O le Soifuaga o Iesu ma Lana Faiva

Tiga i Luga o le Satauro

UA TAʻITAʻIINA atu tagata faomea e toalua faatasi ma Iesu ina ia faaooina i ai le sala. E lē mamao atu mai le aai, ua malōlō ai le solo i le mea ua taʻua o Kolokota, po o le Mea e iai le Ulupoo.

Ua saei ese ofu o pagota. Ona latou aumai lea o le uaina ua faafefiloi ma le muro. E foliga mai ua saunia e fafine o Ierusalema, ma e lē taofia e tagata Roma le tuuina atu o lenei paluga o se vaiinu oona e faateʻa ai tiga ia i latou ua faasatauroina. Ae peitai, ina ua tofo i ai Iesu, ua musu o ia e taumafa ai. Aiseā? E mautinoa lava o loo manao o ia e pulea atoatoa le faagasologa o ona mafaufauga uma a o faia lenei tofotofoga aupito sili o lona faatuatua.

Ua taoto faasasaʻo nei Iesu i luga o le satauro ma ona aao ua tuu i luga aʻe o lona ao. Ona tutuʻi loa lea e fitafita fao uumi i ona lima ma ona vae. Ua femigoiai o ia i le tiga a o ati atu fao i aano ma uaua o sooga o lona tino. Pe a matuā maluelue solo le satauro, ona matuā tetele lava lea o le tiga, ona o le mamafa o le tino ua masaesae ai aano ona o manuʻa i fao. Peitai, na i lo le faamataʻu ai, ua tatalo Iesu mo fitafita Roma: “Loʻu Tamā e, ia e faamagaloina atu ia te i latou; auā ua latou lē iloa le mea ua latou faia.”

Ua tuuina e Pilato se faailoga i luga o le satauro ua faitauina faapea: “O Iesu le Nasareta, o le Tupu o Tagata Iutaia.” E foliga mai, ua ia tusia lenei mea ona e lē gata e faaaloalo o ia ia Iesu, ae ona o lona inoino foi i le au ositaulaga Iutaia ona o lo latou faamalosia atu o le faasalaga oti o Iesu e auala ia te ia. Ina ia mafai e tagata uma ona faitau i le faailoga, ua faia ai e Pilato ina ia tusia i gagana e tolu—i le faa-Eperu, i le gagana Latina o le malo, ma i le gagana taatele a Eleni.

Ua faameo lava le au faitaulaga sili, e aofia ai Kaiafa ma Ana. O lenei faalauiloaga mautinoa ua faaleagaina ai lo latou itula o le manumalo. O le mea lea ua latou tetee atu ai: “Aua e te tusi, O le tupu o tagata Iutaia; a ia faapea, Ua fai mai o ia, O aʻu o le tupu o tagata Iutaia.” I le tiga ona ua faaaogāina o ia e le au ositaulaga, ua tali atu ai Pilato ma le inoino matuā maumauai lava: “O le mea ua ou tusia, ua ou tusia lava.”

Ua faapotopoto atu nei le au ositaulaga, faatasi ma le motu o tagata e toatele, i le mea o faaooina ai le sala, ma ua taumafai le au ositaulaga e faafitia le faamaoniga o le faailoga. Ua latou toe fai atu le molimau pepelo lea na tuuina atu muamua i faamasinoga na faia e le au Saniterini. O le mea lea, e lē o se mea e ofo ai ina ua amata ona upuleaga ē na ui ane, ua lialiaʻi o latou ulu i le faatauemu ma faapea atu: “O oe na, o lē lepeti i le malumalu, ma toe faia i aso e tolu, inā faaola ia oe ia te oe! Afai o oe le Alo o le Atua, inā alu ifo ia i le satauro!”

“Na ia faaolaina isi tagata, ae lē mafaia e ia ona faaola ia te ia!” ua aufaatasi atu ai i ai le au ositaulaga ma o latou soʻo faalotu. “O le Tupu o Isaraelu o ia, ina alu ifo nei lava o ia i le satauro, ona tatou talitonu ai lea ia te ia. Na faatuatua ia i le Atua, ina laveai mai nei o ia ia te ia, afai e finagalo o ia ia te ia; auā na ia fai mai, O aʻu o le Atalii o le Atua.”

 I le aufaatasi atu i lea lava agaga, ua faatauemu atu ai foi fitafita ia Iesu. Ua latou ofo atu ma le aamu le uaina oona ia te ia, e foliga mai ua tuuina i tala atu o ona laugutu ua mamago. “Afai o oe o le tupu o tagata Iutaia,” ua latou taufaifai atu ai, “ina faaola ia oe ia te oe.” E oo lava i pagota faomea—o le tasi na faasatauro i le itu taumatau o Iesu, ma le isi i lona itu agavale,—sa faatauemu ia te ia. Seʻi manatu i lenei mea! O le tagata aupito sili ua faapea ona soifua mai, ioe, o lē na aufaatasi ma Ieova le Atua i le foafoaina o mea uma lava, ua matuā tigaina lava ma le onosai i nei faiga leaga uma!

Ua aveese e fitafita le ofu tele o Iesu ma latou vaevaeina i vaega e fa. Ua latou faia ni vili ia iloa ai po o ai o le a fai mana nei mea. Ae peitai, o lona ofutino e leai se sooga, sa faia i le ie sili ona matagofie. O lea na fetautalatalai ai fitafita: “Aua tatou te saeia, ae seʻi tatou fai ai le vili, po o ai lē fai mona.” I lea, ua latou faataunuu ai ma le lē iloa le mau ua faapea mai: “Ua latou tufatufaina oʻu ofu ia te i latou, ua latou faia foi le vili i loʻu ofu tino.”

O le gasolo o le taimi ua oo ai ina talisapaia e le tasi o tagata faomea faapea e moni lava o Iesu e tatau ona avea o se tupu. O lea la, ua ia faasaʻoina ai lana aumea, i lona faapea atu: “E te lē mataʻu ea i le Atua, ina ua tatou sala faatasi? Ua tonu lava la ta sala; auā ua tauia mai i taʻua e tusa ma mea na ta faia; a o ia nei, e leai se mea e lē tusa na faia e ia.” O lea, na ia fai atu ai ia Iesu, i lona ole atu: “Ia e manatua mai aʻu, pe a e afio i lou malo.”

“E moni, ou fai atu ia te oe i le asō,” ua tali atu ai Iesu, “O le a ta faatasi ma aʻu i le Parataiso.” O le a faataunuuina lenei folafolaga pe a pule Iesu e avea o se Tupu i le lagi ma toe faatuina lenei pagota ua salamō i le ola i luga o le lalolagi i le Parataiso lea o le a maua ai e i latou o le a faasaoina atu ia Amaketo faatasi ma a latou aumea le faaeaga o le atiina aʻe o lea Parataiso. Mataio 27:33-44; Mareko 15:22-32; Luka 23:27, 32-43; Ioane 19:17-24.

◆ Aiseā ua musu ai Iesu e inu le uaina na palu faatasi ma le muro?

◆ E foliga mai, aiseā ua tuuina ai le faailoga i luga o le satauro o Iesu, ma o le ā le felafolafoaiga atili ua muamua ona ia faia i le va o Pilato ma le au ositaulaga sili?

◆ O ā upu leaga atili ua fai atu ia Iesu i luga o le satauro, ma o le ā e foliga mai o loo uunaia ia mea?

◆ Ua faapefea ona faataunuuina le valoaga i le mea ua faia i ofu o Iesu?

◆ O le ā se suiga ua faia e se tasi o tagata faomea, ma o le a faapefea ona faataunuuina e Iesu lana olega?