Vaaiga Faafiafia Loto e Faamalosia ai le Faatuatua

Mea Tāua mai le Faaaliga

O LE auauna a Ieova o Ioane o loo i le motu laitiiti o Patamo, i le talafatai i sisifo o Asia Itiiti. O inā na vaaia ai e lenei aposetolo matua mea ofoofogia—faafaatusa, e masani lava ona faateʻia ai, ma e mataʻina moni lava! O loo iai o ia i le aso o le Alii, e amata mai i le faanofotupuina o Iesu i le 1914 e oo atu i le faaiʻuga o lana Pule Faameleniuma. E ui lava o loo vaaia e Ioane mea o le a tutupu i le vaitaimi sili ona pogisa o le fanau a tagata, ae maeu le matagofie o lona uluai vaaia o le Pulega a Keriso i le Afe o Tausaga! Maeu ni faamanuiaga o le a olioli ai le fanau usiusitai a tagata i lea taimi!

Sa faamauina e Ioane nei vaaiga i le tusi o le Tusi Paia o Faaaliga. I le tusia pe tusa o le 96 T.A., ua mafai i lea ona faamalosia ai lo tatou faatuatua i le Atua o valoaga, o Ieova, ma i lona Alo, o Iesu Keriso.—Mo ni faamatalaga auiliili, tagai i le tusi Faaaliga—Ua Latalata Lona Tumutumuga Matagofie!, ua lomia e le Watch Tower Bible and Tract Society of New York, Inc.

Tuuina atu e Keriso Fautuaga Alofa

I le amataga lava i le faaaliga mai i le Atua e ala ia Keriso o loo aliali mai ai ni tusi i faapotopotoga e fitu o uso o Iesu o suli faatasi o le Malo. (1:1–3:22) I mea uma lava, ua ofoina atu e tusi ni faamālō, faailoaina mai o faafitauli, saunia faasaʻoga ma/po o faalaeiauga, ma taʻua ai faamanuiaga e iʻu i ai mai le usiusitai ma le faamaoni. E ui lava sa tumau tagata Efeso, ae sa latou tuua lo latou uluai alofa. Sa faalaeiauina le faapotopotoga mauʻoa faaleagaga o Semurana ina ia tumau ona faamaoni i totonu o sauaga. E leʻi manumalo sauaga i le faapotopotoga i Perekamo, ae ua ia faatagaina faiga vaega faalotu. E ui lava i le faateleina o le galuega a Kerisiano i Tuatira, ae e iai i inā le taaʻiga faa-Iesepela. E manaomia e le faapotopotoga i Sarataisa ona ala mai faaleagaga, ua uunaia le faapotopotoga i Filatelefaia ina ia taofimau i le mea ua ia te ia, ma e manaomia e tagata Laotikaia faaleogalua se faamalōlōga faaleagaga.

Maeu ni upu lelei mo le toleniina o tupu faalelagi i le lumanai—o le mea moni, o Kerisiano uma lava! Mo se faataʻitaʻiga, po ua faaleogalua ea nisi o i tatou? O lea ia gaoioi loa! Ia avea o se mea e faafouina ai e pei o se ipu vai mālū i se aso vevela, ae ia amata foi ona faaalia le maelega aasa mo Ieova ma lana auaunaga.—Faatusatusa Mataio 11:28, 29; Ioane 2:17.

 Ua Tatala e le Tamai Mamoe se Tusi Taai

Ona sosoo ai ma le vaaia o Ieova i lona nofoālii pupula. (4:1–5:14) O loo siosiomia o ia e toeaina e 24 ma meaola e fa. O loo i lona aao se tusi taai o loo faamauina i faamaufaailoga e fitu. O ai e mafai ona ia tatala le tusi taai? Ia, o le Tamai Mamoe, o Iesu Keriso, ua taʻuaogāina ia faia faapea!

A o tatalaina e le Tamai Mamoe faamaufaailoga e ono, sa faaalia ai ni mea tutupu mataʻina. (6:1–7:17) A o tatalaina le uluai faamaufaailoga, sa tuuina atu i lē o loo tietie i le solofanua paepae se palealii ma ua alu atu ma le manumalo. O tagata tietie solofanua latou te aumaia taua, faamaʻi ma le oti i le fanau a tagata a o tatalaina le isi tolu o faamaufaailoga. I le tatalaina o lona lima o faamaufaailoga, o i latou na faamaturoina ona o Keriso o loo alalaga mai mo le tauia o o latou toto, ma ua tuuina atu i tagata taitoatasi se “ofu sisina” e faaalia ai se tulaga amiotonu ma o le a faia i le toe faatutuina o i latou e avea ma meafaiola agaga e lē mafai ona oti faatasi ai ma ni faaeaga tautupu. (Faatusatusa Faaaliga 3:5; 4:4.) Ua faalauiloa mai e se mafuie le aso o le toasa o le Atua ma le Tamai Mamoe a o tatalaina lona ono o faamaufaailoga. Ae o “matagi e fa o le lalolagi,” o loo faaatagia ai le faamasinoga e faaumatia ai, o loo taofia seia faamaufaailogaina auauna a le Atua e 144,000. Pe a faauuina i latou e le agaga o le Atua ma vavae e avea ma ona atalii faaleagaga, ona muai tuuina atu lea ia i latou o se faailoga—se faamaufaailoga, po o se faamaoniga—o lo latou tofi faalelagi. E na o le taimi lava e uma ai ona tofotofoina o le a mafai ai ona tumau le faamaufaailogaina. (Roma 8:15-17; 2 Korinito 1:21, 22) Ma maeu le ofo atonu na ia Ioane i le vaai atu i “le motu o tagata e toatele” mai atunuu uma lava—se vao o tagata ua iai le faamoemoe o le ola e faavavau i se parataiso faalelalolagi! Ua latou ō mai nai “le puapuaga tele,” o se taimi o puapuaga e lē mafaatutusaina mo le fanau a tagata.

Maeu ni mea tutupu e ofo ai a o tatalaina le faamaufaailoga lona fitu! (8:1–11:14) E ʻafa itula o leai se mea e gasē, ua faatagaina ai tatalo a le au paia ia faafofogaina, ona sosoo ai lea ma le lafoina ifo i le lalolagi o le afi mai le fata faitaulaga. Ona sauni atu lea o agelu e toafitu e ili pu e faalauiloa atu ai mala a le Atua i luga o Kerisinetoma. O loo lagonaina le leo o pu i le vaitaimi atoa o le iʻuga seia oo atu lava i le puapuaga tele. Ua faalauiloa mai e pu e fa mala i le lalolagi, le sami, i puna o vaitafe, le la, le masina, ma fetu. O le iliina o le pu lona lima ua valaauina ai sē akerise na o loo latou faaatagia Kerisiano faauuina ua ō atu i luma e faia le taua mai lava i le 1919 ma agaʻi mai ai. Ina ua ili le pu lona ono, ona faia ai lea o se osofaiga e se ʻau tietie solofanua. I le faataunuuga, na faamalosia atili ai ē faauuina e le “motu o tagata e toatele” talu mai le 1935, i le folafolaina atu o feau faafaamasinoga e faatigaina ai faasaga i taʻitaʻi lotu a Kerisinetoma.

Ona sosoo ai lea ma le ʻaina e Ioane o le tusi taai laitiiti, e faaalia ai faapea ua talia e le vaega faauuina lo latou tofiga ma utufia mai meaʻai susua mai le vaega o le Afioga a le Atua lena o loo iai faaupuga o faamasinoga tauatua o loo latou folafolaina atu faasaga ia Kerisinetoma. Ua poloaiina le aposetolo ina ia fuatia le malumalu, e faailoa ai le mautinoa o le faataunuuga o fuafuaga a Ieova faatatau i le faatulagaga o le malumalu ma faapea ia ausia tapulaa tauatua e i latou o loo auaufaatasi atu i ai. Ona fasiotia ai lea o “molimau e toalua” a le Atua o loo vavalo i ie talatala, ua fasiotia, ae ua faatutuina i laua. O lenei mea o loo faasino atu i le 1918-1919, ina ua toetoe lava a faaumatia e fili la latou galuega talaʻi, ae na toe faaolaina faavavega auauna a Ieova mo la latou faiva.

Ua Fanau le Malo!

O le faaleoina o lona fitu o pu ua faalauiloa atu ai le fanau mai o le Malo. (11:15–12:17) I le lagi ua fanau ai e se fafine faafaatusa (le faalapotopotoga faalelagi a Ieova) se tama tane (le Malo o le Atua ma Iesu o le Tupu), ae o le tarako (o Satani) o loo taumafai ina ia ʻaina ae ua lē taulau. I le taualugaina o le taua i le lagi ua mulimuli mai ai le fanau mai o le Malo i le 1914, ua lafo ifo ai e Mekaeli manumalo (Iesu Keriso) le tarako ma ana agelu i le lalolagi. I inā o loo faaauau ai pea e le tarako ona sii atu le taua i le vaega totoe faauuina o le fanau a le fafine faalelagi.

Ona sosoo ai lea ma le vaaia e Ioane o se manu feai lea ua faia se faatagata o se mea inosia o ia. (13:1-18) O lenei manu feai faapolotiki e fitu ona ulu ma nifo e sefulu, ua alu aʻe nai “le sami,” o le anoanoai o le fanau a tagata fesouaʻiina lea o loo tupuga mai ai le malo faaletagata. (Faatusatusa Tanielu 7:2-8; 8:3-8, 20-25.) O le ā le puna o le pule a lenei manu faafaatusa? Ia, e leai lava se isi na i lo Satani le tarako! Ma seʻi tau lava ina manatu! I lenei manu feai tele faapolotiki e iai se isi manu feai e lua ona nifo (le Malo Malosi o le Lalolagi o Peretania ma Amerika) ua vaaia lona faia o se “faatagata,” lea ua lauiloa nei o Malo Aufaatasi. E toatele ua faamalosia e tapuai atu i le manu feai ma talia lona “faailoga”  e ala i le faia o mea i lana lava auala ma faatagaina o ia e pulea o latou olaga. Ae matuā maumauai lava Molimau a Ieova e tetee atu i le faailoga faatemoni o le manu feai!

Ua Gaoioi Auauna a Ieova

Ua vaaia auauna eseese a le Atua o faia se gaoioiga a o liligiina ifo ipu e fitu o lona toasa. (14:1–16:21) Faalogo! I luga o le Mauga o Siona faalelagi, ua mafai ai e Ioane ona faalogo atu i le 144,000 o pepese e peiseai o se pese fou. O se agelu o loo lele i le taulotoaiga o le lagi o loo ia te ia se tala lelei e faavavau e folafola atu i ē nonofo i le lalolagi. O le ā ua faaalia e lenei mea? E faapea o loo iai i Molimau a Ieova le fesoasoani faaagelu i le folafolaina atu o le feau o le Malo.

Sa tatau ona maofa Ioane e vaai atu i le vine o le lalolagi ua seleseleina ma ua nutipalaina nuu uma lava a o solia le soliga vine o le toasa o le Atua. (Faatusatusa Isaia 63:3-6; Ioelu 3:12-14.) I le poloaiga a Ieova, ona sosoo ai lea ma le liligiina ifo e agelu e toafitu o ipu e fitu o le toasa tauatua. O le lalolagi, le sami, ma puna o vai, faapea foi ma le la, le nofoālii o le manu feai, ma le Vaitafe o le Eufirate, ua aafia a o liligi ifo uluai ipu e ono. Seʻi manatu i le matuā fiafia tele o Ioane a o ia matauina le aoaoina e lena talaʻiga pepelo faatemoni o tupu faaletagata i le taua a le Atua ia Amaketo [Ha-Maketo]. Ma o iʻuga e matuā faaumatia ai a o liligi ifo ipu e fitu i le ea.

Fafine Faafaatusa e Toalua

E mautinoa lava le matuā fiafia o Ioane e vaaia le iʻuga o Papelonia le Aai Tele, le emepaea o lotu sese a le lalolagi, ma ia matauina mea e olioli ai na e mulimuli mai i lona faaumatiaga. (17:1–19:10) I le onā i le toto o le au paia, ua vaaia ai o ia o loo tietie i se manu feai mūmū e fitu ona ulu ma nifo e sefulu (le Malo Sosoo ma lona sui, le Malo Aufaatasi). Oi, ae maeu se faatamaʻiaga ua pagatia ai o ia a o liliu atu nifo faasaga ia te ia!

Ua faalogoina leo faalelagi o vivii atu ia Ioa ona o le faaumatiaina o Papelonia le Aai Tele. Ma maeu se viiga pei ni faititili o loo vivii atu i le faaipoipoga a le Tamai Mamoe ma lana Faatoanofotane, o ē faauuina ua toe faatutuina!

Ua Manumalo Keriso ma ua Pule

Ua sosoo ai le vaaia o le Tupu o tupu o taʻitaʻiina ʻau faalelagi i le faaumatiaga o le faiga o mea a Satani. (19:11-21) Ua vaaia e Ioane Iesu, “O le Lokou o le Atua,” o sii atu le taua faasaga i atunuu. Ona vaaia ai lea e le aposetolo le manu feai (le faalapotopotoga faapolotiki a Satani) ma le perofeta pepelo (le Malo Malosi o le Lalolagi o Peretania ma Amerika) ua lafo i “le lepa afi,” o le faatusa o le faaumatiaga aʻiaʻi, e faavavau.

O le ā e sosoo ai? Ia, ona vaaia lea e Ioane le tuuina o Satani i le to e lē gata. Ona mulimuli mai ai lea i lena se muai vaaiga i le lumanai o le Pulega a Keriso i le Afe o Tausaga, o le vaitaimi lena o le a faamasinoina ai e Iesu ma ana pule lagolago toe faatutuina le fanau a tagata, e siitia ai ē usiusitai i le tulaga lelei atoatoa faaletagata! I le tatalaina mai le to e lē gata, o le a toe alu atu ai Satani e faasese le fanau lelei atoatoa a tagata, ae o le faaumatiaga o le a faaiʻuina ai galuega a temoni uma ma fouvalega a tagata faasaga i le Atua.

I le toe foi i tua i lea lava taimi, maeu le matuā uaʻi atu sa tatau ona ia Ioane i le vaai atu ia i latou uma ua maliliu, i Heitisi (le tuugamau taatele o le fanau a tagata), ma le sami ua toe faatutuina ma ua faamasinoina i luma o le Atua, o loo afio i luga o le nofoālii sili sinasina! (20:11-15) Ma maeu se mapusaga o le a olioli ai ē amio saʻo pe a lafoina le oti ma Heitisi i le lepa afi, e lē taitai ona ia toe avea ni tagata!

A o faaiʻuina vaaiga a Ioane, ona ia vaaia ai lea o le Ierusalema Fou. (21:1–22:21) O lena aai pule ua vaaia o loo alu ifo mai le lagi ma aumaia le malamalama i atunuu. Ua tafe auala ai i le Ierusalema Fou “le vaitafe manino o le vai o le ola,” o loo faaatagia ai upu moni faale-Tusi Paia ma isi sauniuniga uma mai le Atua e faavae i le taulaga a Iesu mo le toe faamalosia o le fanau usiusitai a tagata mai le agasala ma le oti ma tuuina atu ia i latou le ola e faavavau. (Ioane 1:29; 17:3; 1 Ioane 2:1, 2) I ituvai taitasi o lenei vaitafe, ua vaaia ai e Ioane ni laau ma o latou lau e faamalōlō ai, e faaatagia ai se vaega o le sauniuniga a Ieova mo le aumaia o le ola e faavavau i le fanau usiusitai a tagata. O feau faaiʻu mai le Atua ma Keriso o loo mulimuli mai ai ma se valaaulia. Maeu le matagofie o le faalogo atu i le agaga ma le faatoanofotane o valaaulia i latou uma o ē fia inu ina ia ‘ō mai ma ave fua le vai o le ola’! Ma a o tatou faitauina upu faaiʻu o le Faaaliga, e lē taumatea ua fai ai so tatou sao i le maelega o le alaga a Ioane: “Amene. O lea lava, le Alii e Iesu, ia e afio mai.”

[Pusa/Ata i le itulau 25]

Ia Mataala Pea: I totonu o upu faavaloaga e uiga i le taua a le Atua ia Ha-Maketo (Amaketo), ua faapea mai: “Faauta, ou te alu atu pei o se gaoi; amuia lē mataala, ma tausi i ona ofu, ina neʻi savali o ia e lē lavalavā, neʻi latou iloa atu foi lona mā.” (Faaaliga 16:15) Atonu o lenei mea o se faasinoga i tiute o le ovasia, po o le tagata ofisa, i le mauga o iai le malumalu i Ierusalema. I taimi o leoleoga, sa alu atu o ia i le malumalu e vaai po o ala po o momoe ona leoleo o sa Levī i a latou leoleoga. So o se leoleo e maua o moe, sa taia i se laau, ma atonu sa susunuina ona ofu pito i tua e avea o se faasalaga e masiasi ai. Ona ua matuā lata tele mai nei Amaketo, e ao ai i le vaega totoe faauuina o “tupu ma ositaulaga,” po o le “fale faaleagaga,” ona maumauai ina ia mataala pea faaleagaga. E tatau foi ona faapena a latou aumea, le “motu o tagata e toatele,” e iai faamoemoe faalelalolagi, auā o loo latou tuuina atu foi le auaunaga paia i le Atua i le malumalu. (1 Peteru 2:5, 9; Faaaliga 7:9-17) Ae maise lava, e ao i ovasia Kerisiano ona tumau pea ona mataala faasaga i le faatupuina o tulaga leaga i totonu o le faapotopotoga. Ona latou te tumau i le mataala, e tausia ai pea e tagata tapuai faamaoni uma i le malumalu faaleagaga o le Atua o latou “ofu,” e faaalia ai la latou auaunaga mamalu i le avea o Molimau a Ieova.