Ua Autasia e le Gagana Mamā le Motu o Tagata e Toatele o Tagata Tapuaʻi

O LE gagana mamā na tuuina mai e le Atua, o le malosi lea mo le autasi faa-Kerisiano. Sa iloa le faamaoniga o lea mea ia i latou uma lava na auai i le tauaofiaga a Molimau a Ieova na faia i Perelini i Sisifo mai le Aso Lua e oo i le Aso Faraile, Iulai 24 e oo i le 27, 1990, talu ai ona sa auai Molimau mai atunuu eseese e 64.

Ina o faia Tauaofiaga Itumalo o le “Tuutoina i le Atua” i Polani i le tau mafanafana o le 1989, e faitau afe sui usufono na ō mai mai Rusia ma Sekosolovakia, ae na o ni nai selau na auai mai Siamani i Sasae. Maeu le suiga o le tulaga faapolotiki ua iai i le lalolagi talu mai ai na taimi! I le taimi nei, pe tusa ma le 30,000 sui usufono mai Siamani i Sasae sa feiloai ma Molimau i le Malae Taalo o le Olympia i Perelini i Sisifo. Sa o se mea masani lenei tauaofiaga i le faitau selau o tauaofiaga na faia i isi vaega o le lalolagi, e masani lava e amata i le Aso Tofi e oo i le Aso Sa.

I lana lauga amata o le faafeiloaiga i le Aso Lua, na toe taʻua ai e le taʻitaʻifono le vaega na faia e tauaofiaga talu mai le 1919 i le fesoasoani atu i Molimau a Ieova ina ia faia le agaʻigaʻi i luma e tautatala i le gagana mamā. O le a faapena foi ona fesoasoani lenei tauaofiaga ia i latou uma lava na auai ina ia faaleleia lo latou tomai e tautatala ai i le gagana mamā ma ola e tusa ai. Sa ia faamanatu atu i sui usufono faapea e ala i a latou lava teuga ma amio, ua faaalia ai e tagata o Ieova le agaʻigaʻi i luma ua latou faia i le tautala i le gagana mamā.

“ Se Gagana Mamā mo Nuu Uma”

Ma le talafeagai lava, o le lauga autū o le tauaofiaga, sa faatomua ai le matua e pei ona muai taʻua. Sa faavae mai lea lauga i le Sefanaia 3:9 (NW), o inā o loo folafola mai ai e le Atua: “Ou te avatua i tagata le suiga i le gagana mamā, ina ia latou valaau uma lava i le suafa o Ieova, ina ia auauna ia te ia ma le loto gatasi.” Ua aofia ai i le gagana mamā le malamalama saʻo ma le talisapaia o le upu moni e uiga i le Atua ma ana fuafuaga. E na o Ieova lava e mafai ona ia saunia o lena mea e ala i lona agaga paia. E tatau ona avea le alofa i le upu moni ma uunaiga mo le aʻoaʻoina o le gagana mamā, lea e auliuligia mai faiga lē mamā uma tau amio.

E lē gata i lea, o le tautala i le gagana mamā e lē na o se mataupu o le faaaogāina o ni faaupuga faapitoa. Na i lo lea, o o tatou auala o  le olaga e tatau ona ōgatasi ma upu e sau mai i o tatou laugutu. O le mea moni, e tāua foi uiga o o tatou leo, foliga o o tatou mata, ma gaoioiga fai, auā o mea na e faaatagia ai mea o i totonu o o tatou loto. Ina ia ō faatasi pea ma le gagana mamā ua faateleina, e tatau ona tatou faia se polokalama maumauai o suesuega ma auai e lē aunoa i sauniga uma a le faapotopotoga.

Aʻoaʻoina le Gagana Mamā

E pei ona faamamafaina e se lauga i le afiafi o le Aso Lua faapea, o le aʻoaʻoina o le gagana mamā o lona uiga o le “Agaʻi i Luma mai Mea Faavae i le Taʻumatuaina.” E matuā manaomia lava le tuputupu aʻe pe afai tatou te agaʻigaʻi i luma faaleagaga. O le uiga o lena mea, o le faaaogā lea o sauniuniga uma lava mo le agaʻigaʻi i luma faaleagaga ma le faatatauina o mataupu silisili o le Tusi Paia i aso fai soo.

Ina ia oo ina tomai atoatoa i le gagana mamā, e tatau ona “Aʻoaʻoina e Ieova,” i tatou, o le matua lena o le lauga faasolo i le taeao o le Aso Tofi. Sa faaalia e le uluai failauga pe na faapefea ona ‘Faaaʻoaʻo mai e Iesu Keriso’ lenei mea. O le aʻoaʻoina e Ieova o Iesu, sa faaalia manino mai lea i ana upu ma galuega. O lea tatou te mananao ai e faaaʻoaʻo ia te ia i le auala na ia aʻoaʻo atu ai. Ma e pei ona gauai atu pea lava Iesu i le finagalo o lona Tamā, o lea e tatau foi ona faapena i tatou.

Na faaalia e isi failauga e toatolu na sosoo ai le faapefea ona aʻoaʻo e Ieova e ala i sauniga ma fonotaga. Tatou te maua aogā mai sauniga uma lava e lima a le faapotopotoga ma e lē tatau ona tuulafoaia se tasi o nei sauniga. E matuā tāua sauniga taitasi i lo tatou agaʻigaʻi i luma faaleagaga. E aʻoaʻoina foi i tatou e Ieova e ala i polokalama o a tatou fonotaga matagaluega, tauaofiaga itumalo, ma fonotaga o aso faapitoa. Ina ia maua aogā mai nei sauniuniga uma, e tatau lava ona tatou faalogologo ma le naunautai ona faatino lea o mea ua tatou aʻoaʻoina.

Na mulimuli mai ai i nei lauga faasolo le lauga “Faataulagaina mo le Suesuega Totino.” Ina ia maua se taimi mo lea mea, e tatau ona tatou utagia le fautuaga i le Efeso 5:15, 16 ina ia faatau mai le taimi mai mea e faaleai se tāua.

O se sini fetaui o lo tatou aʻoaʻoina o le gagana mamā o le tuuina atu ma le papatisoga. Sa faatāuaina lenei upu moni i le lauga “Papatisoga o i Latou o Ē Aʻoaʻoina i le Gagana Mamā.” O lenei gagana  ua na taʻitaʻiina atu le toatele i le tuuina atu ma le papatisoga. Ae peitai, pe a mavae lea, e tatau i lea tagata ona faaauau ona mulimuli pea i le faaaʻoaʻoga a Iesu e ala i le talaʻi atu ma le maelega o le tala lelei, ia ofu i le tagata fou, ma ia tumau pea ona vavae ese mai le lalolagi.

Meaʻai Aano Faaleagaga

Sa matuā fiafia foi le au usufono e mauaina meaʻai aano faaleagaga e faavae i le faataunuuga o tala faavaloaga. I le afiafi o le Aso Tofi, sa faia ai lauga e lua sa faavae mai i matua na aumaia mai le valoaga a Esekielu. Muamua, “O loo Gaoioi le Kariota Faalelagi a Ieova,” sa faamatalaina ai se gaoioiga o fesootaiga ofoofogia, mamalu, ma mataʻu ai o loo agaʻi atu i luma i se saoasaoa e pei o le uila emo. Ua na faaatagia le faalapotopotoga faalelagi a Ieova, lea o loo tietie ai le Atua ma i lena o loo ia taʻitaʻiina ai ma le alofa ana gaoioiga uma lava, i le faaaogāina o lea faalapotopotoga e tauaveina ana fuafuaga. Ua faaatagia e Esekielu le vaega totoe faauuina e le agaga, ae maise lava talu mai le 1919. Ae maise lava talu mai le 1935 sa aufaatasi atu ai ia i latou le “motu o tagata e toatele.”—Faaaliga 7:9.

O le lauga na sosoo mai ai o lona matua “Ia Ōgatasi ma le Faalapotopotoga Vaaia.” E lē fesiligia le ō faatasi o le faalapotopotoga vaaia a le Atua ma lana faalapotopotoga faalelagi pei se kariota. E pei ona sa faia e Esekielu, e tatau i auauna a Ieova i aso nei ona tauaveina ma le usiusitai lo latou tofiga faavaloaga e ui lava i mea faigata, le amusia, pe oo lava ina teena. O le ō faatasi e taʻitaʻiina atu ai i le tele o faamanuiaga i le taimi nei ma le ola e faavavau i le lalolagi fou a le Atua ua matuā vave lava ona oo mai.

I le taeao o le Aso Faraile, sa saunia ai foi meaʻai aano faaleagaga e ala i lauga e tolu sa faavae mai i le Isaia mataupu e 28. O le lauga muamua o nei lauga na faaalia ai i ni faaupuga malolosi faapea o tagata onanā faaleagaga o Isaraelu anamua ma Iuta na faaatagia ai tagata onanā faaleagaga o Kerisinetoma. Ma e pei ona tofo i ai na uluai tagata onanā o Isaraelu i faamasinoga e lē fiafia ai a Ieova, o le a faapena foi na Kerisinetoma.

O le lauga na sosoo mai ai, o le matua “Lo Latou Malu—O se Pepelo!,” sa aumaia ai se lapataiga matuā malosi: E pei lava ona faamaonia le lē taulau o le faalagolago atu o Iuta anamua ia Aikupito e avea o so latou malu, o le a faapena foi le faalagolago atu o Kerisinetoma i malosi faapolotiki o o tatou aso. O le lauga lona tolu i le Isaia mataupu e 28, “Ia Lapatai atu Pea e Uiga i le Galuega Uiga Ese a Ieova,” sa tuusaʻo atu i tagata o le Atua. O le mea o le a faia e Ieova ia Kerisinetoma ua tonu ai ona taʻua e uiga ese, auā o le a oo mai o se mea e matuā ofo ai o ia. I aso nei, ua avea ai Ieova o le pale o le mamalu i se au toaitiiti o Kerisiano faauuina ma i le sili atu i le fa miliona o “isi mamoe.” (Ioane 10:16) Sa faaiʻu e le failauga i upu e faagaeeina ai: “Tau ina ia avea lo tatou maelega, maumauai, ma le faamaoni ia saosaolaumea i le viiga e faavavau o lo tatou Atua, o Ieova!”

O le Tautala i le Gagana Mamā o Lona Uiga o le Faaalia o le Alofa Faaleuso

I le afiafi o le Aso Lulu, sa oo ai i loto o le au usufono lea matua faapea o le tautala i le gagana mamā e uiga foi i le “Manatunatu i Tamaiti ua Mātua Oti ma Fafine ua Oti a Latou Tane i o Latou Puapuaga.” O tamaiti e leai ni tamā e mafai ona fesoasoania e ala i le mauaina o toleniga totino. E mafai ona tatou faaalia le manatunatu mamafa i fafine ua oti a latou tane e ala i upu agalelei e faalaeiau ai, e ala i le faaaofia o i latou i a tatou gaoioiga faa-Kerisiano ma faatasitasiga e faia ai ni nai faafiafiaga, ma e ala i le avatua ia i latou o le fesoasoani i mea faitino ma pe afai ua tatau ai ma o loo  latou manaomia moni. Sa faaalia i le faatalanoaina o nisi pe ua faapefea ona faia o nei mea.

I le afiafi o le Aso Tofi, na faaalia ai foi i se isi lauga faamafanafana loto “Le Auala e Fetausiai ai Kerisiano le Tasi i le Isi.” E iai se talaaga lelei o Molimau a Ieova i le fetausiai o le tasi i le isi, ae maise lava pe a tutupu mai mala e pei o afā ma mafuie, ma pe a iai foi se manaoga e tusi atu i tagata o le malo, ma pe a iai foi ni manaoga i uso ma tuafafine i totonu lava o le faapotopotoga. Ae pe a mapuna aʻe faigata ona o le lē lelei atoatoa faaletagata, e ao ona tatou faatatauina mataupu silisili o loo aafia i le fautuaga a Iesu i le Mataio 5:23, 24 ma le 18:15-17. Ae maise lava pe a oo mai i faatulagaga tau i pisinisi i le va o uso e manaomia ona iai le ava o le tasi i le tasi, ma le faaalia o le fetausiai ina ia lē faaaogā ai e le pule po o le tagata faigaluega ni avanoa manatu faapito ona o le faiā faaleagaga.

O le Tautala i le Gagana Mamā o Lona Uiga ia Mataala i a Tatou Amio

O le manaoga ia leoleo a tatou amio sa toe faamamafaina mai. I lea, sa talanoa le uluai failauga i le afiafi o le Aso Lua i le matua “Faalogo ma Tausi i le Afioga a le Atua.” Sa ia faaalia ai faapea e lua ni mafuaaga autū e ala ai ona tatou ō mai i tauaofiaga: ina ia ave i fale le poto saʻo lelei ma ia uunaia i tatou ia gaoioi e faatatau i lena poto.

O le uluai lauga i le taeao o le Aso Lulu sa laga ai se fesili e faia ai se iloiloina e faapea “Sa ʻInoino Keriso i le Lē Taupulea’—Pe o Faapea Oe?” E lē lava le alofa i le amiotonu. E tatau foi ona tatou inoino i le amioleaga ina ia maua se loto fuatiaifo lelei, ia tausisia se faiā lelei ma Ieova, ia alofia ai le aumaia o le faalumaina i lona suafa, ma alofia ai le seleseleina mai o fua o le lē taupulea—le iʻuvale ma le oti.

Sa fesootai lelei lava lena matua ma le isi lauga na sosoo ai, o le matua “Ia Tetee atu i Tala o le Vavau Faalelalolagi, Ia Tuliloa Mea Moni o le Malo.” Sa tuliloa e Satani, Eva, ma agelu paʻūū uma ni faanaunauga ua na o ni mafaufauga ua iʻu ai i lo latou malaia. O faanaunauga faalelalolagi ua na o ni mafaufauga, o loo aofia ai miti i le fia mauoa faaletino po o i latou o loo faia tulaga e lē faalenatura ma amio lē mamā, ua iʻu ai i le lē mautonu ma a lē o lea ua faia ai se agasala matuiā. Ina ia faafetaiaia ma le manuia nei faanaunauga ua na o ni mafaufauga, e tatau ona tatou tausisi i mea moni o le Malo e ala i le suesue, tatalo, auai i sauniga, ma le faiva i le lautele.

Ina ia ola i ni olaga saʻo faa-Kerisiano, e tatau foi ona tatou utagia le fautuaga na aumaia i le lauga i le afiafi o le Aso Lulu “Kerisiano e—Ia Ola e Tusa o Tupe ua E Maua.” O le lē taulau ona faia o lenei mea ua oo ai i ni uiga e afaina ai i le faaletino ma le faaleagaga. O le auala i le atamai o le pulea lea o moomooga manatu faapito o se tasi e ala i le lē oo atu i le faia o ni aitalafu e lē manaomia ma e ala i le fuafuaina lelei o le tupe faaalu ma tupe maua ma pipii i ai. I taimi uma lava e manaomia ona tatou atiina aʻe le tuutoina i le Atua. Faatasi ai ma lo tatou lotomalie i mea ua maua, o le auala lenei e maua ai mea e sili ona tele.—1 Timoteo 6:6-8.

O le tāua o le leoleoina o a tatou aumea sa faamatilatila i le lauga i le Aso Lua “Pe o Au Uo o Uo Na a Ieova?” O a tatou uo e ao ona avea o Kerisiano o ē e oofu i uiga e pei o Keriso ma o loo maelega i le galuega talaʻi. O tagata e masani ma i tatou i le lalolagi e lē o ni uo a le Atua, ma e lē mafai ona tatou auaufaatasi ma i latou e aunoa ma le afaina ai o i tatou lava. E oo lava i totonu o le faapotopotoga, e tatau ona tatou filifili lelei pe afai tatou te mananao ia atiina aʻe moni ai i a tatou aumea.

O le fautuaga auiluma e faatatau i amio sa matuā faamamafaina e ala i se tala faaonaponei. O lona matua “Faafetaiai ma Gaoioiga Faaʻoleʻole a le Tiapolo.”

O Fautuaga Faale-Gagana Mamā mo Aiga

Sa sili ona manaomia le lauga i le Aso Lulu “Mātua e—Ia Faataunuu a Outou Avega Tauave!” E tatau i mātua lava latou ona iloa le finagalo o le Atua ma ia faia i le mea sili e tusa ma lo latou tomai. E tatau foi ona latou tamau le Afioga a le Atua i totonu o a latou fanau. Ae lē gata i lea, e lē lava le na o le ave o tamaiti i sauniga faa-Kerisiano ma le faiva i le fanua. E tatau ona aʻoaʻoina i latou ia alolofa ia Ieova ma ia iloa le atamai aogā o le faia o mea faaleatua.

Ona sosoo ai lea ma le faasologa o lauga i le matua “Le Aiga i o Tatou Aso.” Sa faaalia e le failauga muamua faapea o le aiga na amata e le  Atua. E tatau i tamā ona faia ni fesootaiga lelei e tusa ai ma mataupu faaleagaga. E tatau i tinā ona avea o ni ē faia ni aiga lelei, ma e tatau i fanau ona faaalia le faaaloalo mo Ieova e ala i le felagolagomai ma o latou mātua.

Na faaalia e le failauga na sosoo mai faapea o le aiga “Ua Osofaia e Fili.” Ua maua e omiga tau tamaoaiga lo latou iʻuga. Ua faatumuina le fale faigaluega i tofotofoga e faia le mea sese, ma o le maua o alāmanuia fou ua aumaia ai faiga sauā, feusuaiga e lē faatagaina, ma le manao tele i mea faitino. E tatau ona vave amata le aʻoaʻiga, ma e manaomia le matuā filigā ina ia manumalo ai i taaʻiga faalelalolagi. E tatau ona faaaogā lelei mea faigaluega faatiokarate ua saunia e le Sosaiete o le Olo Matamata.

O le lauga na sosoo ai sa feagai ma le ‘Faasaoina atu i le Lalolagi Fou’ o le aiga, sa faamamafa atili ai le matuiā o le avega tauave o loo i mātua. O le toleniina o le fanau e tatau ona faia ma le matuā naunautai. Sa avatua ai foi se fautuaga lelei e uiga i suesuega faale-Tusi Paia i aiga ma le mea e suesueina, e faia nei mea uma ma le faamoemoe ina ia paʻia loto o le fanau. Ua na o lea lava le faamoemoe e mafai ona faasaoina ai mātua ma fanau i le lalolagi fou e avea o se aiga.

O se fautuaga lelei e faalaeiau ai mo se tulaga faaleaiga lea ua toatele Molimau e oo i ai, o le lauga “Faafetaiai i Totonu o le Aiga Fevaevaeai.” O i latou o loo iai i na tulaga sa fautuaina ina ia aua lava neʻi fiu i le taofia pea o le faamoemoe faapea i se aso, o le a oo ai ina avea le lē talitonu ma sē talitonu. Ia faaalu se taimi ma se paaga lē talitonu ma ia mautinoa ua e ausia mea uma lava e manaomia mai se paaga Kerisiano. E mafai ona e maua se fesoasoani mai toeaina pe atonu e mai i isi i aiga fevaevaeai.

Tautala atu le Gagana Mamā i Isi

Sa sili ona fetaui le tele o le uaʻi na tuuina atu i lo tatou faaaogāina o avanoa e aʻoaʻo ai le gagana mamā i isi. I lea, i le taeao o le Aso Lulu, sa faalogologo ai le au usufono i le lauga “Faaaogā ma le Atamai Lou Taimi Tāua.” I le faia o lena mea e tatau ona tatou faatutū ni sini o mea e faamuamua, e ō gatasi ai ma le Mataio 6:33, lea e faapea mai: “A ia outou muai saili le malo o le Atua ma lana amiotonu.” E aofia ai i lena le faataatiaese o se taimi mo suesuega totino faale-Tusi Paia, auai i sauniga uma, ma ia auai e lē aunoa i le faiva i le fanua. E manaomia ai i lenei mea lo tatou faatau mai o le taimi mai mea e faaleai sona tāua e ui lava o ni gaoioiga e faafiafia ai. Sa faaalia i ni nai faatalanoaga le auala ua faia ai e nisi lenei mea.

E lē tatau lava ona tatou faagaloina o i tatou o Molimau a Ieova. I le afiafi o le Aso Tofi, e ala i ni nai faataʻitaʻiga na faia, na matuā oo ifo ai i le loto lena lava manatu autū i lalo o le matua “Ia Tautala Pea i le Gagana Mamā i Mea Uma.” Sa faaalia ai i nei faataʻitaʻiga le faapefea ona faia o lenei mea i le molimau atu i auala, i le molimau atu lē fuafuaina, ma e ala i le faaaogāina o le telefoni. O le alofa lē manatu faapito mo Ieova le Atua ma o tatou tuaoi o le a uunaia ai i tatou e tautala atu i le gagana mamā i avanoa uma lava.

Sa fesootai vavalalata lenei matua ma le isi lauga na sosoo ai, “Faamanuiaga o i Latou o Ē Lē Faavaivai.” I se eseesega e matuā faateʻia ai ma Kerisinetoma, ua tu matilatila ai i le lalolagi aoao le faalapotopotoga e aʻoaʻoina ai a Molimau a Ieova. E tatau lava ia i tatou taitoatasi ona tetee atu i omiga uma, e pei o teteega a malo, le salalau atu o le feitagaʻi i lanu, ma faafitauli tau tamaoaiga. O faataʻitaʻiga na faavae mai le tusi Reasoning From the Scriptures na faaalia ai le auala e foia ai nei omiga.

O se isi mea sa faalaeiauina ai le maelega i le talaʻiga, o le tala faale-Tusi Paia Faia le Finagalo o le Atua ma le Maelega. Sa faaalia ai  maeu le maelega o Ieu mo le suafa o Ieova ma maeu le tāua mo i tatou i le faaalia o le lototele faapena ma le maelega mo le galuega a le Atua.

Lomiga Fou na Tatalaina i le Tauaofiaga

Sa iai ni lomiga mataʻina se lua i le faa-Siamani ma le faa-Peretania na tatalaina i le tauaofiaga. O le uluai lomiga o nei lomiga sa faailoa mai e fesootaʻi atu ma le lauga o lona matua “Faasaoina Lou Ola e Ala i le Toto—Faapefea?” Sa uluai taʻua e le failauga e uiga i tulaga lamatia e fesootai ma tuiga toto. Sa ia taʻua faapea e tele lava mea e mafai ona fesuiai ma le toto e toe maua mai ai le toto ua leiloa. Ae e faamamao ese Molimau a Ieova mai le toto e lē ona e lē lelei mo le soifua malōlōina ae talu ai ona e lē o se mea paia pe afai e talia. Latou te lē faamamao ese ona e faapea atonu e oona le toto, ae ona e tautele i le Atua. O le toto na te faasaoina moni le ola, o le toto togiola lea o Iesu Keriso. I le faaiʻuga sa faafiafiaina ai e le failauga lana au faalogologo uma e ala i le faaalia mai o le polosiua e 32 ona itulau E Mafai Faapefea e le Toto ona Faasaoina Lou Ola?

O le lomiga tāua lona lua na tatalaina sa fesootai atu ma le lauga “Saili mo Ieova, Outou Nuu E.” I le tele pe itiiti, e lē o saili lava tagata i le Atua. O le iai o le tele o lotu eseese ua faataʻitaʻia ai le pagā o le matuā taʻitaʻiseseina o le sailiga a le tagata o loo faia mo le Atua talu ai ua ia faaleamanaia le Afioga a le Atua. E pei ona vaaia i lipoti o a tatou Faamanatuga i tausaga taitasi, e faitau miliona e manaomia ona fesoasoani i ai ina ia faia ni o latou tulaga mo Ieova. Ua faaalia i le Isaia 55:6, 7 faapea e moni o Ieova o le Atua alofa ma le alofa fua, o loo nofo sauni e “matuā faamagaloina.” I le avea o ni ana Molimau, ua tuuina mai ai ia i tatou le gagana mamā ina ia mafai ai ona tatou fesoasoani atu i isi ia au faatasi ma i tatou e auauna soosoo tauʻau ia Ieova.

I aso nei, ua fesagaʻi ai tagata o Ieova ma se luʻi talu ai o le siitia o le anoanoai o le faitau aofai o tagata. O le iʻuga la, atonu ua iai tagata o ituaiga eseese uma lava o lotu i lo tatou oganuu. Ina ia mafai la ona tatou fesoasoani atu i tagata lotu Hinitu, Puta, Sinito, ma i latou i le tele o isi lotu, ua saunia ai e le Sosaiete le tusi matagofie e 384 ona itulau Mankind’s Search for God. Ua ia tuuina mai ma le pule aʻoaʻoga faavae a lotu autū i fafo atu o Kerisinetoma. Ae ua na faaalia foi le faamaumauga a lotu sese i totonu o Kerisinetoma. E mafai e lenei tusi ona tatala le auala e amataina ai ni suesuega faale-Tusi Paia ma tagata o loo iai i lotu eseese e tele.

Lauga Lautele ma Faamatalaga Faaiʻu

O le “Ia Autasia e Ala i le Gagana Mamā” o le matua lena o le lauga lautele i le Aso Faraile. Sa faaalia e le failauga faapea e ui lava e tolu afe gagana ua fai ma ‘pa pupuni i le autasi, ae o le gagana mamā ua avea ma mana malosi e aufaatasia ai. Ua na leoleomaluina Molimau a Ieova faasaga i mea sese faa-Papelonia, ua na aʻoaʻoina i latou ia faaaloalo i le paia o le ola ma le toto, ma ua fesoasoani ia i latou e ola ai e tusa ma mataupu silisili a le Tusi Paia na o loo latou maua ai aogā faaleagaga ma le faaletino. E manaomia e tagata uma ona manatu mamafa e uiga i le aʻoaʻoina ma tautala i le gagana mamā, auā e na o i latou e faia faapea o le a faasaoina ia Amaketo. E leai se taimi e toe maumauina i le utagia o le fautuaga i le Sefanaia 2:1-3.

Ina ua uma ni fautuaga lelei faale-Tusi Paia i le manaoga “Ia Mataala i le Tatalo,” ona sosoo ai lea ma upu faaiʻu sa faavae mai i le matua “Savavali e Tusa ma le Gagana Mamā.” O le aofaiga o i latou ua savavali e tusa ma le gagana mamā o le mea moni o loo faateleina. Ma e tusa ai ma le gagana mamā, na faaalia lea e i latou na auai i nei tauaofiaga i lo latou tumamā, maopoopo, ma le ōgatasi faalefaalapotopotoga. O lomiga fou na tatalaina o le a fesoasoani i Molimau a Ieova uma lava e faasalalau atu ai ma le matuā uigā le gagana mamā.

Sa faamanatu atu e le failauga mulimuli o le tauaofiaga i tagata uma lava le manaomia ona tumau. Sa ia faailoa mai faapea i le avea o se iʻuga o lenei tauaofiaga, e ao ona faamalosia tagata uma i lo latou maumauai e agaʻi i luma. Ona ia faaiʻu mai lea i upu nei: “Tau ina ia tatou faaauau pea ona savavali e tusa ma le gagana mamā ua tuuina mai e le Atua ina ia mafai ai ona tatou faamamaluina lo tatou Tamā faalelagi alofa, o Ieova le Atua, nei ma e oo i le faavavau faavavau lava!”

[Pusa i le itulau 12]

O le tumutumuga o i latou na auai i le tauaofiaga i Perelini i Sisifo e 44,532, ma le 1,018 na papatisoina. E 19 minute na faaalu e sui papatiso e laina atu ai i fafo o le Malae Taalo o le Olympia, ma i lea taimi sa faaauau pea ona iai se pati tele. Sa iai se vaega faapitoa mo sui usufono e tautatala i le gagana faa-Peretania. Pe tusa ma le 6,000 o i latou na faalogo i le polokalama atoa i a latou lava gagana. I lenei tauaofiaga, sa iai foi le 4,500 mai Polani; i itula e lua i aoauli, sa faia ai e sui o le Vaega Pule ni lauga pupuu ina ia aogā mo i latou mai Polani.

[Ata i le itulau 10, 11]

1. Malae Taalo o le Olympia, i Perelini i Sisifo

2. Polokalama lomia o le tauaofiaga

3. E luaselau pasi na aumaia le au usufono mai Siamani i Sasae

4. Sa fiafia tagata Polani na auai i le tauaofiaga e taliaina lomiga na tatalaina

5. O teuteuga o fugalaau na pupula matagofie mai ai le vaaiga

6. O A. D. Schroeder, o se tasi o sui o le Vaega Pule i le polokalama i Perelini i Sisifo