Ia Āva i Tagata Uma
Ia Āva i Tagata Uma
“Ia outou ava i tagata uma; . . . ia matatau i le Atua; ia ava i le tupu.”—1 PETERU 2:17.
1. (a) O ai e ese mai ai i le Atua ma Keriso e tatau ona āva i ai? (e) I ā vaipanoa e tatau ai i tagata ona faaalia le āva e tusa ai ma le 1 Peteru 2:17?
UA TATOU iloa ua ia i tatou le avega tauave e tuuina atu le āva ia Ieova le Atua ma ia Iesu Keriso. O lena le mea saʻo, poto, ma le agalelei e tatau ona faia. Peitai ua faaalia foi e le Afioga a le Atua faapea e ao foi ona tatou āva i uso a tagata. “Ia outou ava i tagata uma,” ua taʻu mai ai ia i tatou. (1 Peteru 2:17) Ona o loo faaiʻu mai lenei fuaiupu i se faatonuga, “ia ava i le tupu,” ua faauigaina la faapea o le āva, e ao ona tuuina atu ia i latou o ē ua tatau ona maua lea āva ona o o latou tulaga. O ai la e ao ona tatou āva i ai? O le aofaiga o i latou e ao ona āva i ai atonu e aofia ai le sili atu na i lo le mea atonu o manatu ai nisi. Atonu tatou te faapea atu, e iai vaipanoa e fa e mafai ai ona tatou faaalia le āva i isi tagata.
Ia Āva i Pule Faapolotiki
2. E faapefea ona tatou iloa faapea o “tupu” na taʻua i le 1 Peteru 2:17 o loo faasino atu i so o se tupu lava faaletagata po o se pule faapolotiki?
2 O le uluai vala o nei vaipanoa ua fesootai atu lea ma malo faalelalolagi. E manaomia ona tatou āva i pule faapolotiki. Ina ua fautua mai Peteru: “Ia ava i le tupu,” aiseā ua tatou fai atu ai sa iai i le mafaufau o Peteru pule faapolotiki? Auā o loo ia tautala i le tulaga i fafo atu o le faapotopotoga Kerisiano. Na seʻi faatoʻā uma lava ona ia fai mai: “Ia outou usiusitai atu i [tofiga faaletagata uma]; po o le tupu ina ua sili; po o alii, o i latou ua aauina mai e ia.” Ia matau foi, faapea, sa tuu e Peteru le Atua i se faaeseesega ma “le tupu,” i le faapea mai: “Ia matatau i le Atua; ia ava i le tupu.” (1 Peteru 2:13, 14) O “le tupu” la lea ua uunaia mai i tatou e Peteru ia āva i ai, ua faasino atu lea i tupu faaletagata ma pule faapolotiki.
3. O ai “faipule silisili,” ma o le ā ua ono ma tatau ia i latou?
3 Ua poloai mai foi faapena le aposetolo o Paulo: “Ia usiusitai tagata uma i faipule silisili.” O nei “faipule silisili” e lē o Ieova le Atua po o Iesu Keriso, ae o i latou ia o pule faapolotiki, o tagata i ofisa faalemalo. I le iai o i latou nei i lona mafaufau, ua faaauau ai ona faapea mai Paulo: “Ia avatu i tagata uma lava a latou mea; . . . o le faaaloalo i e ua tatau i ai le faaaloalo.” Ioe, o i latou na ua faatagaina e le Atua e faatinoina pulega faapolotiki ua ono ma tatau ona āva i ai.—Roma 13:1, 7.
4. (a) E mafai faapefea ona faaalia le āva i pule faapolotiki? (e) O le ā le faaaʻoaʻoga na faataatia e le aposetolo o Paulo i le faaalia o le āva i ē pule?
4 E faapefea ona tatou faaalia le āva i pule faapolotiki? O le tasi o auala o le feutagai lea ma i latou ma le matuā faaaloalo. (Faatusatusa 1 Peteru 3:15.) Ma ona o o latou tulaga, ua tatau ai ona faaaloalo ia i latou e tusa lava pe atonu o ni tagata leaga. Sa faamatalaina e le tusitala Roma o talafaasolopito o Tacitus le Kovana o Filiki o se tagata o lē na “manatu na te mafaia so o se mea leaga e aunoa ma se faasalaga.” Ae peitai sa amata e Paulo lana tetee atu i luma o Filiki i se auala faaaloalo. Sa faapena foi ona taʻu atu ma le faaaloalo e Paulo i le Tupu o Herota Akeripa II, “Ou te manatu ou te manuia ina ua ou faatonuina atu ia aʻu nei i ou luma,” e ui lava sa iloa e Paulo faapea sa ola mataifale Akeripa. Sa faapena foi ona faaalia e Paulo le āva i le Kovana o Feso, i le taʻua o ia “[Lau Afioga Mamalu e,]” e ui lava o Feso o sē sa tapuai atu i tupua.—Galuega 24:10; 26:2, 3, 24, 25, NW.
5. O le ā le isi auala atili e faaalia ai le āva i faipule faalemalo, ma e faapefea ona faataatia e Molimau a Ieova se faaaʻoaʻoga lelei i le faia o lenei mea?
5 O le isi auala e faaalia ai lo tatou āva i tagata i ofisa o le malo ua faaalia e le aposetolo o Paulo ina o ia tusi e uiga i le tuuina atu i pule faalemalo o mea e tatau ona latou maua. Sa ia faapea mai ia avatu “le taulaga i e ua tatau i ai le taulaga; o le telo i e ua tatau i ai le telo.” (Roma 13:7) E tuuina atu e Molimau a Ieova na mea e tatau ai e tusa lava po o le ā le atunuu o le lalolagi o latou nonofo ai. I Italia sa matauina ai e le nusipepa o le La Stampa e faapea: “O i latou o ni tagatānuu sili ona faamaoni e mafai e so o se tasi ona moomoo ia maua: latou te lē aloese mai le totogia o lafoga pe saili ina ia faasese tulafono faigata ina ia maua ai ni aogā mo i latou.” Ma sa matauina foi e le nusipepa The Post o Palm Beach, Florida, i le Iunaite Setete e faatatau i Molimau a Ieova: “Latou te totogi lafoga. O i latou o nisi o tagatānuu aupito sili ona faamaoni i le Republic.”
Faaalia le Āva i Pule o Galuega
6. O ai isi na fai mai aposetolo o Paulo ma Peteru e ao ona tuuina atu i ai le āva?
6 O le vaega lona lua e tatau ai le āva o nofoaga ia o a tatou galuega. O loo faamamafa uma mai e aposetolo o Peteru ma Paulo le tāua o le āva o Kerisiano i ē ua pule ia i latou i se faiā faalegaluega. Na tusi atu Paulo: “O pologa uma o e o i lalo o le amo, ia latou manatu e tatau ona ava lava i o latou lava matai, ina neʻi upuleagaina le suafa o le Atua ma lana mataupu. A o i latou ua i ai matai faatuatua, aua neʻi latou taʻufaatauvaaina i latou, auā o uso i latou; a ia atili ona auauna i ai.” Ma na faapea mai Peteru: “O outou auauna, ia outou usiusitai ma le mataʻu uma i o outou matai, aua neʻi gata ai i e agalelei ma e agamalu, a o e faamalie gatā foi.”—1 Timoteo 6:1, 2; 1 Peteru 2:18, NW; Efeso 6:5; Kolose 3:22, 23.
7. (a) Ua faapefea i le fautuaga a le Tusi Paia mo “pologa” ia faaalia le āva i o latou “matai” ona faatatauina ma le tonu i aso nei? (e) O le ā e ao i tagata faigaluega o ni Kerisiano o ē e iai ni o latou pule faigaluega o ni Kerisiano ona faaeteete ia mataulia?
7 E moni ua lē o taatele faiga faapologa i aso nei. Ae o mataupu silisili ua pulea ai Kerisiano i se faiā o le tausia e se matai o se pologa, o loo aogā i se faiā a le pule ma se tagata faigaluega. I lea, ua iai i tagata faigaluega Kerisiano le tiute tauave e faaalia le āva, e oo lava i pule o galuega o ē faigata ona faamalie. Ma ae faapefea pe afai o le pule o le galuega o se uso talitonu? Na i lo le faatalitalia o se faiga lelei po o se tausiga faapitoa ona o lea faiā, e ao i le tagata faigaluega ona auauna i lona pule Kerisiano ma le matuā āva lava, aua lava neʻi ona faaaogāina o ia i so o se auala.
Āva i Totonu o le Liʻo o le Aiga
8, 9. (a) O ai e manaomia ona āva i ai tamaiti? (e) Aiseā e ao ai i tamaiti ona faaalia lea āva, ma e mafai faapefea ona latou faaalia lea āva?
8 O le vaipanoa lona tolu e tatau ai le āva, o totonu lea o le liʻo faaleaiga. Mo se faaaʻoaʻoga, o tamaiti, ua i lalo o se tiute tauave ia āva i o latou mātua. E lē gata o le mea lenei e manaomia e le Tulafono na tuuina atu ia Mose ae o se avega tauave foi mo Kerisiano. Na tusi le aposetolo o Paulo: “O outou le fanau, ia outou faalogo i o outou mātua i le Alii, auā o le mea tonu lava lea. Ia e ava i lou tamā ma lou tinā.”—Efeso 6:1, 2; Esoto 20:12.
9 Aiseā e ao ai ona āva fanau i o latou mātua? E ao ona latou āva i o latou mātua ona o le pule na tuuina mai e le Atua i mātua, ae faapea foi ma mea na faia e o latou mātua, i le fanauina o i latou, fafaga ma tausi i latou mai lava i lo latou laiti ma agaʻi mai ai. E ao faapefea i fanau ona āva i o latou mātua? E ao ona latou faia o lenei mea ae maise lava e ala i lo latou usiusitai ma gauaʻi atu ia i latou. (Faataoto 23:22, 25, 26; Kolose 3:20) O le tuuina atu o lea āva atonu e manaomia ai faapea o tamaiti ua matutua e ao ona avatu le lagolagosua faaopoopo, i le faaletino faapea foi ma le faaleagaga i o latou mātua ua matutua po o mātua o mātua. O lenei mea e manaomia ona faapaleni ma le atamai faatasi ma isi tiute tauave, e pei o le tausia o le fanau a le tagata lava ia ma auai atoatoa i aufaatasiga Kerisiano ma le faiva i le fanua.—Efeso 5:15-17; 1 Timoteo 5:8; 1 Ioane 3:17.
10. Ua iai i avā le tiute tauave e faaalia ai le āva ia te ai, ma i ā auala e mafai ai ona latou faia o lenei mea?
10 Peitai e lē na o fanau o loo iai i totonu o le aiga ua iai le tiute tauave e tuuina atu le āva i isi. O avā foi e tatau ona tuuina atu le āva i a latou tane. Sa faapea mai foi le aposetolo o Paulo “o le fafine foi ia faaaloalo loloto i lana tane.” (Efeso 5:33, NW; 1 Peteru 3:1 2) O le faaalia o le “faaaloalo loloto” i tane e mautinoa e aafia ai le tuuina atu ia i latou o le āva. Sa āva Sara i lana tane, o Aperaamo, ina ua ia taʻua o ia o le “alii.” (1 Peteru 3:6) O lea avā, ia faaaʻoaʻo ia Sara. Ia avatu i a outou tane le āva e ala i le talia o a latou faaiʻuga ma ia galulue ina ia taulau. E ala i le faia o mea uma tou te mafaia e fasoasoani ai i a outou tane e ave a latou avega, na i lo le faaopoopo atu o le mamafa i nei avega, ua outou faaalia ai le āva ia i latou.
11. E faatatau i le faaalia o le āva, o le ā le tiute tauave ua iai i tane, ma aiseā?
11 Ae faapefea tane? Ua faatonuina i latou i le Afioga a le Atua: “Ia faapea outou tane, ia nonofo faatasi ma [a outou avā] ma le poto, ia ava i le avā, auā o le ipu ia ua sili ona vaivai ia te oe, mona ua tofia faatasi i le ola e foaifuaina mai, neʻi faalavelaveina a outou tatalo.” (1 Peteru 3:7) O lena mea e mautinoa le ao ona mafaufau i ai tane uma. E peiseai o loo tauaveina e le āva se faailoga faapea “E tautele. E mataʻetaʻe. Ia taulimaina ma le faaeteete! Ia tuuina i ai le āva!” O lea ia manatua e tane lena mea faapea afai latou te lē avatu i a latou avā le āva e ala i le faaalia o le manatunatu e tatau ai ia i latou, o le a latou faaleagaina la lo latou faiā ma Ieova le Atua, o le a lē faafofogaina foi a latou tatalo. E moni, o se mea matuā aogā mo tagata o le aiga ona feāvatai i le va o le tasi ma le isi.
I le Faapotopotoga
12. (a) O ai e iai le tiute tauave e faaalia le āva i le faapotopotoga? (e) Na faapefea ona faaalia e Iesu faapea o se mea tatau le taliaina o le āva?
12 O loo iai foi le tiute tauave e tatau i tagata uma lava ona faaalia ai le āva i totonu o le faapotopotoga Kerisiano. Ua fautuaina i tatou: “Ia tausolomua ona ava o le tasi i le tasi.” (Roma 12:10) Sa faaalia e Iesu i se tasi o ana tala faatusa faapea o le mea saʻo le taliaina o le āva. Na fetalai o ia faapea, afai e valaaulia i tatou i se faigaʻai, e ao ona tatou nonofo i le nofoaga sili ona maulalo, auā i lea, o le a fai mai ai lē o tali malo tatou te ō atu i le nofoaga e sili ona maualuga, ona tatou maua ai lea o le āva i luma o o tatou uso a malo. (Luka 14:10) O lenei, ona e talisapaia e i tatou uma le tuuina mai o le āva, pe lē ao ai ea la ona ia i tatou le faalogona mafana ma le āva tatau o le tasi i le isi? E mafai faapefea ona tatou faia o lenei mea?
13. O ā nisi o auala e mafai ai ona tatou faaalia le āva i isi i totonu o le faapotopotoga?
13 O faailoaga mai o le talisapaia mo se galuega ua lelei ona faia ua tutusa ma le tuuina atu o le āva. O lea e mafai ona tatou feāvatai i le avatua o le faamalo, pe atonu mo se lauga po o se tali ua tuuina mai e se tasi i le faapotopotoga. E faaopoopo atu i ai, e mafai ona tatou feāvatai e ala i le fusia o i tatou i le loto maulalo agaʻi i o tatou uso ma tuafafine Kerisiano, e ala i le faaaloalo ia i latou. (1 Peteru 5:5) E ala i lea, ua tatou faatinoina ai faapea e tāua tele i latou ia i tatou o ni uso auauna faamamaluina a Ieova le Atua.
14. (a) E mafai faapefea e uso i le faapotopotoga ona tuuina atu le āva e tatau ai i tuafafine? (e) O le ā ua faaalia ai faapea o le faia o meaalofa o se tasi lea o auala e tuuina atu ai le āva?
14 Sa fautuaina e le aposetolo o Paulo Timoteo talavou ina ia faia tuafafine Kerisiano matutua e pei o tinā ma ē talavou e pei o ni tuafafine faaletino, “ma ia le gaoiā lava.” Ioe, afai e faaeteete uso ina ia aua le soona faia le saolotoga i se tulaga e lē tatau ma o latou tuafafine Kerisiano e ala i le faaalia o le faamanaia, ua latou tuuina atu ai ia i latou le āva. Sa faaauau ona tusi Paulo: “Ia ava i fafine ua oti a latou tane, o e ua ausage lava.” O le tasi o auala e āva ai i se fafine ua oti lana tane o iai se manaomia e ala lea i le āva i ai i mea faitino. Ae ina ia taʻuagavaaina mo lenei mea, e tatau ona “taʻuleleia foi ona o ana galuega lelei.” (1 Timoteo 5:2-10) E tusa ai ma meaalofa faitino, sa tusi atu ai Luka faatatau i tagata i le motu o Melita: “Ua latou alolofa mai foi ia i matou i mea lelei e tele; ua oo ina a matou tuuvaa atu, ua faaee e i latou i luga o le vaa o mea e aoga.” (Galuega 28:10) O lea ua mafai ai ona faaalia le āva i se tasi e ala i le saunia o mea faitino.
15. (a) E agaʻi ia te ai ua iai ia i tatou se tiute tauave faapitoa e faaalia i ai le āva? (e) O le ā le tasi o auala e mafai ai ona tatou faaalia le āva ia i latou o taʻimua?
15 I le faaauauina o lana tusi ia Timoteo, ua tusi atu ai Paulo: “O toeaina o e pule lelei, ia taʻuaogaina i latou ona faateleina atu i ai o le mamalu, a e faasili i e galulue i le upu atoa ma le aʻoaʻo atu.” (1 Timoteo 5:17) I ā auala e mafai ai ona tatou āva i toeaina, po o ovasia? Na faapea mai Paulo: “Ia outou faaaʻoaʻo mai ia te au, pei o aʻu ia Keriso.” (1 Korinito 11:1) Pe a tatou utagia upu a Paulo ina ia faaaʻoaʻo ia te ia, ua tatou tuuina atu ai ia te ia le āva. E faatatau foi lenei mea ia i latou o ē o loo taʻimua ia i tatou i aso nei. I le tele o lo tatou faaaʻoaʻo ia i latou e ala i le mulimuli i la latou faaaʻoaʻoga, o le a tatou avatu ai le āva ia i latou.
16. O ā auala faaopoopo e mafai ai ona faaalia le āva ia i latou o taʻimua?
16 O se isi auala tatou te faaalia ai le āva i ovasia e ala lea i le utagia o le apoapoaiga: “Ia outou usiusitai i o outou taʻitaʻi ma outou gauai i ai; auā o loo leoleo i latou mo o outou agaga, latou te tala atu le tala i ai.” (Eperu 13:17) I le auala lava lea e tasi e āva ai fanau i o latou mātua e ala i lo latou usiusitai ia i latou, ia faapea ai foi i tatou ona āva ia i latou o loo taʻimua ia i tatou e ala i le usiusitai ma gauai atu ia i latou. Ma a o tuuina atu le āva ia Paulo ma ana aumea e ala i meaalofa i mea faitino mai na tagata agalelei i Melita, e toatele sui femalagaai o le Sosaiete ua faapena foi ona tuuina atu i ai le āva mai lea taimi i lea taimi. Ae o le mea moni, e lē tatau lava ona latou aisi pe talosaga atu mo na meaalofa pe fai atu faapea o le a talisapaia i latou pe faapea o loo manaomia i latou.
17. O le ā le tiute tauave o ia i latou ua iai faaeaga o le avea ma ovasia e tusa ai ma le faaalia o le āva?
17 I le isi itu, o i latou uma lava o loo i tulaga ovasia i le faalapotopotoga faatiokarate—pe i le faapotopotoga i le atunuu lava, o se ovasia femalagaai i le matagaluega po o le itumalo, i se tasi o lala o le Sosaiete o le Olo Matamata, pe i totonu o le liʻo faaleaiga—ua iai le tiute tauave e avatu le āva ia i latou o loo i la latou tausiga. O lenei mea e manaomia ai le iai o lo latou faalogona mafana faapea ma faalogona faaleuso. E manaomia ona faigofie ona faalatalata atu uso ia i latou i taimi uma lava, ia maua le agamalu ma ia maulalo i le loto ma le mafaufau, e pei ona fetalai Iesu Keriso sa faapena foi ia.—Mataio 11:29, 30.
Ia Galulue ia Feāvatai
18. (a) O le ā e mafai ona taofia ai i tatou mai le faaalia o le āva ia i latou ua tatau i ai? (e) Aiseā ua leai ai se faamolemolega mo se ituaiga o mafaufau lē mautinoa ma le faitio?
18 E manaomia ona tatou galulue mamafa uma lava i le feāvatai, ona o loo iai se faafitauli malosi i lo tatou faia faapea. O lena faafitauli po o le toʻatugā, o o tatou loto lē lelei atoatoa. Ua “leaga o manatu o loto o tagata e afua mai ina o tama iti,” ua fai mai ai le Tusi Paia. (Kenese 8:21) O le tasi o faanaunauga faaletagata atonu o le a aiā i lo tatou faaalia o le āva e tatau ai i isi, o le iai o se mafaufauga lē mautinoa, ma le faitio. O i tatou uma lava o tagata vaivai, e lē lelei atoatoa, e manaomia le alofa mutimutivale ma le agalelei faifua o Ieova. (Roma 3:23, 24) I le talisapaia o lenei mea, seʻi o tatou faaeteete ia aua le mafaufau tele naʻuā i vaivaiga o o tatou uso pe faauiga sese gaoioiga a o tatou uso.
19. O le ā o le a fesoasoani ia i tatou e faafetaiaʻia so o se uiga lē mautinoa?
19 O le vaifofo mo so o se manatu lē mautinoa faapena o le alofa ma le pulea o le tagata lava ia. E manaomia ona ia i tatou se uiga tiga alofa, faamaoni, ma le mautinoa e faatatau i o tatou uso, i le matauina o o latou uiga lelei. Afai e iai se mea tatou te lē malamalama ai, seʻi o tatou lotomalie pea e aua le soona masalosalo i o tatou uso ma ia utagia le fautuaga a Peteru: “Ia muamua i mea uma ona maua e outou o le alofa naunau o le tasi i le tasi, auā o le alofa e ufiufi ai agasala e tele.” (1 Peteru 4:8) E tatau ona ia i tatou lena ituaiga o alofa pe afai o le a tatou avatu i o tatou uso le āva e tatau ai ia i latou.
20, 21. (a) O le ā le isi faanaunauga o loo faapena foi ona faalavelavea ai lo tatou faaalia o le feāvatai? (e) O le ā o le a fesoasoani ia i tatou e faafetaiaʻia lenei faanaunauga?
20 O le tasi uiga masani e faapena ona foliga mai e aiā i lo tatou faaalia o le āva e tatau ai i isi, o le uiga o le ilitata, po o le soona ita vave. E iai taimi e oo ai i ni uiga faagaeetia. O tagata tusiata e tatau ona iai ni o latou lagona naunautai i leo po o lanu ona o se vaega lea o la latou galuega. Ae o le ilitata pe ita vave i a tatou faiā ma isi o se ituaiga lea o le manatu faapito lena e mafai ona faoa ai mai ia i tatou lo tatou filemu ma taofia ai i tatou mai le faaalia o le āva i isi.
21 E tusa ai o lenei mea, ua aumaia ai ia i tatou se fautuaga lelei i upu o loo maua i le Failauga 7:9: “Aua le faataalise ona ita o lou loto; auā e tumau le ita i loto o e valelea.” O lea ua na faaalia atu ai le leai o se atamai ma se mafaufau lelei, atoa foi ma le leai o se alofa, ina ia ita gofie pe vave ona tetee atu. E tatau lava ona tatou leoleomalu i tatou ina ia lē avea o tatou manatu agasala, e pei o manatu lē mautinoa, le soona faitio naʻuā, po o le soona ita vave, lea e taofia ai i tatou mai le faaalia atu o le āva ia i latou uma ua ono ma tatau i ai.
22. E mafai faapefea ona aoteleina la tatou tiute tauave o le faaalia o le āva?
22 E moni, e tele mafuaaga o ia i tatou e faaalia ai le āva i isi. Ma e pei ona tatou iloa, o loo iai le tele ma tele o auala e mafai ai ona tatou faaalia lena āva. E tatau ona tatou leoleomaluina i tatou i taimi uma ina ia lē avea so o se uiga manatu faapito po o ni uiga lē mautinoa e faalavelavea ai lo tatou faaalia o le āva. E manaomia ona tatou faaeteete i le faaalia o le āva ae maise lava ia i latou i totonu o le liʻo o o tatou aiga, i le va o tane ma avā ma fanau i o latou mātua. Ma i totonu o le faapotopotoga, ua ia i tatou le tiute tauave ia faaalia le āva i uso tapuai ma, ae maise lava, ia i latou o ē o loo galulue mamafa ia i tatou i tulaga o le ovasia. I nei vaipanoa uma lava, o se mea e lelei mo i tatou le tuuina atu o le āva tatau ia i latou ua taʻua i luga, talu ai, na fetalai Iesu: “E sili le manuia o le na te foai atu, i le manuia o le na te talia mai.”—Galuega 20:35.
O le a Faapefea ona E Tali?
□ Aiseā ma e faapefea ona tatou āva i faipule faalemalo?
□ O le ā le fautuaga faale-Tusi Paia atonu e mafai ona faatatauina i le faiā a le tagata faigaluega ma le pule?
□ E ao faapefea ona faaalia le āva i totonu o le liʻo faaleaiga?
□ O le ā le āva faapitoa e mafai ona faaalia i le faapotopotoga, ma aiseā?
□ E mafai faapefea ona foia vaivaiga faaletagata o le lē taulau ona āva i isi?
[Fesili mo le Suʻesuʻega]