Le Togiola Talafeagai mo Tagata Uma

“O le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui aʻi tagata e toatele.”—MATAIO 20:28.

1, 2. (a) Aiseā e mafai ai ona faapea o le togiola o le meaalofa silisili lea a le Atua mo le fanau a tagata? (e) O le ā le aogā e maua mai le iloiloina o le togiola?

O LE togiola o le meaalofa silisili lea a le Atua mo le fanau a tagata. E ala i ‘le tuusaolotoina i le togiola,’ ua tatou maua ai “le faamagaloina o agasala.” (Efeso 1:7) O le faavae lea mo le faamoemoe o le ola e faavavau, pe i le lagi po o i se lalolagi parataiso. (Luka 23:43; Ioane 3:16) Ma ona o lea, ua mafai ai e Kerisiano ona olioli i se tulaga mamā i luma o le Atua e oo foi i le taimi nei.—Faaaliga 7:14, 15.

² O le togiola la e lē o se mea e faanenefua pe vavaeesea. I le faavaeina faaletulafono i mataupu silisili tauatua, ua mafai ai e le togiola ona aumaia aogā moni, aʻiaʻi. O nisi o vala o lenei aʻoaʻoga atonu e “faamatalagatā.” (2 Peteru 3:16) Ae o le a e iloa le matuā aogā o se  taumafaiga ia iloiloina totoʻa le togiola, ona o loo ia faaatagiaina le alofa lē mafaatusalia o le Atua mo le fanau a tagata. Ina ia iloa le uiga o le togiola, o le malamalama lea i se vaega autū o le ‘tamaoaiga, le atamai ma le poto’ lē mafuatia o le Atua.—Roma 5:8; 11:33.

Finauga e Ao ona Faaleleia

3. O le ā ua manaomia ai se togiola, ma aiseā e lē mafai ai ona tau ina solofua e le Atua le tulaga agasala o le fanau a tagata?

³ Sa manaomia se togiola ona ua agasala le uluai tagata, o Atamu, lē na tuufaasolo maia i lana fanau se fua iʻuvale o maʻi, faamaʻi, le faanoanoa ma le tigā. (Roma 8:20) Ona ua latou umia le lē lelei atoatoa, ua avea ai i latou uma e tupuga mai ia Atamu ma “fanauga a le toasa,” ua tatau i ai le oti. (Efeso 2:3; Teuteronome 32:5) E lē mafai ona gauai atu le Atua i manatu e lē faavaea i mataupu silisili ma tau ina faamagaloina le fanau a tagata mai le nofo sala. Ua faailoa mai e lana lava Afioga faapea “o le oti, o le totogi lea o le agasala.” (Roma 6:23) Seʻiloga e faaleamanaia e le Atua ana lava tapulaa amiotonu, ma faaleaogāina lana lava faamasinoga tonu faaletulafono, ona faatoʻā solofua lea o le tulaga agasala o le fanau a tagata! (Iopu 40:8) E ui i lea, o le “amiotonu ma le faamasinoga o loo tumau ai lou [Atua] nofoalii.” (Salamo 89:14) So o se liliu ese mai le amiotonu i lana vaega o le a na ona faamalosia ai o le solitulafono ma faaletaualoa ai lona tulaga o le Silisiliese Aoao.—Faatusatusa Failauga 8:11.

4. O ā finauga na lagā i le fouvalega a Satani?

⁴ Sa manaomia foi ona faaleleia e le Atua isi finauga na lagā e le fouvalega a Satani, ni finauga e sili mamao atu le faitaulia na i lo o fefaloaiga faaletagata. Ua lafo atu e Satani se ata pogisa i luga o le suafa taʻuleleia o le Atua i le tuuaʻia o Ieova faapea o se pepelo ma se matai sauā o lē ua taofia mai i ana foafoaga le poto ma le saolotoga. (Kenese 3:1-5) E lē gata i lena, i le tau faamataʻu i le fuafuaga a le Atua e faatumuina le lalolagi i tagata amiotonu, na folasia ai e Satani faapea ua lē taulau le Atua. (Kenese 1:28; Isaia 55:10, 11) Sa faamalosia foi e Satani ia lava e upueseina auauna faamaoni a le Atua, i le faitioina faapea ua na ona latou auauna atu ia te Ia ona o ni mafuaaga manatu faapito. Na faualuga Satani faapea, e aunoa ma se tasi o i latou o le a tumau faamaoni i le Atua, pe afai e tuu i lalo o omiga!—Iopu 1:9-11.

5. Aiseā e lē mafai ai ona faaleamanaia e le Atua luʻi a Satani?

⁵ E lē mafai ona faaleamanaiaina ia luʻi. Afai sa na ona latou taatitia ai e lē talia, semanū la e iʻu ina soloiesea le mautinoa ma le lagolagosua mo le pulega a le Atua. (Faataoto 14:28) Afai e faaleaogāina le tulafono ma faatonuga, pe o le a lē faauluulu ai la le faalafuā i le vateatea aoao? I lea ua iai le faitalia i le Atua lava ia ma ona ala amiotonu e taʻumamāina ai lona silisiliese. Ua ia tuufaitalia i ana auauna faamaoni e faatagaina i latou e faaalia lo latou faamaoni lē motusia ia te ia. O le uiga o lenei mea o le feagai lea ma le tulaga agasala faaletagata i se auala e faapea ona avatu ai le faamuamua i finauga aupito silisili. Mulimuli ane sa ia fetalai atu ia Isaraelu: “O aʻu, o aʻu lava lē sōloiesea au solitulafono, ona o aʻu lava.”—Isaia 43:25.

Le Togiola: O se Ufiufi

6. O ā nisi upu ua faaaogā i le Tusi Paia e faamatala ai le auala a le Atua mo le faasaoina o le fanau a tagata?

⁶ I le Salamo 92:5, ua tatou faitau ai: “Ieova e, e matuā sili lava mea ua e faia; e loloto lava ou manatu.” O le mea lea tatou te manaomia ai se taumafaiga ia iloatino le mea ua faia e le Atua mo le fanau a tagata. (Faatusatusa Salamo 36:5, 6.) Ae faafetai, ua fesoasoani mai le Tusi Paia ia i tatou e malamalama i mataupu i le faaaogāina o faaupuga e tele e faapea ona faamatala ai pe faatusa i ai galuega matagofie a le Atua mai manatu matalasi. O loo faaupuina e le Tusi Paia le togiola o se faatauga, se leleiga, se togisala, se faasao ola, ma o se laveaʻiga. (Salamo 49:8; Tanielu 9:24; Kalatia 3:13; Kolose 1:20; Eperu 2:17) Ae atonu o le faaupuga e lelei tele ona ia faamatalaina mataupu, o lea sa faaaogā e Iesu ia te ia lava i le Mataio 20:28: “E pei o le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma  togiola [Eleni, lyʹtron] e sui aʻi tagata e toatele.”

7, 8. (a) O le ā ua tatou aʻoaʻoina mai upu Eleni ma le faa-Eperu mo le togiola? (e) Faataʻitaʻi se auala e aafia ai le talafeagai i se togiola.

⁷ O le ā la le togiola? O le upu Eleni lyʹtron e sau mai se veape e uiga “ia tatala.” Sa faaaogā e faamatala ai tupe e totogi mo le tatalaina mai o pagota o le taua. Ae peitai, i Tusitusiga Eperu, o le upu mo le togiola, koʹpher, e sau mai se veape e uiga ia “ufiufi” pe “faapulou.” Mo se faaaʻoaʻoga, sa faatonuina e le Atua Noa ia ufiufi (ka·pharʹ) pe puluti le vaa i le ta. (Kenese 6:14) Mai lenei la manatu, ina ia togiola, pe ina ia laveaʻia agasala, o lona uiga ia ufiufi agasala.—Salamo 65:3.

⁸ Ua matauina e le Theological Dictionary of the New Testament faapea o le koʹpher e “faaalia ai pea se uiga tutusa pau,” po o le talafeagai. I lea, ua talafeagai ai le ufiufi (kap·poʹreth) o le atolaau o le feagaiga ma le tino o le atolaau lava ia. E faapena foi, i le laveaʻia o agasala, pe togiolaina, ua tagisia e le faamasinoga tonu tauatua le ‘solu mo le solu, mata mo le mata, nifo mo le nifo, lima mo le lima, ma le vae mo le vae.’ (Teuteronome 19:21) E ui i lea, i nisi taimi, sa mafai ai ona faamalieina le faamasinoga tonu pe afai e ofoina atu se mea e tutusa pau e suia ai le faasalaga ogoogo. Ina ia faataʻitaʻia: O loo tautala le Esoto 21:28-32 e uiga i se povi poa na suaina se tagata seia oo ina oti ai. Afai na iloa e le tagata e ana, le tulaga o le povi poa ae na te leʻi uia faaeteetega tatau, e ono avea la o ia ma ufiufi, pe totogia le ola o lē na fasiotia i lona lava ola! E ui i lea, o le ā pe afai sa lē soona tuuaʻia ai le tagata e ana? O le a ia manaomia la se koʹpher, se mea e ufiufi ai lona sese. Atonu o le a faaee atu e faamasino tofia i ona luga se togiola, po o se sala, o se tau faasao ola.

9. Ua faapefea i se mea na tupu e aofia ai ulumatua a Isaraelu ona faataʻitaʻia le manaomia ona tonu aʻiaʻi o se tau faasao ola?

⁹ O se isi upu Eperu e fesootai i le “togiolaina” o le pa·dhahʹ, o se veape e uiga moni faapea o le “faaolaina mai.” Ua faataʻitaʻia mai e le Numera 3:39-51 le mea tonu sa tatau ona iai le tau o le faasao ola. I lona faasaoina o ulumatua a Isaraelu mai le salaoti i le Paseka 1513 T.L.M, na avea ai i latou mo le Atua. Sa ono mafai la ona ia talosagaina atalii ulumatua uma a Isaraelu e auauna atu ia te ia i le malumalu. Na i lo lena, sa taliaina e le Atua se “tau faasao ola” (pidh·yohmʹ, o se nauna na maua mai le pa·dhahʹ), ua faatonuina faapea: “Ina aumai ia o sa Levī [mo aʻu] e sui aʻi ulumatua uma o le fanauga a Isaraelu.” Ae sa tatau ona tonu aʻiaʻi le suitulaga. Na faia se faitauga o le ituaiga o sa Levī: e 22,000 tane. Sosoo lea ma se faitauga o ulumatua uma a Isaraelu: e 22,273 tane. I le na o le totogia lava o le ‘tau o le togiola’ e lima sekeli mo tagata taitoatasi, sa mafai ai ona toe faaolaina mai ulumatua e 273 na silia, e tuusaunoa mai le auaunaga i le malumalu.

Le Togiola Talafeagai

10. Aiseā ua lē mafai ai e taulaga i manu ona ufiufia atoatoa agasala a le fanau a tagata?

¹⁰ Ua faataʻitaʻia i manatu ua muamua atu faapea e tatau i se togiola ona tutusa pau ma le mea ua ia suitulaga ai, pe ufiufi. O taulaga i manu sa ofoina atu e tane faatuatua mai ia Apelu ma faasolo mai ai, sa lē mafai ona ufiufi moni ai agasala a tagata, ona e sili atu ai tagata i lo manu faatauvaa. (Salamo 8:4-8) O lea ua mafai ai ona tusi mai Paulo faapea “e le mafai ona aveeseina o agasala i le toto o povi poa ma ʻoti.” Sa galue na taulaga e tau o se ata, po o se faatusa, o se ufiufi e faatalitali ai le togiola o le a oo mai.—Eperu 10:1-4.

11, 12. (a) Aiseā ua lē manaomia ai fua ona maliliu le faitau afe miliona o tagata i se oti faataulaga e ufiufi ai agasala a le fanau a tagata? (e) Ua na o ai e toatasi e mafai ona auauna ‘o se togiola talafeagai,’ ma o le ā le fuafuaga ua galueaiina e lona maliu?

¹¹ O lenei togiola na faaataata mai sa tatau ona tutusa pau aʻiaʻi ma Atamu, ona o le faasalaga oti na faatatauina ma le tonu e le Atua ia Atamu, sa iʻu ai i le malaia o le ituaiga faaletagata. Ua faapea mai le 1 Korinito 15:22: ‘Ua oti uma lava ia Atamu.’ O lea sa lē manaomia fua ona maliliu le faitau afe miliona o tagata taitoatasi i se oti faataulaga ina ia talafeagai ai ma fanau taitoatasi a Atamu. “Faapei ona oo mai o le agasala i le lalolagi i le  tagata e toatasi [Atamu], o le oti foi ona o le agasala.” (Roma 5:12) Ma ona “ua oo mai le oti talu le tagata,” e mafai ai foi la ona oo mai le toe faaolaina o le fanau a tagata “talu le tagata.”—1 Korinito 15:21.

¹² E ao i le tagata o lē o le a avea ma togiola ona lelei atoatoa i le tino ma le toto—ia tutusa aʻiaʻi ma Atamu. (Roma 5:14) O le a lē paleni fua faatautau o le faamasinoga tonu i se meafaiola agaga po o se “Atua-tagata.” E na o se tagata lelei atoatoa lava, o se tasi e leʻi toilalo i le faasalaga oti faa-Atamu, e mafai ona ofoina atu ‘se togiola talafeagai,’ se tasi e talafeagai lelei atoatoa ma Atamu. (1 Timoteo 2:6) * I le foaiina atu faataulaga o lona ola, ua mafai ai e lenei “Atamu mulimuli” ona totogi le taui mo le agasala a “Atamu le uluai tagata.”—1 Korinito 15:45; Roma 6:23.

13, 14. (a) Pe ua aogā ia Atamu ma Eva le togiola? Faamatala. (e) Ua faapefea ona aogā le togiola i ē tupuga mai ia Atamu? Faataʻitaʻi.

¹³ Peitai, e leʻi aogā ia Atamu po o Eva, le togiola. O le mataupu silisili lenei ua iai i le Tulafono faa-Mose: “Tou te le talia lava se togiola e ola ai le fasioti tagata, o le ua faasalaina ia oti.” (Numera 35:31) Sa leʻi olegiaina Atamu, o lea o lana agasala sa faia ma le loto i ai, ma le iloa. (1 Timoteo 2:14) Na iʻu ai i le fasiotia o lana fanau, auā ua tuufaasolo mai nei ia i latou lona lē lelei atoatoa, ma oo atu ai i lalo o le faasalaga o le oti. E manino lava la, ua tatau ona oti Atamu, ona o ia o se tagata lelei atoatoa, ae na ia filifili ma le loto i ai ia lē usiusitai i le tulafono a le Atua. O le a feteenai ma mataupu silisili amiotonu a Ieova pe afai na te faatatauina le togiola e sui ai Atamu. Peitai, o le totogia o le taui mo le agasala a Atamu, ua saunia lea mo le faaleaogāina o le faasalaga oti i luga o le fanau a Atamu! (Roma 5:16) I se uiga faaletulafono, ua vavaeesea tonu lava le malosi faatamaʻia o le agasala mai lona amataga. Na ‘oo le oti’ i lē na faatinoina le togiola ʻona o tagata uma,’ e tauaveina ai āuga o le agasala mo le fanau uma a Atamu.—Eperu 2:9; 2 Korinito 5:21; 1 Peteru 2:24.

¹⁴ Ina ia faataʻitaʻia: Tagaʻi faalemafaufau i se falegaosimea ma ni ona tagata faigaluega e faitau selau. Ua gau le pisinisi ona o le lē faamaoni o le pule; tapuni loa ma faitotoa o le falegaosimea. Ua leai nei ni galuega a le faitau selau ma ua lē mafai ona totogia a latou aitalafu. O a latou paaga faaipoipo, o fanau, ioe, ma ē nonofo aitalafu i ai, ua mafatia uma lava ona o le leaga o lena tagata e toatasi! Ona sau lea o se mauoloa matamau, totogi uma aitalafu a le kamupani ma toe tatalaina le falegaosimea. Na iʻu le solofuaina o lena aitalafu e tasi, i le aumaia o se mapusaga atoatoa i le toatele o tagata faigaluega, o latou aiga, ma ē nonofo aitalafu i ai. Peitai faamata e maua se sao o le uluai pule i lenei tamaoaiga fou? Leai, ua tuua o ia i le falepuipui ma ua tuliesea e faavavau o  ia mai lana galuega! E faapena foi, o le solofuaina o le agasala e tasi a Atamu ua aumaia ai aogā i le faitau miliona o ē tupuga mai ia te ia—ae lē ia Atamu.

O Ai e Saunia le Togiola?

15. O ai ua mafaia ona saunia se togiola mo le fanau a tagata, ma aiseā?

¹⁵ Na tagi faanoanoa le faisalamo: “E le mafaia lava e so latou ona faatau i lona uso, pe avatu i le Atua se togiola mo ia, (auā e matuā [tautele] le togiola o latou agaga, e lē mafaia lava ia e faavavau).” Ua faapea mai The New English Bible o le tau o le togiola sa “faigata e faavavau i lona malosi ona totogia.” (Salamo 49:7, 8) O ai la, o le a saunia le togiola? E na o Ieova lava e mafai ona saunia le “Tamai mamoe [lelei atoatoa] . . . na te aveesea le agasala a le lalolagi.” (Ioane 1:29) Sa leʻi auina mai e le Atua se agelu e laveaʻiina le fanau a tagata. Na ia saunia le taulaga silisili o le auina mai lea o lona lava Alo pele e toatasi, ‘o lē sa sili ona fai mona fiafia.’—Faataoto 8:30; Ioane 3:16.

16. (a) Ua faapefea ona fanau mai le Alo o le Atua o se tagata lelei atoatoa? (e) O le ā sa ono faaigoaina ai Iesu i se uiga faaletulafono?

¹⁶ I lona finagalo malie e auai i le faatatauga tauatua, na tuu ai e le Alo o le Atua ia “faamaulalo e ia ia te ia” mai lona olaga faalelagi. (Filipi 2:7) Sa faaliliuina e Ieova le malosi-ola ma le mamanu o uiga o lona Atalii ulumatua faalelagi i le manava o le taupou Iutaia ua igoa ia Maria. Ona ‘faamalumalu ifo lea i ona luga’ o le agaga paia, ua faamautinoaina faapea o le tamaitiiti o loo tuputupu aʻe i lona manava e paia, e saoloto aʻiaʻi mai le agasala. (Luka 1:35; 1 Peteru 2:22) Ona o se tagata, o le a faaigoaina ai o ia o Iesu. Ae i se uiga faaletulafono, sa ono faaigoaina o ia ‘o le Atamu lona lua,’ auā sa talafeagai atoatoa o ia ma Atamu. (1 Korinito 15:45, 47) Ua mafai ai la e Iesu ona ofoina atu ia lava faataulaga o “le tamai mamoe e le ponā lava, e leai foi sona leaga,” o se togiola mo le fanau a tagata agasala.—1 Peteru 1:18, 19.

17. (a) O ai e totogi i ai le togiola, ma aiseā? (e) Ona e lē gata o le Atua na saunia ma talia le togiola, aiseā ea la na faia ai le fesuiaiga?

¹⁷ Peitai, ia te ai na totogia i ai lena togiola? Ua finau mai aʻoaʻo Kerisinetoma mo le tele o senituri faapea, sa totogia ia Satani le Tiapolo. O le mea moni ona ua “faatauina atu” le fanau a tagata i le agasala o lea ua oo ai i lalo o le pulega a Satani. (Roma 7:14; 1 Ioane 5:19) Peitai o Ieova lava, na te “taui atu ma sui” i le amioleaga, ae lē o Satani. (1 Tesalonia 4:6) O lea, e pei ona taʻua manino i le Salamo 49:7, o le togiola e ao ona totogi “i le Atua.” Ua saunia e Ieova le togiola ia iai, peitai a maeʻa ona osi faataulaga le Tamai mamoe a le Atua, e tatau ona totogi atu le aogā o lana togiola i le Atua. (Faatusatusa Kenese 22:7, 8, 11-13; Eperu 11:17.) O lenei mea e lē faaitiitia ai le togiola i se fesuiaiga faifua, e tau ina fai, e pei ona aumaia o tupe mai le isi taga ma tuu i le isi taga. E lē tele nauā se fesuiaiga faaletino e aafia ai i le togiola e pei o se faiga faaletulafono. I le tautū pea e tatau ona totogi se togiola—e tusa lava pe matuā taugatā ia te ia—na faamautinoa ai e Ieova lona gauai atu ma le lē maluelue i mataupu silisili amiotonu.—Iakopo 1:17.

“Ua Taunuu”

18, 19. Aiseā sa tatau ai ona mafatia Iesu?

¹⁸ I le tau e totogo ai mea o le 33 T.A., o le taimi lena na tatau ona totogi ai le togiola. Sa faapagotaina Iesu Keriso ona o tuuaʻiga sese, faamasinoina e agasala, ma tuʻituʻia i se laau faaoosala. Na ia aioi atu i le Atua ma le “tagi tele ma loimata” ona o le tigā matuitui ma le faalumaina ua aafia ai. (Eperu 5:7) Pe sa tatau  ona mafatia faapena Iesu? Ioe, auā i le tutumau i le ‘faamaoni, agamalu, lē ponā, vavaeese mai ē agasala,’ seia oo lava i le iʻuga, na faaleleia ai e Iesu le finauga i le faamaoni o auauna a le Atua i se faaiʻuga mataʻina.—Eperu 7:26.

¹⁹ Na galue foi mafatiaga o Keriso e faaatoatoaina ai o ia mo lana matafaioi o se Faitaulaga Sili mo le fanau a tagata. I le iai i sea tofiga, ua lē avea ai o ia o sē palaʻai, e pupū i fale. “Auā na tigaina o ia ina o tofotofoina, o le mea lea ua mafai ai o ia ona fesoasoani i e ua tofotofoina.” (Eperu 2:10, 18; 4:15) O lana toe manava lava, na mafai ai e Iesu ona alaga atu ma le manumalo, “Ua taunuu.” (Ioane 19:30) E lē gata sa ia faamaonia lona lava faamaoni peitai na taulau foi ona ia faataatia le faavae mo le faaolataga o le fanau a tagata—ae sili atu ona tāua, o le taʻumamāina ai o le silisiliese o Ieova!

20, 21. (a) Aiseā na toe faatuina ai Iesu mai le oti? (e) Aisea na toe “faaolaina [ai] i le Agaga” Iesu Keriso?

²⁰ E ui i lea, i le ā le auala, o le a faatatau moni ai le togiola i le fanau a tagata agasala? O afea? E faapefea? Sa leʻi tuua ai faapoevaga ia mataupu. Ina ua mavae le maliu o Keriso i le aso tolu, sa toe faatuina o ia e Ieova mai le oti. (Galuega 3:15; 10:40) I lenei gaoioiga tāua, na molimauina ai e le faitau selau o molimau vaai tino se mea moni, e lē gata ina tauia e Ieova le auaunaga faamaoni a lona Alo ae na tuu atu foi ia te ia le avanoa e faaiʻuina ai lana galuega faasao ola.—Roma 1:4; 1 Korinito 15:3-8.

²¹ Na toe “faaolaina mai i le Agaga” Iesu, o ona vaega faalelalolagi na totoe sa faagafuaina i se auala e lē mailoa. (1 Peteru 3:18; Salamo 16:10; Galuega 2:27) I le avea ma meafaiola agaga, ua mafai ai nei e Iesu toe faatuina ona foi atu ma le manumalo i le lagi. Maeu se alalaga fiafia lē mataofia na iai i le lagi i lena taimi! (Faatusatusa Iopu 38:7.) Sa lē na ona toe foi atu Iesu e olioli i lona faafeiloaiga. Na afio mai o ia e faatino isi galuega, e aofia ai le faia ia taulau ona maua e le ituaiga atoa faaletagata aogā mai lana togiola. (Faatusatusa Ioane 5:17, 20, 21.) O le a talanoaina i le mataupu o loo sosoo mai, le auala na te faataunuuina ai lenei mea ma lona uiga mo le fanau a tagata.

[Faaopoopoga i lalo]

Fesili Autalu

□ O ā finauga sa sili atu foi ona tāua na i lo le faaolataga o le fanau a tagata?

□ O le ā lona uiga ia “togiola” ē agasala?

□ O ai sa tatau ona talafeagai i ai Iesu, ma aiseā?

□ O ai e saunia le togiola, ma o ai e totogi i ai?

□ Aiseā sa manaomia ai ona toe faatuina Keriso mai le oti o se agaga?

[Fesili mo le Suʻesuʻega]

[Ata i le itulau 13]

Sa lē lava taulaga i manu e ufiufi ai agasala faaletagata; na latou faaataina le taulaga sili a sau