E Faapea ona Mafai e le Agaga o le Atua ona Faaaafia Oe

“I LE amataga, na faia ai e le Atua le lagi ma le lalolagi. Sa leai se foliga mai o le laueleele ma sa soona nunumi, ma sa ufitia foi e le pouliuli le moana sausau; ma sa fegaoioiaʻi le Agaga o le Atua i le fogatai.” (Kenese 1:1, 2, Revised Standard Version) Ua faatāuaina e lenei faamatalaga faale-Tusi Paia se auala mataʻina ua mafai ai e tagata ola uma ona maua aogā mai le agaga paia. Sa gaoioi tiotio lena agaga i le vaitaimi o le foafoaga, ma e faafetai i lana galuega, auā ua avea ai le laueleele o se aiga fiafia mo le fanau a tagata.

Ae mafai e tagata ona maua aogā e sili atu mai le agaga paia. Ua faapea mai se faataoto faagaeeina: “Liliu mai ia i laʻu aoaiga; faauta, ou te liligi atu loʻu Agaga ia te outou; ou te faailoa atu aʻu upu ia te outou.” (Faataoto 1:23) I o tatou aso, o loo mafai ona maua le tuufaatasiga o “upu” a le Atua i le Tusi Paia, na tusia e tagata o e na “osofia mai e le Agaga Paia.” (2 Peteru 1:21; Mareko 12:36; 2 Timoteo 3:16) So o se taimi lava e faitauina ai e se tagata loto maulalo le Tusi Paia, e maua ai e ia aogā mai le agaga paia.

Le Agaga Paia ma le Galuega Talaʻi

Pe a asiasi atu se tasi o Molimau a Ieova i lou fale e talanoa e uiga i le tala lelei o le Malo, ua mafai la e le agaga paia ona faaaafia lou olaga i se isi auala. E faapefea ona tatou iloa? Ia, ina ua amata e Iesu Keriso ona talaʻi le tala lelei, sa ia faatatauina ia te ia lava upu a le perofeta o Isaia, ua faapea mai: “Ua i oʻu luga le Agaga o le Alii [o Ieova], auā ua na faauu mai ia te au e folafola le tala lelei i e matitiva; . . . e talaʻi le tausaga e finagalo malie mai ai le Alii [o Ieova].” (Luka 4:18, 19; Isaia 61:1, 2) Ioe, sa faauuina Iesu e le agaga paia e talaʻi le tala lelei.

E lē gata i lea, na valoia e Iesu faapea o le a faaauau pea le talaʻiina o le tala lelei pe a mavae lona maliu. Sa ia valoia: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) I sina taimi puupuu a o leʻi afio atu Iesu i le lagi, na ia tuuina atu i ona soʻo lenei poloaiga: “O atu e fai [tagata o] nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) Ina ua mavae le afio aʻe o Iesu i le lagi, o lea la, sa faaauau ai lava e ona soʻo le galuega na pulea mai e le agaga paia o le talaʻi ma aʻoaʻo atu. O loo faaaʻoaʻo Molimau a Ieova i aso nei i na uluai soʻo i le talaʻiina o le tala lelei i le lalolagi aoao.

Papatisoga ma le Agaga Paia

Pe afai e talileleia e se tasi le tala lelei, na fetalai Iesu e ao ona papatisoina o ia “i le suafa o le Tamā, ma le Atalii, ma le Agaga Paia.” O lea, ua aafia atili ai soʻo fou e ala i le agaga paia. O le faaupuga “i le suafa o le” o lona uiga moni “e ala i le pule a le” po o “le faamaonia o le tulaga o le.” * I lea, o le papatisoina i le suafa o le Tamā o lona uiga o le talia e aunoa ma le fesiligia o le pule silisili ese a le Atua i o tatou olaga. O le papatiso i le suafa o le Alo o lona uiga o le talia o Iesu e avea ma Faaola, ma Faaaʻoaʻo, ma Tupu. Ma o le papatiso i le suafa o le agaga paia e aafia ai le faalagolago i le  agaga ma gauai atu i lona mana. *

Le Agaga Paia i Lou Olaga

E faanoanoa lava, ona o le lē faamaoni, amioga lē mamā, le sauā, ma le salalau atu o le lē taupulea lea ua tatou vaaia i aso nei i atunuu “Kerisiano” ua faaataina ai le mea moni faapea, o le toatele o i latou ua faapea mai o Kerisiano ua tetee moni atu lava i le agaga paia. Ae o i latou o loo gauai atu i ai o loo matuā faamanuiaina. Mo le mea e tasi, latou te matuā faauigaina mea o latou faitauina i le Tusi Paia faagaeeina e le agaga ma faatatauina i o latou olaga. O lea, ua latou maua ai le atamai, le malamalama, le faamasinoga tonu, le tofa mamao, le poto, ma le tomai e mafaufau ai. (Faataoto 1:1-4) O mea aupito tāua lava nei i o tatou taimi tumu i faalavelave.

Ua fesoasoani foi le agaga paia i na tagata e foia faafitauli faigata. I aso anamua, sa faaali atu e le Atua i ona tagata pe mafai faapefea ona latou faataunuuina se galuega matuā faigata. Na fetalai Ieova faapea o le a faia e lē ala i “le fitafita, e le o le malosi, a o [lona] Agaga.” (Sakaria 4:6) Afai tatou te gauai atu i le Atua ma lona agaga, o le a fesoasoani foi ia i tatou e faataunuuina galuega mamafa ma foia toʻatugā na atonu e matuā tetele naua mo i tatou.—Mataio 6:33; Filipi 4:13.

E lē gata i lea, ua fesoasoani le agaga o le Atua ia i tatou ia olioli i se saolotoga e lē iloa e le lalolagi lautele. Na tusi le aposetolo o Paulo: “O le mea o i ai le Agaga o le Alii, o i ai le saʻolotoga.” (2 Korinito 3:17) O i latou e gauai i le agaga o le Atua e olioli i le saolotoga mai lotu sese, faiga faaagaga, le mataʻu i le lumanai, ma isi lava vala e tele e faapologaina ai. O le agaga o le Atua o le mea moni o se mana mo le lelei! E mafai ona oo lava ina ia suia tagata. E faia lava e le Tusi Paia lenei mea i lona faapea mai: “O le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā; e le faatulafonoina mea faapena.” (Kalatia 5:22, 23) Maeu se ese o le a iai lenei lalolagi pe afai e gauai tagata uma lava i taaʻiga a le agaga o le Atua!

I le avea o se vaega, ua olioli ai foi Kerisiano moni i “le loto gatasi i la le Agaga i le noataga o le filemu.” (Efeso 4:3) O le autasi ma le filemu o ni uiga ua seasea ona maua i aso nei. Ae maua i le mea o loo gaoioi ai le agaga o le Atua. O le mea moni, i totonu o Molimau a Ieova ua aumaia ai e le noataga e autasia ai a le agaga paia tagata mai atunuu uma, o lanu, gagana, ma ituaiga uma i se “au uso” moni.—1 Peteru 2:17.

Le Agaga Paia ma Oe

O e iloa ea le aogā o le iai o le atamai mai le Atua ma i le olioli i le saolotoga moni? Pe lē o se mea matagofie ea le maua o le fesoasoani tauatua i le foiaina o faafitauli ma atiina aʻe le alofa, olioli, filemu, onosai, agalelei, lelei, faamaoni, agamalu, ma le pulea o oe lava? O lea ia gauai i le mana o le agaga paia o le Atua. Ae mafai faapefea e se tasi ona fai o lenei mea?

Ia tuu atu i le Afioga a le Atua, le Tusi Paia, e taaʻina lou mafaufau ma lou loto. Ia auaufaatasi ma i latou o ē tuu atu i le agaga paia e taaʻina o latou olaga. Ia faia nei ni laasaga e aʻoaʻo ai ma faia le finagalo tauatua. O lea, “ia faatutumuina outou e ia i le olioli uma atoa ma le filemu, ina ua faatuatua; ina ia tele lava lo outou faamoemoe ona o le mana o le Agaga Paia.”—Roma 15:13.

[Faaopoopoga i lalo]