Ia Leoleoina Lou Loto e ‘le Filemu mai le Atua’
Ia Leoleoina Lou Loto e ‘le Filemu mai le Atua’
“Ia faasaga mai e Ieova ona fofoga ia te oe ma tuuina atu ia te oe le manuia [filemu, “NW”].”—NUMERA 6:26.
1. A o lalata lona oti, o le ā na tusia e Paulo ia Timoteo, e faaalia atu ai le ā?
I LE tausaga e 65 T.A., na faapagotaina ai le aposetolo o Paulo i Roma. E ui ina sa lalata lona oti faataugā i lima o se faaoosala Roma, ae na toʻafilemu Paulo. Ua faamaonia lenei i upu na ia tusia i lana uo talavou o Timoteo, ina ua ia taʻua: “Ua ou tau le taua lelei, ua iu ia te au le tausinioga, ua ou taofi i le upu o le faatuatua. O lenei, ua teuina mo aʻu le pale o le amiotonu, e foaiina mai ia te au i lea lava aso o le Alii le faamasino amiotonu.”—2 Timoteo 4:7, 8.
2. O le ā sa leoleoina ai le loto o Paulo i mea uma na tutupu i lona olaga, seia oo i lona oti?
2 Na mafai faapefea ona toʻafilemu Paulo ina ua fesagaʻi ma le oti? Ona sa leoleoina lona loto i “le manuia [filemu, NW] mai le Atua, o loo silisili lava i mea uma e manatu i ai.” (Filipi 4:7) O le filemu lava lenei e tasi sa puipuia ai o ia i tausaga uma e tumu i le vevesi talu mai lona uluai liliu i le Faa-Kerisiano. Na ia onosaia ai osofaiga, faafalepuipuiina, sasaina, ma le fetogia i maa. Sa faamalosia ai o ia e tau faasaga i le faaaposetasi ma taaʻiga faa-Iutaia. Ma na fesoasoani foi ia te ia e tauivi ma ʻau a temoni lē vaaia. E mautinoa, sa faamalosia ai o ia seia oo lava i le iʻuga.—2 Korinito 10:4, 5; 11:21-27; Efeso 6:11, 12.
3. O ā fesili ua lagā e uiga i le filemu o le Atua?
3 Maeu se uunaiga malosi na iloa e Paulo e uiga i lenei filemu! Pe mafai ona tatou aʻoaʻoina i aso nei po o le ā lena filemu? Faamata o le a ia fesoasoani e leoleoina o tatou loto ma faamalosia i tatou a o tatou “tau le taua lelei i la le faatuatua” i le gasologa mataʻutia, o nei “aso faigata”?—1 Timoteo 6:12; 2 Timoteo 3:1.
Filemu ma le Atua —Le Auala na Leiloa Ai
4. O ā nisi uiga o le upu “filemu” i le Tusi Paia?
4 I le Tusi Paia e tele uiga o le upu “filemu” o loo iai. O loo mulimuli mai nisi uiga, e pei ona lisiina i le The New International Dictionary of New Testament Theology: “I le F[eagaiga] T[uai] atoa, [o le sha·lohmʹ] (filemu) e aofia ai le tamaoaiga i se uiga lautele o le upu; (Faama. 19:20); le manuia (Sala. 73:3), e oo foi i ē faalemataʻu; soifua malōlōina faaletino (Isaia 57:18, 19]; Sala. 38:3); lotomalie . . . (Kene. 15:15 ma isi.); o ni faiā lelei i le va o atunuu ma tagata ( . . . Faama. 4:17; 1 No. 12:17, 18); faaolataga ( . . . Iere. 29:11; cf. Iere. 14:13).” Ae sili ona tāua o ni faiā filemu ma Ieova, a aunoa ma lena, so o se isi lava filemu faapea e sili atu, e na ona faatapulaa pe e lē tumau.—2 Korinito 13:11.
5. Sa faapefea ona faavevesia le filemu o le foafoaga a le Atua i le amataga?
5 I le amataga lava, sa filemu atoatoa le foafoaga uma ma Ieova. O se mafuaaga lelei lea, na folafola ai e le Atua faapea o ana galuega uma tau le foafoaga sa matuā lelei lava. Ioe, sa alalaga fiafia agelu faalelagi i lo latou tino mai. (Kenese 1:31; Iopu 38:4-7) E ui i lea, e faanoanoa, ona sa lē tumau lena filemu faalevateatea. Na malepe ia ina ua olegia e le meafaiola agaga lea ua lauiloa nei o Satani, se tasi e faatoʻā fou mai o meafaiola atamamai a le Atua, o Eva, mai le usiusitai i le Atua. Sa mulimuli atu Atamu, le tane a Eva ia te ia, ma i le fouvale faatasi o le toatolu, na mafua ai ona iai se fevaevaeaiga i le vateatea.—Kenese 3:1-6.
6. O le ā ua iʻu i ai le leiloa o le filemu ma le Atua mo le fanau a tagata?
6 O le leiloa o le filemu ma le Atua na oo ai puapuaga ia Atamu ma Eva, o ē ua amata nei ona faasolosolo ina faaleagaina faaletino ma faapea ona iʻu ai i lo la oti. I lo le olioli i le filemu i le Parataiso, sa tatau ona āsā e Atamu le eleele gaoā i fafo atu o Etena e fafagaina ai lona aiga o loo tuputupu aʻe. Na i lo le faafaileleina ma le lotomalie o se aiga faaletagata lelei atoatoa, ua afua mai ia Eva se fanau lē lelei atoatoa i le tigā ma mafatiaga. O le leiloa o le filemu ma le Atua na taʻitaʻia ai i le fuā ma le sauā i le va o tagata. Na fasiotia e Kaino lona uso o Apelu, ma i le taimi o le Lolo, sa faatumuina le lalolagi uma i le sauā. (Kenese 3:7–4:16; 5:5; 6:11, 12) Ina ua feoti o tatou uluai mātua, e mautinoa lava la te leʻi ō ifo i o la tuugamau ma le lotomalie, i “le filemu,” e pei o Aperaamo i le faitau selau o tausaga mulimuli ane.—Kenese 15:15.
7. (a) O le ā le valoaga na fofogaina e le Atua sa faasino i le faafoisia o le filemu atoatoa? (e) O le ā le tele sa taaʻina ai le fili o le Atua, o Satani?
7 O le mavae ona leiloa ia Atamu ma Eva o le filemu, ua tatou tau ane ai i le uluai taʻua o le feitagaʻi i le Tusi Paia. Na tulei le Atua ia Satani e faapea: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:15) A o mou atu le taimi, sa tuputupu aʻe le taaʻiga a Satani ma oo atu i le tulaga na mafai ai ona faapea mai le aposetolo o Ioane: “O le lalolagi uma o loo nofo toilalo i loo leaga.” (1 Ioane 5:19) E mautinoa o se lalolagi e pulea e Satani e lē o filemu ma le Atua. Ua talafeagai ai la, ona lapatai mai le soʻo o Iakopo i Kerisiano: “Tou te le iloa ea o le fefaauoai ma le lalolagi o le ita lea i le Atua?”—Iakopo 4:4.
Ia Filemu i se Lalolagi Faatautee
8, 9. Ina ua mavae le agasala a Atamu, na mafai faapefea ona maua e tagata le filemu ma le Atua?
8 I tuā lava i Etena, ina ua uluai tulei le Atua i le upu “feitagai,” na ia valoia ai foi le auala e toe faafoisia ai le filemu atoatoa i le foafoaga. O le a tuʻimomomoina e le fanau folafolaina a le fafine a le Atua le ulu o lē na uluai talepeina le filemu. E faasolo mai i Etena, o i latou o ē na faaalia le faatuatua i lena folafolaga ua olioli i ni faiā filemu ma le Atua. Mo Aperaamo, na oo lenei mea i se faiga uo.—2 Nofoaiga a Tupu 20:7; Iakopo 2:23.
9 I aso o Mose, na faatuina ai e Ieova le fanau a Isaraelu, le atalii o le atalii o Aperaamo, i se nuu. Na ia ofoina atu lona filemu i lenei nuu, e pei ona faaalia i se faamanuiaga na tolaulauina e Arona, le faitaulaga, ia i latou: “Ia faamanuia oe e Ieova, ma ia na tausi ia te oe; ia faamalamalamaina e Ieova ona fofoga i luga ia te oe, ma alofa atu ia te oe; ia faasaga mai e Ieova ona fofoga ia te oe, ma tuuina atu ia te oe le [filemu, NW].” (Numera 6:24-26) O le a aumaia e le filemu o Ieova ni taui faaʻoaina, ae sa ofoina mai i se tuutuuga.
10, 11. Mo Isaraelu, o le ā le tuutuuga o le filemu ma le Atua sa iai, ma o le ā sa iʻu i ai?
10 Na fetalai atu Ieova i le nuu: “Afai tou te savavali i aʻu tulafono, ma tausi i aʻu poloaiga, ma fai ai; ona ou avatu ai lea le ua ia te outou i ona po e tatau ai, e fua mai foi le laueleele i ona lava fua, o laau foi o i le fanua e fua mai ai i o latou fua. Ou te avatu le filemu i le nuu, tou te taooto foi, e leai se tasi e faamatau ia te outou; ou te faaumatia foi manu feai ai le nuu, e le oo foi le pelu i lo outou nuu. Ou te fealuai foi i totonu ia te outou, e fai foi aʻu mo outou Atua, e fai foi outou moʻu nuu.” (Levitiko 26:3, 4, 6, 12) Na ono mafai ona olioli Isaraelu i le filemu ona sa iai lo latou malu puipuiga mai o latou fili, fau ma soloi mea faaletino, atoa ma se faiā vavalalata ma Ieova. Ae o le a faalagolago lenei mea i lo latou utagia o le Tulafono a Ieova.—Salamo 119:165.
11 I le talafaasolopito atoa o le nuu, o tagata Isaraelu o ē na taumafai ma le faamaoni e tausia tulafono a Ieova sa olioli i le filemu ma ia, ma na masani ai ona maua le tele o isi faamanuiaga. I uluai tausaga o le nofoaiga a le Tupu o Solomona, na aumaia ai e le filemu ma le Atua le tamaoaiga faaletino atoa ma se mapusaga mai taua ma tuaoi o Isaraelu. I le faamatalaina o lena taimi, ua faapea mai le Tusi Paia: “Sa nonofo ma le filemu o Iuta ma Isaraelu; e taitasi ma nofo i lalo o lona vine, ma lalo o lona mati, e gata mai i Tanu, e pau mai i Peresepa, i ona po uma o Solomona.” (1 Tupu 4:25) E oo foi ina ua sasao aʻe le faatautee mai nuu tuaoi, ae sa iai pea i tagata Isaraelu faamaoni le filemu e matuā tāua, le filemu ma le Atua. O lea na tusia ai e le Tupu o Tavita, o se tagata tau sa mataʻina: “Ou te taoto, ma ou moe filemu; auā o oe Ieova e, na o oe lava, ua ou nofo ai ma le filemu.”—Salamo 4:8.
Se Faavae Sili ona Lelei mo le Filemu
12. Na faapefea ona teena e Isaraelu le filemu ma le Atua i le faaiʻuga?
12 E leʻi mamao, ae faatōai loa i le tagata o Iesu le Fanau o lē na te toe faafoisia le filemu atoatoa, ma na pepese agelu i lona fanau mai: “O le viiga i le Atua i mea aupitoaluga; ma le [filemu, NW] i le lalolagi; o le finagalo alofa i tagata.” (Luka 2:14) Na aliali mai Iesu i Isaraelu, ae ui ina i lalo o le feagaiga a le Atua, sa teena o ia e lena nuu atoa ma tuuina atu o ia i tagata Roma e fasiotia. A o latalata lona maliu, na tutulu ai Iesu ia Ierusalema, ua faapea ane: “Ana e iloa, e oe lava i lenei aso, o mea e te filemu ai—a o lenei ua lilo i o outou mata.” (Luka 19:42, NW; Ioane 1:11) Ona o le teena o Iesu, na leiloa atoa ai e Isaraelu lona filemu ma le Atua.
13. O le ā le auala fou na faavae e Ieova ina ia maua ai e le tagata le filemu ma Ia?
13 E ui i lea, sa leʻi soloia ai fuafuaga a le Atua. Na toe faatuina mai Iesu nai le oti, ma ia ofoina atu ia Ieova le aogā o lona soifua lelei atoatoa o se togiola mo tagata e saʻo o latou loto. (Eperu 9:11-14) Sa avea le taulaga a Iesu o se auala fou ma sili ona lelei mo tagata—Isaraelu faaletino ma Nuu Ese—e maua ai le filemu ma le Atua. I lana tusi i Kerisiano i Roma na faapea mai ai Paulo: “Ua lelei i tatou ma le Atua i le maliu o lona Alo, ina o fai i tatou mona fili.” (Roma 5:10) I le uluai senituri, o i latou na osia le filemu i lenei auala sa faauuina i le agaga paia e avea ma atalii fai o le Atua ma sui o se nuu fou faaleagaga ua taʻua o “le Isaraelu o le Atua.”—Kalatia 6:16; Ioane 1:12, 13; 2 Korinito 1:21, 22; 1 Peteru 2:9.
14, 15. Faamatala le filemu o le Atua, ma faamalamalama pe faapefea ona puipuia ai Kerisiano e tusa lava pe avea i latou ma taulaʻiga o le faatautee a Satani.
14 O ia tagata Isaraelu fou faaleagaga e ono avea ma taulaʻiga o osofaiga mai ia Satani ma lana lalolagi. (Ioane 17:14) Peitai, o le a ia i latou le “[filemu, NW] mai le Atua le Tamā, atoa ma Keriso Iesu lo tatou Alii.” (2 Timoteo 1:2) Sa fetalai atu Iesu ia i latou: “Ua ou fai atu nei mea ia te outou, ina ia outou maua le manuia [filemu, NW] ia te au; e maua foi outou e le puapuaga i le lalolagi, a ia outou loto tetele, ua ou manumalo i le lalolagi.”—Ioane 16:33.
15 O le filemu lenei na fesoasoani ia Paulo ma ana aumea Kerisiano e tumau ai e ui lava i faigata uma sa latou fetaiaʻi. E atagia ai se faiā mautū, e talafeagai ma le Atua ua taulau ona o le taulaga a Iesu. E avatu ai i lē ana, se toʻafilemu o le mafaufau a o ia amanaia le manatu mai o Ieova. Ua iai i se tamaitiiti o loo opoopo i lima alofa o lona tamā sea faalogona e tasi o le filemu, se mautinoa e lē fesiligia faapea o loo vaavaaia o ia e se tasi e manatu atu ia te ia. Na faalaeiauina e Paulo tagata Filipi: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le [filemu, NW] foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”—Filipi 4:6, 7.
16. Sa faapefea i le filemu ma le Atua ona aafia ai le faiā a le tasi i le isi o Kerisiano o le uluai senituri?
16 O se tasi o taunuuga o le leiloa o le filemu o le tagata ma le Atua, o le feinoinoaʻi ma fevaevaeaiga. Mo Kerisiano o le uluai senituri, na iʻu le sailia o le filemu ma le Atua i ni iʻuga e matuā tuufaafeagai: na taʻua e Paulo, le filemu ma le autasi i lo latou lava lotolotoi, o “le noataga o le filemu.” (Efeso 4:3) Sa latou ‘loto gatasitasi ma ola fifilemu, ma na ia i latou le Atua o le alofa ma le filemu.’ E sili atu i lena, na latou talaʻia “le tala lelei o le manuia [filemu, NW]” sa matuā manaomia, le tala lelei o le faaolataga mo ‘uo a le filemu,’ i latou o ē talilelei mai i le tala lelei.—2 Korinito 13:11; Galuega 10:36; Luka 10:5, 6.
Se Feagaiga o le Filemu
17. O le ā ua osia e le Atua ma ona tagata i o tatou aso?
17 Pe mafai ona maua sea filemu i aso nei? Ioe, e mafai. Talu mai le faavaeina o le Malo o le Atua i lalo o Iesu Keriso faamamaluina i le 1914, ua aoaoina ai e Ieova i latou o totoe o le Isaraelu a le Atua mai lenei lalolagi ma osia ai se feagaiga o le filemu ma i latou. O lea na ia faataunuu ai lana folafolaga sa faia e ala i le perofeta o Esekielu: “Ou te osia foi ma i latou le feagaiga [o le filemu, NW]; e fai foi ma feagaiga ia te i latou e faavavau; ou te faanofomauina i latou, ma faatoateleina i latou, ou te tuu foi loʻu malumalu ia te i latou e faavavau.” (Esekielu 37:26) Na osia e Ieova lenei feagaiga ma Kerisiano faauuina o ē, e pei o o latou uso i le uluai senituri, ua faaalia le faatuatua i le taulaga a Iesu. I le faamamāina mai le palapalā faaleagaga, ua latou tuuina atu ai i latou lava i lo latou Tamā faalelagi ma tauivi e mulimuli i ana poloaiga, i se auala e sili ona mataʻina o le taulamua e talaʻi le tala lelei o le Malo o le Atua ua faavaeina i le lalolagi aoao.—Mataio 24:14.
18. Ua faapefea ona tali mai nisi o i atunuu ina ua latou iloa o loo iai le suafa o le Atua i luga o le Isaraelu a le Atua?
18 Ua faaauau le valoaga: “E i ai foi loʻu fale ia te i latou; e fai foi aʻu mo latou Atua, e fai foi i latou moʻu nuu. E iloa ai foi e nuu ese o aʻu lava o Ieova o lē faapaiaina Isaraelu.” (Esekielu 37:27, 28) I le ōgatasi ma lenei, e faitau selau afe, ioe, e faitau miliona, i latou mai “nuu ese” ua oo ina iloa o loo iai le suafa o Ieova i le Isaraelu a le Atua. (Sakaria 8:23) Mai atunuu uma lava, ua latou lolofi ane ai e auauna ia Ieova ma lena nuu faaleagaga, i le faatuina o se “motu o tagata e toatele” ua muai vaaia i le Faaaliga. Ona ua “ta foi o latou ofu, ma ua faasinasinaina o latou ofu i le toto o le Tamai mamoe,” o le a faasaoina ai i latou i le puapuaga tele i se lalolagi fou filemu.—Faaaliga 7:9, 14.
19. O le ā le filemu o loo olioli ai tagata o le Atua i aso nei?
19 Ua olioli faatasi, le Isaraelu a le Atua ma le motu o tagata e toatele i se filemu faaleagaga e faatusaina i le filemu sa olioli ai Isaraelu i taimi o le Tupu o Solomona. Na vavalo Mika, e faatatau ia i latou: “Ona latou tuʻi ai lea i a latou pelu e fai ma uamea o suotosina, o latou tao foi o fai e fai ma polo teu vine; e le sii atu foi le pelu e le tasi nuu i le tasi nuu, latou te le toe aʻoaʻo foi i taua. A e taitasi ma nofo i lalo o lona vine, ma lalo o lona mati; e leai foi se na te faamatau mai.” (Mika 4:3, 4; Isaia 2:2-4) I le ōgatasi ma lenei, ua latou fulitua ai i taua ma misa, ae ua tuʻi faafaatusa a latou pelu e fai ma suotosina ma o latou tao e fai ma polo teu vine. O lea, ua latou olioli ai i se filemu faaleuso i le sālafa o lo latou aiga faavaomalo, e tusa lava po o le ā lo latou atunuu, gagana, ituaiga po o talaaga faavafealoai. Ma ua latou fiafia ona o le mautinoa o le puipuiga malu a Ieova i o latou luga. ‘E leai se tasi e faamataʻu ia i latou.’ E moni, ‘ua aumaia e Ieova lava ia le malosi i lona nuu. Ua faamanuia e Ieova lava ia lona nuu i le filemu.’—Salamo 29:11.
20, 21. (a) Aiseā e tatau ai ona tatou galulue e faasaoina lo tatou filemu ma le Atua? (e) O le ā e mafai ona tatou fai atu ai e uiga i taumafaiga a Satani e talepe le filemu o tagata o le Atua?
20 Peitai, e pei ona sa iai i le uluai senituri T.A., ua avea le filemu o auauna a le Atua ma mea e faamaite ai le faatautee o Satani. Talu a ona lafo ese mai le lagi ina ua mavae le faavaeina o le Malo o le Atua i le 1914, ua sii taua ai Satani ia i “latou ua totoe o lana [fafine] fanau.” (Faaaliga 12:17) Na lapatai mai Paulo, e oo foi i ona aso: “Tatou te le tau ma tagata, a o . . . agaga leaga i mea o i le lagi.” (Efeso 6:12) Ona ua faasāsāina nei Satani i le siomaga o le lalolagi, ua faapea ona faanatinati ai lena lapataiga.
21 Ua faaaogā e Satani so o se faiga o loo ia te ia i lana taumafaiga e faaumatia ai le filemu o tagata o le Atua, ae ua ia lē taulau. I tuā lava i le 1919, sa lē taitai atoa se 10,000 o ē na tauivi e auauna ma le faamaoni i le Atua. I aso nei, e silia i le fa miliona i latou ua manumalo i le lalolagi i lo latou faatuatua. (1 Ioane 5:4) Mo i latou ia, ua avea le filemu ma le Atua ma le filemu o le tasi i le isi o se mea moni, e faapea foi a o latou tumau i le faatautee a Satani ma lana fanau. Ae i le manatu atu i lenei faatautee, ma le iloiloina o lo tatou lava lē lelei atoatoa ma “aso faigata” o loo tatou ola ai, e tatau ai ona tatou galulue ma le maelega e faasaoina lo tatou filemu. (2 Timoteo 3:1) I le mataupu o sosoo mai, o le a tatou iloa ai po o le ā o loo aafia i lenei mea.
E Mafai ona E Faamalamalamaina?
□ Aiseā na leiloa ai e le tagata lona filemu ma le Atua i le amataga?
□ Mo Isaraelu, o le ā sa faalagolago i ai le filemu ma le Atua?
□ O le ā ua faavae ai le filemu ma le Atua i aso nei?
□ O le ā “le filemu mai le Atua” lea e leoleoina ai o tatou loto?
□ O ā faamanuiaga atili tatou te olioli ai pe afai tatou te maua le filemu ma le Atua?
[Fesili mo le Suʻesuʻega]