MATAUPU 10

Faapefea ona E Manatu i Ou Mātua?

1-3. (a) O le ā e taʻu mai e le uiga o se tagata agaʻi i ona mātua e faatatau ia te ia? (e) O ā uiga o tagata talavou agaʻi i o latou mātua e te iloaina? Pe e te ioe faatasi ma i latou? (i) O ā ituaiga o aʻoaʻoga e mafai ona fesoasoani i se tagata talavou ina ia faaaloalo ai i ona mātua, ma aiseā?

PE a taʻu atu e isi ia te oe o latou faalogona e uiga i o latou mātua, o loo latou taʻuina atu ai foi ma se mea e uiga ia i latou lava. Ioe, o le mea e te tautala ai ma fai agaʻi i ou mātua e faailoa mai ai le mea o loo i lou lava mafaufau ma lou loto. E taʻuina mai ai mea e tele e uiga i le ituaiga o tagata o loo e iai i le taimi nei lava. E aumaia ai foi se faasinoga manino o le ituaiga o tagata atonu o le a e iai i le lumanai. Ua mafua lenei mea ona o ituaiga o amioga e te atiina aʻe i le aiga e faasolosolo malie atu lava ina avea ma se vaega o oe.

² O nisi tagata talavou latou te atiina aʻe se uiga o le leai atu i o latou mātua toetoe lava i mea uma. O le toatele latou te lagona faapea e lē taitai ona malamalama o latou mātua ia i latou pe taumafai foi ina ia malamalama, e faapea e manatu faaanamua ma le leai o se faamoemoe ma e lē mafai ona ofoina mai ai so o se taʻiala aogā i lenei lalolagi televave naʻuā. E lē pine ae tuputupu aʻe lenei faalogona e avea ma uiga e masani ai o le fouvale. Afai e lē loloʻua, e faigofie ona avea ma masani. O le a faaalia mai ai lava i feutagaiga ma tagata i fafo o le lio o le aiga. A o e te leʻi iloaina po o fea o e iai, e mafai ona taʻitaʻiina atu ai oe i faalavelave matuiā ona o le lē loto ina ia usiusitai i tulafono ua fuafuaina mo le lelei ma le puipuiga o le sosaiete faaletagata.

³ Peitai, e iai isi e lē lagona ma gaoioi i lea auala. Latou te tutupu aʻe ma manatu i o latou mātua ma le faaaloalo. E iloa e nei tagata talavou le pogai ua oo ai le lalolagi i le tele o faalavelave ma le mea o loo taofia e le lumanai mo i latou. O lea ua lē omia ai i latou ina ia faaliliuina agaʻi i uiga o le leai atu ia o loo iai i isi. Latou te talisapaia le faagotoina e o latou mātua i totonu ia i latou o le faaaloalo mo mataupu silisili e sili ona maualuluga o amioga faaletagata—ia o loo maua i le Afioga tusia ua faagaeeina a le Atua. E pei ona fautua mai le Tusi Paia: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a [Ieova].” Ua tali atu nei talavou i lena aʻoaʻoga ma o loo faia ma le loto i ai la latou vaega. O le iʻuga, latou te talisapaia o latou tulaga i totonu o le faatulagaga faaleaiga. Ua iai se faiā lelei i totonu o le aiga—Efeso 6:4.

LE USIUSITAI E TATAU AI I MĀTUA

4-6. (a) O ā mea ua uma ona faia e ou mātua mo oe e oo mai le taimi nei o le olaga? (e) E mafai faapefea ona e faaalia e te talisapaiaina? (Efeso 6:1, 2)

⁴ Ae faapefea i latou e lē o taumafai o latou mātua ina ia aʻoaʻoina i latou i mataupu silisili o le Tusi Paia? Pe o le uiga o lenei mea e lē tatau ai ona latou avatua i o latou mātua le faaaloalo ma le usiusitai? E moni e mautinoa lava le pagatia o le taʻitaʻiga faamātua pe a see ese ma tapulaa a le Atua, ae e lē faaitiitia ai e lenei mea le manaoga mo nei talavou ina ia atiina aʻe se uiga lelei faasaga i o latou mātua. Aiseā e lē faaitiitia ai? E tele ni mafuaaga.

⁵ Ona e te leʻi ola aʻe lava na o oe, atonu e te lē matuā talisapaia atoatoa ai mea uma ua faia e ou mātua mo oe. Peitai, seʻi nofo ma mafaufau faapea: Talu mai lava le taimi na e fanau mai ai, sa tausia oe e lou tamā ma lou tina i aso taitasi. Ua la saunia meaʻai ma lavalava ma se fale ina ia e nofo ai ma faamautinoa le faaaʻogaina o oe.

⁶ Ana fai e te faafaigaluegaina se tasi ina ia faia mea ua faia e ou mātua mo oe talu ona e fanau mai, o le a taugata tele lea mo oe. E tatau ona maua e ou mātua le faaaloalo ona o na mea uma. Mulimuli ane, afai e te faaipoipo ma avea o se matua, o le a sili atu ona e talisapaia atoatoa mea e tele sa faia e ou mātua mo oe. Ae aiseā lava e lē faaalia ai le talisapaia i le taimi nei? Afai e te toe totogi atu i ou mātua se vaega o le alofa o loo e nofo aitalafu ai e ala i le avatua  ia i laua o le faaaloalo ma le usiusitai, ona e faaalia ai lea o loo e tuputupu aʻe e avea ma tagata matua, o se tasi o loo mafaufau lelei, o se tasi o lē faatāuaina i latou o ē na latou faia mea lelei mo ia.

7-12. (a) O le ā le manatu e tatau ona iai i se tagata talavou i mea sese ua faia e ona mātua? (Mataio 6:14, 15) (e) O le ā le tulaga ua tuuina mai e le Atua i mātua e pei ona faaalia mai e le Tusi Paia? (Faataoto 6:20) Aiseā e avea ai o se faatulagaga e manaomia? (i) O le ā le mataʻutia o le mataupu e faatatau i le lē usitai o se tasi i mātua?

⁷ E lē o fai atu nei faapea e lelei atoatoa ou mātua. O le mea moni la te faia mea sese. Ae faapena foi oe. Ai lava e pito tele ni mea sese e te faia, talu ai e lē o ia te oe lo la poto masani i le olaga. Pe e te faitioina ou mātua ona o ni a la mea sese, ae faatalitalia i laua e aua neʻi fai mai so o se upu e uiga i au mea sese? Ina ia ōgatusa, e tatau ona e iloaina ona faagaloina mea sese la te faia, e pei lava ona tatau ona la faagalo mea sese e tele e te faia. Ma talu ai e sili mamao atu le mamafa o le tiute tauave o loo ia i laua, e ao ai ona malamalama faapea e mafai ona la sese i nisi o taimi. Ua taofia lelei e le Tusi Paia le mataupu silisili lenei: “Aua o le le alofa, e le alofagia o ia i le faamasinoga; a o lē alofa, e olioli ia pe a faamasinoina.”—Iakopo 2:13.

⁸ Ae peitai, o le mea e te manatu o se sese o mātua i nisi o mea, atonu ua na o se manatu e ese mai lou manatu. Afai o le tulaga lea, ma ua laasia e ou mātua se tulaga maumauai i le mataupu o loo finauina, o le ā e tatau ona e faia?

⁹ E manaomia ona teu i lou mafaufau faapea e lē tutusa le tulaga o ou mātua ma lou tulaga. Ua fai se matua ma sui o se tasi e sili ona maualuga i le faatulagaga o mea a le Atua. Ua tuuina e le Atua i ou mātua le pule ma tiute tauave e leʻi oo ina ia te oe. O le mea lea, o iʻuga filifiliga e faatatau i mea o loo aafia ai oe e ā ou matua ia. O le pogai lena e fautua mai ai le Afioga a le Atua: “O outou le fanau, ia outou faalogo i o outou mātua i mea uma; auā o le mea mālie lea i le Alii.” O le mea moni, o lona uiga o le usiusitai i mea uma e manaomia e ou mātua, ia e lē solia ai tulafono a le Atua.—Kolose 3:20.

¹⁰ Ua e iloa la, e tatau ona maopoopo le sosaiete faaletagata. A lē maopoopo, o le a fenuminumiai e oo lava ina fevesiaʻi. Mo se faaaʻoaʻoga, e lē faalauina atu e le seila i le kapeteni pe faapefea ona faatonutonu le vaa, e lē faatonuina foi e le tagata taalo le pule pe faapefea ona puleaina le kalapu. E moni, e talia e se kapeteni lelei ma se pule lelei, ma o le mea moni, la te faalaeiauina fautuaga mai ia i latou o loo i lalo o la la taʻitaʻiga. Ae peitai, afai la te faatagaina isi ina ia faatonuina i laua ma faalau atu mea e tatau ona la faia, o le a lē pine ae faalēaogāina la la pule, ma iʻu ai i le fenuminumiai ma le lē maopoopo o mea. Pe e te lē ioe i ai?

¹¹ E faapea foi la, e tatau ona maopoopo mea i totonu o le lio faaleaiga. Ma ua tofia ai le tamā i inā e le Atua e fai ma ulu, faatasi ma le tina ia felagolagomai ma le vavalalata. Ua tofiaina mātua uma e toalua ina ia avea ma pule e vaavaaia la la fanau. Pe a tuuina atu la e ou mātua nisi o mea e manaomia ia te oe, e pei o le taimi e tatau ai ona e iai i le fale i le po, po o ai e tatau ona e aumea i ai, le auala e teu ai  oe lava, ma isi lava mea faapena, ma e usitai ia i laua, o loo e faaaloalogiaina la le faatulagaga a le Atua. Pe a e lē usitai i ou mātua, o loo e lē faaaloalogiaina le faatulagaga a le Atua. O lona uiga o le feteenai lena ma le Atua, o Lē na Foafoaina oe atoa foi ma ou mātua! Ma ua e iloaina lava po o ai o le a faiaʻina ai i inā. O le auala la e te tali atu ai i ou mātua e atagia mai ai pe faapeī lou lagona e uiga i Lē o lē e sili ona maualuga i lo i laua ma o lē o loo iai ia i laua le tiute tauave ina ia gauai atu ia te ia, o Ieova le Atua.

¹² O le pogai lea ua faapea mai ai le Afioga a le Atua: “O mata ua tauemu i le tamā, ma ʻinoʻino ona usiusitai i le tinā, e sailia ia e oreva o le vanu, e ʻaina e tamai areto.” Ioe, o le faaalia o se uiga sese faasaga i mātua e mafai ona maumau ai ola o talavou.—Faataoto 30:17.

LESONA UA AʻOAʻOINA MAI LE AVEA MA SĒ E MAUALALO IFO

13-17. (a) E mafai faapefea e lou aʻoaʻoina ina ia faaaloalo ma usitai i ou mātua ona fesoasoani ia te oe pe a avea oe ma matua? (e) E mafai faapefea ona fesoasoani ia te oe i le aʻoga ma pe a e faigaluega mo se tagata e ana le galuega? (i) Ae sili atu ai ona tāua, o le a aafia ai faapefea lou tulaga ma le Atua?

¹³ I se aso, pe a e ausiaina tausaga faaletulafono ma lē taumate o le a fai sou lava aiga, pe e te lē manao ina ia avatu e lau fanau le faaaloalo ma le usiusitai ia te oe? Peitai, afai e te leʻi iloa ona faia faapena i ou lava mātua, faamata ea la o le a e toleniina lau fanau ma le manuia tele i lo latou tuuina atu o sea faaaloalo? Fai mai le Tusi Paia e te selesele mea na e luluina. (Kalatia 6:7)

Faataʻitaʻi pe faapefea ona faafeagai ma le tulaga maualalo ifo o loo e iai nei, ma o le a fesosoani lena ia te oe ina ia faafeagai ai ma tiute tauave e sili ona tele o le tagata matua, atonu po o le avea ma matua, i se taimi mulimuli ane.

¹⁴ Afai foi e te atiina aʻe se uiga o le leai atu i ou mātua, e mafai ona faaalia mai i isi mea e te faia mulimuli ane. Mo se faataʻitaʻiga, afai e te faigaluega mo se tagata e ana se galuega, pe o le a e ita pea lava i lona puleaina o oe? A ia avatu ia te oe se mea e fai, pe o le a faafaigata ia te oe ona usitai i ai? O le a e faitio ea i taimi uma lava e uiga i lau galuega? Ae faapefea lou uiga agaʻi i isi o ē tou te faigaluega faatasi? Atonu o le a e iloaina o loo e faitioina pea lava pea i latou, e lē taitai ona faafetai atu ia i latou mo ni mea lelei atonu latou te faia mo oe. Po o lou alu foi i se aʻoga ina ia aʻoaʻoina mai ai se matātā, pe ua toleniina foi i le galuega, a mavae ni nai vaiaso ona amata loa lea ona e lagona faapea ua tele mea ua e iloa i lo lou faiaʻoga. O nei uiga uma atonu e faigofie ona faapogaia ai mo oe le faanoanoa tele ma faalavelave. E mafai ona avea o ni fua o le atiina aʻe o uiga sese agaʻi i ou mātua i le taimi muamua.

¹⁵ O le mea lea, ia talia le uiga moni o le olaga faaleaiga ma lou tulaga i totonu o le aiga. Ia talisapaia faapea o le auala a le Atua, ma e sili ona lelei tele lana auala.

¹⁶ Peitai, afai e te teena lou tulaga e tatau ona iai i totonu o le aiga i ou tausaga talavou, o lona uiga la o loo e sailia faalavelave. E lē gata ina aafia ai la tou faiā ma ou mātua ma isi, ae faapena foi lou olaga mulimuli mai ai; ae sili mamao ai ona tāua, o le a faaleagaina ai lou tulaga i luma o le Atua. Ma o ia na te filifilia pe o le a e ola e faavavau i lana faiga fou, pe o le a tafiesea e lē toe iai pe a toeitiiti faaumatia lenei faiga o mea amioleaga. Ia tali atu i le talosaga mai: “Loʻu atalii e, aua neʻi galo ia te oe laʻu tulafono, a ia tausia aʻu poloaiga i lou loto. Auā e faaopoopoina ai ia te oe o aso e tele, ma tausaga e te ola ai, atoa ma le manuia.”—Faataoto 3:1, 2.

¹⁷ Seʻi tau ina mafaufau i le taui o le a mauaina e tagata o ē tausia poloaiga a lo tatou Tamā faalelagi ma o ē e lē faagaloina Lana tulafono. O le taui o le “faaopoopoina ai ia te oe o aso e tele, ma tausaga e te ola ai, atoa ma le manuia.” O le mea ea lea e te manao i ai? O e faanaunau ea ina ia ola mo se taimi umi, ma olioli moni i se olaga filemu ma le fiafia? Ia faamaonia la e te manao i ai e ala i le faalogo i le faalaeiauga a le Atua ina ia usiusitai i ou mātua.

[Fesili mo le Suʻesuʻega]

[Ata i le itulau 31]

Pe e te avatuina i ou mātua le faaaloalo e tatau ona la mauaina?