Gaoioi le Kariota Faalelagi a Ieova

“A o mea taavavale, ua valaau le tasi ia te i latou, o loo ou faalogo atu, Le mea taavale e.”—ESEKIELU 10:13.

1. O le ā le fausaga tau femalagaiga o loo ia Ieova?

ONA o aso nei ua iai vaalele tetele e lago lelei, atonu ua manatu ai taʻitaʻi o le lalolagi o loo latou olioli i se tulaga muamua i le faafoeina o femalagaiga. E ui i lea, i le 2,600 tausaga ua mavae, sa faaalia ai e Ieova le Atua faapea o loo ia te ia se fausaga aupito sili ona maoaʻe tau femalagaiga, se ituaiga e leai se inisinia ua tagaʻi muamua i ai. O se kariota telē, ma le paū! Pe foliga mai ea o se mea uiga ese le feafioaʻi o Lē na Foafoaina mea o le vateatea i se taavale e pei o se kariota? Leai, auā e ese mamao le taavale faalelagi a Ieova mai so o se taavale ua fausia e tagata.

2. Ua faaataina mai faapefea e le Esekielu mataupu 1 le kariota faalelagi a Ieova, ma o ai ua muamua tataʻi atu i ai e le perofeta o tatou manatu?

 ² I le Esekielu mataupu 1 o le valoaga a Esekielu, ua faaataina ai Ieova e peiseai o loo tietie mai i se kariota faalelagi e mataʻutia le telē. O lenei taavale mamana e fa ona uili, e iai ona lava peapea ma e mafai ona ia faia mea ofoofogia. Sa maimoaina e Esekielu lenei kariota faalelagi i se vaaiga i le 613 T.L.M., a o iai o ia i tafatafa ane o se vaitafe o Papelonia anamua. Ua muamua ona tataʻi atu e le perofeta o tatou manatu ia i latou na o loo vagavagaia le kariota faalelagi a Ieova. A o tatou faitauina, seʻi o tatou taumafai e vaai faalemafaufau i le mea na tagaʻi i ai Esekielu.

Mea Ola e Fa

3. O le ā ua faatusa i ai foliga taʻi fa o kerupi taitasi e fa?

³ Ua lipotia mai e Esekielu: “Na ou vaai, faauta foi, o le afā o loo sau i le itu i matu, o le ao tele, ma le afi, o loo mu lava e ia ia ia, o le pupula foi ua faataaliolioina ai le ao . . . Mai totonu foi le faatusa o mea ola e fa.” (Esekielu 1:4, 5) E tofu a nei meaola taitasi e fa, po o kerupi, ma apaau taʻi fa ma foliga taʻi fa. Na ia i latou foliga o se leona, e mataulia ai le faamasinotonu o Ieova; o foliga o se povi poʻa, e fai ma sui i le malosi o le Atua; ma foliga o se aeto, e faailoa mai ai Lona atamai. Na ia i latou foi foliga o se tagata, e suitulaga i le alofa o Ieova.—Teuteronome 32:4; Iopu 12:13; Isaia 40:26; Esekielu 1:10; 1 Ioane 4:8.

4. Aiseā ua taʻi fa ai foliga o kerupi, ma e faapeī le saoasaoa o kerupi?

⁴ E tofu a le kerupi ma se foliga o loo tagaʻi i se tasi o itulagi e fa. O lea, ua mafai ai e kerupi ona suia faanatinati lo latou ala ae mulimuli atu i le foliga o loo tagaʻi i le itulagi ua manaomia. Ae e faapeī le saoasaoa o na kerupi? Ioe, e mafai ona latou gaoioi e pei o le emo o le uila! (Esekielu 1:14) E augapiu ma se taavale ua fausia e le tagata ua ausia lena saoasaoa.

5. Ua faamatalaina faapefea e Esekielu uili o le kariota ma ona mea e lio ai?

⁵ Ua faafuaseʻi lava ona aliali mai uili o le kariota. Maeu lo latou uiga ese! Fai mai le Esekielu 1 fuaiupu e 16 ma le 18: “O latou tino mai ma o latou gaosiga ua peiseai se mea taavale i totonu o le mea taavale. O mea foi e lio aʻi (rims) i latou ua maualuluga lava, ua tupu ai le mataʻu; ua soo foi mea e lio aʻi i latou i mata, ua faataaliolioina ai i latou e fa.” O uili i tafatafa o kerupi taitasi e pei o ni uili se fa i nofoaga fesootai e fa. Ua pupula mai ia uili e peiseai o le tasesa, o se mea e vavala pe susulu faasamasama po o se maa lanumeamata. E faaopoopo atu e lenei mea le malamalama ma le matagofie i lea vaaiga mamalu. Talu ai ona sa ‘soo faataaliolio i mata’ mea e lio ai uili, latou te leʻi ō pogisa la i so o se itu. Ma ona o le maualuluga tele o na uili, e mafai ai ona ufitia se va mamao i na o sina faatamilosaga lava e tasi o lona ʻau. Sa pei i latou o kerupi e fa, e mafai ona gaoioi i se saoasaoa e pei o le emo o le uila.

Uili i Totonu o Uili

6. (a) Na faapefea ona iai uili i totonu o uili o le kariota? (e) Sa mulimuli atu le ala o gaoioiga a uili i le ā?

⁶ Ae sa iai se isi mea uiga ese. E tofu a le uili ma se uili o loo iai i totonu—o se ituaiga e tutusa lona lautele ua faamau faalava agaʻi i le uili e pito i lalo. Na pau lenei o le auala e mafai ai ona faapea o loo “o [faatasi] i o latou itu e fa.” (Esekielu 1 Fuaiupu 17) E mafai ona suia faafuaseʻi le itulagi e ō i ai uili ona o loo iai pito o le uili o loo faasasaga i itu  taitasi. E mulimuli atu le ala o gaoioiga a uili i le mea e ō i ai kerupi e fa. I luga o nei uili e fa, o loo tietie atu ai le tino o le kariota a le Atua e ala i se lagolago lē vaaia, e tali tutusa ma se vaa malosi o loo taofi aʻe i luga e se taga ʻea a o ia faasee atu i luga o le vai.

7. O le ā sa avea ma puna o le malosi mo uili?

⁷ O fea e aumai ai e uili lenei malosi e mulimuli atu ai i gaoioiga uma a kerupi e fa? E mai le agaga paia o le Atua e Ona le Malosi Uma Lava. Fai mai le fuaiupu e 20: “O le mea a alu i ai le agaga ua o i ai i latou . . . auā na i ai le agaga o mea ola i mea taavavale.” O le malosi galue lava e tasi o le Atua lea sa i totonu o kerupi, lea foi sa i na uili.

8. O le ā le igoa sa avatu i uili, ma aiseā?

⁸ O le faaupuga ua ave i nei uili o le “mea taavale” galue. (Esekielu 10:13) Sa faamaonia le fetaui o lena igoa ona o le mea o loo faia e uili taitasi. O loo taavili atu pe taamilo. O le faailogaina o lenei vaega o le kariota faalelagi i sea auala, ua faamanatu mai ai le saoasaoa o loo gaoioi ai le kariota faalelagi. E ui ina matuā taavili saoasaoa ona uili, o loo mafai pea ona latou tagaʻi i lo latou auala auā e anoanoai o latou mata.

9. Na faamatalaina faapefea e Esekielu le mea sa i luga aʻe o uili e fa televavave o le kariota?

⁹ Ae i le taimi lenei, seʻi o tatou tepa atu ma tagaʻi po o le ā o loo i luga o na uili e fa, maualuluga tau faamataʻu, toe televavave. Fai mai le fuaiupu e 22 o le Esekielu mataupu 1: “O le va i lagi i luga o ulu o mea ola ua tino mai ua pei o le maa tioata matautia, ua folasia i luga o latou ulu i o latou luga ae.” E ui ina tiʻaa lena va, ae sa susulu mai e “pei o le maa tioata matautia.” Na feilafi mai e peiseai o le faitau afe o taimane pe a sulugia i latou e le la. Ioe e matuā ofoofogia!

Le Tietie Kariota Mamalu

10. (a) Ua faamatalaina faapefea le nofoalii ma Lē o loo iai i le nofoalii? (e) O le ā ua faailoa mai e le mea moni faapea o loo fusia Lē tietie kariota i le mamalu?

¹⁰ E foliga o lena ua tu le kariota, ina ia mafai ai ona saunoa atu Lē o loo tietie ai ia Esekielu. I luga aʻe o le va i lagi, o loo iai le faatusa o le nofoalii, ua tino mai e pei o le maa safaira, pe lanu moana pauli. O loo iai foi se Tasi i luga o le nofoalii, ua tino mai e pei o se tagata. Ua avea lea foliga faaletagata o se fesoasoani sili ia Esekielu e sapaitalia ai lenei faaaliga tauatua. Ae o lena foliga faaletagata ua fusia i le mamalu, ina ia susulu ai e sili atu i le eletise, o se aloi pupula o le siliva ma le auro. Maeu se matagofie faamaniti tino! Mai le sulugatiti o lenei foliga faaletagata, ua faasalafa ane ai lenei mamalu anagatā i luga ma lalo. O lea sa faataaliolioina ai le tino atoa i le mamalu. Ua faaalia ai i lenei mea le mamalu lē mafaamatalaina o Ieova. E lē gata i lena, o loo faafeao mai Lē tietie ai e se nuanua matagofie. Maeu le toafilemu ma le fifilemu ua faailoa mai e le nuanua ina ua mavae atu se afā! O le iai o lena uiga toafilemu, ua tausia ai pea e Ieova ona uiga o le atamai, faamasinotonu, malosi, ma le alofa i le paleni lelei atoatoa.

11. Sa afaina faapefea Esekielu i le vaaiga o le kariota ma le nofoalii o Ieova?

¹¹ O loo siosiomia le kariota ma le nofoalii o Ieova i le malamalama ma ni lanu matagofie. Maeu se eseesega ma Satani, le alii o le pogisa ma faiga faataulaitu! Ma sa afaina faapefea Esekielu mai nei mea uma? Ua ia taʻua, “Na ou iloa ai, ona ou faapaū fao ai lea, ona ou lagona lea le siufofoga o le tasi ua fetalai mai.”—Esekielu 1:28.

Le Mea ua Faaataina e le Kariota

12. O le ā ua faaataina e le kariota faalelagi a Ieova?

¹² O le ā ua faaataina e lenei kariota ofoofogia? O le faalapotopotoga faalelagi a Ieova le Atua. Ua faia aʻe lea i meafaiola uma a lona agaga paia i le afioaga lē vaaia—o serafi, kerupi, ma agelu. Ona o Ieova o ia o le Atua e Silisili ona Maualuga, ua gauai atu ai ana meafaiola uma faaleagaga ia te ia, ma e tietie atu o ia ia te i latou i se uiga faapea na te pulea ma le maopoopo i latou ma faaaogāina i latou e tusa ma lana fuafuaga.—Salamo 103:20.

13. (a) Aiseā e mafai ai ona faapea o loo tietie atu Ieova i lana faalapotopotoga? (e) E faapefea ona afaina oe i le vaaiga o le kariota e fa uili a Ieova o loo gaoioi?

 ¹³ E pei o loo i luga o se kariota, ua tietie atu ai Ieova i lenei faalapotopotoga, ua mafua ai ona gaoioi i so o se mea e tofia agaʻi i ai o ia e lona agaga. E lē faapea o soona alu, e aunoa ma se tapasa po o se faatonutonuga atamai. Ua lē faatagaina e le Atua lenei faalapotopotoga e alu i so o se itu atonu ua tosina e alu i ai. Na i lo lea, e mulimuli atu i lana taʻitaʻiga. I se auala tuufaatasi, ua latou agaʻi uma ai i luma ma le autasi i le faataunuuga atoatoa o fuafuaga a le Atua. Maeu se faalapotopotoga faalelagi ofoofogia ua faaalia mai i lenei vaaiga o le kariota faalelagi e fa uili a Ieova o loo gaoioi! I le ōgatasi ma lenei mea, ua folasia ai le faalapotopotoga a Ieova faapea e faatafafā, e paleni lelei atoatoa.

Tofia o se Tagata Vaai

14. O ai ua faaataina e le perofeta o Esekielu?

¹⁴ Ae o ai ua faaataina e le perofeta o Esekielu? Mai mea moni o talafaasolopito, ua faamaonia ai faapea o le tino o Molimau a Ieova faauu-agagaina sa auaumea ma le kariota faalelagi. I lea, o Esekielu ua matuā faaataina ai le vaega totoe faauuina o Molimau a Ieova talu mai le 1919. Sa feoeoeai faaleagaga, le faalapotopotoga faalelagi a le Atua ma le vaega totoe faauuina i lena tausaga, e toe faaolaolaina ai i latou o ni Molimau a Ieova i le lalolagi uma. (Faatusatusa Faaaliga 11:1-12.) O lena faalapotopotoga e pei se kariota sa gaoioi i nā aso, o loo gaoioi foi i aso nei. O le mea moni, o le agaʻi i luma o ona uili ua sili atu ona moe lana taavili na i lo muamua. O loo faanatinati ona tietie atu ai Ieova agaʻi i luma!

15. O le ā na fetalai mai ai le siufofoga o Lē tietie i le kariota faalelagi, ma o le ā le tofiga ua maua e Esekielu?

¹⁵ Sa naunau Esekielu e fia iloa le pogai na oo mai ai lenei kariota faalelagi ma tu i ona luma. Na ia iloa ina ua malele mai ia te ia se siufofoga mai Lē o loo tietie i luga o le kariota. I le gatete tele i lenei vaaiga ofoofogia, na faapaʻū faō ai Esekielu. Faalogo foi a o fetalai mai le siufofoga o Lē tietie i le kariota faalelagi: “Le atalii e o le tagata, ina tulai ia i luga i ou vae, ou te fai atu ai ia te oe.” (Esekielu 2:1) Ona faatonu lea e Ieova o Esekielu e avea ma tagata vaai ma ia lapataia le aiga fouvale o Isaraelu. Sa faatonuina foi o ia e tautala atu i le suafa tauatua. O le uiga o le igoa o Esekielu o le “Faamalosia e le Atua.” O lea la sa faamalosia ai e le Atua le vasega a Esekielu ma aauina atu i latou e ō, i le tofiaina o i latou e avea ma tagata vaai ia Kerisinetoma.

16, 17. (a) Na aogā faapefea ia Esekielu le vaaiga i le kariota faalelagi? (e) I o tatou aso, e faapefea i le malamalamaga i le vaaiga o le kariota faalelagi ona aafia ai le vasega a Esekielu ma le motu o tagata e toatele?

¹⁶ E lē gata sa faateʻia ma maofa Esekielu i le faaaliga o le kariota faalelagi, ae sa sauniunia ai foi o ia mo lona tofiga o se tagata vaai e faaleoina atu le lapataiga o le oo mai o le faaumatiaga o Ierusalema. Ua moni foi lea i le vasega o le tagata vaai i aso nei. O lo latou malamalamaga i le vaaiga o le gaoioi o le kariota faalelagi a Ieova sa matuā tuʻi tino ai le vaega totoe faauuina. I le 1931 sa latou aʻoaʻoina ai atili e uiga i le vaaiga a Esekielu, e pei ona faaalia i le Vindication, Tusi Muamua. O inā na faatumuina ai i latou i le talisapaia loloto ma faapea ona amata mai ai i le lomiga o Oketopa 15, 1931, e oo ia Aokuso 1, 1950, sa tauaveina ai e se ata i le faavaa pito i luma o Le Olomatamata i lona itu taumatau i luga, se uiga faalemafaufau o le vaaiga a Esekielu o le kariota faalelagi. I lea, ua gaoioi ai le vasega a Esekielu i le tofiga na tuuina atu ia te i latou, ma ua latou auauna o se tagata vaai, e faaleoina atu le lapataiga tauatua. Sa leʻi faapea muamua le lalata tele mai o le taimi mo le faaumatiaga mumū o Kerisinetoma mai ia Ieova o loo afio i lona kariota faalelagi!

¹⁷ I aso nei, ua auaumea faatasi “se motu o tagata e toatele” o tagata e pei ni mamoe ma le vaega totoe faauuina. (Faaaliga 7:9) I  se auala tuufaatasi, ua latou faaleoina atu ai le lapataiga i le fotuai mai o le faaumatiaga i luga o Kerisinetoma ma lenei faiga o mea aoao faatiapolo. O loo faanatinati ona faia o lena galuega lapatai, ma e pei ona faaalia i le Faaaliga 14:6, 7, o loo lagolagoina lenei e agelu.

Ō Faatasi ma le Kariota Faalelagi

18. O le ā e tatau ona fai ina ia maua ai le lagolagosua e lē aunoa a agelu, ma o le ā e ao ona tatou gauai atu i ai?

¹⁸ O loo gaoioi autasi agelu usiusitai o se vaega o le faalapotopotoga faalelagi a le Atua, a o ia fesoasoani i auauna faalelalolagi a Ieova e faataunuuina lo latou tofiga, ia faalauiloa lapataiga o le faamasinoga tauatua. Afai tatou te faanaunau e faaauau le puipuiga ma le taʻitaʻiga a na auauna malolosi faaagelu a le Atua, e tatau foi la ona tatou gaoioi autasi ma agaʻi i luma faatasi ma le mea taavale galue faafaatusa. E sili atu i lena, i le avea ma vaega o le faalapotopotoga vaaia a Ieova o loo ō faatasi ma lana kariota faalelagi, e tatau ona tatou gauai i taʻitaʻiga a le agaga o le Atua. (Faatusatusa Filipi 2:13.) Afai o i tatou o ni Molimau a Ieova, e tatau la ona tatou ō i le faasinoga e tasi e pei o le kariota faalelagi. E mautinoa e lē tatau ona tatou gaoioi faasagatau i lana fuafuaga. A aumaia se faatonuga i le ala e ao ona tatou ui ai, e tatau lava ona tatou mulimuli ai. I lea, o le a lē fevaevaeai ai le faapotopotoga.—1 Korinito 1:10.

19. (a) E pei lava ona faataaliolio atoa mata i uili o le kariota faalelagi, o le ā e tatau i tagata o Ieova ona mataalia ai? (e) O le ā e ao ona avea ma ala o a tatou gaoioiga i nei taimi fenuminumiai?

¹⁹ O mata o loo faaliolio atoa i uili o le kariota a le Atua e faaalia ai le mataala. E pei lava ona mataala le faalapotopotoga faalelagi, e tatau foi la ona tatou mataalia e lagolago le faalapotopotoga faalelalolagi a Ieova. I le tulaga tau faapotopotoga, e mafai ona tatou faaalia lena lagolagosua, i le felagolagomai ma toeaina i le faapotopotoga. (Eperu 13:17) Ma i nei aso o le fenuminumiai, e manaomia e Kerisiano ona matuā piiama i le faalapotopotoga a Ieova. Tatou te lē mananao e fai a tatou lava faauigaina o mea tutupu, auā o le a tatou lē gaoioi faatasi ai la ma le kariota faalelagi a Ieova. Seʻi o tatou fesili ane pea ia i tatou, ‘O fea le auala o loo gaoioi agaʻi i ai le kariota faalelagi?’ Afai tatou te agaʻi faatasi i luma ma le faalapotopotoga vaaia a le Atua, o le a tatou ō faatasi foi la ma le faalapotopotoga lē vaaia.

20. O le ā le fautuaga lelei ua aumaia e le aposetolo o Paulo i le Filipi 3:13-16?

²⁰ Na tusia e Paulo, e faatatau i lenei: “Le au uso e, ou te le manatu ua ou maua, a o le mea e tasi ou te faia, ou te faagalogalo i mea ua tuanai, ou te momoʻe punou aʻi foi i mea o lumanai, ou te tausisi atu i le faailoga, ia maua ai le taui na valaauina ai aʻu mai lugā e le Atua ia Keriso Iesu. O lenei, o i tatou uma o e ua atoatoa ona lelei, ia tatou manatunatu i lenei mea; afai foi e ese so outou manatu i se isi mea, e faaalia mai e le Atua lea lava mea ia te outou. A o le mea ua tatou oo i ai, ia savavali faatatau [i] lea lava [masani, NW] ia manatunatu i lea lava mea.”—Filipi 3:13-16.

21. O le mulimuli i le ā le masani e mafai ai ona agaʻigaʻi i luma faaleagaga ma le faalapotopotoga a le Atua?

²¹ O le upu “masani” i inei, e lē o lona uiga o se amioga leaga e faafaigata ona tatou tuua. Ua iai i auauna a Ieova se masani lelei, lea ua mafai ai ona latou agaʻigaʻi i  luma faaleagaga. O le masani o le faia o suesuega totino faale-Tusi Paia, auai i sauniga a le faapotopotoga, talaʻi e lē aunoa le tala lelei o le Malo, ma faaatagia uiga o le faalapotopotoga faalelagi a le Atua. O sea masani ua mafai ai ona latou mulimuli i taʻitaʻiga a le faalapotopotoga faalelagi pei se kariota a Ieova. I le tauivi pea i lenei auala, o le a tatou maua ai lo tatou sini, pe o le taui o le ola e lē mafai ona oti i le lagi po o le ola e faavavau i se lalolagi parataiso.

22. (a) Ina ia maopoopo ona autasi le vaega totoe faauuina ma le motu o tagata e toatele o isi mamoe, o le ā e tatau ona fai? (e) O le ā e lē mafai ona sao i le silasila a Ieova?

²² E pei ona faaalia i le Ioane 10:16, o le a maopoopo ona autasia “isi mamoe” ma le vasega a Esekielu. O lea, ua matuā manaomia ai ona puʻe e tagata uma i le faalapotopotoga a Ieova, le uiga atoatoa ma le aogā o le vaaiga ua faamauina i le Esekielu mataupu 1 pe afai o le a latou gaoioi autasi ma le kariota faalelagi a le Atua. Ua fesoasoani ia i tatou lona faaalia mai e talisapaia ai faapea e ao ona tatou gaoioi ia ōgatasi ma le faalapotopotoga a le Atua, e vaaia ma le lē vaaia. Ia teu foi i manatu, o fofoga o Ieova o loo “fetaufetuliai i le lalolagi uma, na te fesoasoani ia te i latou o e ua sao o latou loto ia te ia.” (2 Nofoaiga a Tupu 16:9) E lē mafai ona sao se mea e tasi i le silasila a Ieova, ae maise lava i so o se mea e uiga i lana fuafuaga ia faasilisilia o ia lava o le Silisiliese Aoao.

23. Ona o loo gaoioi le kariota faalelagi a Ieova, o le ā e tatau ona tatou faia?

²³ O le mea mautinoa o loo gaoioi le kariota faalelagi a Ieova i aso nei. Ua toe o se aga ona aumaia lea o mea uma lava i le mamalu e ōgatasi ma Lē e malualii o loo tietie i lena kariota—e faasilisilia uma ai o ia o le Alii Silisiliese o le vateatea. O loo lagolagoina i tatou e ana serafi, kerupi, ma agelu i la tatou galuega talaʻi tele i le lalolagi aoao. O lea, seʻi o tatou agaʻi ia i luma, ma le faalapotopotoga faalelagi a Ieova. Peitai e mafai faapefea ona tatou savavali faatasi ma lena kariota faalelagi o loo alu saoasaoa?

O le a Faapefea ona E Tali?

□ O ā uiga ua suitulaga i meaola e fa na vaaia e Esekielu?

□ O le ā ua faaataina e le kariota faalelagi a Ieova?

□ O ai ua faaataina e le perofeta a le Atua o Esekielu?

□ E faapefea i le malamalamaga i le kariota faalelagi a Ieova ona aafia ai le vasega a Esekielu ma le motu o tagata e toatele?

[Fesili mo le Suʻesuʻega]