Faailoaina le Agaga Paia

PE SA e iloa faapea e faaaafia e le agaga paia olaga o i tatou uma lava taitoatasi? Ma pe sa e iloa faapea na te mafaia ona fai o ni faaleleiga tetele i lou olaga? E mafai ona e ofo ai i lenei mea. O le mea moni, atonu o le a e fesili: ‘O ai pe po o le ā le agaga paia?’

Afai e te auai atu i se tasi o lotu a Kerisinetoma, atonu sa e faalogo i se patele o faapaiaina se pepe “i le suafa o le Tamā ma le Alo ma le Agaga Paia.” (Mataio 28:19, The New English Bible) Pe a fesili atu ina ia faailoa mai le agaga paia, o le a tali vave mai lava le toatele o patele: ‘O le agaga paia o le peresona lona tolu o le Tasitolu, e tutusa i auala uma lava ma le Atua le Tamā ma le Alii o Iesu Keriso.’

Ae peitai, o lenei manatu sa leʻi talitonuina i le vaitaimi o uluai senituri T.A. O se faataʻitaʻiga: I le 381 T.A.—pe tusa ma le tolu senituri ina ua mavae le maliu o le au aposetolo o Iesu Keriso—na tusi ai Gregory of Nazianzus e faapea: “Ua manatu nisi faapea [o le agaga paia] o se mana malosi (energeia), ua faapea mai nisi o se meafaiola, o nisi ua faapea mai o le agaga paia o le Atua, ae o nisi ua lē mafai ona latou filifili po o lē fea o nei mea.”

I aso nei, o le tele o lotu i Kerisinetoma ua talia le manatu faa-Tasitolu o le agaga paia. Ae pe o le mea lena o lagolagoina e le Tusi Paia? Po ua na o se manatu e faavae i uputuu? O le mea moni, e lē o taitai lava ona tautala le Tusi Paia i le agaga paia e pei o le auala lea o loo ia tautala ai e uiga i le Atua po o Iesu. Mo se faaaʻoaʻoga, i le Tusi Paia, e leai se igoa totino o le agaga paia.

Pe ua na o se auiliiliga lē mautinoa lena?  E leai, e tāua igoa i le Tusi Paia. Sa faamamafa e le Atua le tāua o lona lava suafa ina ua ia fetalai: “O aʻu o Ieova, o loʻu igoa lea; o loʻu mamalu foi ou te le avatua lea i se tasi, ma loʻu viiga ou te le avatua i tupua ua ta.” (Isaia 42:8) O le tāua o le suafa o Iesu Keriso sa faamamafaina a o leʻi fanau mai o ia ina ua taʻu atu e se agelu ia Maria: “E te faaigoa ia te ia o Iesu.” (Luka 1:31) Afai sa matuā tāua le suafa o le Tamā ma le suafa o le Atalii, aiseā la le mea ua leai ai se igoa totino o le agaga paia? O le mea moni, ua na o lenei lava le faamatalaga auiliili e ao ona faia ai se tagata ia manatunatu pe tutusa moni le agaga paia ma le Tamā ma le Alo.

Le Tusi Paia ma le Agaga Paia

I Tusitusiga Eperu, po o le “Feagaiga Tuai,” o loo iai faasinoga i le “Agaga Paia” ma i “loʻu Agaga [Agaga o le Atua].” (Salamo 51:11; Ioelu 2:28, 29) Ua tatou faitau faapea e mafai e le agaga paia ona faatumuina se tagata, oo mai i ona luga, ma ufitia o ia. (Esoto 31:3; Faamasino 3:10; 6:34) E mafai ona aumai se vaega o le agaga paia o le Atua mai le tasi tagata ma avatu i le isi. (Numera 11:17, 25) E mafai ona galue le agaga paia i luga o se tasi, ma i lea e mafai ai e ia ona faia galuega mamana.—Faamasino 14:6; 1 Samuelu 10:6.

O le ā se faaiʻuga poto e mafai ona faia mai nei faamatalaga? E mautinoa e faapea o le agaga paia e lē o se peresona. E mafai faapefea e se vaega o se tagata ona aumai mai se tasi tagata ma avatu i le isi? Ae lē gata i lea, e leai se faamaoniga faapea ina o iai Iesu i le lalolagi, sa manatu ai tagata Iutaia faamaoni i le agaga paia faapea o se peresona e tutusa ma le Tamā. E mautinoa latou te leʻi tapuai atu i le agaga paia. Ae na i lo lea, sa tuusaʻo atu la latou tapuaiga e na o Ieova lava, o Lē na taʻua e Iesu lava ia o “loʻu Tamā” ma “loʻu Atua.”—Ioane 20:17.

I le pei o le mea ua taʻua o le Feagaiga Tuai, o le vaega o le Tusi Paia lea ua taʻua o Tusitusiga Kerisiano Eleni, po o le “Feagaiga Fou,” lea o loo faapea mai e mafai e le agaga paia ona ‘faatumuina’ se tagata pe “ua i luga” ia te ia. (Galuega 2:4; Luka 2:25-27) O le agaga paia sa ‘tuuina atu,’ ‘sa liligi ifo i luga,’ ma sa ‘tufatufaina.’ (Luka 11:13; Galuega 10:45; Eperu 2:4) I le Penetekoso 33 T.A., na maua ai e le au soʻo “i luga” o i latou le agaga o le Atua. (Galuega 2:17) O loo tautala foi le Tusi Paia e uiga i le papatisoina i le agaga paia ma i le faauuina ai.—Mataio 3:11; Galuega 1:5; 10:38.

O na faamatalaga faale-Tusi Paia e faamaonia ai e lē o se peresona le agaga paia. Ua faamautinoaina lenei faaiʻuga pe a tatou vaaia le agaga paia o lisiina mai faatasi ai ma isi mea e lē o ni peresona. Mo se faataʻitaʻiga, ua taʻua i le Tusi Paia faapea o Setefano sa “tumu i le faatuatua ma le Agaga Paia.” (Galuega 6:5) Ma sa faailoa mai e le aposetolo o Paulo o ia lava o le faifeau a le Atua “i le amio mamā, i le poto, i le faapalepale, i le agamalu, i le Agaga Paia, i le alofa moni.”—2 Korinito 6:4-6.

E moni, i nisi taimi e faaperesona ai e le Tusi Paia le agaga paia. Mo se faataʻitaʻiga, na faapea mai Isaia o nisi tagata fouvale ‘sa latou faatigaina le agaga paia.’ (Isaia 63:10) Na faapea mai Paulo e mafai e le agaga paia ona ‘tigaina.’ (Efeso 4:30) Ma e tele ni mau o loo faapea mai e mafai e le agaga paia ona aʻoaʻo atu, taʻitaʻi, tautala, ma molimau atu. (Ioane 14:26; 16:13, 14; 1 Ioane 5:7, 8) Ae ua faaperesonaina foi e le Tusi Paia isi mea e leai ni ola, e pei o le atamai, oti, ma le agasala. (Faataoto 1:20; Roma 5:17, 21) O se auala matuā malosi lenei e faamatala ai i nisi taimi e le Tusi Paia mea.

I aso nei, e faapena foi ona tatou tautala e uiga i le Tusi Paia pe a tatou faapea atu ua faapea mai le Tusi Paia i le mea lea, pe i lona aʻoaʻoina mai o se aʻoaʻoga. I le faaaogāina o faaupuga faapena, tatou te lē o faauigaina faapea o se peresona le Tusi Paia, a ea? E lē o faauiga foi e le Tusi Paia faapea o le agaga paia o se peresona pe a ia faaaogā ni faaupuga i le faia o ni faatusatusaga.

Ae o le ā la le agaga paia? E lē o se peresona. Na i lo lea, o le agaga paia o le malosi galue o le Atua lava ia, na te faaaogā e faataunuuina lona finagalo. (Kenese 1:2) Ae faapefea ona aafia ai o tatou olaga i le agaga paia? Ma e mafai faapefea ona tatou maua totino ai aogā e sili atu i lana gaoioiga?