Savavali Faatasi ma le Kariota Faalelagi a Ieova
Savavali Faatasi ma le Kariota Faalelagi a Ieova
“Ia e fai atu lava aʻu upu ia te i latou, pe latou te faalogo, pe leai.”—ESEKIELU 2:7.
1, 2. O le ā le kariota tautupu na maimoaina e Esekielu, ma o le ā na taʻu atu ia te ia?
UA TU nei le kariota faalelagi a Ieova i luma o ana auauna. I mata o le faatuatua, ua latou iloa atu ai lena nofoa faataavalevale tautupu a lo latou Alii Silisiliese. E mamalu, ofoofogia, ma malualii.
2 O le kariota tautupu a lea e tasi, na tu mai i luma o le perofeta a le Atua o Esekielu i le vaaiga i nai tausaga e 2,600 ua mavae. Mai lena nofoalii e pei se kariota—le faalapotopotoga faalelagi o meafaiola agaga a le Atua—na fofoga atu ai e Ieova lenei faatonuga faamaniti tino ia Esekielu: “O tagata mata le mamā, ma le loto maaa, ou te auina atu ai oe ia te i latou; e te fai atu ia te i latou, Ua faapea ona fetalai mai ai o le Alii o Ieova. O i latou foi, pe latou te faalogo, pe leai, auā o le aiga fouvale i latou, latou te iloa sa i ai le perofeta ia te i latou.”—Esekielu 2:4, 5.
3. O le ā le vaega faaonaponei o loo iai a Esekielu?
3 Sa tauaveina ma le lototele e Esekielu lena tofiga, i le auauna o se meafaigaluega e toatasi i le aao tauatua. I se tulaga tutusa, ua pulea ai nei e le Atua se meafaigaluega faalefaalapotopotoga e toatasi. O loo taulamua ai le vasega a Esekielu, le vaega totoe faauuina, i le galuega o le avatuina o se molimau faaiʻu, faatasi ma “le motu o tagata e toatele” o “isi mamoe” o loo siʻo faataamilo ai e avatu le lagolagosua. (Faaaliga 7:9, 10; Ioane 10:16) O i latou uma o se “lafu e tasi,” ma le Leoleo Mamoe Lelei, o Iesu Keriso, o loo taʻitaʻia i latou i lalo o le pule a le Tietie Kariota sili, o Ieova le Atua.
4, 5. Na faapefea ona aliaʻi mai le faalapotopotoga vaaia a le Atua, ma o le ā ua oo i ai e tusa ma le Isaia 60:22?
4 I lalo o le taʻitaʻiga a Ieova, ua tuputupu aʻe ai lenei faalapotopotoga i le lalolagi aoao mai ni nai amataga itiiti seia avea ma vaega e sili ona malosi i le folafolaina o le faatonuga ia “matatau i le Atua, ma avatu ia te ia le viiga, auā ua oo mai le itu aso o lana faamasinoga.” (Faaaliga 14:7) E pei ona lē faatuina e Esekielu pe tofia ia lava o se perofeta, e faapena foi ona lē foafoaina pe tofia e le faalapotopotoga vaaia a le Atua ia lava. E leʻi afua mai i se maliliega po o se taumafaiga faaletagata. Ua faapogaia e le Tietie Kariota tauatua lenei faalapotopotoga ia iai. I le faamalosia e le agaga o le Atua ma lagolagoina e le au agelu paia, ua oo ai i tagata o Ieova se faatelega mataʻina ua faapea ai ona ‘avea le toaitiiti e fai ma nuu malosi.’—Isaia 60:22.
5 E silia i le 4,000,000 Molimau a Ieova o loo faalauiloaina le feau o le Malo i atunuu e 212. Ua faavasegaina i latou i le silia i le 63,000 faapotopotoga ua faamaopoopoina i matagaluega ma itumalo. O loo faagaoioia ofisa tetele o lala ma fale lomitusi i lalo o le taʻitaʻiga a le Vaega Pule o le autū lea o le ofisa ulu o le faalapotopotoga. Ona e pei i latou o se tagata e toatasi, ua latou agaʻi uma ai i luma, i le talaʻia o le tala lelei, aʻoaʻoina o i latou e talilelei mai, ma fausia nofoaga o sauniga. Ioe, o loo savavali faatasi le faalapotopotoga vaaia a Ieova ma le kariota faalelagi ma Lē o loo tietie ai.
6. O le ā e aofia ai i le savavali faatasi ma le faalapotopotoga vaaia a Ieova?
6 Afai o oe o se tasi o Molimau a Ieova, pe o lua savavali faatasi ea ma le faalapotopotoga vaaia a le Atua? O le faia faapea e lē na o se mataupu o le auai i sauniga Kerisiano ma le faaaluina o taimi i le faiva. Muamua, e fesootai le savavali ma le agaʻigaʻi i luma ma le tuputupu aʻe faaleagaga. E aofia ai se vaaiga mautinoa, le faatulagaina tatau o mea e faamuamua, ma le ō faatasi. Afai o tatou savavali faatasi ma le kariota faalelagi a Ieova, e ao la ona talafeagai o tatou olaga ma le feau o loo tatou folafolaina.
7. Aiseā e manatunatu ai i le amio a Esekielu o se perofeta a le Atua?
7 I le mataupu o le savavali faatasi, e tele ni mea e mafai ona aʻoaʻoina e auauna faaonaponei a Ieova mai le faaaʻoaʻoga a Esekielu. E ui ina sa tofia faapitoa o se perofeta e Ieova, ae na iai pea faalogona, popolega, ma manaoga o Esekielu. Mo se faataʻitaʻiga, i le avea o se tagata talavou faatoʻā faaipoipo, na mafatia ai o ia i le faanoanoa ona o le toesea o lana avā i le oti. Peitai, sa lē taitai ona ia faamaamulu ai i lona tofiga o se perofeta a Ieova. I le iloiloina o le auala na pulea ai e Esekielu ia lava i isi foi itu, e mafai ai ona faalaeiauina i tatou ia savavali faatasi ma le faalapotopotoga vaaia a le Atua. O le a mafai ai i lenei mea ona tatou savavali faatasi ma lana faalapotopotoga lē vaaia.
Talia le Tofiga ma Faataunuu
8. E tusa ai ma lona tofiga, o le ā le faaaʻoaʻoga ua faataatia e Esekielu?
8 Ua faataatia e Esekielu se faaaʻoaʻoga lelei i le taliaina o lona tofiga ma faataunuuina. Peitai, sa manaomia le usiusitai ma le lototele e faatinoina ai, auā ua tatou faitauina: “O oe na foi, le atalii o le tagata, aua e te fefe ia te i latou, aua foi e te fefe i a latou upu, e ui ina ua outou i ai ma e o fouvale ma mea matuitui, ma outou nonofo ma akarava, aua e te fefe i a latou upu, aua foi e te mataʻu i o latou mata, e ui lava o le aiga fouvale i latou. Ia e fai atu lava aʻu upu ia te i latou, pe latou te faalogo pe leai, auā ua fouvale lava i latou. A o oe le atalii o le tagata, faalogo mai ia i le mea ou te fai atu ai ia te oe, Aua e te fouvale oe, e pei o lena aiga fouvale.”—Esekielu 2:6-8.
9. Tau lava o le faia o le ā o le a saoloto ai Esekielu mai le nofosala i le toto?
9 Sa lē manaomia ona faalotolotolua pe mataʻu Esekielu, e ala ai ona toe tau uunaia pea e faataunuu lona tofiga. O le a saoloto o ia mai le nofosala i le toto, pe afai e tau lava o le lotomalie ma lototele e tautala atu i afioga a Ieova. Na faatonuina Esekielu: “Afai e te apoapoai atu i le ua amio leaga, a e le liliu ese o ia i lana amio leaga ma lona ala leaga, e oti o ia i lana amioletonu; a o oe, ua laveaiina oe ia te oe.”—Esekielu 3:19.
10. Ua faamaonia faapefea e le vasega a Esekielu le pei o le perofeta?
10 E pei o le tulaga o Esekielu, ua talia ai e le vasega faauuina a Esekielu lo latou tofiga mai le Atua ma ua faataunuuina. Afai o i tatou o ni Molimau a Ieova, e ao ona tatou manatua e faalagolago o tatou ola ma ola o isi i lo tatou usiusitai. (1 Timoteo 4:15, 16) E manaomia i Molimau taitoatasi ona savavali faatasi ma le faalapotopotoga a Ieova. O le a lē noanoaina i tatou e le Atua i lana kariota ma toso atu ai i tatou. O le masalosalo ma le loto faaafaafa e faaletaualoa ai le Tietie Kariota. O lea ua apoapoai mai ai le faalapotopotoga vaaia a Ieova ia i tatou ia tausia faanaunauga tauatua i le ogatotonu o o tatou olaga. O le tali atu e lē aunoa i sea apoapoaiga o le a tatou laalaa faatasi ai pea ma le faalapotopotoga a le Atua ma siitia ai i luga la tatou faiva paia mai le masani, o le tau ina fai. E mautinoa, i se atoaga ua faaalia ai e tagata o Ieova le tuutoina iloga. O la tatou vaega taitoatasi la ia tumau ona savavali faatasi.
Ave i Fale Afioga a le Atua
11. O le ā le faaaʻoaʻoga sa faataatia e Esekielu e uiga i afioga a le Atua?
11 Ua faataatia foi e Esekielu se faaaʻoaʻoga lelei i le aveina i fale o afioga a le Atua i lona loto. Ona o le poloaiga, na ia ʻaia ai le tusi, po o le tusi taai mai le Atua. “Ua suamalie i loʻu gutu e pei o le meli,” o le tala lea a Esekielu. E ui ina tumu le tusi i “auega, ma faanoanoaga, ma lauaitu,” ae na suamalie ia Esekielu ona sa ia sapaitalia le faaaloaloga o le fai ma sui o Ieova. Sa o se mea suamalie i le perofeta le faataunuuina o lona tofiga mai le Atua.[1] Na fetalai le Atua ia te ia: “Le atalii e o le tagata, o aʻu upu uma ou te fai atu ai ia te oe, ia talia i lou loto, ma faalogo ai ou taliga.” (Esekielu 2:9–3:3, 10) O na vaaiga sa matuā amanaia ai e Esekielu le mea na faataga atu e le Atua ia te ia e auai ma faamalosia ai lana faiā ma Ieova.
12. O le ā na faia e Esekielu i le silia i le lua sefulu tausaga o le auaunaga faaperofeta?
12 O vaaiga ma feau sa tuu atu ia Esekielu e mo fuafuaga ma aofia eseese. Sa tatau ona ia faalogo ma le faaeteete ona tautala ai lea ma gaoioi e pei ona faatonuina. Na faaalia faasolosolo mai ia te ia faamatalaga fou ma feuiuiaiga i nai tausaga e 22 o lana auaunaga faaperofeta.[2, 3, 4] I nisi taimi na tautala atu ai Esekielu i se feau sa faapitoa ona faaupuina. O isi taimi, na te faia ai ni gaoioiga lēleoa, e pei o le taoto i luma o se maaomea e faatusa i ai Ierusalema. (Esekielu 4:1-8) O lana faaaʻoaʻoga i mataupu totino, e pei o lona lagona ina ua maliu lana avā, sa tauaveina ai foi se feau. (Esekielu 24:15-19) Sa tatau ona ia faamalosi, e taulimaina pea le feau saʻo ma faia le gaoioiga tonu i le taimi tatau. Na noanoatia Esekielu i se faiā matuā vavalalata, o galuega faasolosolo ma Ieova.
13. E mafai faapefea ona tatou atiina aʻe se faiā vavalalata ma Ieova?
13 E faapena foi, ina ia atiina aʻe ma faatumauina se faiā vavalalata ma Ieova o ni ana aumea faigaluega, e tatau ona tatou ave i fale i o tatou loto le Afioga a le Atua. (1 Korinito 3:9) O le savavali faatasi ma le faalapotopotoga vaaia a le Atua i lenei itu, e manaomia ai ona tatou tausisi i le tafega o meaʻai faaleagaga a o faasoasoaina mai i le taimi tatau. (Mataio 24:45-47) O loo faalauteleina pea le “gagana mamā.” (Sefanaia 3:9, NW) Seʻi vagana ua tatou tausisi i ai ona mafai moni lea ona tatou tali atu ma le usiusitai i le taʻitaʻiga a le Tietie Kariota.
14, 15. O le ā le masani e manaomia e tausia ai le savavali faatasi ua faataatia e le faalapotopotoga a le Atua?
14 O lea la, tatou te manaomia ai se masani lelei o le tatalo totino, suesuega patino, ma auai i le faiva paia o le tala lelei. (Roma 15:16) Manatua le faaaʻoaʻoga a Esekielu i le ʻaina o le tusi taai o loo iai le feau a le Atua. Sa ʻaina e Esekielu le tusi taai atoa, ae lē na o sona vaega. Na te leʻi auauina ma filifilia ni mea atonu e sili ona lelei i lana tofo. I se tulaga tutusa, e ao ona pulea la tatou suesuega totino o le Afioga a le Atua ma lomiga faa-Kerisiano ia ō faatasi ma tafega o meaʻai faaleagaga, ma e ao ona tatou tagofiaina mea uma ua laulauina i le laʻoai faaleagaga, e aofia ai upu moni loloto.
15 Pe tatou te faia se taumafaiga ma tatalo ia maua le uiga o meaʻai aano? O le savavali faatasi e manaomia ai ona faasolosolo lo tatou poto ma le malamalama i tala atu o manatu faavae, auā ua tatou faitau ai: “O i latou uma ua faasusuina i le sua susu, e le atamamai i latou i le upu o le amiotonu; auā o tama meamea i latou; a o mea aano, mā e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga.” (Eperu 5:13, 14) Ioe, o le agaʻigaʻi i luma faaleagaga o se vaega matuā tāua o le savavali faatasi ua faataatia mai e le faalapotopotoga a le Atua.
Aua Neʻi Taofia e le Faaleogalua
16, 17. Sa faapefea ona feagai Esekielu ma le faaleogalua, tauemuga ma le lē talilelei mai?
16 Ua faataatia foi e Esekielu se faaaʻoaʻoga lelei e ala i le usiusitai ma le lē faatagaina o ia lava e taofia e le faaleogalua po o tauemuga. E faapena foi, e ala i le ō faatasi ma taualumaga o le gagana mamā, tatou te tausisi atu ai i le taʻitaʻiga o loo tauaaoina e le Tietie Kariota tautupu. O lea ua faaauupegaina ai i tatou e tali atu i ana poloaiga, ma faamalosia ai ia aua neʻi taofia e le faaleogalua po o tauemuga a i latou o ē tatou te faaoo atu i ai le feau faafaamasinoga a Ieova. E pei o le tulaga o Esekielu, ua muai lapataia i tatou e le Atua faapea o le a soona tetee mai nisi tagata, e faaulu malō ma lotomaʻaa. O le a faataliga tutuli isi ona latou te lē mananao e faalogo ia Ieova. (Esekielu 3:7-9) O isi foi o le a faagutugutulua pea, e pei ona taʻua i le Esekielu 33:31, 32: “Latou te o mai foi ia te oe pei ona o mai o loʻu nuu, latou te nonofo foi i ou luma e pei o loʻu nuu, latou te faalogologo foi i au upu, a e latou te le mafafai ona anaana i ai; auā ua latou alolofa fua i o latou gutu, a ua mafuli o latou loto i lo latou manumanu. Faauta foi, ua tusa oe ia te i latou ma se pese mālie a le ua leo mālie, ma lē ta mālie i le laaupese; auā latou te faalogologo i au upu, a e latou te le anaana i ai.”
17 O le ā o le a iʻu i ai? Ua faaopoopo mai le fuaiupu e 33: “A taunuu lea mea, faauta e taunuu lava, ona latou iloa ai lea sa i ai le perofeta ia te i latou.” Ua faaalia i na upu sa leʻi faavaivai Esekielu ona o le lē talilelei mai. E leʻi avea le faapalapala o isi ma mea e faatalalē ai o ia. Pe na faalogo tagata pe leai, ae sa ia usiusitai pea i le Atua ma faataunuu lona tofiga.
18. O ā fesili e te ono fesili ane ai ia te oe lava?
18 Ua faamalosia nei e le faalapotopotoga vaaia a Ieova le folafolaga faapea e ao i tagata uma ona matataʻu i le Atua ma avatu ia te ia le viiga. Pe e te finafinau pe a faitioina mo le tu malosi e avatu se molimau o le Malo, ona e mamā tau amio le ala o lou olaga? O e tu mausalī ea pe a avea oe ma taulaʻiga o omiga ona o le lē talia o le toto, le lē tapuai i faatusa faaleatunuu, ma le lē faamanatuina o aso malōlō faalelalolagi?—Mataio 5:11, 12; 1 Peteru 4:4, 5.
19. E tusa ma le taʻitaʻiga, o le ā o le a tatou faia pe afai o loo tatou savavali faatasi ma le kariota faalelagi a Ieova?
19 E lē faigofie lenei ala, ae o i latou e tumau seia oo i le iʻuga o le a faasaoina. (Mataio 24:13) Faatasi ma le fesoasoani a Ieova, o le a tatou lē faatagaina ai tagata o le lalolagi e faia i tatou e pei o i latou ma aveesea ai i tatou mai le ō faatasi ma le kariota faalelagi a Ieova. (Esekielu 2:8; Roma 12:21) Afai tatou te savavali faatasi ma le faalapotopotoga faaagelu e pei se kariota, o le a vave la ona tatou gauai atu i le taʻitaʻiga ma faatonuga e maua mai e ala i le faalapotopotoga vaaia a le Atua. Ua saunia e Ieova mea tatou te manaomia e faafetaiaʻia ai osofaiga i lo tatou faatuatua, e tatou te uu mau ai le Upu o le ola, ma taulaʻi atu ai pea la tatou vaai i mea moni faaleagaga o loo faaautū i le Tietie Tautupu o le kariota faalelagi.
Uunaia e Savavali Faatasi
20. O ā nisi mea sa faamauina e Esekielu e ao ona uunaia ai i tatou e savavali faatasi?
20 O mea na vaaia e Esekielu e ao ona uunaia ai i tatou e savavali faatasi. E lē gata sa ia faalauiloa faamasinoga a le Atua ia Isaraelu ae na ia faamauina foi valoaga mo le toe faafoisiaina. Na faasino atu e Esekielu i Lē o le a iai le aiā faaletulafono e pule ai i le nofoalii o Ieova i le taimi atofaina. (Esekielu 21:27) O lena Auauna Tautupu, o “Tavita,” o le a toe aoaoina tagata o le Atua ma leoleoina i latou. (Esekielu 34:23, 24) E ui o le a osofaia e Koku o Makoku, ae o le a laveaʻia i latou e le Atua, ma o le a faamalosia Ona fili ia ‘iloa Ieova’ a o latou ō atu i le faaumatiaga. (Esekielu 38:8-12; 39:4, 7) Ona olioli ai lea o auauna a le Atua i le ola e lē uma i se faiga o mea e iai le tapuaiga mamā e aofia ai se malumalu faaleagaga. O le a avea vai e tafe mai le malumalu o se puna o le faafouina ma faamalōlōga, ma se fanua e maua o le a vaevaeina mo lo latou faamanuiaga.—Esekielu 40:2; 47:9, 12, 21.
21. Aiseā ua sili atu ai le matafaioi a Molimau faaonaponei a Ieova na i lo Esekielu?
21 Maeu se faamaniti tino ia Esekielu o le faamauina o na valoaga! E ui i lea, e sili atu ai le matafaioi a Molimau faaonaponei a Ieova. O loo tatou ola i le taimi ua faataunuuina ai nisi o na valoaga. O le mea moni, o i tatou o ni ē auai ma le tiotio i nisi o na faataunuuga. I le auala o loo tatou ola ai, pe o tatou taitoatasi ma faaalia ai lo tatou talitonuga faapea o loo pule nei Iesu o Lē ua iai le aiā faaletulafono? Pe tatou te talitonu totino faapea ua toeitiiti ona faapaiaina lea e Ieova o ia lava ma faasaoina atu ai i lana faiga fou i latou o ē savavali faatasi ma lana faalapotopotoga? (2 Peteru 3:13) O sea talitonuga, ua vaavaalua ma galuega o le faatuatua, e faaalia ai e moni o loo tatou savavali faatasi ma le kariota faalelagi a Ieova.
Faaauau ona Savavali Faatasi
22. O le ā e mafai ona faia e alofia ai faatosinaga ina ia faatumauina se vaaiga manino faaleagaga?
22 Ona ua ‘tago o tatou lima i le suotosina,’ e lē tatau la ona tatou toe tepa i tua ma moomoo i so o se mea e ofo mai e le lalolagi. (Luka 9:62; 17:32; Tito 2:11-13) O lea seʻi o tatou faamuta ia so o se faanaunauga e faaputuina ʻoa o le lalolagi, ae inā faafaigofie ia la tatou vaai, ia taulaʻi atu i le Malo. (Mataio 6:19-22, 33) O le faafaigofie o o tatou olaga, le lafoaia o avega mamafa i mea uma e mafai ai, o le a fesoasoani lea ia i tatou e savavali faatasi ma le faalapotopotoga a Ieova. (Eperu 12:1-3) E mafai i faatosinaga ona puaoa ai la tatou vaai i le kariota faalelagi ma Lē o loo tietie ai. Ae faatasi ma lana fesoasoani, e mafai ai ona tatou faatumauina se vaaiga manino faaleagaga, e pei o Esekielu.
23. O le ā e manaomia ona faia e Molimau faamaoni mo ē fou?
23 O se vaega o la tatou avega tauave o ni Molimau a Ieova e aofia ai le fesoasoani i le toatele o ē fou ia savavali faatasi ma le kariota faalelagi a le Atua. I le 1990 toeitiiti lava 10,000,000 na auai i le Faamanatuga o le maliu o Iesu Keriso. A o mafai ona auai le toatele o ia tagata i nai sauniga Kerisiano, e manaomia ona latou iloa le tāua o le agaʻigaʻi i luma ma le faalapotopotoga vaaia a Ieova. I le avea ma Molimau faamaoni, e mafai ona tatou fesoasoani ia i latou, i le agaga tatou te faaalia ma faalaeiauga tatou te avatua.
24. O le ā e ao ona tatou faia i nei taimi faaiʻuiʻu?
24 O taimi faaiʻuiʻu nei. Faatasi ma mata o le faatuatua, ua tatou vaaia ai le tu mai o le kariota faalelagi i o tatou luma. Ua tuuina mai e le Tietie Kariota mamalu i lana faalapotopotoga se tofiga e talaʻi atu i atunuu uma, ina ia oo ane ai i le faaiʻuga, ae ua latou iloa po o ai Ieova. (Esekielu 39:7) Ia matuā faaaogā lenei avanoa tele e auai i le taʻumamāina o le silisiliese o le Atua ma le faapaiaina o lona suafa paia e ala i le savavali faatasi ma le kariota faalelagi a Ieova.
O le a Faapefea ona E Tali?
□ O le ā le faaaʻoaʻoga na faataatia e Esekielu e tusa ma lona tofiga?
□ O le ā le uiga o le savavali faatasi ma le faalapotopotoga a le Atua?
□ Na faapefea ona tagaʻi Esekielu i afioga a Ieova?
□ E mafai faapefea ona tatou mulimuli i le faaaʻoaʻoga a Esekielu i le feagai ai ma le faaleogalua?
□ O le ā e ao ona uunaia ai auauna a Ieova ia savavali faatasi ma lana kariota faalelagi?
[Fesili mo le Suʻesuʻega]
[Ata i le itulau 17]
O le ā e manaomia ina ia savavali faatasi ai ma le kariota faalelagi a Ieova?
[Ata i le itulau 18]
Na sapaitalia e Esekielu ona faaeaga mai le Atua. Ae ā oe?