O le Soifuaga o Iesu ma Lana Faiva

Tanumia i le Aso Faraile, se Tuugamau Gaogao i le Aso Sa

O LE afiafi po lenei o le Aso Faraile, ma o le Sapati o Nisani 15 e amata i le goto o le la. O loo tautau le tino maliu o Iesu i luga o le laau, ae o tagata faomea e toalua o loo i ona autafa, o loo ola pea. O le afiafi o le Aso Faraile ua taʻua o le aso o Sauniuniga ona o le aso lea e sauniuni ai e tagata mea taumafa ma faauma ai so o se galuega o manaomia vave e lē mafai ona faatali seia mavae le Sapati.

O le Sapati lea ua toeitiiti amata e lē gata o se Sapati masani, (le aso lona fitu o le vaiaso) ae o se Sapati e faaluaina, po o le Sapati “sili” foi lea. Ua taʻua faapea ona o Nisani 15, le aso muamua lea o le Tausamiga e fitu aso o Areto Lē Faafefeteina (ma e avea pea o se Sapati, e tusa lava po o le ā le aso o le vaiaso e paʻū i ai), e paʻū lava i le aso e tasi e pei o le Sapati masani.

E tusa ai ma le tulafono a le Atua, o tino oti e lē tatau ona tuu e tautau ai i le satauro e atoa se po. O lea ua fai atu ai tagata Iutaia ia Pilato ina ia faavavevave ona faaoti i latou ua faasalaina e ala i le gauia o o latou vae. Ona gaui ai lea e fitafita vae o faomea e toalua. Ae ona e foliga mai ua maliu Iesu, ua lē gauia ai ona aao. Ua faataunuuina ai i lenei mea le tusi: “E le gauia sona ivi.”

 Ae peitai, ina ia leai se masalosalo faapea ua maliu moni lava Iesu, ua tutuʻi ai e se tasi o fitafita lona itu i le tao. Ua ati atu le tao i le ogatotonu o lona fatu, ma tafe mai ai loa le toto ma le vai. O le aposetolo o Ioane, o lē sa avea o se molimau vaai tino, ua lipotia mai e faapea ua faataunuuina ai i lenei mea se tasi foi tusi: “E vaai atu i latou ia te ia na latou tuʻia.”

O loo iai foi i le taimi o le faaoosalaga o Iesu Iosefa mai le aai o Arimataia, o se sui o le au Saniterini, o se tagata e taʻuleleia. Sa musu o ia e au atu i la latou taupulega e tusa o le faaiʻuga lē tonu a le faamasinoga faasaga ia Iesu. O Iosefa o le soʻo moni lava o Iesu, e ui sa fefe e faailoa mai o ia o se soʻo o Iesu. Ae peitai, ua ia faaalia nei le lototele ma alu atu ia Pilato e talosaga atu i ai mo le tino o Iesu. Ua valaau atu Pilato i le taʻitaʻiʻau e pule, ma ina ua uma ona faamautinoa atu e le taʻitaʻiʻau faapea ua maliu Iesu, ona tuuina atu lea e Pilato le tino maliu.

Ua ave e Iosefa le tino ma aui i se ie lino e mamā lelei e sauniuni ai mo le tanuga. Sa fesoasoani ia te ia Nikotemo, o se tasi o sui o le au Saniterini. Ua lē taulau foi ia Nikotemo ona taʻutino atu lona faatuatua ia Iesu ona o le fefe ina neʻi leiloa lona tulaga. Ae ua ia aumaia nei se taʻaiga ie pe tusa ma le selau pauna Roma (33 kilokalama) o le muro ma aloe taugatā. Ua aui le tino o Iesu i fusi o loo iai nei mea manogi, e pei lava o le auala e faia ai le tu faa-Iutaia e saunia ai tino mo le tanuga.

Ona tuu ai lea o le tino i le tuugamau faamanatu fou a Iosefa lea sa eliina i le papa i se togalaau e lata ane. I le iʻuga, ona fuli atu lea o se maa tele i luma o le gutu o le tuugamau. Ina ia faaiʻuina le tanuga a o leʻi oo i le Sapati, ua faavave ai ona faia le sauniuniga o le tino. O le mea lea, ua faanatinati atu ai Maria le Makatala ma Maria le tinā o Iakopo le Itiiti, o ē atonu sa fesoasoani i le teuina o le tino, i lo latou aiga e sauniuni atili nisi mea manogi ma suauu manogi. Ina ua mavae le Sapati, ua latou fuafua e faia atili nisi mea manogi i le tino o Iesu ina ia taatia ai mo se vaitaimi umi.

O le aso na sosoo ai, o le Aso Toonai lea (le Sapati), ua ō atu ai ositaulaga sili ma Faresaio ia Pilato ma faapea atu: “Le alii e, ua matou manatua, na fai mai lena tagata pepelo ina o ola mai o ia, A mavae aso e tolu ou te toe tu mai ai. O lenei, ia e fetalai ane, ia faamauina le tuugamau seia oo i le aso tolu, ina neʻi ō atu ona soʻo i le po, ma gaoi ia te ia, ma latou fai atu i le nuu, Ua toe tu mai ia nai ē ua oti; ona sili ai lea o le pepelo e mulimuli i lē na muamua.”

“Ua ia te outou leoleo,” ua tali atu ai Pilato. “Ina ō ia, faitalia outou ona faamau ai.” O lea ua latou ō ai ma faamau le tuugamau, e ala i le faamaufaailogaina o le maa ma tuu ai fitafita Roma e leoleo ai.

I le taeao po lava o le Aso Sa ua aumai ai e Maria le Makatala, Maria le tinā o Iakopo, faatasi ma Salome, Ioana, ma isi fafine mea manogi e teu ai le tino o Iesu. Ua latou feoai ma faapea ane le tasi i le isi: “Po o ai o le a na fuliesea le maa mai le gutu o le tuugamau mo i tatou?” Ae ina ua taunuu atu, ua latou iloa ai na lūlū se mafuie ma na fuli ese ai e le agelu a Ieova le maa. Ua leai ni leoleo, ma ua gaogao le tuugamau! Mataio 27:57–28:2; Mareko 15:42–16:4; Luka 23:50–24:3, 10; Ioane 19:31–20:1; 19:14; 12:42; Levitiko 23:5-7; Teuteronome 21:22, 23; Salamo 34:20; Sakaria 12:10.

◆ Aiseā ua taʻua ai le Aso Faraile o le aso o Sauniuniga, ma o le ā le Sapati “sili”?

◆ O ā tusi ua faataunuuina e tusa ai ma le tino o Iesu?

◆ O le ā ua faia e Iosefa ma Nikotemo i le tanuga o Iesu, ma o le ā la latou faiā ma Iesu?

◆ O le ā le talosaga ua faia e ositaulaga ia Pilato, ma o le ā lana tali atu?

◆ O le ā ua tupu i le taeao po lava o le Aso Sa?