoioiga faaleituaiga.”

¹³ Na matuā “fai ma fiafiaga” o lea talavou nei faiga, ma na o le pau lava le mea na mafai ona ia manumalo mai ai, ina ua uma ona ia faia ni taumafaiga malolosi. O le ā na uunaia ai o ia ina ia sui? O le faanaunauga ina ia faafiafia Ieova le Atua. Ina ua ia malamalama faapea e silasila le Atua i le tauātane ma le tauāfafine o se gaoioiga e “lē faalenatura,” ma Na te matuā lē faamaoniaina ia faiga, sa tauivi loa lenei taulealea talavou faasaga i nei faiga masani seia oo ina ua ia manumalo mai ai. E matuā manino lava le Afioga a le Atua i lenei mataupu, ua faapea mai: “Aua neʻi faaseseina outou, e leai sē faitaaga po o sē ifo i tupua, e leai se tasi e agasala i le mulilua po o le tauātane ma le tauāfafine . . . o le a fai mona tofi le malo o le Atua.”—1 Korinito 6:9, 10, The New English Bible.

E MANUMALO I LE PULEA O OE LAVA

14-16. (a) O ā mea e mafai ona fai ina ia faatoilaloina ai pea faanaunauga faaleituaiga? (Filipi 4:8; 1 Tesalonia 4:3-5) (e) Afai e te faalogoina le fatufatu aʻe o faalogona faaleituaiga, o le ā e mafai ona e faia ina ia maua ai le mapusaga? (Salamo 1:1, 2; 63:6, 7)

¹⁴ O le mea e te mafaufau i ai e tele lava sona aafiaga i le auala o ou lagona ma mea foi  e te faia. O le ā moni lava la le mea e te manao i ai? Pe e te manao e faalavelaveina oe i faanaunauga faaleituaiga i le tele o taimi, fai ma masani le taaloalo i totoga sa, ma atonu e oo ai lava ina see atu i faiga faatauātane po o le tauāfafine? E mafai ona tupu lenei mea pe a faatagaina lou mafaufau ina ia mafaufau pea i mea faaleituaiga. Peitai, afai e te manao ina ia taofia uunaiga faaleituaiga faapena mai le faalavelave atu i lou fiafiaga o le olaga ma lou matuā faataunuuina o mea taʻuaogāina, ona faatino lea o lou puleaina o oe lava ma liliu atu lou mafaufau i isi mataupu.

¹⁵ Pe a e tau ane i ni ata, tusi faitau po o isi mea o loo aofia ai mea e faaosofiaina uiga faaleituaiga, aua lava neʻi toilalo ai ma le faavaivai. Afai e te faatagaina lou mafaufau e mafaufau ai pea i mea faapena pe auai i ni talanoaga e faaautū i ai, o le a tauia oe i taunuuga o le lagonaina o le lē fiafia ma le fatufatuina aʻe o omiga i totonu o oe lava. O le mafuaaga o lena mea ona o le umi e te tilotilo ai po o le talanoa i mea faapena, o le sili foi lena ona loloto o le aafia ai o lou loto. Ma o lou loto foi o le vala autū lea i le uunaia o oe ina ia gaoioi.

¹⁶ Ae faapefea pe afai e oo lava i tulaga masani, ae e te faalogoina lava le fatufatu aʻe o faalogona faaleituaiga i totonu o oe? E mafai faapefea ona e maua le mapusaga? E lē o le liliu atu i le taaloalo i totoga sa, ae ala i le tuu atu o lou mafaufau, loto ma le tino i se isi auala. E te mafaia ona faia nisi o galuega, auai i ni faamalositino faaletino, fai se taaloga po o le alu e savalivali. E lelei le saili o se tasi e talanoa i ai, se tasi e te faaaloalogia, po o le telefoni i se tagata faapena pe afai e tatau ai. Faitau—ia leo tele—i le Tusi Paia po o lomiga o loo faamatalaina mai ai faapea o le Tusi Paia o se tasi o fesoasoani e sili ona lelei. Ae sili ai i na mea uma, avatu le faafitauli i lou Tamā faalelagi, o Ieova le Atua, i le tatalo.

17-20. (a) Atonu e mafai faapefea ona fesoasoani fetuunaiga i masani a se tasi e tusa ai ma le moe, ʻai ma le tumamā? (e) E tusa lava pe o loo iai i se tagata se tauiviga faigata i le faia o le mea ua saʻo, aiseā e lē tatau ai ona ia lagona faapea ua leai se faamoemoe o lona tulaga? (Salamo 103:13, 14)

¹⁷ O le mea moni lava, e tele mea faaopoopo o se uiga faigofie ma talafeagai tonu e mafai e se tasi ona fai e fesoasoani ai ina ia alofia pe faaitiitia ai faalogona malolosi faaleituaiga. O le faatasi ma isi—o le mea moni, tau lava ina ia avea i latou o ni tagata e taʻuaogāina—o se puipuiga lea. Afai e te moe toatasi i se potu ma e iloaina ai e foliga mai e te faalogoina se popolega faapitoa i lea itu i le po, atonu e mafai ona e faia se fuafuaga ina ia lua toalua i se potu ma se isi o lou aiga. Atonu foi o le a e iloaina e fesoasoani pe a e taoto faatafa na i lo le taliaga pe faō.

¹⁸ O le isi mea e mafai ona fesoasoani, ia mautinoa e lē o oloia ma le lē tatau ou lavalava i totoga faaleituaiga. A o e leʻi moe, taumafai e vaai lelei o loo iai ni aafiaga toafilemu i mea o loo e faitau pe talanoa i ai, na i lo le tuufaafeagai. E faapena foi i so o se taumafataga e te faia i lea taimi. Ua iloaina e nisi faapea, afai latou te faatapulaa le tele o le mea taumafa ma mea inu latou te taumamafaina a o leʻi momoe, e sili ona momoe lelei ma e lē lolo atu ai i le faaosofiaina faaleituaiga. Ma e tāua faapitoa lava le tumamā lelei o alii ma tamaitai. O le lē mamā lelei e mafai ona mageso ai totoga sa ma tosina atu ai manatu o se tasi i lea itu. E mafai ona e faafesili atu i ou mātua mo faamatalaga i mea faapena e faatatau i le tumamā totino.

¹⁹ O le tumamā e tatau ai, e manaomia ai le taulimaina faapitoa o totoga faaleituaiga, ma atonu e lagonaina ai e se tasi faapea o le a avea lea ma tofotofoga ina ia faaaogāseseina ai. Ae ona e saʻo le uunaiga o lou loto—ma le faamoemoe ia alofia popolega faaleituaiga—o le a e iloa lelei ai faapea, o le tausia faapena o le a fesoasoani ai ia te oe ina ia maua se vaaiga e sili ona aogā mo le soifua malōlōina agaʻi i nei totoga. O le a e talisapaia ai faapea, sa leʻi faamoemoe ina ia ‘pule ia te oe’ ma puleaina ai lou olaga atoa.

²⁰ Afai o loo e tauivi nei faasaga i le faiga faifai pea o le taaloalo i totoga sa, ia manatua: E mautinoa lava e lē o oe le tagata muamua pe na o oe foi le tagata ua faafeagai ma lenei faafitauli. E ui lava ina e iloaina e oe lava o loo e iai i se tauiviga faigata ina ia momotuese le fai ma masani le taaloalo i totoga sa, aua lava neʻi manatu faapea ua tuulafoaiina oe e Ieova le Atua ma lona Alo o Iesu Keriso. Afai e te galue pea lava ma le faamaoni ina ia manumalo mai ai, o le a la fesoasoani ia te oe ma le agalelei ma le onosai ina ia fausia aʻe le malosi e manaomia ina ia e sao mai ai ma le manumalo.

[Fesili mo le Suʻesuʻega]

[Faamatalaga faaopoopo i le itulau 25]

Pe na fananau mai tauātane po o tauāfafine ua faapena, pe o la latou amioga o se mea na latou aʻoaʻoina mai?

[Ata i le itulau 26]

Pe afāina mea o loo e faitau ai?

[Pusa i le itulau 24]

O le vaega lona tolu lenei o la tatou faasologa. O loo talanoaina ai amioga lē mamā e pei o le taaaloalo i totoga sa, tauātane po o le tauāfafine, le tausiga o oe i le tino ma le auala e te laei ai