O le Soifuaga o Iesu ma Lana Faiva

Tuuina atu ma Taʻitaʻiina ese Atu

INA ua toe taumafai Pilato o lē ua uunaia ona o le toafilemu ma le faaaloalo o Iesu ua faataugāina ina ia tatalaina o ia, ua oo ai ina matuā feita lava le au ositaulaga sili. Ua latou maumauai e leai lava se mea o le a faatagaina e aiā i la latou fuafuaga leaga. O lea na toe faafou ai la latou alaga: “Ina faasatauro ia, faasatauro ia.”

“Ina ave ia e outou ia te ia, ma ia outou faasatauroina,” ua tali atu ai ma le inoino tele Pilato. E ese ai mai i a latou uluai tuuaʻiga, atonu ua iai i tagata Iutaia le pule e faasalaina ai tagata solitulafono mo teteega faalotu na ua lava lo latou malosi pe matuiā. O lea, pe a ma le faalima taimi a lē itiiti mai, ua faalauiloa atu ai e Pilato le leai o se agasala a Iesu, i le faapea atu: “Ou te leʻi iloa se mea e sala ai o ia.”

I le vaai atu o tagata Iutaia faapea, ua lē taulau i a latou moliaga faapolotiki ona aumaia ai ni iʻuga, ona toe foi atu lea i moliaga faalotu faapea ua upuvale lea sa faia i uluai itula i le faamasinoga o Iesu i luma o le au Saniterini. “O ia te i matou le tulafono,” ua latou fai mai ai, “e tusa foi i la matou tulafono ona ia oti o ia, auā ua fai o ia e ia ma Alo o le Atua.”

E fou ia Pilato lenei moliaga, ma ua faapogaia ai lona matuā fefe lava. I le taimi lea, ua ia iloa ai o Iesu e lē o se tagata faatauvaa, e pei lava ona faaali i le miti a lana masiofo ma i le faamaonia mai o le malosi uiga ese o le peresona o Iesu. Ae pe o le “Alo o le Atua”? Ua silafia e Pilato o Iesu e mai i Kalilaia. Peitai, pe faamata sa ia soifua muamua? I le toe avatua o ia i totonu o le maota, ua fesili atu Pilato: “ Se fea ea oe?”

Ua lē gagana Iesu. I le taimi muamua na ia taʻu atu ai ia Pilato o ia o le tupu, ae o lona Malo e lē mai i lenei lalolagi. E leai se aogā o nisi faamatalaga atili e toe faia. Ae peitai, ua tiga le loto mimita o Pilato ona o le musu o Iesu e tali atu, ma ua ia oso atu ai ma le ita ma faapea atu ia Iesu: “E te lē gagana mai ea ia te aʻu? Po ua e lē iloa, o ia te aʻu le pule e faasatauro ia te oe, o ia te aʻu foi le pule e tatala ia te oe?”

“E leai sau pule ia te aʻu, ana lē tuuina mai ia te oe mai lugā,” ua tali atu ai ma le faaaloalo Iesu. O loo ia faasino atu i le tuuina mai e le Atua o le pule i pule faaletagata latou te pulea ai mataupu a le lalolagi. Ua faaopoopo mai Iesu: “O le mea lea e tele ai lona leaga o lē na ia tuuina mai aʻu ia te oe.” O le mea moni, ua matuā mamafa lava le avega ua tauaveina e le ositaulaga sili o Kaiafa ma lana au lagolago ma Iuta le Sekara na i lo Pilato mo faiga lē tonu na faia ia Iesu.

I le matuā sili atu ona maofa ia Iesu ma le fefe faapea ai e iai sona amataga tauatua, ua toe faafou ai e Pilato lana taumafaiga e tatalaina o Ia. Ae peitai ua tetee atu tagata Iutaia ia Pilato. Ua toe fai atu foi la latou tuuaʻiga faapolotiki, i le faamataʻu atu faatogafiti: “Afai e te tatalaina lena tagata, e te lē alofa ia Kaisara; o sē fia fai ma tupu, e fou o ia ia Kaisara.”

E ui lava i aafiaga mataʻutia, ae ua toe aumai tasi lava e Pilato Iesu i fafo. “Faauta i lo outou tupu,” ua faapea ona ia toe ole atu ai.

“Ave ese ia, ave ese ia; ina faasatauro ia te ia.” ua sau ai le tali.

“Ou te faasatauro ea i lo outou tupu?” ua fesili atu ai Pilato ma le leai o se faamoemoe.

Sa lē mafai ona onosai tagata Iutaia i lalo o le pulega a Roma. O le mea moni ua latou inoino i le pulega a Roma! Peitai, ua fai atu ma le pepelo ositaulaga sili: “E leai so matou tupu, na o Kaisara.”

I le fefe i lona tulaga faapolotiki ma lona talaaga, na iʻu ai ina lolo atu Pilato i alaga faifai pea ma le faamataʻu a tagata Iutaia.  Ona ia tuuina atu lea o Iesu. Ona saei lea e fitafita le ofu viole pauli ma toe faaofu ia te ia i ona ofu. A o taʻitaʻiina atu Iesu ina ia faasatauroina, ua tuuina atu ina ia ave e ia lava lona satauro.

O le taimi lea ua tutonu le la i le taeao o le Aso Faraile, Nisani 14; atonu ua agaʻi atu i le aoauli. Sa ala mai Iesu talu mai le taeao po lava o le Aso Tofi, ma ua puapuagatia o ia i lea mea ma lea mea tiga. Ma le malamalama lava, ua toeitiiti lava uma lona malosi i lalo o le mamafa o le satauro. O lea, o se tagata na ui ane, o Simona le Kurene mai Aferika, ua faamalosia ina ia auauna i le aveina o le satauro mo ia. A o latou agaʻi atu, sa mulimuli atu le motu o tagata e toatele, e aofia ai ma le toatele o fafine o ē ua taufaitagituʻi ma taufaitagiaue ona o Iesu.

Ua liliu atu i fafine, ona fetalai atu lea o Iesu: “Tama fafine a Ierusalema e, soia le tagi ia te aʻu, a ia outou tagi ia te outou, atoa foi ma a outou fanau. Faauta foi, e oo mai ona aso, e fai mai ai tagata, Amuia ē ua pa, ma fafine e leʻi fananau, ma susu e leʻi susuina. Ona fai atu lea o tagata i mauga, Mafuli mai ia ia te i matou; e fai atu foi i mea maupuepue, Ina ufiufi ifo ia ia te i matou. Auā afai e faia nei mea i le laau mata, se ā se mea e fai i le laau mago?”

O loo faasino atu e Iesu i le laau o le nuu o Iutaia, lea o loo mata pea o loo iai le sua o le ola i totonu ona o le faatasi ai pea o Iesu ma le iai o le vaega totoe o loo talitonu ia te ia. Ae pe a aveesea i latou nei mai le nuu, o le a na o se laau mate faaleagaga o le a totoe ai, ioe, se faalapotopotoga faamalo ua mago. Oi, pagā se pogai mo le tagituʻi o le a iai i inā pe a faaumatia e ʻautau a Roma, o loo auauna e avea ma faaoosala a le Atua, le nuu faa-Iutaia! Ioane 19:6-17; 18:31; Luka 23:24-31; Mataio 27:31, 32; Mareko 15:20, 21.

◆ O le ā le moliaga ua faia e taʻitaʻi lotu faasaga ia Iesu ina ua lē taulau ona aumaia ni iʻuga e a latou moliaga faapolotiki?

◆ Aiseā atonu ua sili ai ona mataʻu Pilato?

◆ O ai e sili atu ona mamafa le agasala ua aveina ona o mea ua tupu ia Iesu?

◆ Ua faapefea ona uunai e ositaulaga Pilato ina ia tuuina atu Iesu mo le faaooina i ai o le sala?

◆ O le ā ua taʻu atu e Iesu i fafine o ē na fetagisi ona o ia, ma o le ā ua ia uiga i ai e ala i le faasino atu i le laau “mata” ae na oo ina “mago”?