Taʻutinoga o Agasala—I le Auala a le Tagata po o le Atua?

I TAGATA Katoliko, ua matuā mataʻina lava le suiga ua iai le faia o le taʻutinoga i le faagasologa o senituri. I uluai tausaga o le Lotu Katoliko, o le taʻutino o agasala ma le faasalaina, na o agasala matuiā sa manaomia ai. E faatatau i lenei mea, ua faapea mai le tusi Religion in the Medieval West: “Sa matuā sauā lava le faia o faasalaga seia oo mai i le tau faaiʻuiʻuga o lona ono o senituri: e mafai ona tuuina atu le sakalameta e na o le faatasi lava i le olaga o se tagata, o le taʻutinoga sa faia i se tulaga lautele, o le faasalaga sa umi ma ogoogo.”

O le ā le ogoogo o lena faasalaga? O se tagata agasala na faaalia le salamō i le 1052, sa manaomia ona savali e leai ni seevae i le auala mai lava i Bruges i Peleseuma e oo atu i Ierusalema! “Sa mafai pea ona maua tagata Katoliko i vaieli ma vaipuna paia i le tausaga e 1700, o loo tootutuli i totonu o le vai aisa malūlū ua oo i o latou ua, e fai atu tatalo e faaalia ai lo latou salamō i o latou faasalaga,” ua fai mai ai le tusi Christianity in the West 1400-1700. Talu mai lena taimi sa taofia le faamagaloina o agasala seia oo ina mavae le faataunuuina o le faasalaga, ma e toatele na tolopo le faia o a latou taʻutinoga seia oo lava ina tāli oti.

O anafea na amata ai le faiga faaonaponei o taʻutinoga? Ua taʻua e le Religion in the Medieval West e faapea: “Sa faaofi atu i Falani se faiga fou o faasalaga e faaalia ai le salamō i le faaiʻuga o lona ono o senituri e monike o le ituaiga Celtic. . . . O lenei taʻutinoga tuutaliga, lea e taʻutino atu ai e le tagata ua salamō ana agasala pe a na o i laua ma le patele, ma sa o se mea faaopoopo o faiga faamonaseri e avatu ai fautuaga faaleagaga.” E tusa ai ma faiga tuai faamonaseri, e taʻu atu ai e le tasi monike ana agasala i le isi ina ia maua le fesoasoani  faaleagaga e mafai ai ona manumalo i o latou vaivaiga. Ae peitai, i le faiga fou e tuutaliga le faia o taʻutinoga, e tāpa ai e le lotu mai le patele le matuā tele o “le mana po o le pule e faamagalo ai agasala.”—New Catholic Encyclopedia.

Pe sa avatu moni e Iesu i nisi o ona soʻo lena pule? O le ā na ia fetalai i ai na taʻitaʻiina atu ai nisi e faia lenei faaiʻuga?

“Ki o le Malo”

I se tasi taimi, na taʻu atu ai e Iesu Keriso i le aposetolo o Peteru: “Ou te avatu ia te oe ki o le malo o le lagi: so o se mea e te fusifusia i le lalolagi ua fusifusia lava lea i le lagi; so o se mea e te tatalaina i le lalolagi ua tatalaina lava lea i le lagi.” (Mataio 16:19, The Jerusalem Bible) O le ā sa faauiga i ai e Iesu “ki o le malo”? E mafai ona tatou malamalama lelei i lenei mea pe afai tatou te vaavaai i se tasi o mea na tupu sa faaaogā ai e Iesu le upu “ki.”

Na taʻu atu e Iesu i se isi taimi i taʻitaʻi lotu Iutaia e popoto i le Tulafono a Mose e faapea: “Oi talofa ia te outou alii loia o ē ua aveesea le ki o le malamalama! Auā tou te leʻi ulu atu i ai outou lava, ma ua outou pupuni foi isi o ē mananao ina ia ulu atu i ai.” (Luka 11:52, JB) ‘Pupuni isi mai le ulu atu’ i fea? Ua taʻu mai e Iesu ia i tatou i le Mataio 23:13: “Oi talofa ia te outou tusiupu ma Faresaio, tagata pepelo! Ua outou pupuni le malo o le lagi mai mata o tagata, auā tou te lē ulu atu i ai outou, ua outou taofia foi isi o ē fia ulu atu i ai ina ia lē ulu atu i ai.” (JB) Ua tapuni e taʻitaʻi lotu Iutaia le faitotoa i le toatele, e pei ona latou faia, e ala i le faoa mai ia i latou o le avanoa e faatasi atu ai ma Iesu Keriso i le lagi. O le “ki” ua “aveesea” e na taʻitaʻi lotu e leai lava se fesootaiga ma le faamagaloina o agasala. O le ki lea i le poto ua saunia tauatua.

E faapena foi i “ki o le malo o le lagi” na tuuina atu ia Peteru, ona lē fai ma sui o le mana e logo ai i le lagi po o agasala a ai e ao ona faamagaloina pe taofia. Ae na i lo lea, ua fai lena ma sui o le faaeaga sili o Peteru o le tatalaina o le ala i le lagi e ala i le faasalalauina atu o le poto ua saunia tauatua e ala i lana faiva. Sa ia faia muamua lenei mea mo tagata Iutaia ma tagata Iutaia ua faaliliuina, ona oo atu ai lea i tagata Samaria, ma mulimuli ane o Nuuese.—Galuega 2:1-41; 8:14-17; 10:1-48.

“So o se Mea E te Fusifusia i le Lalolagi”

Mulimuli ane, sa toe taʻu atu e Iesu i isi soʻo le mea na ia taʻu atu ia Peteru. “E moni, ou te fai atu ia te outou,” na fetalai ai Iesu, “so o se mea tou te fusifusia i le lalolagi ua fusifusia lava lea i le lagi; so o se mea tou te tatalaina i le lalolagi ua tatalaina lava lea i le lagi.” (Mataio 18:18, JB) O le ā le pule lea na tofia atu e Keriso i le au soʻo? Ua faaalia i faamatalaga o loo siosiomia ai e faapea, sa ia fetalai e uiga i le faaleleia o faafitauli i le va o tagata talitonu taitoatasi ma tausia ai le mamā o le faapotopotoga mai tagata fai mea leaga lē salamō.—Mataio 18:15-17.

I mataupu e aafia ai le matuā solia o tulafono a le Atua, o tane ua tatau ai i le faapotopotoga o le a latou faia le faamasinoga o mataupu ma filifili pe ua tatau ona “fusifusia” (manatu ua agasala) pe “tatalaina” (e lē agasala). Pe o le uiga o lenei mea faapea o le a mulimuli le lagi i filifiliga a tagata? E leai. E pei ona faaalia e se tagata aʻoga o le Tusi Paia o Robert Young faapea, so o se filifiliga sa faia e le au soʻo o le a mulimuli atu i le faaiʻuga ua faia i le lagi, ae lē o le muamua i lea. Ua faapea mai o ia ia faitau le fuaiupu e 18 i le uiga faaletino e faapea: O mea e te fusifusia i le lalolagi “e tatau o mea foi na ua (uma) ona fusifusia” i le lagi.

E moni lava, e lē o se mea tatau ona manatu faapea e mafai e so o se tagata lē lelei atoatoa ona faia filifiliga na o le a fusifusia ai i latou i lotoā faalelagi. O se mea e sili ona tatau le faapea sa tofia e Keriso sui o ē o le a mulimuli i lana faatonutonuga ina ia tausia ai le mamā o lana faapotopotoga. O le a latou faatinoina lenei mea e ala i le faia o se filifiliga e faavae i mataupu silisili na ua uma ona faataatia i le lagi. O Iesu lava ia o le a na taʻitaʻiina i latou i le faia o lenei mea.—Mataio 18:20.

Pe iai se tagata e mafai ona ia “suia Keriso i le avea o le faamasino faatamā” e oo atu i le tulaga o le filifilia o le lumanai e faavavau o se uso tapuai? (New Catholic Encyclopedia) O patele o ē faalogo i taʻutinoga e toetoe lava tuuina atu le faamagaloga atoatoa e aunoa ma le faia o se faaeseesega, e ui lava “o loo iai se mea e foliga mai o se talitonuga e lē o mafai ona talanoaina [e aʻoaʻo Katoliko] faapea e toaitiiti tagata ua salamō moni i a latou agasala.” (The New Encyclopædia Britannica) O  anafea moni lava le taimi mulimuli na e faalogo ai i se patele o musu e tuuina atu le faamagaloga o agasala pe fai atu i se tagata fai mea sese ua magalo ana agasala? Atonu ona e lē o manatu le patele faapea o loo ia te ia le tomai e faamasino ai pe ua salamō pe leai le tagata agasala. Ae afai o lea le tulaga, aiseā ua ia taofi ai faapea ua ia te ia le pule e faamagalo ai agasala?

Seʻi vaai faalemafaufau i se fale faamasino o loo fai ai ma masani a se faamasino agaalofa ona faamagalo pagota, e oo lava i tagata e solia pea le tulafono, ona sa latou uia se faiga e taʻutino ai a latou solitulafono ma faapea atu ua latou salamō. A o atonu e faamalieina ai tagata fai mea sese i lenei tulaga, ae o lea manatu e ono taʻitaʻiseseina o le alofa tunoa, o le a matuā ōia ai le faaaloalo mo le faamasinoga tonu. Pe faamata o le taʻutinoga e pei ona faia e le Lotu Katoliko ua faamaʻaa moni ai loto o tagata i le faia o le agasala?—Failauga 8:11.

“O le taʻutino o agasala po o le faia o taʻutinoga e lē aumaia ai se faanaunauga ina ia taumafai e aloese mai le faia o le agasala i le lumanai,” ua fai mai ai Ramona, i le utufia mai i le mea na tupu ia te ia o le taʻutino atu o agasala i le avea o se Katoliko a o fitu tausaga lona matua. Ua ia faaopoopo mai: “O le taʻutino o agasala e faatupuina ai le manatu faapea e matuā faamagaloina e le Atua agasala uma lava, ma po o ā lava mea e taʻitaʻiina i ai oe e lou tino le lelei atoatoa e faia, o le a ia faamagaloina lava oe. E lē faatupuina ai i lea mea se faanaunauga e faia le mea ua tonu.” *

Ae faapefea upu a Iesu o loo faamauina i le Ioane 20:22, 23? I inā na ia taʻu atu ai i ona soʻo: “Ia outou talia le Agaga Paia. O i latou tou te faamagaloina i ai a latou agasala, e faamagaloina i latou; a o i latou tou te tuu pea i ai a latou agasala, e tuu pea lava ia i latou.” (JB) Pe lē o tuuina atu ea faapitoa e Iesu i inei le pule i ona soʻo e faamagalo ai agasala?

E foliga mai, ua na o lenei le mau i le Tusi Paia ua fai mai faapena. Ae peitai, pe a manatunatu i nei upu faatasi ma le faamatalaga i le Mataio 18:15-18 ma isi mea uma ua aʻoaʻoina e le Tusi Paia e uiga i le taʻutino o agasala ma le faamagaloina, o le ā sa tatou faaiʻuga e tatau ona fai? E faapea, i le Ioane 20:22, 23, na tuuina atu ai e Iesu i ona soʻo le pule e faateʻaese ai mai le faapotopotoga tagata e faia pea le agasala ma le lē salamō ma tagata e faia agasala matuiā. I le taimi lava e tasi, na tuuina atu ai e Keriso i ona soʻo le pule e faalautele atu ai le alofa tunoa ma faamagalo tagata agasala ua salamō. E mautinoa lava e leʻi fetalai Iesu faapea e ao i ona soʻo ona faailoa atu agasala uma lava i se patele.

O i latou ua tatau ai i le faapotopotoga sa faapea ona tuuina i ai le pule e filifilia se auala e feutagaʻi ai ma i latou ua faia agasala matuiā. O na filifiliga o le a faia i lalo o le taʻitaʻiga a le agaga paia o le Atua ma ia ōgatasi ma faasinoga a le Atua na tuuina mai e ala ia Iesu Keriso ma le Tusi Paia. (Faatusatusa Galuega 5:1-5; 1 Korinito 5:1-5, 11-13.) O le mea lea, o na tane ua tatau ai o le a tali atu i le taʻitaʻiga mai le lagi, ae lē o le faailoa atu o a latou filifiliga i le lagi.

“Ia Fefaaaliaʻi a Outou Agasala”

O lea la, o afea ua alagātatau ai mo Kerisiano ona fefaaaliaʻi a latou agasala? E tusa ai ma se agasala matuiā (e lē o nai masei laiti uma), e ao ai i se tagata ona faaali atu i ovasia ua tatau ai i le faapotopotoga. E tusa lava pe lē mataʻutia le agasala ae afai o faalavelavea ai pea le loto fuatiaifo o lē o faia le agasala, e matuā tāua tele la le faaali ma saili le fesoasoani faaleagaga.

Ua faapea mai le tusitala o le Tusi Paia o Iakopo e tusa ai o lenei mea: “Afai ua maʻi [faaleagaga] so outou, e ao ona aami atu i toeaina o le ekalesia, ma e tatau ona latou faauu ia te ia i le suauu i le suafa o le Alii ma tatalo mo ia. O le tatalo e faia ma le faatuatua o le a faasaoina ai le tagata maʻi ma o le a toe faatuina o ia e le Alii; ma afai sa ia faia ni agasala, o le a faamagaloina o ia. O lea, ia fefaaaliaʻi a outou agasala ma tatalo le tasi mo le isi.”—Iakopo 5:14-16, JB.

E leai se fautuaga o se taʻutinoga fuafuaina, faiga faalotu, po se taʻutinoga tuutaliga i nei upu. Na i lo lea, afai ua matuā mafatia se Kerisiano i se agasala na te lagona ua lē mafai ai ona ia tatalo, e ao ona ia valaau i toeaina tofia, po o ovasia, o le faapotopotoga, ma o le a latou tatalo faatasi ma ia. Ina ia fesoasoani ia  te ia ia toe malosi faaleagaga, o le a latou faatatauina foi le suauu o le Afioga a le Atua.—Salamo 141:5; faatusatusa le Luka 5:31, 32; Faaaliga 3:18.

E aogā foi ona matau le apoapoaiga a Ioane le Papatiso ina ia “fua mai ni fua e tatau ma le salamo.” (Mataio 3:8; faatusatusa le Galuega 26:20.) O se tagata fai mea sese ua salamō moni, na te lafoai lona ala agasala. I le pei o le Tupu o Tavita o Isaraelu anamua, o le tagata agasala salamō o lē ua taʻutino lona sese i le Atua o le a maua lona faamagaloga. Na tusi Tavita: “Ona ou faailoa atu ai lea ia te oe o laʻu agasala, na ou le ufitia foi laʻu amioletonu; sa ou faapea, Ou te faaali atu ia Ieova oʻu solitulafono; ona e aveesea ai lea o le leaga o laʻu agasala.”—Salamo 32:5.

O le faia o faasalaga ina ia faaalia ai le salamō e lē mafai ona maua ai lena faamagaloga. E na o le Atua e mafai ona tuuina mai. E tāpa e ia mea manaomia mo le faamasinoga tonu atoatoa, ae o lana faamagaloga e faaalia ai lona alofa mo le fanau a tagata. O lana faamagaloga o le faaalia foi lea o le alofa tunoa na faavae i le taulaga togiola a Iesu Keriso, ma ua faalauteleina atu i na o tagata agasala salamō o ē ua liliuese mai le mea ua leaga i le silafaga a le Atua. (Salamo 51:7; Isaia 1:18; Ioane 3:16; Roma 3:23-26) E na o i latou ua faamagaloina e Ieova le Atua o le a maua le ola e faavavau. Ma ina ia maua lea faamagaloga, e tatau ona tatou faia le taʻutinoga i le auala a le Atua, ae lē o le auala a tagata.

[Faaopoopoga i lalo]

[Ata i le itulau 7]

Sa taʻutino e Tavita ana agasala ia Ieova, o lē na faamagaloina