“Ua Faatauina Outou i le Tau”

“Ua faatauina outou i le tau; o lenei, ia outou vivii atu i le Atua i o outou tino.”—1 KORINITO 6:20.

1, 2. (a) O le ā na tatalaina “le ala e faasaoina ai mai le oti”? (e) O le ā sa tatau ona fai ina ia aogā faaletulafono ai le taulaga a Keriso, e pei ona faaataina mai i le ā?

UA FAAPEA mai le faisalamo, “O le Atua moni, o lo tatou Atua ia o le olataga; ma o Ieova le Alii Silisiliese e ana le ala e faasaoina ai mai le oti.” (Salamo 68:20, NW) Sa tatalaina lena ala e le taulaga a Iesu Keriso. Ae ina ia aogā faaletulafono lena taulaga, sa tatau ai ona faailoa atu totino Keriso i luma o le Atua lava ia.

² Sa faaataina mai lenei mea i le Aso o Togiola mo agasala pe a ulu atu le faitaulaga sili i le mea e Silisili ona Paia. (Levitiko 16: 12-15) “Peitai,” na tusia e le aposetolo o Paulo, “ina ua maliu mai Keriso o se faitaulaga sili . . . , na o le faatasi lava ona ulu atu o ia i totonu o le mea paia, e lē ma le toto o ʻoti ma tamai povi, ae o lona lava toto, ua maua ai le faaolataga e faavavau mo i tatou. Auā ua lē ulu atu Keriso i le mea paia ua faia e lima, o le faatusa lea o le mea moni, ae i le lagi lava, ina ia iloa ai nei o ia i luma o le Atua mo i tatou.”—Eperu 9:11, 12, 24, NW.

Le Malosi o le Toto

3. (a) Ua faapefea ona manatu tagata tapuai o Ieova i le toto, ma aiseā? (e) O le ā e faaalia ai faapea ua iai i le toto le malosi faaletulafono e togiola ai agasala?

³ O le ā le matafaioi e faatino e le toto o Keriso i lo tatou faaolataga? Talu mai aso o Noa, ua manatu ai tagata tapuai moni i le toto o se mea e paia. (Kenese 9:4-6) Ua faatinoina e le toto se vaega tāua i le gasologa o le ola, auā ua faapea mai le Tusi Paia “o i le toto le ola [po o le solu] o le tino.” (Levitiko 17:11) O lea na manaomia ai e le Tulafono faa-Mose faapea afai e osia se taulaga i se manu, e ao ona sasaa ese lona toto i luma o Ieova. O nisi taimi sa tuu ai foi le toto i luga o nifo o le fata faitaulaga. E manino lava la, o le malosi faasao ola o se taulaga sa iai i lona toto. (Levitiko 8:15; 9:9) “Na toe ina uma foi o mea uma ona faamamāina i le toto e tusa ma le tulafono; a le o i ai foi se faamaligiina o le toto, ua leai foi se faamagaloina.”—Eperu 9:22.

4. (a) O le ā le fuafuaga sa galueaiina e le vaoia e le Atua o le faaaogāina o le toto? (e) O le ā sa iloga e uiga i le auala na fasiotia ai Iesu?

⁴ E lē tioa la, faapea i lalo o le Tulafono, so o se faaaogāseseina o le toto sa faasalaina i le oti! (Levitiko 17:10) Ua tatou iloa uma lava, a iai se mea e seāseā maua, pe matuā sa taputapu lona faaaogāina, ona siitia lea o lona aogā. O le vaoia e Ieova o lona faaaogāina, ua faamautinoa ai faapea e ao ona manatu i le toto, e lē o se mea e itiiti lona aogā, ae o se mea e tautele, e tāua. (Galuega 15:29; Eperu 10:29) Ua ōgatasi lenei ma le fuafuaga faitaulia o le a galueaiina e le toto o Keriso. O lona maliu i se auala sa faapea ona faamasaaina ai lona toto, ua fetaui lelei. Na faamaonia ai i lea, faapea sa lē gata ina faataulaga e Keriso lona tino faaletagata ae na sasaa atu foi lona solu, ma faataulaga lona lava ola o se tagata lelei atoatoa! (Isaia 53:12) Sa leʻi maʻimaua e Keriso le aiā faaletulafono i lena olaga ona o le lē lelei atoatoa, o lea na matuā aogā tele ai lona toto masaa ma sa mafai ona aaoina atu i luma o le Atua mo le togiolaina o agasala a le fanau a tagata.

5. (a) O le ā na ave e Keriso i le lagi, ma aiseā? (e) Sa faamaonia faapefea ua talia e le Atua le taulaga a Keriso?

⁵ Sa lē mafai e Keriso ona ave lona toto faaletino i le lagi. (1 Korinito 15:50) Na i lo lea, na ia avea le mea sa faatusaina e lena toto: le aogā faaletulafono o lana taulaga, ola lelei atoatoa faaletagata. Ua mafai nei ona ia aaoina atu aloaia lena ola o se togiola e sui ai le fanau a tagata agasala, i luma o le Atua. Na faamaonia le taliaina e Ieova o lena taulaga i le Penetekoso 33 T.A., ina ua afio ifo le agaga paia i luga o soʻo e 120 i  Ierusalema. (Galuega 2:1-4) Ua toe umia nei e Keriso, le ituaiga faaletagata e ala i le faatauina, e pei ona sa iai. (Kalatia 3:13; 4:5; 2 Peteru 2:1) I lea, ua mafai ai ona tafe atu aogā o le togiola i le fanau a tagata.

O Ē Aogā Muamua i ai le Togiola

6. O ā fuafuaga ua faia e le Atua mo le faatatauina o aogā o le togiola a Keriso?

⁶ Peitai, sa lē o lona uiga, faapea o le a maua nei loa e le fanau a tagata le lelei atoatoa i le tino, auā e lē mafai ona lelei atoatoa faaletino, seʻi vagana ua tafiesea agasala tuufaasolo a tagata. (Roma 7:18-24) E faapefea ma o afea la o le a tafiesea ai le tulaga agasala? Muamua, ua fuafuaina e le Atua se 144,000 faalelagi o ni ‘faitaulaga i lo tatou Atua e pule mai o ni tupu i luga o le lalolagi’ faatasi ma Keriso Iesu. (Faaaliga 5:9, 10; 7:4; 14:1-3) E ala ia i latou o le a faasolosolo mai ai ona faatatauina aogā o le togiola i le fanau a tagata i se vaitaimi e afe tausaga.—1 Korinito 15:24-26; Faaaliga 21:3, 4.

7. (a) O le ā le feagaiga fou, o ai ona vaega, ma o le ā le fuafuaga ua ia galueaiina? (e) Aiseā sa manaomia ai ona oti ina ia taulau ai le feagaiga fou, ma o le ā le vaega ua faatino e le toto o Keriso?

⁷ E faasino atu i lena, o tupu faitaulaga e 144,000 ua “faatauina nai tagata.” (Faaaliga 14:4) Ua faataunuuina lenei mea e ala i “le feagaiga fou.” O lenei feagaiga o se maliliega lea i le va o Ieova le Atua ma le Isaraelu faaleagaga a le Atua ina ia auauna ai ona sui o ni tupu ma faitaulaga. (Ieremia 31:31-34; Kalatia 6:16; Eperu 8:6-13; 1 Peteru 2:9) E ui i lea, ua faapefea ona taulau se feagaiga i le va o le Atua ma tagata lē lelei atoatoa? Ua faamatala mai e Paulo: “Auā pe a fai se feagaiga [i le va o le Atua ma tagata lē lelei atoatoa], seʻiloga e oti le tagata e ana le feagaiga, ona oo ai lea; auā faatoʻā aogā se feagaiga ona o ē ua oti, ae ua lē aogā i so o se taimi a o ola mai le tagata e ana le feagaiga.”—Eperu 9:16, 17, NW.

8, 9. Ua fesootai faapefea le togiola ma le feagaiga fou?

⁸ O le taulaga togiola la, o le faavae lea o le feagaiga fou, lena ua avea ai Iesu ma Puluvaga. Na tusia e Paulo: “Auā e toatasi le Atua, e toatasi foi le puluvaga i le Atua ma tagata, o le tagata o Keriso Iesu lea; o le na foaifuaina e ia te ia e fai ma togiola mo tagata uma lava, e fai ma molimau i ona lava po e tatau ai.” (1 Timoteo 2:5, 6) Ua faapitoa ona faatatau o na upu i le 144,000, o ē ua fai aʻe ai le feagaiga fou.

⁹ Ina ua osia e le Atua se feagaiga ma Isaraelu faaletino, sa lē mafai ona aogā faaletulafono seʻi vagana ua faamasaaina le toto o manu. (Eperu 9:18-21) E faapena foi, sa manaomia ona sasaa atu e Keriso le “toto o le feagaiga,” ina ia faagaoioia ai le feagaiga fou. (Mataio 26:28; Luka 22:20) I le gaoioi o Keriso o se Faitaulaga Sili ma o se “puluvaga o le feagaiga fou,” ua faatatau ai e le Atua le aogā o le toto o Iesu ia i latou ua aumaia i totonu o le feagaiga fou, ua lautogia faaletulafono i latou i le amiotonu faaletagata. (Eperu 9:15; Roma 3:24; 8:1, 2) Ua mafai ai la e le Atua ona tuu i latou i totonu o le feagaiga fou o ni tupu faitaulaga i le lagi! Ona o ia o lo latou Puluvaga ma le  Faitaulaga Sili, ua fesoasoani ai Iesu ia i latou e faatumauina lo latou tulaga mamā i luma o le Atua.—Eperu 2:16; 1 Ioane 2:1, 2.

Aoaoina o Mea i le Lalolagi

10, 11. (a) E faapefea ona faasalafa i tala atu o Kerisiano faauuina le togiola? (e) O ai le motu o tagata e toatele, ma o le ā le tulaga ua latou iai ma le Atua?

¹⁰ Pe ua na o Kerisiano faauuina e mafai ona oo i ai le tuusaunoaina i le togiola, le faamagaloina o a latou agasala? Leai, e pei ona faaalia i le Kolose 1:14, 20, ua toe faaleleia e le Atua ia te ia lava isi mea uma, i le osia o le filemu e ala i le toto na masaa i le laau faaoosala. E aofia ai i lenei, mea o i le lagi (le 144,000) atoa ma mea i luga o le lalolagi. O mea i le lalolagi, o i latou ia ua iai i le laina mo le olaga faalelalolagi, tagata o ē o le a olioli i le ola lelei atoatoa i Parataiso i le lalolagi. Ae maise lava talu mai le 1935 ua iai se taumafaiga tuufaatasi e aoaoina i latou na. Ua faamatalaina i latou e le Faaaliga 7:9-17 o se “motu o tagata e toatele” o ē ou le faaolataga i le Atua ma le Tamai Mamoe. O loo manaomia pea ona faasaoina i latou i “le puapuaga tele” ma ia ‘taʻitaʻia atu i puna o vai ola,’ auā ua faailoa mai e le Faaaliga 20:5 faapea o i latou na o le a faaolaina atoatoa, i le olaga lelei atoatoa faaletagata, i le faaiʻuga o le Afe Tausaga o le Pulega a Keriso. O i latou la e sao mai i le tofotofoga faaiʻu i lo latou tulaga lelei atoatoa faaletagata, o le a taʻuamiotonuina mo le ola e faavavau i le lalolagi.—Faaaliga 20:7, 8.

¹¹ E ui i lea, i se ala faataʻimua, ua maeʻa ai ona ‘taina e le motu o tagata e toatele o latou ofu ma ua faasinasina i le toto o le Tamai mamoe.’ (Faaaliga 7:14) Ua lē gaoioi Keriso o se Puluvaga o le feagaiga fou mo i latou, e ui i lea latou te maua aogā mai lenei feagaiga e ala i le galuega o le Malo o le Atua. Peitai, o loo gaoioi pea Keriso o se Faitaulaga Sili mo i latou, e ala ai ona mafai ma faatatauina e Ieova le togiola i se mamao ua taʻuamiotonuina ai nei i latou o ni uo a le Atua. (Faatusatusa Iakopo 2:23.) I le taimi o le Meleniuma, latou te faasolosolo ai ona ‘tuusaunoa mai le faapologaina e le iʻuvale, seia oo ina latou maua le saolotoga mamalu o le fanau a le Atua.’—Roma 8:21.

12. O le ā le faavae na feutagaʻi ai le Atua ma tagata faatuatua i taimi i tua atu o uluai Kerisiano?

¹² E faatatau i lo latou tulaga ma le Atua, e foliga mai e itiiti sina eseesega o le motu o tagata e toatele mai tagata tapuai i tua atu o uluai Kerisiano. Peitai, sa feutagaʻi le Atua ma tagata i nā ona po e ala i sauniuniga o loo lumanai o le togiola. (Roma 3:25, 26) E na o se auala faaletumau sa latou olioli ai i le faamagaloina o a latou agasala. (Salamo 32:1, 2) Na i lo le aveesea atoatoa mai ia i latou o le “agasala i le loto fuatia ifo,” sa avea taulaga i manu e “faamanatu ai agasala.”—Eperu 10:1-3.

13. O ā aogā e sili atu ai i tatou na i lo auauna a le Atua i tua atu o uluai Kerisiano?

¹³ E ese ai la mai Kerisiano moni i aso nei. Latou te tapuai e faavae i se togiola ua maʻea ona totogi! E ala i lo latou Faitaulaga Sili, ua latou “faalatalata atu ai ma le [saolotoga o le tautala] i le nofoālii o le alofa tunoa.” (Eperu 4:14-16) O le leleiga ma le Atua e lē o sina faamoemoe—e tau atiina aʻe, ae o se mea moni lava i le taimi nei! (2 Korinito 5:20) E mafai ona latou maua le faamagaloga moni, pe a latou sese. (Efeso 1:7) Ua latou olioli i se loto fuatiaifo mamā. (Eperu 9:9; 10:22; 1 Peteru 3:21) O ia faamanuiaga o se muai tofo lea i le saolotoga mamalu o le fanau a le Atua o le a faapea ona olioli ai auauna a Ieova i le lumanai!

Le Loloto o le Atamai ma le Alofa o le Atua

14, 15. Ua faapefea i le togiola ona faamatilatila ai le atamai lē mafaatusalia o Ieova, atoa ma lona amiotonu ma le alofa?

¹⁴ Maeu se meaalofa ofoofogia mai ia Ieova o le togiola! E faigofie tele ona malamalama ai, ae ua lava lona loloto e faaosofia ai le mataʻu i le tomai silisili. O la tatou autaluga o galuega o le togiola ua na ona valuvalusia ai o le laualuga. E ui i lea, tatou te alalaga faatasi ma le aposetolo o Paulo: “Aue! le  loloto o le tamaoaiga o le [atamai atoa ma le poto o le Atua]. E le masuesueina ana faamasinoga; e le mafai foi ona iloa ona ala.” (Roma 11:33) Ua folasia le atamai o Ieova i lona mafaia ona laveaʻia o le fanau a tagata ma taʻumamāina lona lava silisiliese. E ala i le togiola, “ua faaalia mai ai le amiotonu a le Atua, . . . ua tuuina mai [Keriso] i luma e le Atua, o se taulaga mo le leleiga e ala i le faatuatua i lona toto.”—Roma 3:21-26, NW.

¹⁵ E leai se faitioga e mafai ona faia faasaga i le Atua mo le faamagaloina o agasala sa faia i le taimi ua tuanai, e tagata tapuai i tua atu o uluai Kerisiano. E lē gata i lena, e leai se faitioga e mafai ona faia faasaga ia Ieova mo le taʻuamiotonuina o ē faauuina o ni ona atalii po o le motu o tagata e toatele o ni ana uo. (Roma 8:33) E ui ina matuā taugatā ia te ia, ae na lelei atoatoa faaletulafono, pe amio saʻo le Atua, i ana feutagaʻiga, i le taliina o le tuuaʻiga pepelo a Satani faapea o Ieova o se pule e lē faamasinotonu! Ua faapea foi ona faaalia le alofa lē manatu faapito o le Atua mo ana foafoaga e aunoa ma le fesiligia.—Roma 5:8-11.

16. (a) O le ā le auala ua saunia e le togiola mo le faaleleia o le finauga o le faamaoni o auauna a le Atua? (e) Ua aumaia faapefea ia i tatou e le togiola se faavae mo le faatuatua i se lalolagi fou amiotonu o loo sau?

¹⁶ Ua faaleleia foi e le auala sa saunia ai le togiola, finauga e aofia ai le faamaoni o auauna a le Atua. Na faataunuuina lena mea i le usiusitai o Iesu e toatasi. (Faataoto 27:11; Roma 5:18, 19) Peitai e faaopoopo atu i lena, o le olaga o Kerisiano e 144,000 o ē, e ui i teteega a Satani, ae na tumau pea i le faamaoni seia oo i le oti! (Faaaliga 2:10) Ua faataulauina e le togiola mo i latou ia, ia maua o so latou taui le ola e lē mafai ona oti—ola e lē faaumatia! (1 Korinito 15:53; Eperu 7:16) O lenei mea ua taʻuvaleaina ai le tuuaʻiga a Satani faapea e lē maufaatuatuaina auauna a le Atua! Ua aumai foi e le togiola ia i tatou se faavae mausalī mo le faatuatua i folafolaga a le Atua. E mafai nei ona tatou vaaia se ata o le faaolataga ua ‘faavaeina faaletulafono’ e ala i le taulaga togiola. (Eperu 8:6) O se lalolagi fou o le amiotonu ua faamautinoaina!—Eperu 6: 16-19.

Aua Neʻi Misia Lona Fuafuaga

17. (a) E faapefea ona faaalia e nisi ua latou misia le fuafuaga o le togiola? (e) O le ā e mafai ai ona uunaia i tatou ia tumau i amioga mamā?

¹⁷ Ina ia maua aogā mai le togiola, e manaomia e se tasi ona aveina i fale le poto, faatino le faatuatua, ma ola i tapulaa a le Tusi Paia. (Ioane 3:16; 17:3) E ui i lea, e toaitiiti lava, ua loto malilie e faia faapea. (Mataio 7:13, 14) E oo foi i le lotolotoi o Kerisiano moni, o nisi atonu e ‘talia le alofa tunoa o le Atua ae ua misia lona fuafuaga.’ (2 Korinito 6:1) Mo se faaaʻoaʻoga, i le gasologa mai o tausaga, e faitau afe ua faateʻaina ona o amioga lē pulea faaleituaiga. Pagā se faalumaina pe a manatu i le mea ua faia e Ieova ma Keriso mo i tatou! Pe lē ao ea i le talisapaia mo le togiola ona uunaia ai se tagata e alofia le “faagalogalo foi e ia o le faamamāina o ana agasala tuai”? (2 Peteru 1:9) Ua fetaui ai la, ona faamanatu mai e Paulo i Kerisiano: “Ua faatauina outou i le tau; o lenei, ia outou vivii atu i le Atua i o outou tino.” (1 Korinito 6:20) O le manatuaina o lenei mea e aumai ai ia i tatou se uunaiga malosi ia tumau i amioga mamā.—1 Peteru 1:14-19.

18. E mafai faapefea e se Kerisiano ua paʻū atu i se agasala matuiā ona maua pea le avanoa i le togiola?

¹⁸ Ae ā pe afai ua uma ona paʻū atu se tagata i se agasala matuiā? E ao ona ia faaaogā tatau le faamagaloga ua taulau i le togiola, ma talia le fesoasoani mai ovasia alolofa. (Iakopo 5:14, 15) E tusa foi pe manaomia ai se aʻoaʻiga malosi, e lē tatau i se Kerisiano ua salamō ona faavaivai i lalo o na faasaʻoga. (Eperu 12:5) Ua ia i tatou lenei faamautinoaga ofoofogia faale-Tusi Paia: “Afai tatou te faaali a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava.”—1 Ioane 1:9.

19. O le ā le manatu e ao ona iai i se Kerisiano e uiga i ana amioga lē pulea sa fai a o leʻi aʻoaʻoina le upu moni?

 ¹⁹ I nisi taimi e faavaivai faaletatau ai ni Kerisiano ona o amioga lē pulea ua tuanai. Na tusi mai se tasi o uso sa loto vaivai, “A o leʻi ma ō mai i le upu moni, na maua i maʻua ma loʻu toalua i se faamaʻi o totoga sa. I nisi taimi ma te lagona ai le lē mamā, peiseai e lē ‘fetaui’ i maʻua i le faalapotopotoga mamā a Ieova.” E moni, e tusa lava pe mavae ona avea ma Kerisiano, atonu o le a seleseleina e nisi sina fua o mafatiaga mai mea sese ua tuanai. (Kalatia 6:7) Ae tumau pea, ona leai se mafuaaga e lagona ai e se tasi le lē mamā i luma o Ieova pe afai ua salamō. Ua mafai ona “faamamāina o outou loto fuatia ifo ai galuega e oti ai, i le toto o Keriso.”—Eperu 9:14.

20. E mafai faapefea i le faatuatua i le togiola ona mapu ai se Kerisiano mai le tiga lē manaomia o le agasala?

²⁰ Ioe, e mafai e le faatuatua i le togiola ona fesoasoani, ina ia tatou mapu ai mai tiga lē manaomia o le agasala. Na taʻutino mai e se tasi o tuafafine talavou: “Sa oʻu tauivi ma se masani lē mamā o le pule i le tino mo le silia nei i le 11 tausaga. Toeitiiti lava ou tuua le faapotopotoga i se tasi taimi, i le lagona faapea e lē taitai finagalo Ieova i se tagata amio matagā e faaleagaina lana faapotopotoga.” Peitai, e tatau ona tatou manatua, o Ieova e “lelei, ma ua [nofo sauni] e faamagalo” pe afai tatou te tau ma le loto faamaoni faasaga i le amioletonu, ae lē o le lolo atu i ai!—Salamo 86:5.

21. E ao faapefea i le togiola ona aafia ai o tatou manatu ia i latou o ē faatigā mai ia i tatou?

²¹ E ao foi ona iai se sootaga o le togiola i le auala o loo tatou feutagaʻi ai ma isi. Mo se faataʻitaʻiga, e faapefea ona e tali atu pe afai e faatigā mai se uso Kerisiano ia te oe? Pe e te saoloto e faasalafa atu i ai le faamagaloga e pei o Keriso? (Luka 17:3, 4) E “femutimutivaleai lo outou alofa, ia fefaamagaloai [i isi], faapei ona faamagaloina outou e le Atua ia Keriso”? (Efeso 4:32) Pe e te mafuli e teuloto feitagaʻiga pe faatuputupu pea maseiga? E mautinoa o na mea, o le a misia ai le fuafuaga o le togiola.—Mataio 6:15.

22, 23. (a) O le ā le āuga e ao i le togiola ona iai i o tatou sini ma ala o le olaga? (e) O le ā le faaiʻuga e ao i Kerisiano uma lava ona faia e faatatau i le togiola?

²² O le manatu faaiʻu, e ao i le sapaitalia mo le togiola ona iai se āuga loloto i o tatou sini ma ala o le olaga. Na taʻua e Paulo: “Ua faatauina outou i le tau, aua neʻi avea outou ma pologa o tagata.” (1 Korinito 7:23) O avea pea ea manaoga tau tamaoaiga—fale, galuega, mea taumafa, lavalava—ma ogatotonu o lou olaga? Pe o e sailia muamua le Malo, ma tuu atu le faatuatua i le folafolaga a le Atua na te tausia oe? (Mataio 6:25-33) Faamata e ao ona e auauna mo lou pule, ae lē mafai ai ona lava le taimi mo gaoioiga faatiokarate? Ia manatua, o Keriso “na foaiina mai o ia e ia mo i tatou, . . . ma ia faamamāina mai e ia e fai mona, o lona lava nuu, e maelega i galuega lelei.”—Tito 2:14; 2 Korinito 5:15.

²³ “Faafetai lava i le Atua, [e ala ia] Iesu Keriso” mo lenei meaalofa silisili—o le togiola! (Roma 7:25) Talosia ia lē taitai ona tatou misia le fuafuaga o le togiola peitai ia faataga o ia e avea o se malosi moni i o tatou olaga. Tau lava ina tatou vivii pea i le Atua, i manatu, i upu, ma i gaoioiga, i le manatuaina ma le loto faafetai ua uma ona faatauina i tatou i se tau.

Fesili Autalu

□ Aiseā ua manatu ai e paia le toto, ma sa aaoina atu faapefea le toto o Keriso i luma o Ieova i le lagi?

□ O le ā le vaega sa faatino e le toto o Keriso i le faatuina o le feagaiga fou?

□ Ua faapefea ona aogā le togiola i ē faauuina ma le motu o tagata e toatele?

□ E mafai faapefea ona tatou faaalia ua tatou lē misia le fuafuaga o le togiola?

[Fesili mo le Suʻesuʻega]

[Ata i le itulau 16]

O le malosi togiola o se taulaga o loo iai lea i lona toto ola

[Ata i le itulau 17]

O se tasi e sapaitalia le faamagaloga a le Atua e loto malie e faasalafa atu le faamagaloga i isi