MATAUPU 17

Musika ma Siva E te Filifilia

1-3. (a) I le ā le auala e moni ai faapea ua fausia e Lē na Foafoaina mea musika i totonu o o tatou siomaga faalenatura? (e) Aumai ni faaaʻoaʻoga e faaalia ai faapea o loo faamaonia e le Tusi Paia siva.

NA FAUSIA e Lē na Foafoaina le tagata musika i siosiomaga o le tagata. E lē na o leo manino ma tafelemu o loo malele aʻe mai faaī o manu felelei, ae faapena foi le gasēsē mai o ālia, le agi fisaga o le matagi i luga o laau, le tagi mai o alisi, le tagi oolo mai o rane faapea ma le fetagisi mai o le tele o isi meaola o le laueleele—o nei mea uma lava e iai so latou leo faamusika. E lē o se mea la e maofa ai, le amata mai o le atiaʻeina o mea faimusika i tuā lava i le tafa o ata o le talafaasolopito o le tagata.

² E iai foi se talafaasolopito anamua o siva. I Isaraelu, sa taʻimua ai le tuafafine o Mose o Miriama i fafine i “topa ma siva.” E faapea foi ina ua uma ona fesoasoani le Atua i le Tupu o Tavita ina ia faatoilaloina fili leaga, “ona o atu ai lea o fafine mai aai uma o Isaraelu ua pepese, ma sisiva.” E mautinoa foi le faamaonia e Iesu Keriso o siva, talu ai na ia taʻua e avea o se vaega o se tausamiga e tatau ai i lana tala faatusa e uiga i le atalii faamaumau oa. Sa fetalai Iesu e uiga “i laaupese ua ta, ma le siva” na fuafuaina ina ua toe foi mai le atalii faamaumau oa. Ua faaalia e le Tusi Paia faapea o nisi siva sa faia e tagata taitoatasi po o ni vaega o tane po o fafine.—Esoto 15:20; 1 Samuelu 18:6; Luka 15:25.

³ Pe o lona uiga e tatau ona lelei uma musika ma siva? Pe manaomia ona e filifili  lelei i musika e te faalogologo i ai faapea ma siva atonu e te auai ai? O le ā le mea e mafai ona fesoasoani ia i tatou ina ia filifili ai? O le ā le tele e mafai ona afāina ai?

FILIFILIGA O SIVA

4-6. (a) O le ā e mafai ona avea ai nisi o siva ma mea e tetee i ai Kerisiano? (Kolose 3:5, 6) (e) Aiseā ua faatusalia ai nisi o siva faaonaponei i siva faafanau tama i aso anamua?

⁴ E tele naunau ituaiga eseese o siva—e amata mai i uosi onomea e oo atu i siva e taʻua o le polka e tiotio lona faiga. E iai siva faa-Amerika Latina o le conga, le rumba ma le samba, le merengue, le beguine atoa ma le bossa nova, o le tele lava o nei siva e iai o latou talaaga faa-Aferika. E iai foi le rock ‘n’ roll, faapea ma siva e tele lata mai nei. E iai ea se mafuaaga lelei i le pogai atonu e te tetee ai i nisi o nei siva?

⁵ E iai, pe afai o le siva e faagaeeina ai oe i feusuaiga faaleituaiga ma aumaia ai se faaosoosoga ina ia faia le amioga lē mamā faaleituaiga. E mafai ona ono faapogaia ai faafitauli e tele mo oe.

⁶ Mo se faaaʻoaʻoga, sa fuafuaina siva anamua o le fanau tama ina ia faaosofiaina ai faalogona tau i feusuaiga faaleituaiga ma o nisi o siva faaonaponei ua pei o nei siva. I ni nai tausaga ua mavae, na matauina ai e le mekasini o le Time e faapea:

“Muamua lava sa avea le Tuisi o se siva sa lava lona mamā . . . Peitai, ua toe faaolaolaina e talavou laiti i se (tasi o kalapu i Niu Ioka) Le Tuisi ma toe fatuina ai e pei o se ata ua toe faia o se sauniga a se ituaiga o tagata i le tauamatamataga o le olaga talavou.”

7-10. (a) Afai e auai se tagata i siva faapena, i luga o le ā le faavae atonu ua faatosina mai ai isi i lea tagata? O le a e manao ea ina ia faatosina mai tagata o le isi ituaiga ona o lena faavae? (e) Aiseā e manaomia ai le faaeteete e oo lava i siva i falesiva tetele?

⁷ O le tele o siva i tausaga lata mai, o ituaiga eseese o le Tuisi. E lē fepaiaʻi tagata sisiva, ae mafai ona femigoiaʻi suilapalapa ma tauʻau i ni auala e taʻu atu ai faiga faaleituaiga. Atonu e faigofie ona faagaeeina ai faalogona tau feusuaiga faaleituaiga o se talavou e ala i le matamata i se tino o faia nei femigoiaʻiga. Mo se faaaʻoaʻoga, atonu e lē manatu se teine e uiga i ai, na ona fai o gaoioiga o le siva. Peitai, e lē tatau ona ia faagaloina le iʻuga e oo i ai ē o loo maimoaina, ma le mea atonu latou te manatu ai e uiga ia te ia, e pei ona matauina e lenei tusi i le faatonu o le Times Magazine a Niu Ioka: “Tau ina ia tatou faamoemoe faapea o loo pepelo tino o o tatou tagata Tuisi tino laiti (ae lē matuā laiti tele), ia lē amioaʻi o latou mafaufau i totonu e pei o le auala o loo iai o latou nofoi ma fatafata i fafo.”

⁸ E tusa lava pe leai ni ou uunaiga sese, ae afai e te auai i siva faapena, o le a poto mo oe ona manatunatu i le ituaiga o faatosinaga o le a e iai i isi tagata talavou. Mo se faaaʻoaʻoga, pe o latou tosina atu ia te oe e faavae i le faagaeega faaleituaiga latou te maua mai ia te oe, le ituaiga o faagaeega e mafai ona latou maua mai tagata o ē laei i laei fufusi, ma femigoiaʻi o latou suilapalapa ma faia taga eseese e faagaee ai faalogona faaleituaiga? E te manao ea e faatosina mai se tasi i le na o luga o lena faavae? Pe e te manao i le ituaiga o tagata o lē fiafia ia te oe ona o lou lava tagata? ona o mea e te lagona e tāua i le olaga? ona o lau talanoa atu? E te naunau fiafia ea i se tasi o lē maua le fiafiaga i le faia o mea mo oe, pe na o mea e mafai ona ia maua mai ia te oe?

⁹ E oo lava i siva i falesiva tetele, lea e faamamafaina ai faiga o vae e ō faatasi ma gaoioiga onomea o le tino, ma e opoina ai e le tasi le isi, e mafai lava i nisi taimi ona faagaeeina ai i feusuaiga faaleituaiga ona o le vavalalata tele o fepaʻiaʻiga o tino. O lea, afai e te auai i siva faapena, ia mataulia ma le manatunatu le ono mafai ona faagaeeina ma le lē  tatau o lau paga e tusa lava pe atonu e te lagona faapea, lua te lē o vavalalata tele e te faatupuina ai faalogona fiafia tau feusuaiga mai le siva.

¹⁰ O se mea moni faapea o le tele o siva e lē mafai ona faavasegaina faapea e tatau pe lē tatau foi. O le tele o siva e mafai ona fai a lē i auala tatau ma mamā, po o se auala e solia ai le fautuaga a le Afioga a le Atua, ina ia faia i se amio mamā ma taʻuaogāina.

FILIFILIGA O MUSIKA

11, 12. E faatinoina faapefea e le musika lona malosiaga? Taʻu mai ni faaaʻoaʻoga.

¹¹ E manaomia le faaeteete ma le mafaufau lelei i lou filifilia o le musika e te faalogologo i ai, e pei lava ona faia i siva. Aiseā? Auā e iai le malosiaga o le musika. Ma e pei lava o so o se isi malosiaga, e mafai ona tautua mo le lelei po o le leaga.

¹² O fea e sau mai ai le malosiaga o le musika? E sau mai lona agavaa e faapogaia ai nisi o faalogona, lagona po o agaga i tagata. O le musika e mafai ona faatoafilemu ma faamālū ai, pe faafouina ma faaolaolaina ai. E toetoe lava e mafaia ona “lagonaina” le eseesega i le va o se pese faaili malosi ma se pesega mālū. O musika e mafai ona saveʻuina ai faalogona uma faaletagata—o le alofa, agavaivai, faaaloalo, faanoanoa, ita, inoino ma le faalogona tau feusuaiga faaleituaiga. Ua iloatino e tagata i le faagasologa mai o le talafaasolopito le malosiaga o musika, ma ua faaaogāina ina ia faagaeeina ai tagata i nisi o auala. Mo se faataʻitaʻiga, ua viiviia soo se vaega o le manumalo a le Fouvalega Falani i le mea ua taʻua e se tasi tusitala faapea, o “le valaau taufaamataʻu ina ia faaaogā auupega,” i le pese La Marseillaise. Ma e masani ona iai “pese tau” a aʻoga ua faaaogāina a o leʻi faia tauvaga afeleti.

13-16. (a) E fesootai faapefea le fautuaga i le Faataoto 4:23 i se filifiliga a se tasi e faatatau i musika? (e) E mafai faapefea ona avea musika ma se “mea e faapogaia ai se suiga faavavevave,” ma i nisi taimi e maua ai iʻuga e faaleagaina tumau ai?

¹³ Ua faafesootaia vavalalata e le Tusi Paia le loto ma faalogona ma uunaiga, o lea ua fautua mai ai le Afioga a le Atua: “Ia sili ona leoleoina o lou loto i le leoleoina o mea uma; auā e [ola, NW] tupu mai ai le amio.” (Faataoto 4:23) Talu ai o le malosiaga tau faalogona o musika o se mea moni, o lo tatou leoleoina o o tatou loto e manaomia ai le fili lelei o le musika tatou te filifilia.

¹⁴ E moni, o aafiaga faagaeeina o musika e mo na o sina taimi e lē tumau. Ae masani ona lava lona umi e aumaia ai se uunaiga ua uma ona filifilia i se tasi o itu, pe faaitiitia ai foi lou malosi e tetee atu i se tasi o faatosinaga po o se faaosoosoga. Afai na e suesue i mea tau vailaau (chemistry) i le aʻoga, na e aʻoaʻoina ai e uiga i le “mea e faapogaia ai se suiga faavavevave [catalyst].” Na e aʻoaʻoina ai faapea, o le tuufaatasia o ni vailaau e lua pe sili atu foi, e na o le pau lava le auala e masani ona mafai ona faataulauina ai, e ala lea i le faaaogāina o se isi mea, o le mea moni, e faatasia ai ia vailaau. O lea mea o le “mea e faapogaia ai se suiga faavavevave [catalyst].” O lenei la, e tofu uma lava i tatou ma nisi o vaivaiga ma faanaunauga sese, ma o lea tatou te lagona ai le faaosoosoga i nisi taimi ina ia faia nisi o mea e sese. Faapea la ua oo mai ni tulaga e faalaeiau ai oe ina ia e faia se gaoioiga sese. E mafai ona avea le musika ma “mea e faapogaia ai se suiga faavavevave [catalyst]” e faapogaia ai faanaunauga ma  tulaga ina ia tuufaatasia—ma iʻu ai i se mea atonu o le a mulimuli ane e faanoanoa tele ai. Sa faapea mai se tasi tagata suesue mo se komisi tamaitai faalemalo o loo suesueina amioga tau feusuaiga faaleituaiga i ata, tifaga ma tusi, e faavae i ana suesuega:

¹⁵ “O musika, e ala i le tāina faatatau i faalogona o tamaitai ina ia faagaeeina ai le alofa ma le alofa faaleituaiga, e avea soo lava ma mea e faapogaia ai se suiga faavavevave mo le alofa ma faapea ona avea ma mea e faagaeeina ai i faagaeega tau feusuaiga faaleituaiga i le tamaitai talavou. . . . E aumaia i luga e musika lea faalogona.”

¹⁶ Ioe, e mafai e le uunaiga puupuu ua aumaia e le musika, e ui ina e mo na o sina taimi lē tumau, atonu na o le pau lea o le mea e manaomia e faaosoina ai oe i se gasologa po o se auala o le olaga e tumau pe maua mai ai iʻuga e faapena. O lea, e lē aogā ea la ona e faaaogāina le utaga poto i mea e aafia ai musika?

LE FAAFITAULI O LE FILIFILIA

17, 18. E mafai faapefea ona e filifili e ala i le faalogologo i se musika, pe o se mea e lelei mo oe po o se mea e leaga?

¹⁷ O le mea moni lava, e leai se tasi na te mafaia ona saunia mo oe se lisi e vave iloa ai po o ā musika e lelei ma musika e leaga. O le mafuaaga ona toetoe lava o ituaiga uma o musika, e leai ni musika e mafai ona faavasegaina faapea e “lelei uma” pe “leaga uma.” E ao lava ona faaaogā lou mafaufau ma le loto mo le fuafuaina o aogā taitasi o nisi o musika, ma ia taʻitaʻiina e mataupu silisili e pei o ia ua uma ona iloiloina. Ma o lau filifiliga e taʻu atu ai i isi le ituaiga o tagata e iai oe.

¹⁸ “E le faamasino ea e le taliga i upu? e le tofotofo ea foi e le gutu i ana mea e ʻai?” o le fesili lea a Iopu i aso ua mavae. (Iopu 12:11) E faapea foi, e mafai e ou taliga ona tofotofoina musika. E tusa lava pe leai ni upu, ae masani lava ona e mafaia ona iloaina le ituaiga o lagona po o le agaga ua fuafuaina ai se musika ina ia aumaia le ituaiga o amio o loo faalaeiauina. O le tulaga lena na iai le musika na faalogo i ai Mose i lona alu ifo mai le Mauga o Sinai ma agaʻi atu i le togalauapi a le fanauga a Isaraelu. E pei ona ia faapea atu ia Iosua: “E le o le leo o e alalaga ina ua malo [pese o le manumalo]; e le o le leo foi o e alalaga ina ua lafoia [pese o le faanoanoa]; a o le leo o le pese lava ou te faalogo i ai.” Na faaatagia moni lava e pesega gaoioiga lē mamā ma le lē pulea faaifo i tupua.—Esoto 32:15-19, 25.

19-22. (a) O le ā e manaomia ai e i latou o ē fiafia i musika classical ona leoleo faasaga i ai? (e) O ā mea moni e tatau ma onomea ona manatunatu i ai ma le faaeteete e tusa ai ma aafiaga e oo i ai ona o nisi o musika jazz ma le rock?

¹⁹ Seʻi manatunatu i faaaʻoaʻoga e tele e leʻi mamao atu. Mo se faataʻitaʻiga, e masani ona iai i musika (classical) se leo mamalu ma i nisi taimi e malosi. Peitai, o le tele o ia musika e mafai ona iai se aafiaga matagofie i mafaufauga o se tasi, a o nisi o loo feagai ma e oo lava ina faamamaluina ai itu o le olaga e leaga pe manatu faapito. E aogā ona manatuaina faapea o le toatele lava o tagata fatu pese (classical) lauiloa na ola i ni olaga lē mamā, e oo lava i olaga e taʻitaʻiina atu ai i le leaga. Ma e ui lava e masani ona latou tusiaina mo se aufaalogologo faapea latou te talisapaiaina “mea lelei o le olaga,” ae toetoe lava lē maalofiaina faapea o nisi o a latou vaaiga piopio ma faalogona piopio o le a faaalia mai i nisi o a latou musika, pe iai ni upu pe leai foi. O lea, afai tatou te mananao e leoleoina le soifua malōlōina lelei o o tatou mafaufau ma loto, e oo lava i musika ua taʻua o musika “sili ona tāua,” e lē mafai ona taliaina e aunoa ma le fesiligia.

²⁰ I le isi itu o le faasologa faamusika e  amata mai fatuga (classical), tatou te maua ai le (jazz) tuʻi malosi faapea ma le musika (rock). E oo foi lava i nei musika e iloaina ai e se tasi o nisi o ia musika e fati mālie ma onomea. A o nisi e malosi ma īī. O le pogai lena e faaeseese ai e tagata fai musika lava latou le eseesega o le musika jazz ma le rock e “mālū” ma le musika e “aasa,” “malosi” po o le “aati.” E tatau ona mafai ona e iloa le ituaiga o amio o loo siitia e le musika—e tatau ona taʻuina atu ia te oe e lou taliga, lou mafaufau ma lou loto. I nisi taimi e matuā manino mai ai upu po o le leo o nisi o musika, ua faigofie ai ona faafesootaia e tagata ma nisi o ituaiga o amioga po o ituaiga o tagata. Mo se faaaʻoaʻoga, o loo tautala le Tusi Paia e faatatau i le “pese a e inu ʻava” ma le “pese i le fafine talitane.” (Salamo 69:12; Isaia 23:15, 16) Ae faapefea aso nei?

²¹ Mo se faaaʻoaʻoga, afai e te faitau i se nusipepa e uiga i se koniseti faamusika po o se faafiafiaga ma o loo taʻua ai i le lipoti ni tagata o loo feʻei, ni teine o loo matapogia, le faaaogāina o vailaau faasaina ma le aumaia o alii leoleo ina ia puipuia le fale o faafiafiaga mai le talepeina—o le ā le ituaiga o musika e te manatu na aafia ai i lea faaaliga? Afai e te faalogo i se tagata pese talavou lauiloa po o se faimusika ua vaivai a maliu ona o le ova o se inumaga o vailaau faasaina—o ā ituaiga o musika e te manatu na faapitoa ai o ia (tane pe tamaitai)?

²² Ai lava ua e iloaina faapea, o le toatele o tagata talavou ua tosina atu i musika rock ona latou te talitonu o loo faamatalaina mai e ona upu mea moni ma faafitauli o le lalolagi o loo siomia ai i latou. Atonu o le tele lava o so o se isi ituaiga o musika lauiloa, o musika rock o loo taumafai e aumaia ai se feau: e faatatau i faafitauli o le tuputupu aʻe, motusia o le fesootaiga i le va o matua ma fanau, vailaau, feusuaiga faaleituaiga, aiā faaletagata, feeseeseaiga, mativa, o taua ma mataupu tali faapena. O loo taumafai e faailoa mai le lē faamalieina o le toatele o tagata talavou i faamasinoga lē tonu faavafealoaʻi ma o latou manatu mo se lalolagi sili ona lelei. Ae o le ā le iʻuga masani ua oo i ai? O le ā ua ia faia mo le toatele o tagata talavou? O ā vaifofo moni ua aumaia e ona filosofia ia i latou? Afai ua fuafuaina musika faapena ina ia aumaia ai mea moni i lona tulaga tonu, aiseā ua tele ai ina fesootai ma vailaau faasaina, o nisi o upu e na o i latou o ē faaaogāina vailaau faasaina e malamalama ai? O fesili nei e ao ona manatunatu i ai.

23-25. (a) E tusa ai ma musika, o le ā le manatu o le fautuaga i le Failauga 7:5? (e) O ai e tatau ona tatou manatu i ai pe a filifilia musika ma siva? Aiseā? (1 Korinito 10:31-33; Filipi 1:9,10) (i) O lea, aiseā e lē o se mataupu māmā ai la tatou filifiliga e tusa ai i musika ma siva?

²³ O lea, e lē o se mataupu māmā lau filifiliga o musika. E te mafaia ona faatagaina isi latou te faia filifiliga mo oe i le na ona malilie faatasi ma tagata i le filifilia o le mea o loo lauiloa, le mea e tosina i ai le toatele o tagata. Po o lou mafaufau mo oe lava ma faaeteete i le filifiliga, ua taʻitaʻina e le atamai tumau ma le silisili ua maua i le Afioga a le Atua. Ua fai mai le Failauga 7:5: “E sili ona lelei o le faalogo i le aoaiga a le tagata poto, i le faalogo o se tasi i le pese a e valelea.” O le ‘valea’ o loo tautala i ai le Tusi Paia, e lē o le valea faalemafaufau, ae o le valea tau amio, o le mulimuli atu i se auala e na ona mafai ona aumaia ai faafitauli i le lumanai.

²⁴ Atonu e te lagona faapea e mafai ona e faalogologo i musika o loo iai nisi o upu e feteenai ma le mea moni ma le mea saʻo, pe iai foi se leo e faafiafiaina ai faalogona ma lē pulea, ae lē afāina ai lava. Atonu e faapena foi lou lagona i siva e te siva ai. Peitai, o le ā le ituaiga o taaʻiga o loo e iai i isi? Pe e te lagona e pei o le aposetolo o Paulo, o lē na faapea mai na ia lotomalie e faaseloa e oo lava i mea tatau e pei o le ʻai i aano o manufasi pe afai na te mafaia ona alofia ai le avea ma mea e tausuai ai isi? O le ā le ituaiga o tagata e mataulia ai oe e le musika e te filifilia?

²⁵ O lau filifiliga la o le musika e te faalogologo ai faapea ma siva atonu e te auai atu ai, e faaalia ai pe na ona e naunau fiafia mo se “taimi fiafia” po o se olaga fiafia, se olaga e faavavau i le finagalo lelei o le Atua.

[Fesili mo le Suʻesuʻega]

[Ata i le itulau 29]

E iai ni sivi i talafaasolopito ua leva.