O le Soifuaga o Iesu ma Lana Faiva

“Faauta i le Tagata!”

I LE maofa i uiga o Iesu ma le iloaina o le leai o sana agasala, ua tuliloa ai e Pilato se isi auala e tatala ai ia te ia. “O la outou tu lea,” ua ia taʻu atu ai i le motu o tagata, “ia ou tatalaina atu ia te outou se tasi tagata i le paseka.”

O Parapa, o se fasioti tagata logologoā, o loo taofia foi faapagota, o lea ua fesili atu ai Pilato: “Po o ai tou te loto i ai ou te tatalaina atu ia te outou? o Parapa ea? po o Iesu lē ua igoa ia Keriso?”

I le faatauanauina e ositaulaga sili o ē ua faatupuina le vevesi, ua talosaga atu ai tagata ina ia tatalaina mai Parapa ae ia fasiotia Iesu. I le lē fiu, ua tali atu ai Pilato, i lona toe fesili atu: “O ai so laua tou te loto i ai ou te tatalaina atu ia te outou?”

“O Parapa,” ua latou tauvalaau atu ai.

“ Se ā foi le mea ou te faia ia Iesu o lē ua igoa ia Keriso?” ua fesili atu ai ma le ofo lava Pilato.

I le alalaga mai e pei o se tagata e tasi ma le leo tetele lava, ua latou tali mai: “Ia faasatauroina ia.” “Ina faasatauro ia, ina faasatauro ia ia te ia.”

I le iloa faapea ua latou mananao e fasioti i le tagata ua lē sala, ua ole atu ai Pilato: “ Se ā foi lona leaga ua na faia? Ou te leʻi iloa se mea e faasalaina ai o ia ia oti; o lea foi ou te aʻoaʻi atu ai ia te ia, i le ou tatalaina atu ai.”

E ui lava i ana taumafaiga, ae sa alalaga pea lava le motu o tagata ua tumu i le ita o ē na uunaia e taʻitaʻi lotu: “Ia faasatauroina ia.” I le uunaia i le ita tele i faiga sauā a ositaulaga sili, ua mananao ai le motu o tagata i le faamasaaina o le toto. Ma seʻi manatu i le na o le lima lava aso na muamua atu, o nisi o i latou ai sa iai faatasi ma ē na taliaina Iesu i lona afio atu i Ierusalema o se Tupu! I lenei taimi atoa uma lava, o soʻo o Iesu, pe afai o iai, ua matuā gūgū lava ma e leʻi iloa lava i latou.

I le vaai atu o Pilato e lē aogā lava ana taumafaiga uma, ae na i lo lea o loo alu aʻe pea se alaga, na tago ai i le apavai ma fafano ona lima i luma o le motu o tagata, ma faapea atu, “Ou te mamā aʻu i le toto o lenei tagata amiotonu; faitalia lava outou.” Ua tali  mai i ai tagata: “Ia i luga ia i matou, ma a matou fanau lona toto.”

O lea, ina ia tusa ai ma o latou manaoga—ma ua manao ina ia faamalieina le motu o tagata e sili atu na i lo le faia o le mea ua ia iloa e tonu—ua tatala atu ai e Pilato Parapa ia i latou. Ua ia ave ia Iesu ua latou saei ona ofu ma sasa ia te ia. E lē o se sasa masani lenei. Ua faamatala e The Journal of the American Medical Association le faiga faa-Roma i le sasaina:

“O lenei mea faigaluega e masani ai sa o se sasa puupuu (flagrum po o le flagellum) ua fili faatasi i ni maea tuaiti e eseese lava le uumi ua fafau faatasi i ai ma ni fasi uamea po o ni ponaivi maamaai o mamoe e nonoa faavāvā i ai. . . . A o sasaina pea ma le matuā malosi e fitafita Roma le tua o se tagata ua faasalaina, o nei polo uamea laiti e faapogaia ai ni totoulia i le tino o le tagata, ma o mea matuitui na fili faatasi ai ma ponaivi mamoe e faia ai ni manuʻa loloto i le aano o le tino ma o manuʻa matuā loloto i le paʻu ma lavevea ai ʻafuʻafu o le aano o le tino o le tagata. O lea, a o faaauau ona sasaina, e matuā masaesae lava ʻafuʻafu o le aano o le tino ma oo atu ai lava i musele ma oo ai ina maligi mai ai ni ogāalualu toto i le aano o le tino.”

Ina ua uma lenei sasaina ogoogo, ona avatu ai lea o Iesu i le maota o le kovana, ona valaau lea ina ia faapotopoto ane le vaegaau atoa. I inā ua faafaupue atu ai e fitafita isi upu faifai ia te ia e ala i lo latou faia o se pale i laau tuitui ma oomi faamalosi ifo i lona ao. Ua latou tuu se ū i lona aao taumatau, ma faaofu ia te ia i se ofu viole pauli, o le ituaiga e laei e tagata mamalu. Ona latou tauemu atu lea ia te ia: “Talofa, le tupu o tagata Iutaia!” Ua latou tuufeanu atu foi ia te ia ma po atu i ona fofoga. Na latou toe avea le ū malosi sa i lona aao, ma faaaogā e taia ai o ia i lona ao, na matuā loloto atu ua oo i le ipu o lona ao le maamaai o laau tuitui sa faia ai le “pale” o lona faalumaina.

O le mamalu uiga ese ma le malosi o Iesu i le feagai ai ma lenei faiga leaga ua matuā maofa ai lava Pilato o lea ua uunaia ai o ia e toe faia se isi taumafaiga ina ia laveaiina o ia. “Faauta, ou te taʻitaʻiina atu o ia i fafo ia te outou, ina ia outou iloa ou te leʻi iloa se mea e sala ai o ia,” ua ia taʻu atu ai i le motu o tagata. Sa manatu o ia atonu o le vaaia o le tulaga faataugā o Iesu o le a gau ai o latou loto. A o tu Iesu i luma o le motu o tagata lē alolofa, o loo i lona ao le pale tuitui ma o loo ofu i le ofu viole pauli ma o loo tafe ifo le toto i ona fofoga o loo matuitui i le tiga, ua faailoa atu e Pilato: “Faauta i le tagata!”

E ui lava ua manuʻanuʻa ma momomo, ae ua tu i inei le tagata aupito mataʻina o le talafaasolopito atoa, e moni lava o le tagata aupito sili lenei ua faapea ona soifua mai. Ioe ua faaalia e Iesu se tulaga matuā sili ona mamalu ma toafilemu ua tatau ai ona tuuina atu i ai le mamalu e oo lava ia Pilato e tatau ona iloa, auā o ana upu e foliga mai o loo fefiloi faatasi ai le faaaloalo ma le tiga alofa. Ioane 18:39–19:5; Mataio 27:15-17, 20-30; Mareko 15:6-19; Luka 23:18-25.

◆ I le ā le auala ua taumafai ai Pilato e tatalaina Iesu?

◆ Ua faapefea ona taumafai Pilato ia aloese mai o ia i le tauaveina o le tuuaʻiga?

◆ O le ā ua aafia ai i le sasaina?

◆ Ua faia faapefea faifaiga ia Iesu ina ua uma ona sasaina?

◆ O le ā le isi taumafaiga atili ua faia e Pilato ina ia tatalaina ai Iesu?