Taʻutinoga o Agasala—Pe Iai se Mea Sese?

“O LE taʻutino o agasala o se faamamāina faaleagaga, o se auala e toe fuataʻi ai, o se auala e faamamā ai le olaga. Ou te fiafia tele e alu i le Kofesio, e taʻu atu i le patele aʻu agasala, na te faamagaloina ai aʻu atoa ma se faalogona fiafia e mulimuli mai ai.” Ua faapena ona fai mai ai se tasi tagata Katoliko tuutoina.—Bless Me, Father, for I Have Sinned (Tamā e, ia E Faamanuia mai Aʻu, auā ua Ou Agasala).

E tusa ma le faamatalaga a le New Catholic Encyclopedia e faapea, “e na o patele lava na tuuina atu pe na tofia i ai e Keriso le pule e fusifusia ma tatalaina ai, le faamagaloina ma le taofia” o agasala. Ua fai mai lea lava tusi faamaumau e faapea o le uiga o le faia e lē aunoa o kofesio po o le taʻutino o agasala, o le “toe faafoisia mai lea o le paia o le ola na leiloa ona o le mataʻutia o le agasala ma . . . ia faamamāina ai le loto fuatiaifo o se tasi.” Peitai, o le tulaga tau amio i le tele o atunuu, ua faaalia ai faapea o le faia e lē aunoa o taʻutinoga e lē o faapogaia ai le toatele o ē o latou faia lea mea e “alo ese ia i mea leaga, a ia fai mea lelei.” (Salamo 34:14) O lea, pe o iai se mea ua sese?

Pe ua Na o se Tu Masani Faalotu?

O le taʻutino o agasala atonu e amata i le na o se aganuu faalotu. I Aialani, e vave lava ona faia le uluai taʻutinoga a o leʻi faia le uluai Komenio. Ma pe lē o se mea e ofo ai ona o se teineitiiti e fitu ona tausaga, o le a sili atu ona manatu mamafa e uiga i le ofu manaia pei se tamai ofu faaipoipo o le a ia ofuina, na i lo le mafaufau i le ‘toe faafoisia mai o le paia o le ola lea na leiloa ona o le mataʻutia o le agasala’?

“O le mea aupito sili sa faafiafiaina ai aʻu o le ofu, e ese ai mai le maua mai o tupe mai oʻu aiga,” ua fai mai ai Ramona, o lē na faia lana uluai taʻutinoga ina ua fitu ona tausaga. Ua ia faaauau mai: “I teine uma lava na ou iloa, sa leai lava se faalogona faaleagaga. E leai lava se tasi o i matou na mafaufau e uiga i le Atua i lena taimi.”

O le mea moni, o le faatonuina o tamaiti talavou e taʻutino atu agasala e lē aunoa, ua mafai ona taʻitaʻiina ai i le fai ma masani e aʻoaʻo faatauloto e pei o se masini. “E na ona ou faia ma toe faia pea lava upu masani,” ua fai mai ai Mikaele, o lē sa amata foi ona ia faataʻitaʻia le faia o le taʻutinoga ina ua fitu ona tausaga.

Ua faaalia i faamatalaga a ni tagata Katoliko o loo sii mai i le tusi Bless Me, Father, for  I Have Sinned le itiiti o le tāua faaleagaga o le taʻutinoga mo i latou e oo lava i le taimi ina ua matutua. “O le kofesio e aʻoaʻo ai oe ina ia e faia le pepelo, auā o loo iai nisi mea e te lē mafai ona e manao e taʻu atu i le patele,” na ioe mai ai se tasi tagata. O le lē mafai ona tutusa o patele lava latou atonu ua faia ai faasalaga mo sina taimi itiiti. O nisi ua saili mo se tagata “lelei” e taʻu atu i ai a latou agasala ina ia mafai ai ona maua le fautuaga latou te fia faalogo i ai. “Ina ua uma ona ou saili solo mo le tolu masina, sa ou maua ai loa lē e mafai ona taʻu atu i ai aʻu agasala. Ou te alu lava e vaai o ia i masina uma, ma te faafesagaʻi lava i le potu o le leleiga, ma e ese lona lelei,” na fai mai ai se tasi teine talavou. “Afai sa o oe o se tagata poto, e te maua se patele tutuli ma e lē mafai ona tautala i le gagana faa-Peretania seʻi vagana ai upu ‘three Hail Marys,’” na fai mai ai se tasi Katoliko.

O lea, e foliga mai e iai se mea ua sese i le taʻutinoga e pei ona faia ai e nisi tagata. Ae ua faaalia mai e le Tusi Paia faapea o loo iai se manaoga ina ia faaalia pe ia taʻutino agasala, auā o loo faapea mai: “E leai se tasi o lē na te ufiufi ana agasala e manuia, a o lē na te taʻutino ma lafoaiina, na te maua le alofa tunoa.”—Faataoto 28:13, The New Jerusalem Bible.

Pe o le uiga o lenei mea faapea e ao i se Kerisiano ona taʻutino ana agasala uma? Afai o lea, ia te ai? O le a iloiloina nei fesili i le isi mataupu o sosoo mai.