Le Nuu Olioli

O LE nuu olioli! Pe o fetaui lenei faaupuga i so o se atunuu o le fanau a tagata i aso nei? Pe mafai e so o se atunuu ona faapea mai ma le fiafia faapea ua ia mafaia ona soloia faiga sauā, solitulafono, le mativa, le polusione, faamaʻi o le lē atoatoa lelei o vaega o le tino, le iʻuvale o faiga faapolotiki, le feitagai o lotu? Pe o tuuina mai e se atunuu se faamoemoe moni i le faataulauina o na sini? E matuā leai lava!

Ae faapefea le vaaiga faalekelope? Na taʻua e Mikhail Gorbachev, o le peresitene o Rusia ia Iulai 16 o le tausaga na teʻa nei faapea: “Ua tuanai atu nei se tasi o vaitaimi fou i faiā faavaomalo, ma ulu atu i le isi, o se vaitaimi, ou te manatu, o le filemu malosi ma le faaumiumi.” Ae peitai, na lipotia mai e le mekasini o le Time o le aso lava lea faapea o loo taulai atu pea e le Iunaite Setete meatau faaniukelea e 120 i Moscow, ma o se tasi mai nei meatau e mafai ona matuā faatamaʻia atoatoa ai lena aai. Ma e lē taumatea ua nofo sauni foi Rusia e tali mai i lena lava ituaiga o auupega. Faatasi ai ma ni nai sui o Malo Aufaatasi o ē ua latou iloa nei pe faapefea ona saunia auupega faaniukelea, ua itiiti la se olioli pe a manatu atu i le po o ai o le a faia le uluai osofaiga.

Se Nuu e Olioli Moni

I se tasi taimi i le talafaasolopito—pe tusa ma le 3,500 ni tausaga ua mavae—sa iai se nuu olioli moni lava. O Isaraelu anamua lea. Ina ua laveaiina e le Atua lena nuu mai mafatiaga i Aikupito, sa latou pepese faatasi ma Mose i se pese olioli o le manumalo, ma sa faaauau pea ona latou olioli a o latou usiusitai atu i lo latou Atua ma o Lē e Laveaiina.—Esoto 15:1-21; Teuteronome 28:1, 2, 15, 47.

I lalo o le pulega a Solomona sa “toatele Iuta ma Isaraelu, e pei o le oneone i le matafaga ona toatele, o loo aai, ma feinu, ma olioli.” Sa avea lena ma taimi o le olioli tele, sa taualuga i le faatuina o se fale atonu o le fale aupito mamalu i le talafaasolopito uma, le malumalu mo le tapuaiga ia Ieova i Ierusalema.—1 Tupu 4:20; 6:11-14.

Le Nuu Olioli Faaonaponei

Na faaatagia mai e Isaraelu anamua se nuu faaonaponei. O lē fea nuu? Po o Isaraelu  faapolotiki ea o Sasae Tutotonu? Ua faaalia i le lipoti o tala fou faapea o lena atunuu tauivi e matuā aunoa lava ma le olioli. Pe ua aumaia e le mea ua taʻua o le Malo Aufaatasi le olioli moni i ona sui o loo iai? E leai, o le olioli moni e lē o maua lava i se mea o malo faapolotiki i aso nei. O le matapeapea, iʻuvale, ma le taatele o le lē faamaoni, ma i le tele o atunuu o loo tauivi ai ma le lē fiafia tagata ona o le taumafai ina ia tau lava ina ola.—Faataoto 28:15; 29:2.

Ae peitai, o loo iai i aso nei se nuu mataʻina e tasi, lena o loo matuā sili ona olioli. O lea nuu e lē faapolotiki, auā na faapea mai lona Ao, o Iesu Keriso, e uiga i lona nuu: “E le ni o le lalolagi outou.” (Ioane 15:19) E ui lava e na o le taʻu o loo autasi ai Malo Aufaatasi, ae ua aumaia ai le nuu olioli “mai atu nuu uma, ma aiga, ma nuu, ma gagana eseese.” (Faaaliga 7:4, 9) O lea nuu ua sili atu nei i le fa miliona lona faitau aofai, o lea o lona faitau aofai ua sili atu ona toatele na i lo malo e 60 o loo iai o latou sui e 159 i Malo Aufaatasi. O gagana a tagatānuu moni o lenei fa miliona tagata o lona aofai ua tusa ma le 200; peitai o loo autasi i latou uma i le tautala i le “gagana mamā” e tasi.—Sefanaia 3:9, NW.

Pe lē o se mea uiga ese faapea e matuā toatele naua aganuu eseese ae ua mafai ona tautala i se gagana taatele? E leai, ona o lenei gagana e autasia ai o loo aofia ai le feau e uiga i le Malo o le amiotonu o loo sau a le Atua. O lenei nuu olioli e sau mai “le tuluiga o le lalolagi” ma ua lauiloa foi i le lalolagi aoao o ‘Molimau a Ieova.’ (Isaia 43:5-7, 10; Sakaria 8:23) Toetoe lava i so o se mea e te malaga atu i ai i luga o lenei kelope, o le a e maua ai lava i latou.

I le Isaia 2:2-4, o loo faamatalaina ai e le perofeta a le Atua se vao o tagata o loo gasolo mai mai atunuu uma lava, ua faapea mai: “O mai ia, tatou o ae ia i le mauga o Ieova, o le fale o le Atua o Iakopo; e aʻoaʻo mai foi o ia ia te i tatou i ona ala, ona tatou savavali ai lea i ona ala.” Ma le maelega lava, ua valaaulia ai e i latou nei isi tagata ina ia maua faatonuga mai ia Ieova e ala i lana Afioga, le Tusi Paia, ina ia mafai ai ona latou aʻoaʻo e faia lona finagalo. O loo mulimuli atu lenei nuu e tasi i le ala o le filemu moni, ua uma ona tuʻi e ona tagata ‘a latou pelu e fai ma suotosina ma polo e teu ai vine, latou te lē o toe aʻoaʻo foi i taua.’ O se nuu olioli moni lava!

E mafai foi ona fai ai sou sao i lenei olioli. E mafai ona e aʻoaʻo e uiga i aso ua vave tele ona oo mai pe a aveesea e le Tupu, o Keriso Iesu tagata ma malo faaleagamea ma toe faafoisia mai le Parataiso i le lalolagi. (Tanielu 2:44; Mataio 6:9, 10) E oo lava i le taimi nei, ua maua ai e Molimau a Ieova i le avea o se nuu autasi le olioli tele i la latou galuega o le sauniuni atu mo lena vaitaimi mamalu o le filemu moni, e pei ona o le a faaalia i itulau o loo sosoo mai.