O le Soifuaga o Iesu ma Lana Faiva

“E Moni Lava, o le Alo Lenei o le Atua”

I LE aoauli e leʻi leva lava ona iai Iesu i luga o le satauro, ae tupu loa se pogisa uigaese e tolu itula le umi. E lē o se gasetoto o le masina lea, talu ai e faatoʻā tutupu na mea i le na o le taimi o le masina faatoʻā vaaia, ma o le masina e faatoʻā atoa i le taimi o le Paseka. E lē gata foi i lea, o gasetoto o le masina e tutupu i na o ni nai minute. O lea o le pogisa e iai sona mafuaaga tauatua! O lenei mea atonu ua taofia ai i latou o loo tauemu ia Iesu, ma oo ai foi ina taofia ai a latou tauemuga.

Afai na tupu lenei mea uigaese a o leʻi matuā aʻoaʻia e le tasi pagota lana aumea ma talosaga atu ia Iesu ina ia manatua mai o ia, atonu la ua mafai ona avea ma se isi vala o lona salamō. Atonu o le taimi lea o le pogisa na faalatalata atu ai fafine e toafa, o le tinā o Iesu ma lona uso o Salome, o Maria le Makatala, ma Maria le tinā o le aposetolo o Iakopo le Itiiti, i le satauro. O loo iai ma i latou i inā Ioane, le aposetolo ua alofaina a Iesu.

Pagā le ‘tuia’ o le loto o le tinā o Iesu a o ia vaavaai atu i le tama na ia tausia faapelepele ma fafaga o tautau mai i inā ma le tiga! Peitai, e manatu Iesu, e lē na o ona lava tiga, ae faapea foi ma le lelei mo lona tinā. Faatasi ai ma se taumafaiga sili, ua lue atu lona ao ia Ioane ma faapea atu i lona tinā: “Sena e, faauta, o lau tama!” Ona lue atu lea o lona ao ia Maria, ma faapea atu ia Ioane: “Faauta, o lou tinā.”

O lea na tuuina atu ai e Iesu le tausiga o lona tinā, o lē ua mautinoa nei ua avea o ia o se fafine ua oti lana tane, i lona aposetolo e alofa faapitoa i ai. Ua ia faia lenei mea ona talu ai o isi fanau a Maria e leʻi faaalia lava i lea taimi se faatuatua ia te ia. I lea ua ia faataatia ai se faaaʻoaʻoga lelei o le faia o sauniuniga e lē mo na o manaoga faaletino o lona tinā, ae faapea foi ma ona manaoga faaleagaga.

I le pe tusa ma le tolu i le afiafi, ae fetalai atu Iesu: “Ua ou fia inu.” O lea, i le lagona faapea ua aveesea e lona Tamā le puipuiga mai ia te ia, e pei ona sa iai, ina ia mafai ai ona tofotofoina lona faamaoni i se tulaga lē faatapulaaina, ua ia alaga atu ai ma le leotele: “Loʻu Atua e, loʻu Atua e, se ā le mea ua e tuulafoai mai ai aʻu?” Ina ua faalogo ai nisi o ē sa tutū latalata ane, ona latou alalaga ai lea ma faapea ane: “Faauta! O loo valaau atu o ia ia Elia.” Ua tamoe faavave atu loa se tasi o i latou ma tago i le omomi ma fufui i le uaina oona ma tuu i le pito o le laau o le isopo, ma faainu ia te ia. Ae ua faapea atu nisi: “Tuu pea ia; seʻi tatou iloa pe sau Elia e ave ifo ia te ia.”

Ina ua tofo Iesu i le uaina oona, ona alaga lea o ia: “Ua taunuu.” Ioe, ua ia faaiʻuina mea uma na auina mai ai o ia e lona Tamā i le lalolagi e faia. I le iʻuga lava na ia fetalai ane: “Loʻu Tamā e, ou te tuuina atu loʻu nei agaga i ou aao.” I lea la, ua tuuina atu ai e Iesu i le Atua lona malosi ola i le mautinoa faapea o le a toe faafoisia mai e le Atua ia te ia. Ona faagaugau ifo lea o lona ao ma ua maliu.

I le minute lava na manavaina ai e Iesu lana toe manava, ona tupu ai lea o se mafuie mataʻutia, na mavaevae ai papa. Ua matuā malosi lava le lulu o le mafuie o lea na malepelepe ai tuugamau i fafo atu o Ierusalema, ma ua lafoaia mai i fafo tino oti sa iai. O ē na ui ane ai ma latou iloa nei tino oti ua lafoaiina mai i fafo, ua latou ulu atu i le aai ma taʻu atu lenei mea.

Ae lē gata i lea, i le taimi lava na maliu ai Iesu, o le ie puipui telē lava na vaeluaina ai le Mea Paia ma le Mea e Sili ona Paia i le malumalu o le Atua i Ierusalema ua saeluaina,  mai i luga e oo i lalo. E foliga mai o lenei ie puipui e matagofie lona teuteuina e tusa ma le 60 futu [18 mita] le umi ma e matuā mamafa lava! O lenei vavega e maofa ai, ua lē gata ina faaalia ai le toasa o le Atua faasaga i ē ua fasiotia Lona Alo, ae ua faamautinoa ai foi faapea o le ulu atu i le Mea Aupito Sili ona Paia, o le lagi lava ia, ua mafai nei ona o le maliu o Iesu.

Ia, ina ua faalogoina e tagata le mafuie ma vaai i mea ua tutupu, ona latou matuā matataʻu ai lea. O le taʻitaʻiʻau sa pulea le faiga o le faaoosalaga, sa vivii atu i le Atua. “E moni, o le Alo lava lenei o le Atua,” ua ia faailoa mai ai. Atonu sa iai o ia ina o talanoaina le tulaga tau i le avea o Iesu o le Alo tauatua i le taimi o lona faamasinoga i luma o Pilato. Ma ua mautinoa nei e ia faapea o Iesu o le Alo o le Atua, ioe, o ia moni o le tagata aupito sili ua faapea ona soifua mai.

Ua matuā meia foi isi i nei mea faavavega ua tutupu, ona amata lea ona latou toe foi atu i o latou aiga ma tuʻituʻi o latou fatafata, e pei o se tāga o lo latou matuā faanoanoa ma le masiasi. I le matauina mai se vaaiga mamao, ua iai le toatele o soʻo fafine o Iesu o ē ua matuā faanoanoa ona o nei mea iloga ua tutupu. O loo iai foi ma le aposetolo o Ioane. Mataio 27:45-56; Mareko 15:33-41; Luka 23:44-49; 2:34, 35; Ioane 19:25-30.

◆ Aiseā e lē mafai ai ona faapea o le gasetoto o le masina na pogai ai le tolu itula o le pogisa?

◆ A o toetoe lava oo i lona maliu, o le ā le faaaʻoaʻoga lelei ua saunia e Iesu mo i latou e iai mātua ua matutua?

◆ O ā fetalaiga mulimuli e fa a Iesu ua fai a o leʻi maliu?

◆ O le ā ua faataunuuina e le mafuie, ma o le ā ua faamaonia mai e le ie puipui o le malumalu ina ua saeluaina?

◆ Ua faapefea ona aafia le taʻitaʻiʻau sa pulea le faiga o le faaoosalaga ona o vavega?